ກອງທັບປະຊາຊົນລາວ

ວັນພະຫັດ, ວັນທີ 28 ຕຸລາ 2021



ພິທີມອບ-ຮັບ ອູ່ສ້ອມແປງລົດລະຫວ່າງ ກົມໃຫຍ່ເຕັກນິກ ແລະ ບໍລິສັດ ລາວີນາໂກ້ 36 ຈໍາກັດ
ເວລາອອກຂ່າວ: 2021-09-21 12:19:28 | ຜູ້ຂຽນ : admin1 | ຈຳນວນຄົນເຂົ້າຊົມ: 108 | ຄວາມນິຍົມ:



ວັນທີ 17 ກັນຍາ 2021 ກົມໃຫຍ່ເຕັກນິກກອງທັບ ຈັດຕັ້ງພິທີ ມອບຮັບ ອູ່ສ້ອມແປງລົດລະຫວ່າງ ກົມໃຫຍ່ເຕັກນິກ ແລະ ບໍລິສັດ ລາວີນາໂກ້ 36 ຈໍາກັດ, ຂຶ້ນຢູ່ທີ່ໂຮງງານມິດຕະພາບລາວ-ຫວຽດນາມ, ໂດຍການເຂົ້າຮ່ວມໂດຍສະຫາຍ ພົນຈັດຕະວາ ທອງພັນ ສຸທໍາມະວົງ ຮອງຫົວໜ້າກົມໃຫຍ່ເຕັກນິກກອງທັບ ພ້ອມດ້ວຍຄະນະ, ມີຄະນະອໍານວຍການບໍລິສັດລາວີນາໂກ້ 36 ຈໍາກັດ, ຄະນະກົມ, ຄະນະຫ້ອງ, ຄະນະພັກ-ຄະນະບັນຊາໂຮງງານຕະຫຼອດຮອດພະນັກງານຫຼັກແຫຼ່ງເຂົ້າຮ່ວມ. ໃນພິທີ ສະຫາຍ ພັນໂທ ສີສຸກ ພົມມະຈັນ, ຫົວໜ້າພະແນກກໍ່ສ້າງ-ຄຸ້ມຄອງຊັບສິນ, ໄດ້ຂຶ້ນລາຍງານຜົນສໍາເລັດໂຄງການກໍ່ສ້າງ ອູ່ສ້ອມແປງລົດ ໂດຍປະຕິບັດຕາມອານຸສັນຍາຊ່ວຍເຫຼືອ ລະຫວ່າງ ກະຊວງປ້ອງກັນປະເທດແຫ່ງ ສປປ ລາວ ແລະ ກະຊວງປ້ອງກັນປະເທດ ແຫ່ງສະຫະພັນລັດເຊຍ ເວົ້າລວມແມ່ນການຊ່ວຍເຫຼືອທາງດ້ານພາຫະນະ, ວັດຖຸອາໄຫຼ່ ແລະ ເຄື່ອງຈັກອຸປະກອນເຕັກນິກການທະຫານໃຫ້ແກ່ ກົມໃຫຍ່ເຕັກນິກກອງທັບ, ເພື່ອເປັນການຮອງຮັບເຄື່ອງມືອຸປະກອນສ້ອມແປງດັ່ງກ່າວ ຄະນະກົມໃຫຍ່ເຕັກນິກ ຈຶ່ງຕົກລົງກໍ່ສ້າງອາຄານອູ່ສ້ອມແປງລົດ ຢູ່ໂຮງງານມິດຕະພາບລາວ-ຫວຽດນາມ ບ້ານ ຄໍາຮຸ່ງ, ເມືອງໄຊທານີ, ນະຄອນຫຼວງວຽງຈັນ, ໃນເນື້ອທີ່ທັງໝົດ 10.500 ມ2 ໂດຍແມ່ນທຶນສະສົມຂອງກົມໃຫຍ່ເຕັກນິກກອງທັບ 100%. ອາຄານອູ່ສ້ອມແປງເປັນອາຄານໂຄງເຫຼັກປະກອບສໍາເລັດຮູບຂະໜາດກ້ວາງ 60 ແມັດ, ຍາວ90 ແມັດ, ສູງ 17,45 ແມັດ, ໂຄງສ້າງຂອງອາຄານເປັນແບບປະສົມປະສານລະຫວ່າງໂຄງສ້າງເບຕົງເສີມເຫຼັກ ແລະ ໂຄງສ້າງເຫຼັກປະກອບສໍາເລັດຮູບ ໂຄງໄອບີ່ມ ( I-BEAM ) ເພື່ອປະຕິບັດແຜນການກໍ່ສ້າງໂຄງການດັ່ງກ່າວໃຫ້ທັນກັບເວລາ, ກົມໃຫຍ່ເຕັກນິກ ຈຶ່ງເຫັນດີມອບໂຄງການກໍ່ສ້າງ ອູ່ສ້ອມແປງລົດ, ໃຫ້ບໍລິສັດ ລາວີນາໂກ້ 36 ຈໍາກັດ ເປັນຜູ້ຮັບເໝົາກໍ່ສ້າງໄດ້ລົງມືນັບແຕ່ວັນທີ 04/08/2020 ມາຮອດປະຈຸບັນໂຄງການກໍ່ສ້າງໄດ້ສໍາເລັດ 100%, ລວມເວລາກໍ່ສ້າງ 12 ເດືອນ, ຈາກນັ້ນສະຫາຍຕາງໜ້າບໍລິສັດ ລາວີນາໂກ້ 36 ຈໍາກັດ ໄດ້ຂຶ້ນກ່າວມອບອູ່ສ້ອມແປງລົດ ໃຫ້ກັບ ກົມໃຫຍ່ເຕັກນິກກອງທັບ ແລະ ກ່າວຮັບໂດຍ ສະຫາຍ ພົນຈັດຕະວາ ທອງພັນ ສຸທໍາມະວົງ, ພ້ອມທັງກ່າວສະແດງຄວາມຂອບໃຈຕໍ່ທັງສອງຝ່າຍ ທີ່ປະສົບຜົນສຳເລັດນຳກັນ ແລະ ຮຽກຮ້ອງໃຫ້ທັງສອງພາກສ່ວນຈົ່ງສືບຕໍ່ຮັດແໜ້ນຄວາມສາມັກຄີນັບມື້ໃຫ້ແໜ້ນແຟ້ນກວ່າເກົ່າ ພ້ອມກັນເຮັດສໍາເລັດໜ້າທີ່ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນກ້າວໜ້າຂຶ້ນໄປເລື້ອຍໆ. ໂດຍ ພູສະນິດ ສິງເມືອງຄໍາ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ