ວັນອັງຄານ, ວັນທີ 03 ທັນວາ 2024
ກອງພັນໃຫຍ່ 605 ຈັດຕັ້ງປິດຊຸດອົບຮົບ-ຫັດແອບປະຈຳປີ 2021
ເວລາອອກຂ່າວ: 2021-12-16 12:03:47 | ຜູ້ຂຽນ : admin1 | ຈຳນວນຄົນເຂົ້າຊົມ: 1683 | ຄວາມນິຍົມ: 
ໃນວັນທີ 15 ທັນວາ 2021 ນີ້, ກອງພັນໃຫຍ່ 605 ໄດ້ຈັດຕັ້ງປິດຊຸດອົບຮົມ-ຫັດແອບວຽກງານການເມືອງ, ການທະຫານ, ພະລາທິການ-ເຕັກນິກປະຈຳປີ 2021 ໂດຍການເປັນປະທານຂອງສະຫາຍ ພັນເອກ ປະເສີດ ທ່ຽງທຳ ຫົວໜ້າການທະຫານກອງພັນໃຫຍ່ 605, ມີສະຫາຍ ພັນເອກ ບົວຄຳ ສາມາວົງ ຫົວໜ້າການເມືອງກອງພັນໃຫຍ່, ມີຄະນະພັກ-ຄະນະບັນຊາ, ພະແນກການ ແລະ ກົມກອງເຂົ້າຮ່ວມ.
ສະຫາຍ ພັນຕີ ສັນຍາ ມະໂນລາດ ຫົວໜ້າຂະແໜງອົບຮົມກອງພັນໃຫຍ່ 605 ໄດ້ຂື້ນຜ່ານບົດສະຫຼຸບຕີລາຄາຜົນໄດ້ຮັບຜ່ານການຈັດຕັ້ງປະຕິບັດອົບຮົມ-ຫັດແອບວຽກງານການເມືອງ, ການທະຫານ, ພະລາທິການ-ເຕັກນິກ ເຊີ່ງເລີ່ມອົບຮົມ-ຫັດແອບແຕ່ເດືອນກຸມພາ 2021 ເປັນຕົ້ນມາຈົນເຖີງປະຈຸບັນ, ເຫັນໄດ້ວ່າຄະນະພັກ-ຄະນະບັນຊາແຕ່ລະຂັ້ນກໍ່ໄດ້ເອົາໃຈໃສ່ໃກ້ຊິດຕິດແທດກັບພະນັກງານ-ນັກຮົບ ໄດ້ນຳພາກົມກອງຈັດຕັ້ງເຝິກແອບຮ່ຳຮຽນຕາມທິດທາງ ແລະ ແຜນການວາງອອກ ໄດ້ຮັບຜົນດີມີຄວາມຮັບຜິດຊອບສູງ, ສາມາດບັນລຸຜົນໄດ້ຮັບຄື: ພາກວິຊາການເມືອງບັນລຸໄດ້ 85% ພາກວິຊາພະລາເຕັກນິກບັນລຸໄດ້ 80% ແລະ ພາກວິຊາກາານທະຫານ, ວິຊາລະບຽບບຸກຄົນ ແລະ ລວມໝູ່ບັນລຸໄດ້ 70,05%, ວິຊາກິລາການທະຫານບັນລຸ 70,91%, ຈັດຕັ້ງຍິງເປົ້າໝາຍປືນ AK ບັນລຸໄດ້ 83,33%, ຍິງປືນຊະນິດ K59 ບັນລຸໄດ້ 72,37%, ສ່ວນພາກວິຊາສະເພາະປືນໃຫຍ່ໜ້າດິນແມ່ນໄດ້ອົບຮົມ-ຫັດແອບແຕ່ບໍ່ໄດ້ອອກປະຕິບັດຕົວຈິງຍິງລູກປືນແທ້, ເພາະການແຜ່ລະບາດຂອງເຊື້ອພະຍາດໂຄວິດ-19, ນອກຈາກນີ້, ຍັງໄດ້ອົບຮົມ-ຫັດແອບໃຫ້ທະຫານໃໝ່ປະຈຳປີ 2021 ໄດ້ສຳເລັດມີຈຳນວນພົນເຂົ້າຮ່ວມ 111 ສະຫາຍ, ໃນນັ້ນຕີລາຄາປະເພດເກັ່ງ 67 ສະຫາຍເທົ່າກັບ 60,36%, ປະເພດກາງ 34 ສະຫາຍ, ເທົ່າກັບ 30,63% ແລະ ຄາດໝາຍ 10 ສະຫາຍ, ເທົ່າກັບ 9,01%, ຈາກນັ້ນຍັງໄດ້ອົບຮົມ-ຫັດແອບໄລຍະສັ້ນຊະນິດປືນ ເດກາເບ (DKB) ໃຫ້ພະນັກງານ-ນັກຮົບ ແລະ ອອກຍິງເປົ້າໝາຍດ້ວຍລູກປືນແທ້ບັນລຸໄດ້ຄາດໝາຍສູງ ແລະ ມີຄວາມປອດໄພ 100%.
ໂອກາດນີ້ສະຫາຍ ພັນເອກ ປະເສີດ ທ່ຽງທຳ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດການອົບຮົມ-ຫັດແອບປະຈຳປີ 2021 ໃນຄັ້ງນີ້, ພ້ອມທັງເນັ້ນໜັກ ແລະ ຮຽກຮ້ອງໃຫ້ຄະນະພັກ-ຄະນະບັນຊາ ແຕ່ລະຂັ້ນ, ພະນັກງານ-ນັກຮົບແຕ່ລະສະຫາຍຈົ່ງພ້ອມກັນຍົກສູງຄວາມຮູ້-ຄວາມສາມາດໃຫ້ສູງຂື້ນກ່ວາເກົ່າ, ເພີ່ມທະວີຄວາມສາມັກຄີໃຫ້ເປັນປຶກແຜ່ນ ພ້ອມກັນແກ້ໄຂບັນຫາທີ່ຄົງຄ້າງ, ພ້ອມທັງນຳເອົາເນື້ອໃນບົດຮຽນດັ່ງກ່າວໄປຈັດຕັ້ງຜັນຂະຫຍາຍເຂົ້າໃນກົມກອງໃຫ້ເກີດດອກອອກຜົນໃນຊຸມປີຕໍ່ໄປ, ສ້າງໃຫ້ກົມກອງມີຄວາມໜັັກແໜ້ນເຂັ້ມແຂງຂື້ນໄປເລື້ອຍໆ.
ຂ່າວ:ໜູແດງລາດສະແກ້ວ
ພາບ:ເພັງມະນີລະສິດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
