POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນອັງຄານ, ວັນທີ 03 ທັນວາ 2024

ກອງພັນໃຫຍ່ 11 ຈັດຕັ້ງພິທີປາຖະກະຖາວັນສ້າງຕັ້ງກອງພັນໃຫຍ່ ຄົບຮອບ 46 ປີ
ເວລາອອກຂ່າວ: 2021-12-16 14:58:32 | ຜູ້ຂຽນ : admin1 | ຈຳນວນຄົນເຂົ້າຊົມ: 1683 | ຄວາມນິຍົມ:

ໃນຕອນເຊົ້າຂອງວັນທີ 16 ທັນວາ 2021 ນີ້, ກອງພັນໃຫຍ່ ໄດ້ຈັດຕັ້ງພິທີປາຖະກະຖາ ວັນສ້າງຕັ້ງກອງພັນໃຫຍ່ ຄົບຮອບ 46 ປີ (ວັນທີ 16 ທັນວາ 1975-16 ທັນວາ 2021), ໂດຍການເຂົ້າຮ່ວມເປັນປະທານຂອງ ສະຫາຍ ພັນເອກ ກົງທອງ ສຸຂະວົງ ຫົວໜ້າການທະຫານກອງພັນໃຫຍ່ 11, ມີສະຫາຍ ພັນເອກ ພອນມີໄຊ ສີວົງຊຳ ຫົວໜ້າການເມືອງກອງພັນໃຫຍ່ ພ້ອມດ້ວຍຄະນະພັກ-ຄະນະບັນຊາ ແລະ ພະນັກງານ-ນັກຮົບທົ່ວກອງພັນໃຫຍ່ເຂົ້າຮ່ວມ. ໃນພິທີ ສະຫາຍ ພັນໂທ ຄຳສາຍ ມົນດວງສິງ ຫົວໜ້າພະແນກການເມືອງ ໄດ້ຂຶ້ນຜ່ານບົດປາໄສ ໃຫ້ຮູ້ວ່າ:ກ່ອນໜ້ານີ້ 46 ປີ ຄືວັນທີ 16 ທັນວາ 1975 ກອງພັນໃຫຍ່ທະຫານຮາບຍານເກາະທີ 11 ໄດ້ຮັບການສ້າງຕັ້ງຂຶ້ນ ທີ່ບ້ານໜອງທາເໜືອ ໂດຍແມ່ນ ທ່ານ ພົນໂທ ສີພອນ ຜາລີຂັນ ເປັນຜູ້ອ່ານຂໍ້ຕົກລົງ, ເຊິ່ງຕົ້ນກຳເນີດແມ່ນມາຈາກກຸ່ມ 109 ທີ່ເຂົ້າມາປະສົມຢູ່ວຽງຈັນເວລານັ້ນ ເອີ້ນວ່າກອງພັນໃຫຍ່ທະຫານຮາບ 201 ເຊິ່ງເປັນກອງພັນໃຫຍ່ທຳອິດຂອງປະຊາຊົນລາວ. ມີສະຫາຍ ຄຳຈັນ ໄຊສົງຄາມ ເປັນຫົວໜ້າ, ສະຫາຍ ຈຳປາ ໄຊຍະສຸກ ເປັນຮອງ, ມາຮອດວັນທີ 12 ກຸມພາ 1984 ກະຊວງປ້ອງກັນປະເທດໄດ້ຕົກລົງປ່ຽນຊື່ຈາກກອງພັນໃຫຍ່ 201 ມາເປັນກອງພັນໃຫຍ່ທະຫານຮາບທີ 11.ໂດຍແມ່ນ ສະຫາຍ ເມກສຸວັນ ນ້ອຍຜິວພັນ ເປັນຫົວໜ້າ, ສະຫາຍ ຄຳຜອງ ດາວົງສອນ ເປັນຮອງການເມືອງ, ສະຫາຍ ຄູນເກດ ເປັນຮອງຮັບຜິດຊອບເຕັກນິກ. ມາຮອດວັນທີ 14 ກຸມພາ 2019 ລັດຖະມົນຕີກະຊວງປ້ອງກັນປະເທດຕົກລົງປ່ຽນຊື່ຢ່າງເປັນທາງການ ປ່ຽນຈາກກອງພັນໃຫຍ່ທະຫານຮາບທີ 11 ມາເປັນກອງພັນໃຫຍ່ທະຫານຮາບຍານເກາະທີ 11 ຈົນເຖິງປັດຈຸບັນ. ກອງພັນໃຫຍ່ທະຫານຮາບຍານເກາະທີ 11 ປະກອບມີ 2 ກອງ ພັນນ້ອຍທະຫານຮາບຍານເກາະ ຄື: ກອງພັນທະຫານຮາບຍານເກາະທີ 01 ແລະ ກອງພັນທະຫານຮາບຍານເກາະ 705, ມີ 1 ກອງພັນ 586 ເປັນກອງພັນເຄື່ອນທີ່ຕອບໂຕ້ໄວ, ມີ 01 ກອງພັນທະຫານຮາບ 743 ແລະ ຍັງມີ 5 ກອງຮ້ອຍເອກະລາດຂຶ້ນກັບຄື: ກອງຮ້ອຍສືບຂ່າວ, ສື່ສານ, ຊ່າງແສງ, ປ້ອງກັນອາກາດ ແລະ ກອງຮ້ອຍປືນໃຫຍ່, ພ້ອມນັ້ນ ຍັງ ມີ 01 ໝວດເຄມີ, 01 ໝວດ ປ້ອງກັນທີ່ຕັ້ງ ແລະ ໂຮງໝໍ 10 ຕຽງ, ການກຳເນີດຂຶ້ນຂອງກອງພັນໃຫຍ່ທະຫານຮາບຍານເກາະທີ 11 ແມ່ນເຫດການ ການເມືອງໜຶ່ງທີ່ສຳຄັນຂອງຊາດ, ຂອງກອງທັບ ແມ່ນການຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ຂອງການປະຕິວັດລາວ ໃນການປະຕິບັດສອງໜ້າທີ່ຍຸດທະສາດຂອງພັກຄື: ປົກປັກຮັກສາ ແລະ ສ້າງສາພັດທະນາປະເທດຊາດ, ປົກປັກຮັກສາອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດໄວ້ໃຫ້ໝັ້ນຄົງ. ພາຍຫຼັງໄດ້ຮັບການສ້າງຕັ້ງ ກອງພັນໃຫຍ່ທະຫານຮາບຍານເກາະທີ 11 ພວກເຮົາກໍ່ໄດ້ຮັບການມອບໝາຍໜ້າທີ່ອັນໜັກໜ່ວງ ແຕ່ມີກຽດສະຫງ່າຈາກ ພັກ-ລັດ ກໍ່ຄືປະຊາຊົນ ມອບໝາຍໃຫ້ຄື: ປົກປັກຮັກສາໝາກຜົນຂອງການປະຕິວັດ, ປົກປັກຮັກສານະຄອນຫຼວງວຽງຈັນ ເຊິ່ງເປັນໝາກຫົວໃຈຂອງປວງຊົນລາວທັງຊາດ, ປ້ອງກັນການນຳ ພັກ-ລັດ, ປ້ອງກັນແຂກພາຍໃນ ແລະ ຕ່າງປະເທດ, ເຮັດໜ້າທີ່ໃນການເຄື່ອນໄຫວສູ້ຮົບໃນທົ່ວປະເທດ ເມື່ອມີຄຳສັ່ງຂອງຂັ້ນເທິງ, ເຮັດໜ້າທີ່ປັບປຸງກໍ່ສ້າງກົມກອງ ໃຫ້ໜັກແໜ້ນເຂັ້ມແຂງຮອບດ້ານ, ເປັນກອງຈຸດສຸມຕົວແບບຂອງກະຊວງປ້ອງກັນປະເທດ ແລະ ເຮັດໜ້າທີ່ກໍ່ສ້າງຮາກຖານການເມືອງປະຊາຊົນບ້ານອ້ອມຂ້າງຂອບເຂດກົມກອງຮັບຜິດຊອບ. ຜ່ານການເຄື່ອນໄຫວ ແລະ ເຮັດສຳເລັດໜ້າທີ່ຕະຫຼອດ 46 ປີ ຜ່ານມາກົມກອງໄດ້ເຄື່ອນໄຫວ ປະຕິບັດໜ້າທີ່ການເມືອງຂອງກົມກອງ ຈໍານວນ 4.330 ຄັ້ງ, ດັບສູນສັດຕູໄດ້ 2.354 ບັກ, ຈາກຜົນງານ ແລະ ໄຊຊະນະທີ່ຍາດມາໄດ້ນັ້ນ, ເຮັດໃຫ້ມີຫຼາຍ ກົມກອງລວມໝູ່ ແລະ ບຸກຄົນ, ນາຍ ແລະ ພົນທະຫານກອງ ພັນໃຫຍ່ 11 ໄດ້ຮັບການຍ້ອງຍໍສັນລະເສີນຈາກການນໍາ ພັກ-ລັດ ກໍຄືກະຊວງປ້ອງກັນປະເທດ ຄື: ມີ 02 ກອງພັນ ແລະ 05 ກອງຮ້ອຍໄດ້ຮັບນາມມະຍົດເປັນກົມ ກອງວິລະຊົນແຫ່ງຊາດ ແລະ ບຸກຄົນ 6 ສະຫາຍ ໄດ້ຮັບນາມມະ ຍົດເປັນວິລະຊົນແຫ່ງຊາດ, 25 ສະຫາຍ ໄດ້ຮັບນາມມະຍົດເປັນນັກຮົບແຂ່ງຂັນ, ໄດ້ຮັບທຸງວິລະຊົນ 07 ຜືນ, ທຸງມູນເຊື້ອ 10 ຜືນ, ຫຼຽນໄຊອິດສະຫຼະຊັ້ນ I, ຊັ້ນ II, ຊັ້ນ III 125 ໜ່ວຍ, ຫຼຽນ ໄຊແຮງງານ ຊັ້ນ I, ຊັ້ນ II, ຊັ້ນ Ill 1.072 ໜ່ວຍ, ຫຼຽນໄຊພິລະອາດຫານຊັ້ນ I, ຊັ້ນ II, ຊັ້ນ III 1.520 ໜ່ວຍ, ຫຼຽນກາແຮງງານຈຳນວນ 2.211 ໜ່ວຍ, ຫຼຽນກາລະນຶກ 50 ປີ, 60 ປີ ແລະ 70 ປີ ຂອງກອງທັບ 2.000 ກວ່າໜ່ວຍ ແລະ ໃບຍ້ອງຍໍປະ ເພດຕ່າງໆ ຈຳນວນ 14.154 ໃບຢ່າງສົມກຽດ. ໃນຕອນທ້າຍພິທີ ສະຫາຍ ພັນເອກ ກົງທອງ ສຸຂະວົງ ໄດ້ໃຫ້ກຽດໂອ້ລົມ ໂດຍຮຽກຮ້ອງໃຫ້ພະນັກງານ-ນັກຮົບແຕ່ລະສະຫາຍ ຕ້ອງຮັບຮູ້ ແລະ ເຂົ້າໃຈເຖິງວັນທີ່ມີຄວາມໝາຍ ຄວາມສຳຄັນທາງດ້ານປະຫວັດສາດຂອງກອງພັນໃຫຍ່ທະຫານຮາບຍານເກາະທີ 11 ຂອງພວກເຮົາ, ພ້ອມກັນຈັດຕັ້ງເຊື່ອມຊຶມ ປະຕິບັດໜ້າທີ່ການເມືອງຂອງຕົນໃຫ້ເຂັ້ມງວດ, ຕ້ອງເຊີດຊູສະຕິລະວັງຕົວກຽມພ້ອມປະຕິບັດ ໜ້າທີ່ສູ້ຮົບ, ປົກປັກຮັກສາໝາກຜົນຂອງການປະຕິວັດ, ຕັ້ງໜ້າຫັນກຳລັງ ລົງກໍ່ສ້າງຮາກຖານການເມືອງ, ປັບປຸງສ້າງຕາໜ່າງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນໃຫ້ເຂັ້ມແຂງ, ຕັ້ງໜ້າປັບປຸງກຳລັງໃຫ້ໜັກແໜ້ນ ເຂັ້ມແຂງ ໃນທຸກດ້ານໂດຍຖືເອົາການຄຸ້ມຄອງບັນຊາ ໃຫ້ມີຄຸນ ນະພາບ, ສຸມທຸກເງື່ອນໄຂຄວາມສາມາດປະຕິບັດວຽກງານພະລາທິການ ຮັບປະກັນການເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເພື່ອປັບປຸງຊີວິດການເປັນຢູ່ຂອງກົມກອງ, ຮັກສາມູນເຊື້ອນາມມະຍົດຂອງກອງພັນໃຫຍ່ທະຫານຮາບຍານເກາະທີ 11 ໄວ້ໝັ້ນຄົງ ແລະ ພ້ອມກັນປັບປຸງກໍ່ສ້າງກົມກອງໃຫ້ກາຍເປັນກົມກອງທີ່ມີລະບຽບແບບແຜນ ແລະ ທັນສະໄໝຂຶ້ນເທື່ອລະກ້າວ. ໂດຍ: ເຄນ ພົມສະຫວັດ

news to day and hot news