ວັນພຸດ, ວັນທີ 04 ທັນວາ 2024
ກອງວັດແທກ 32 ປະກາດແຕ່ງຕັ້ງໜ້າທີ່
ເວລາອອກຂ່າວ: 2021-12-17 10:50:15 | ຜູ້ຂຽນ : admin2 | ຈຳນວນຄົນເຂົ້າຊົມ: 796 | ຄວາມນິຍົມ: 
ໃນວັນທີ 16 ທັນວາ 2021 ນີ້, ກອງວັດແທກປືນໃຫຍ່ໜ້າດິນ 32 ກົມໃຫຍ່ເສນາທິການ, ໄດ້ຈັດພິທີປະກາດແຕ່ງຕັ້ງຂັ້ນຫົວໜ້າຮອງການເມືອງ ແລະ ຮອງການທະຫານ ຂຶ້ນຢູ່ທີ່ ສະໂມສອນຂອງກົມກອງ ໂດຍການເປັນປະທານຂອງ ສະຫາຍ ພົນຈັດຕະວາ ກອງແກ້ວ ວໍລະຈິດ ຄະນະພັກອົງການກົມໃຫຍ່ ຫົວໜ້າຫ້ອງການເມືອງ ກົມໃຫຍ່ເສນາທິການກອງທັບ, ມີ ສະຫາຍ ພັນໂທ ແສງຟອງ ທິບທິລາດ ຮອງຫົວໜ້າກົມປືນໃຫຍ່ໜ້າດິນ ພ້ອມດ້ວຍ ຄະນະພັກ - ຄະນະບັນຊາ ຕະຫຼອດຮອດພະນັກງານພາຍໃນກົມກອງເຂົ້າຮ່ວມ.
ສະຫາຍ ພັນໂທ ສະໄຫວທອງ ບຸດດາວົງ ຮອງຫົວໜ້າພະແນກ ພະນັກງານ ຫ້ອງການເມືອງ ກົມໃຫຍ່ເສນາທິການກອງທັບ, ໄດ້ຜ່ານຂໍ້ຕົກລົງຂອງ ກົມໃຫຍ່ການເມືອງກອງທັບ ສະບັບເລກທີ 6822 / ກມທ, ລົງວັນທີ 18 / 12 / 2021 ວ່າດ້ວຍການ ແຕ່ງຕັ້ງໜ້າທີ່ຂັ້ນຮອງຫົວໜ້າການເມືອງ ແລະ ຮອງຫົວໜ້າການທະຫານ ຂອງກອງວັດແທກປືນໃຫຍ່ໜ້າດິນ 32 ກົມໃຫຍ່ເສນາທິການກອງທັບ ອີງຕາມກົດໝາຍນາຍທະຫານກອງທັບປະຊາຊົນລາວ ( ສະບັບປັບປຸງ ) ໃນພາກທີ II ໝວດທີ IV ມາດຕາ 26 ວ່າດ້ວຍການແຕ່ງຕັ້ງ - ຍົກຍ້າຍນາຍທະຫານ, ອີງຕາມທິດທາງກ່ຽວກັບການປັບປຸງບູລະນະກົງຈັກການຈັດຕັ້ງນໍາພາ - ບັນຊາໃນກໍາລັງປະກອບອາວຸດໃຫ້ເຂັ້ມແຂງ ໜັກແໜ້ນຮອບດ້ານເພື່ອເຮັດສໍາເລັດໜ້າທີ່ປົກປັກຮັກສາ ແລະ ສ້າງສາປະເທດຊາດ ກົມໃຫຍ່ການເມືອງຕົກລົງແຕ່ງຕັ້ງ ສະຫາຍ ພັນຕີ ຄໍາພູ ວົງສາຄໍາຜູຍ ເປັນຮອງຫົວໜ້າການເມືອງ ແລະ ສະຫາຍ ຮ້ອຍເອກ ວົງທອງ ແກ້ວມະນີ ເປັນຮອງຫົວໜ້າການທະຫານ ກອງວັດແທກປືນໃຫຍ່ໜ້າດິນ 32 ກົມໃຫຍ່ເສນາທິການກອງທັບ.
ໃນໂອກາດດັ່ງກ່າວ ສະຫາຍ ພົນຈັດຕະວາ ກອງແກ້ວ ວໍລະຈິດ ໄດ້ມີຄໍາເຫັນໂອ້ລົມ ແລະ ຍ້ອງຍໍຊົມເຊີຍຕໍ່ຜູ້ທີ່ໄດ້ຮັບໜ້າທີ່ໃໝ່ ພ້ອມທັງເນັ້ນໜັກໃຫ້ຍົກສູງນໍ້າໃຈຄວາມຮັບຜິດຊອບເຂົ້າໃນໜ້າທີ່ການເມືອງຂອງຕົນ ໃນການຊີ້ນໍາ-ນໍາພາ ຂົງເຂດວຽກງານຕາມພາລະບົດບາດຂອງກົມກອງ, ເອົາໃຈໃສ່ເຮັດວຽກງານສຶກສາອົບຮົມການເມືອງ-ນໍາພາແນວຄິດ, ສຸມໃສ່ປັບປຸງແບບແຜນ ວິທີເຮັດວຽກ ການກໍ່ສ້າງກົມກອງ 3 ປອດ ສ້າງໜ່ວຍພັກປອດໃສ, ເຂັ້ມແຂງ-ໜັກແໜ້ນ, ຕັ້ງໜ້າເຝິກຝົນຫຼໍ່ຫຼອມຕົນເອງໃຫ້ມີຄຸນທາດການເມືອງໜັກແໜ້ນມີຄຸນສົມບັດສິນທໍາປະຕິວັດ, ເພີ່ມທະວີຄວາມສາມັກຄີພາຍໃນໃຫ້ເປັນປຶກແຜ່ນແໜ້ນໜາ, ສືບຕໍ່ປັບປຸງກໍ່ສ້າງກົມກອງ ໃຫ້ມີຂະບວນການອັນພົ້ນເດັ່ນ ແລະ ມີໃບໜ້າອັນໃໝ່ ມີການຫັນປ່ຽນທີ່ຕັ້ງໜ້າຢ່າງບໍ່ຢຸດຢັ້ງ.
ຂ່າວ-ພາບ : ເກດຕະວັນ ໄຊຍະສົມບັດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
