ກອງທັບປະຊາຊົນລາວ

ວັນຈັນ, ວັນທີ 05 ທັນວາ 2022



ຈີນ ຄອງ​ເຈົ້າ​ຫຼຽນ​ຄຳ ປິ່ງ​ປ່ອງ​ຊີງ​ແຊັມ​ ເຍົາວະຊົນ-ໄວ​ໜຸ່ມ ອາຊີ ຄັ້ງ​ທີ 26
ເວລາອອກຂ່າວ: 2022-09-14 13:48:48 | ຜູ້ຂຽນ : admin2 | ຈຳນວນຄົນເຂົ້າຊົມ: 13 | ຄວາມນິຍົມ:



ນັກ​ກີລາ​ປິ່ງ​ປ່ອງ ​ສປ ຈີນ ທັງ​ຮຸ່ນ​ເຍົາວະ​ຊົນ-ໄວ​ໜຸ່ມ ສ້າງ​ຜົນ ງານ​ໄດ້​ຢ່າງ​ໂດດ​ເດັ່ນ​ສົມ​ລາຄາ​ເປັນ​ເບີ 1 ຂອງ​ໂລກ ກວາດ 5 ຫຼຽນ​ຄຳ, 3 ຫຼຽນ​ເງິນ ແລະ 8 ຫຼຽນ​ທອງ ໃນ​ການ​ແຂ່ງຂັນ​ກີລາ​ປິ່ງ​ປ່ອງ​ຊີງ​ແຊັມ​ເຍົາວະ​ຊົນ-ໄວ​ໜຸ່ມ ອາຊີ ຄັ້ງ​ທີ 26 ທີ່ ​ສປປ ລາວ ຮັບ​ກຽດ​ເປັນ​ເຈົ້າພາບ ແລະ ເປັນ​ຄັ້ງ​ທຳ​ອິດ ຂອງ​ວົງ​ການ​ກີລາ​ປິ່ງ​ປ່ອງ​ລາວ. ຂະນະ​ທີ່​ອັນ​ດັບ​ທີ 2 ຮອງ​ເຈົ້າ​ຫຼຽນ​ຄຳ ຕົກ​ເປັນ​ຂອງ​ທັບ​ນັກ​ກີລາ​ທີມ​ຊາດ​ຍີ່ປຸ່ນ ສາມາດ​ຍາດ​ໄດ້ 4 ຫຼຽນ​ຄຳ, 3 ຫຼຽນ​ເງິນ ແລະ 3 ຫຼຽນ​ທອງ, ທີ 3 ອິນ​ເດຍ ໄດ້ 1 ຫຼຽນ​ຄຳ, 3 ຫຼຽນ​ທອງ ແລະ ທີ 4 ໄທ ໄດ້ 1 ຫຼຽນ​ຄຳ. ການ​ແຂ່ງຂັນ​ກີລາ​ປິ່ງ​ປ່ອງ ​ຊີງ​ແຊັມ​ເຍົາວະ​ຊົນ-ໄວ​ໜຸ່ມ ອາຊີ ຄັ້ງ​ທີ 26 ທີ່ ​ສປປ ລາວ ຮັບ​ກຽດ​ເປັນ​ເຈົ້າພາບ ຈັດ​ຂຶ້ນ​ໃນ​ລະຫວ່າງ​ວັນ​ທີ 1-6 ກັນຍາ​ນີ້ ທີ່​ສູນ​ການ​ຄ້າ​ໄອ​ເຕັກ​ມໍ ຊັ້ນ 7 ນະຄອນຫຼວງ​ວຽງ​ຈັນ ໄດ້​ສຳ ເລັດ​ລົງ​ຢ່າງ​ເປັນ​ທາງ​ການ​ໃນ​​ວັນ​ທີ 6 ກັນຍາຜ່ານ​ມາ, ໂດຍ​ມື້​ສຸດ​ທ້າຍ​ຂອງ​ການ​ແຂ່ງຂັນ​ໄດ້​ມີ​ການ​ຊີງ​ຊະນະ​ເລີດ 5 ລາຍການ ລະດັບ​ໄວ​ໜຸ່ມ ຮຸ່ນ​ອາຍຸ​ບໍ່​ເກີນ 19 ປີ (U19), ໂດຍ​ໃຫ້​ກຽດ​ເຂົ້າ ຮ່ວມ ແລະ ມອບ​ລາງວັນ​ຂອງ ​ທ່ານ ພຸດ ສິມ​ມາລາ​ວົງ ລັດຖະ ມົນຕີ​ກະຊວງ​ສຶກ​ສາ​ທິ​ການ ແລະ ກີລາ, ທ່ານ ຄາ​ລິວ ອາວ ໂມ​ຮານ​ ນາ​ດີ້ ປະທານ​ສະຫະພັນ​ກີລາ​ປິ່ງ​ປ່ອງ​ອາຊີ ແລະ ທ່ານ ນາງ ແສງ​ເດືອນ ຫຼ້າ​ຈັນທະ​ບູນ ປະທານ​ສະຫະພັນ​ກີລາ​ປິ່ງ​ປ່ອງ​ແຫ່ງ​ຊາດ​ລາວ ພ້ອມ​ດ້ວຍ​ຄະນະ​ຮັບ ຜິດຊອບ​ຈັດການ​ແຂ່ງຂັນ ແລະ ຜູ້​ໃຫ້ການ​ສະໜັບສະໜູນ ຕະຫຼອດ​ຮອດ​ສື່​ມວນ​ຊົນ ແລະ ຊາວ​ນະ ຄອນ​ຫຼວງ​ເຂົ້າ​ຮ່ວມ. ສຳລັບ​ຜົນ​ການ​ແຂ່ງຂັນ​ໄດ້​ມີ​ການ​ຊີງ​ຊະນະ​ເລີດ 5 ລາຍການ ລະດັບ​ໄວ​ໜຸ່ມ U19 ຜົນ​ປະກົດ​ວ່າ: ປະເພດ​ຄູ່​ຊາຍ U19 ຈາກ​ຍີ່ປຸ່ນ ແຊງ​ຊະນະ ຄູ່​ຈາກ​ຈີນ 3-2 ເກມ, ຍີ່ປຸ່ນ ໄດ້​ແຊັມ​ປະເພດ​ຄູ່​ຊາຍ​ລາຍການ​ນີ້ ສອງ​ຄັ້ງ​ຕິດຕໍ່​ກັນ, ອັນ​ດັບ 3 ຮ່ວມ ເປັນ​ຂອງ​ຄູ່​ຈາກ​ອິນ​ເດຍ ແລະ ຈີນ ຂະນະ​ທີ່​ຜົນງານ​ຂອງ 3 ຄູ່ ນັກ​ກີລາ​ລາວ ແມ່ນ​ຕົກ​ຮອບ 32 ຄູ່​ສຸດ​ທ້າຍ ສ່ວນ​ປະເພດ​ຄູ່​ຍິງ U19 ແຊັມ​ຕົກເປັນ​ຂອງ ສາວ​ຍີ່ປຸ່ນ ຊະນະ ຄູ່​ຈາກ​ໄຕ້​ຫວັນ 3-0 ເກມ ແລະ ທີ 3 ຮ່ວມ ຕົກ​ເປັນ​ຂອງ​ນັກ​ກີລາ​ຈີນ ທັງ​ສອງ​ຄູ່ ແລະ ຜົນງານ​ຂອງ​ນັກ​ກີລາ​ລາວ ໃນ​ລາຍການ​ດັ່ງກ່າວ​ບໍ່​ຜ່ານ​ຮອບ​ຄັດເລືອກ ແລະ ປະເພດ​ຄູ່​ປະສົມ U19 ແຊັມ ​ເປັນ​ຂອງ​ອິນເດຍ ຄູ່​ມື 1 ຂອງ​ລາຍການ ຊະນະ ຈີນ 3-2 ເກມ, ອິນ​ເດຍ ໄດ້​ແຊັມ​ປະເພດ​ຄູ່​ປະສົມ​ລາຍການ​ນີ້​ຄັ້ງ​ທຳ​ອິດ ແລະ ທີ 3 ຮ່ວມ​ແມ່ນ​ຄູ່​ຈາກ​ຮົງ​ກົງ ແລະ ສ ເກົາຫຼີ, ສ່ວນ 3 ຄູ່​ ຈາກ ​ລາວ ຕົກ​ຮອບ 32 ຄູ່​ສຸດ​ທ້າຍ ແລະ ປະເພດ​ຍິງ​ດ່ຽວ U19 ທີ 1 ແລະ ທີ 2 ແມ່ນ​ນັກ​ກີລາ​ຈາກ​ຈີນ, ທີ 3 ຮ່ວມ ອິນ​ເດຍ ແລະ ຈີນ ຂະນະ​ທີ່ ແຊັມ​ຊາຍ​ດ່ຽວ U19 ເປັນ​ຂອງ​ນັກ​ກີລາ ​ຈາກ ​ຈີນ, ທີ 2 ໄຕ້​ຫວັນ ແລະ ທີ 3 ຮ່ວມ​ອີກ​ສອງ​ນັກ​ກີລາ​ ຈາກ ​ຈີນ. ສ່ວນ​ປະເພດ​ທີມ​ຍິງ U19 ປີ ​ສປ ຈີນ ຄອງ​ແຊັມ​ອາຊີ 23 ສະໄໝ​ຕິດຕໍ່​ກັນ ພາຍຫຼັງ​ເອົາ​ຊະນະ ໄຕ້​ຫວັນ 3-1 ຄູ່, ທີ 3 ຮ່ວມ ສ. ​ເກົາຫຼີ ແລະ ຍີ່ປຸ່ນ ຂະນະ​ທີ່ ທີມ​ຊາຍ U19 ແຊັມ​ກໍ​ເປັນ​ຂອງ​ຈີນ ຮອບ​ຊີງຊະນະ ຍີ່ປຸ່ນ 3-0 ຄູ່ ປ້ອງ​ກັນ​ແຊັມ​ໄດ້​ສຳເລັດ ແລະ ເປັນ​ແຊັມ​ສະໄໝ​ທີ 4 ຕິດຕໍ່​ກັນ, ທີ 3 ຮ່ວມ ສ. ເກົາຫຼີ ແລະ ອິນ​ເດຍ. ຂະນະ​ທີ່ ທີມ​ຍິງ ແລະ ທີມ​ຊາຍ​ຈາກ​ລາວ ບໍ່​ຜ່ານ​ຮອບ​ຄັດ​ເລືອກ ສ່ວນ​ລະດັບ​ເຍົາວະ​ຊົນ ຮຸ່ນ​ອາຍຸ​ບໍ່​ເກີນ 15 ປີ (U15) ແຊັມ​ປະເພດ​ຍິງ​ດ່ຽວ​ແມ່ນ​ນັກ​ກີລາ​ຈາກ​ໄທ, ທີ 2 ຍີ່ປຸ່ນ, ທີ 3 ຮ່ວມ ສ. ເກົາຫຼີ ແລະ ຍີ່ປຸ່ນ; ປະເພດ​ຊາຍ​ດ່ຽວ U15 ແຊັມ ແລະ ຮອງ​ແຊັມ​ເປັນ​ຂອງ ຍີ່ປຸ່ນ, ທີ 3 ຮ່ວມ ຈີນ ແລະ ກາ​ຊັກ​ສະຖານ. ລະດັບ​ເຍົາວະ​ຊົນ U15 ແຊັມ​ປະເພດ​ທີມ​ຍິງ​ເປັນ​ຂອງ ຍີ່ປຸ່ນ ໄດ້​ແຊັມ​ຄັ້ງ​ທຳ​ອິດ​ໃນ​ຮອບ 8 ປີ ຕໍ່​ຈາກ​ປີ 2014, ທີ 2 ໄຕ້​ຫວັນ, ທີ 3 ຮ່ວມ ສ ເກົາຫຼີ ແລະ ຈີນ ແຊັມ​ເກົ່າ; ປະເພດ​ທີມ​ຊາຍ U15 ​ສປ ຈີນ ປ້ອງ​ກັນ​ແຊັມ​ໄດ້​ສຳເລັດ ແລະ ເປັນ​ແຊັມ​ສະໄໝ​ທີ 4 ຕິດຕໍ່​ກັນ, ທີ 2 ໄຕ້​ຫວັນ, ທີ 3 ຮ່ວມ ຍີ່ປຸ່ນ ແລະ ອີ​ຣານ. ສະຫຼຸບ​ຕາຕະລາງ​ຫຼຽນ​ລາງ ວັນ ທັງ​ລະດັບ​ເຍົາວະ​ຊົນ U15 ແລະ ລະດັບ​ໄວ​ໜຸ່ມ U19 ເຈົ້າ​ຂອງ​ຫຼຽນ​ຄຳ​ຄັ້ງ​ນີ້ ແມ່ນ ​ສປ ຈີນ ໄດ້​ມາ​ທັງ​ໝົດ 5 ຫຼຽນ​ຄຳ 3 ຫຼຽນ​ເງິນ ແລະ 8 ຫຼຽນ​ທອງ. ໃນ​ນີ້, ລະດັບ​ເຍົາວະ​ຊົນ U15 ຈີນ ໄດ້​ມາ 1 ຫຼຽນ​ຄຳ 2 ຫຼຽນ​ທອງ ແລະ ລະດັບ​ໄວ​ໜຸ່ມ U19 ໄດ້​ມາ 4 ຫຼຽນ​ຄຳ 3 ຫຼຽນ​ເງິນ ແລະ 6 ຫຼຽນ​ທອງ ອັນ​ດັບ​ທີ 2 ຍີ່ປຸ່ນ ໄດ້ 4 ຫຼຽນ​ຄຳ 3 ຫຼຽນ​ເງິນ ແລະ 3 ຫຼຽນ​ທອງ, ທີ 3 ອິນ​ເດຍ ໄດ້ 1 ຫຼຽນ​ຄຳ 3 ຫຼຽນ​ທອງ, ທີ 4 ໄທ ໄດ້ 1 ຫຼຽນ​ຄຳ, ທີ 5 ໄຕ້​ຫວັນ ໄດ້ 5 ຫຼຽນ​ເງິນ ສຳລັບ​ນັກ​ກີລາ​ທີ່​ໄດ້​ແຊັມ ແລະ ຮອງ​ແຊັມ ປະເພດ​ຍິງ​ດ່ຽວ, ຊາຍ​ດ່ຽວ U15 ແລະ U19 ລວມ​ທັງ​ແຊັມ​ປະເພດ​ທີມ​ຍິງ, ທີມ​ຊາຍ U15 ແລະ U19 ໃນ​ລາຍການ​ນີ້ ໄດ້​ສິດ​ເຂົ້າ​ຮ່ວມ​ແຂ່ງຂັນ​ປິ່ງ​ປ່ອງ​ເຍົາວະ​ຊົນ-ໄວ​ໜຸ່ມ ຊີງ​ແຊັມ​ໂລກ (World Youth 2022). ລາຍການ​ດັ່ງກ່າວ ມີ​ນັກ​ກີລາ 165 ຄົນ ຈາກ 17 ປະເທດ ແລະ ເຂດ​ແຄວ້ນ ທີ່​ຜ່ານ​ການ​ຄັດ​ເລືອກ​ເຂົ້າ​ຮ່ວມຊີງ​ໄຊ​ທັງ​ໝົດ 11 ລາຍການ: ລະດັບ​ເຍົາວະ​ຊົນ ຮຸ່ນ​ອາຍຸ​ບໍ່​ເກີນ 15 ປີ (U15) 4 ລາຍການ ແລະ ລະດັບ​ໄວ​ໜຸ່ມ ຮຸ່ນ​ອາຍຸ​ບໍ່​ເກີນ 19 ປີ (U19) 7 ລາຍການ. ນອກຈາກ​ນີ້, ຍັງ​ມີ​ຄະນະ​ນຳ​ຈາກ​ສະຫະພັນ​ປິ່ງ​ປ່ອງ​ອາຊີ, ທີມ​ງານ​ກຳມະການ​ຕັດສິນ ພ້ອມ​ດ້ວຍ ວິຊາ​ການ ແລະ ເຈົ້າ​ໜ້າທີ່​ກ່ຽວຂ້ອງ​ເກືອບ 100 ຄົນ ຈາກ​​ຫຼາຍ​ປະເທດ​ເຂົ້າ​ຮ່ວມ. ຕະຫຼອດ​ການ​ແຂ່ງຂັນ 6 ວັນ ເຫັນ​ໄດ້​ເຖິງ​ນ້ຳໃຈ​ນັກ​ກີລາ, ຄວາມ​ສາມັກຄີ ແລະ ມິດ ຕະພາບ ເຮັດ​ໃຫ້ການ​ແຂ່ງຂັນ​ຄັ້ງ​ນີ້ ສຳເລັດ​ລົງ​ຢ່າງ​ຈົບງາມ.




 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ