ກອງທັບປະຊາຊົນລາວ

ວັນອາທິດ, ວັນທີ 04 ທັນວາ 2022



ກອງ​ປະຊຸມ​ປຶກສາ​ຫາລື​ກຽມ​ຄວາມ​ພ້ອມ ​ການ​ຊ້ອມ​ຮົບ​ທາງ​ອາກາດ​ຮ່ວມ ລາວ-ຣັດ​ເຊຍ
ເວລາອອກຂ່າວ: 2022-11-23 09:29:01 | ຜູ້ຂຽນ : admin2 | ຈຳນວນຄົນເຂົ້າຊົມ: 24 | ຄວາມນິຍົມ:



ກອງ​ບັນຊາ​ການ​ທະຫານ​ອາກາດ​ໄດ້​ເປີດ​ກອງ​ປະຊຸມ​ປຶກ​ສາ​ຫາລື​ກຽມ​ຄວາມ​ພ້ອມ​ການ​ຊ້ອມ​ຮົບ​ຮ່ວມ ກອງທັບ​ປະຊາຊົນ​ລາວ ແລະ ກອງທັບ​ສະຫະພັນ​ຣັດ ​ເຊຍ ຢູ່​ສະໜາມ​ຫັດ​ແອບບ້ານ​ແປນ ແຂວງ​ຊຽງ​ຂວາງ ເຊິ່ງ​ໄດ້​ຈັດ​ຂຶ້ນ​ໃນ​ວັນ​ທີ 21 ພະຈິກ 2022 ນີ້, ໂດຍ​ການ​ເປັນ​ປະທານຂອງ ​ສະຫາຍ ພົນ​ຈັດຕະວາ ຄຳ​ເຫຼັກ ແສງ​ພະຈັນ ຜູ້​ບັນຊາ​ການ​ທະຫານ​ອາກາດ, ມີ​ຄະນະ​ພັກ, ຄະນະ​ຫ້ອງ, ພະແນກການ​ພ້ອມ ດ້ວຍ​ພະນັກງານ​ນັກ​ບິນ ແລະ ອະ​ນຸ​ກຳມະການ​ທີ່​ກ່ຽວຂ້ອງ ​ເຂົ້າ​ຮ່ວມ. ໃນ​ກອງ​ປະຊຸມ​ໄດ້​ຈັດ​ຕັ້ງ​ປະຕິບັດ​ຕາມ​ແຜນການ​ຊ້ອມ​ຮົບ​ຮ່ວມ ລະຫວ່າງ ກອງທັບ​ປະຊາຊົນ​ລາວ ແລະ ກອງທັບ​ສະຫະພັນ​ຣັດ​ເຊຍ LAROS-2022 ຂອງ​ກະຊວງ​ປ້ອງ​ກັນ​ປະເທດ ແລະ ປະຕິບັດ​ຕາມ​ທິດ​ຊີ້​ນຳ​ຕາມ​ຂໍ້​ລົງ​ຂອງ​ກະຊວງ​ປ້ອງ​ກັນ​ປະເທດ, ຂໍ້​ຕົກລົງ​ຂອງ​ກອງ​ບັນຊາ​ການ​ທະຫານ​ອາກາດ ເພື່ອ​ເປັນ​ການ​ຄົ້ນຄວ້າ​ປືກ​ສາ​ຫາລື​ກຽມ​ຄວາມ​ພ້ອມ​ໃຫ້​ອະນຸ​ກຳມະການ​ແຕ່​ລະພາກສ່ວນປະຕິບັດໜ້າທີ​່ການເມືອງ​ຂອງ​ຕົນ ແລະ ຮັບປະກັນ​ໃຫ້​ກຳລັງ​ເຫຼົ່າ​ຮົບ​ທະຫານ​ອາກາດມີ​ຄວາມ​ປອດ​ໄພ ແລະ ເຮັດ​ສຳເລັດໜ້າ​ທີ​ຂອງ​ກົມ​ກອງ, ໂດຍ​ສະເພາະ​ແມ່ນ​ວຽກ​ງານ​ການເມືອງ, ວຽກ​ງານ​ເສນາ​ທິ​ການ, ວຽກ​ງານ​ພະລາທິການ, ວຽກ​ງານ​ເຕັກນິກ, ວຽກ​ງານ​ອົບຮົມ​ການບິນ ແລະ ວຽກ​ງານ​ຫ້ອງການ ເພື່ອ​ຮັບປະກັນ​ໃຫ້​ວຽກ​ງານ​ການ​ຊ້ອມ​ຮົບ​ຮ່ວມ ລາວ-ຣັດ​ເຊຍ ໃຫ້​ປະສົບ​ຜົນສຳເລັດ​ຕາມ​ທີດ​ນຳ​ຂອງ​ກະຊວງ​ປ້ອງ​ກັນ​ປະເທດ ກໍ​ຄື​ກອງ​ບັນຊາ​ການ​ທະຫານ​ອາກາດ. ພ້ອມ​ນັ້ນ, ຄະນະ​ອະນຸ​ກຳ​ມະ​ການ​ກໍ​ໄດ້​ຜັດປ່ຽນ​ກັນ​ຂຶ້ນ​ລາຍ​ງານ​ແບບແຜນ​ວິທີ​ເຮັດ​ວຽກ​ທີ່​ໄດ້​ຈັດ​ຕັ້ງ​ປະຕິບັດ​ໃນ​ໄລຍະ​ຜ່ານ​ມາ​ຕໍ່​ກອງ​ປະຊຸມ​ໄດ້​ຮັບ​ຊາບ​ຢ່າງ​ກົງ​ໄປ​ກົງ​ມາ​, ​ມີ​ເນື້ອ​ໃນ ແລະ ຄວາມ​ໝາຍ​ຄວາມ​ສຳຄັນ ຢ່າງ​ເລິກເຊິ່ງ ແລະ ມີ​ແຜນການ​ລະອຽດ​ຄົບ​ຖ້ວນ​ສົມບູນ ເພື່ອ​ຮັບປະກັນ​ກຽມ​ຄວາມ​ພ້ອມ​ທຸກ​ວຽກ​ງານ​ຮອບດ້ານ​ໃນ​ການ​ຊ້ອມ​ຮົບ​ໃຫ້ມີ​ຄວາມ​ປອດ​ໄພ. ທັງ​ນີ້, ກໍ​ເພື່ອ​ເປັນ​ການ​ຍົກ​ລະດັບ​ໃຫ້​ນັກ​ບິນ​ເຫຼົ່າ​ຮົບ​ທະຫານ​ອາກາດ​ມີ​ຄວາມ​ຮູ້​ຄວາມ​ສາມາດ, ມີ​ຄວາມ​ຊຳນິ​ຊຳນານ​ການບິນ ກຽມພ້ອມ​ສູ້​ຮົບ​ໃຫ້​ຄ່ອງ​ແຄ້ວ, ວ່ອງໄວ ແລະ ທັນ​ສະໄໝ ​ຢູ່​ໃນ​ຖັນ​ແຖວ​ກອງທັບ​ປະຊາຊົນ​ລາວ ເພື່ອ​ຮັບປະກັນ​ໃຫ້​ກຳລັງ​ເຫຼົ່າ​ຮົບ​ທະຫານ​ອາກາດ​ເຕີບ​ໃຫຍ່​ເຂັ້ມແຂງ ແລະ ເປັນ​ການສະແດງ​ໃຫ້​ເຫັນ​ແສນ​ຍາ​ນຸ​ພາບ​ເຮຶອ​ບິນ​ຊະນິດ​ຕ່າງໆ​ໃຫ້​ບັນດາ​ການ​ນຳ​ຂັ້ນ​ສູງ​ຂອງ​ພັກ-ລັດ ໄດ້​ຮັບ​ຊົມ​ດ້ວຍ​ຄວາມ​ສະຫງ່າ​ງາມ ແລະ ອົງອາດ​ກ້າຫານ ແລະ ຮັບປະກັນ​ຄວາມ​ປອດ​ໄພ​ໃນ​ການ​ປົກ​ປ້ອງ​ນ່ານ​ຟ້າ​ຂອງ​ປະເທດ​ເຮົາ. ພ້ອມ​ນັ້ນ, ປະທານ​ກອງ​ປະຊຸມ​ຍັງ​ໄດ້​ມີ​ຄຳ​ເຫັນ​ໂອ້​ລົມ ແລະ ຮຽກຮ້ອງ​ໃຫ້​ຄະນະ​ອະນຸ​ກຳມະການ​ແຕ່​ລະພາກສ່ວນ​ຈົ່ງ​ພ້ອມ​ກັນ​ຍົກ​ສູງ​ພາລະ​ບົດບາດ, ໜ້າທີ່​ການເມືອງ​ຂອງ​ຕົນ, ພ້ອມ​ກັນ​ຈັດ​ຕັ້ງ​ປະຕິບັດ​ນຳພາ-ຊີ້​ນຳ​ວຽກ​ງານ​ປິ່ນ​ອ້ອມ ຮອບດ້ານ​ໃນ​ການ​ຊ້ອມ​ຮົບ​ຮ່ວມ ລາວ-ຣັດ​ເຊຍ ໃນ​ຄັ້ງ​ນີ້​ໃຫ້​ປະສົບ​ຜົນສຳເລັດ​ຢ່າງ​ຈົບງາມ. ໂດຍ: ສີ​ທາ




 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ