ສະເຫຼີມສະຫຼອງວັນສ້າງຕັ້ງໂຮງຮຽນກໍ່ສ້າງນາຍສິບ ເລກ 2 ວຽງໄຊ ຄົບຮອບ 60 ປີ ຢ່າງຄຶກຄື້ນ
ເວລາອອກຂ່າວ: 2022-11-23 09:39:51 | ຜູ້ຂຽນ : admin3 | ຈຳນວນຄົນເຂົ້າຊົມ: 299 | ຄວາມນິຍົມ:
ວັນທີ 22 ພະຈິກ 2022 ນີ້, ໂຮງຮຽນກໍ່ສ້າງນາຍສິບ ເລກ 2 ວຽງໄຊ ໄດ້ຈັດພິທີສະເຫຼີມສະຫຼອງວັນສ້າງຕັ້ງໂຮງຮຽນ ຄົບຮອບ 60 ປີ ( 22 ພະຈິກ 1962-22 ພະຈິກ 2022) ຂຶ້ນຢ່າງຄືກຄື້ນ ຢູ່ທີ່ຜາມໄຊໂຮງຮຽນ ໂດຍການເຂົ້າຮ່ວມຂອງ ສະຫາຍ ພົນໂທ ຄຳລຽງ ອຸທະໄກສອນ ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບ, ມີ ທ່ານ ວິໄລວົງ ບຸດດາຄຳ, ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ປະທານປ້ອງກັນຊາດ-ປ້ອງກັນຄວາມສະຫງົບແຂວງ, ເຈົ້າແຂວງ ແຂວງຈຳປາສັກ, ການນຳກະຊວງປ້ອງກັນປະເທດ, ຄະນະນຳກົມໃຫຍ່, ຫ້ອງວ່າການກະຊວງ, ຮອງຫົວໜ້າກົງສູນໃຫຍ່ ສສ ຫວຽດນາມ ປະຈຳພາກໃຕ້ລາວ, ກອງບັນຊາການທະຫານເຂດ 5 ກອງທັບປະຊາຊົນຫວຽດນາມ, ບັນດາຄະນະພັກ-ຄະນະບັນຊາກຳລັງຫຼວງ-ກຳລັງທ້ອງຖິ່ນ, ພ້ອມດ້ວຍຄະນະພັກ-ຄະນະອຳນວຍການ, ພະນັກງານປະຕິວັດ-ອາວຸໂສບຳນານ, ນາຍ ແລະ ພົນທະຫານ, ອະດີດພະນັກງານ-ຄູອາຈານ, ນັກຮຽນ-ນັກສຶກສາໂຮງຮຽນກໍ່ສ້າງນາຍສິບ ເລກ 2 ວຽງໄຊ ຕະຫຼອດຮອດແຂກທີ່ຖືກເຊີນ, ອົງການປົກຄອງທ້ອງຖິ່ນ ແລະ ມວນຊົນຊາວແຂວງຈຳປາສັກເຂົ້າຮ່ວມຢ່າງຄຶກຄື້ນມ່ວນຊື່ນ.
ສະຫາຍ ພັນເອກ ພູເວີນ ວົງຄຳຊາວ, ເລຂາຄະນະພັກໂຮງຮຽນ, ຫົວໜ້າການເມືອງ ໂຮງຮຽນກໍ່ສ້າງນາຍສິບເລກ 2 ວຽງໄຊ ໄດ້ກ່າວບົດປາໃສ ກ່ຽວກັບປະຫວັດຄວາມເປັນມາ, ມູນເຊື້ອແຫ່ງການກຳເນີດເຕີບໃຫຍ່ຂະຫຍາຍຕົວ ຂອງໂຮງຮຽນກໍ່ສ້າງນາຍສິບເລກ 2 ວຽງໄຊ ໃນຕະຫຼອດ 60 ປີ ທີ່ຜ່ານມາ, ເຊິ່ງໄດ້ຮັບການສ້າງຕັ້ງຂຶ້ນຢ່າງເປັນທາງການ ໃນວັນທີ 22 ພະຈິກ 1962 ໃນສະພາບແວດລ້ອມທີ່ປະເທດຊາດ ດຳເນີນສົງຄາມຕໍ່ສູ້ປົດປ່ອຍຊາດ ໂດຍແມ່ນສະຫາຍ ພົນເອກ ຄຳໄຕ ສີພັນດອນ ອະດີດກຳມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນປະເທດໃນເວລານັ້ນ ເປັນຜູ້ປະກາດສ້າງຕັ້ງ ໂດຍມີຕົ້ນກຳເນີດສືບທອດມູນເຊື້ອມາຈາກໂຮງຮຽນວັດທະນະທຳຊວນແທ໋ງ, ໂຮງຮຽນວັດທະນະທຳກອງທັບວຽງໄຊໃນເມື່ອກ່ອນ ພາຍຫຼັງໄດ້ຮັບການສ້າງຕັ້ງຂຶ້ນຄະນະພັກ-ຄະນະບັນຊາ, ພະນັກງານຄູ-ອາຈານແຕ່ລະຮຸ້ນ ໄດ້ອອກແຮງເສີມຂະຫຍາຍຫົວຄິດປະດິດສ້າງຂອງຕົນ ເຂົ້າໃນການກໍ່ສ້າງບຸກຄະລະກອນຮຸ້ນສືບທອດປ່ຽນແທນ ໃຫ້ກຳລັງປະກອບອາວຸດກອງທັບປົດປ່ອຍປະຊາຊົນລາວໃນເມື່ອກ່ອນ ກໍຄືກອງທັບປະຊາຊົນລາວໃນປັດຈຸບັນ ເປັນແຕ່ລະໄລຍະໄດ້ທາງດ້ານປະລິມານ ແລະ ຄຸນະພາບ ສາມາດຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງຂອງກອງທັບຢ່າງມີໝາກຜົນອັນຈົບງາມ.
ຕະຫຼອດໄລຍະ 60 ປີ ຜ່ານມາ, ໂຮງຮຽນກໍ່ສ້າງນາຍສິບ ເລກ
2 ວຽງໄຊ ສາມາດສ້າງນັກຮຽນໄດ້ທັງໝົດ 23,143 ຄົນ ກາຍເປັນກຳລັງແຮງສັງລວມໃຫ້ແກ່ກອງທັບ ກໍຄືປະເທດຊາດ. ໃນນີ້, ຫຼາຍສະຫາຍໄດ້ກາຍເປັນພະນັກງານການນຳຂັ້ນສູງຂອງພັກ-ລັດ, ກໍຄືຂອງກອງທັບ, ປົກປັກຮັກສາ ແລະ ເສີມຂະຂາຍໄດ້ທາດແທ້, ມູນເຊື້ອອັນມີກຽດສະຫງ່າຂອງຕົນ ກາຍເປັນເບົ້າຫຼໍ່ຫຼອມນັກຮຽນ-ນັກສຶກສາ ໃຫ້ມີຄວາມຮູ້-ຄວາມສາມາດ, ມີຄຸນສົມບັດສິນທຳປະຕິວັດ, ມີຄວາມຈົງຮັກພັກດີຕໍ່ພັກ, ຕໍ່ກອງທັບ, ຕໍ່ປະເທດຊາດ ແລະ ຕໍ່ປະຊາຊົນບັນດາເຜົ່າ ຈາກຜົນງານ ແລະ ມູນເຊື້ອອັນສະຫງ່າງາມທີ່ສ້າງມາໄດ້ ເຮັດໃຫ້ໂຮງຮຽນກໍ່ສ້າງນາຍສິບ ເລກ 2 ວຽງໄຊ ໄດ້ຮັບການຍ້ອງຍໍຈາກພັດ-ລັດຖະບານ, ກະຊວງປ້ອງກັນປະເທດ ແລະ ອົງການຈັດຕັ້ງຂັ້ນເທິງ ໃນນີ້ປະເພດຫຼຽນໄຊປະຕິວັດຊະນະເລີດຊັ້ນ II 2 ໜ່ວຍ, ຊັ້ນ III ຈຳນວນ 2 ໜ່ວຍ, ຫຼຽນໄຊອິດສະຫຼະຊັ້ນ II ຈຳນວນ 2 ໜ່ວຍ, ຊັ້ນ III ຈຳນວນ 2 ໜ່ວຍ, ຫຼຽນໄຊແຮງງານຊັ້ນ II 27 ໜ່ວຍ, ຊັ້ນ III ໄດ້ 29 ໜ່ວຍ, ຫຼຽນໄຊເອກະລາດຊັ້ນ III ຈາກ ສສ ຫວຽດນາມ 1 ໜ່ວຍ, ຫຼຽນໄຊພິລະອາດຫານ ຊັ້ນ II 1 ໜ່ວຍ, ຫຼຽນກາແຮງງານ 13 ໜ່ວຍ, ໃບຍ້ອງຍໍປະເພດຕ່າງໆໄດ້: 11 ໃບ. ນອກຈານນີ້, ຍັງສາມາດຄັດເລືອກຄູສອນດີ-ສອນເກັ່ງ 721 ສະຫາຍ, ນັກຮຽນກໍ່ສ້າງນາຍສິບ ໄດ້ຮັບປະກາສະນິຍະບັດແດງ 101 ສະຫາຍ.
ໃນໂອກາດອັນມີຄວາມໝາຍຄວາມສຳຄັນນີ້ ສະຫາຍ ພົນໂທ ຄຳລຽງ ອຸທະໄກສອນ ໄດ້ໂອ້ລົມເຊິ່ງກ່ອນອຶ່ນສະຫາຍໄດ້ສະແດງຄວາມຍ້ອງຍໍຊົມເຊີມຕໍ່ຄະນະ ພັກ- ຄະນະອຳນວຍການ, ພະນັກງານ-ຄູອາຈານ ແຕ່ລະຮຸ້ນທີ່ສາມາດສ້າງມາໄດ້ມູນເຊື້ອອັນດີງາມຂອງໂຮງຮຽນ ດ້ວຍດີຕະຫຼອດມາ ພ້ອມທັງເນັ້ນໜັກໃຫ້ສືບຕໍ່ເພີ່ມທະວີຄວາມຕັ້ງຕໍ່ບໍລິສຸດຕໍ່ພັກ, ຕໍ່ປະເທດຊາດ, ຕໍ່ປະຊາຊົນບັນດາເຜົ່າ ເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ V ຂອງຄົງຄະນະພັກກະຊວງປ້ອງປະເທດ ແລະ ມະຕິກອງປະຊຸມໃຫຍ່ຂອງໂຮງຮຽນໃຫ້ໄດ້ຮັບໝາກຜົນຕົວຈິງສາມາດປົກປັກຮັກສາ ແລະ ເສີມຂະຫຍາຍມູນເຊື້ອຂອງໂຮງຮຽນແຕ່ລະໄລຍະ ໃຫ້ຈະເລີນງອກງາມຍິ່ງໆຂຶ້ນ.
ເນື່ອງໃນໂອກາດພິທີສະເຫຼີມສະຫຼອງວັນສ້າງຕັ້ງໂຮງຮຽນກໍ່ສ້າງນາຍສິບ ເລກ 2 ວຽງໄຊ ຄົບຮອບ 60 ປີ ກະຊວງປ້ອງກັນປະເທດ ຍັງໄດ້ມອບຫຼຽນໄຊພິລະອາດຫານຊັ້ນ II ໃຫ້ໂຮງຮຽນກໍ່ສ້າງນາຍສິບເລກ 2 ວຽງໄຊ, ປະເພດຫຼຽນໄຊພິລະອາດຫານຊັ້ນ III ໃຫ້ກົມກອງລວມໝູ່ 7 ກົມກອງ, ໃບຍ້ອງຍໍກະຊວງປ້ອງກັນປະເທດ 39 ກົມກອງ, ໃບຍ້ອງຍໍກົມໃຫຍ່ການເມືອງກອງທັບ 22 ກົມກອງ, ໃບຍ້ອງຍໍໂຮງຮຽນກໍ່ສ້າງນາຍສິບເລກ 2 ວຽງໄຊ ໃຫ້ກົມກອງລວມໝູ່ 4 ກົມກອງ, ບຸກຄົນ 324 ສະຫາຍ ທີ່ມີຜົນງານດີເດັ່ນປະກອບສ່ວນອັນສຳຄັນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ກໍຄືປົກປັກຮັກສາ ແລະ ສ້າງສາພັດທະນາປະເທດຊາດ ໂດຍການຂຶ້ນປະດັບຂອງສະຫາຍພົນໂທ ຄຳລຽງ ອຸທະໄກສອນ ຢ່າງສົມກຽດ. ນອກຈາກນັ້ນ, ພິທີຍັງໄດ້ຮັບຊົມການສະແດງເດີນຂະບວນສວນສະໜາມຈາກກ້ອນກຳລັງຕ່າງໆ, ຮັບຊົມການສະແດງສິລະປະ-ວັນນະຄະດີ ຈາກສິລະປະສະໝັກຫຼິ້ນ ແລະ ຊົມການສະແດງຫັດກາຍມີປືນ ຂອງພະນັກງານ-ນັກຮົບໂຮງຮຽນກໍ່ສ້າງນາຍສິບເລກ 2 ວຽງໄຊ ເຊິ່ງໄດ້ສ່ອງແສງໃຫ້ເຫັນເຖິງມູນເຊື້ອແຫ່ງການກຳເນີດເຕີບໃຫຍ່ຂະຫຍາຍຕົວຂອງໂຮງຮຽນກໍ່ສ້າງນາຍ ສິບເລກ 2 ວຽງໄຊ ຄົບຮອບ 60 ປີ ທີ່ຜ່ານມາ ແລະ ຮັບຊົມການໂດດຈ້ອງຈາກ ກອງພັນໃຫຍ່ 703 ທັງນີ້ກໍເພື່ອເຮັດໃຫ້ວັນສ້າງຕັ້ງໂຮງຮຽນກໍ່ສ້າງນາຍສິບ ເລກ 2 ວຽງໄຊ ຄົບຮອບ 60 ປີ ມີບັນຍາກາດຄຶກຄື້ນ ແລະ ເຕັມໄປດ້ວຍຄວາມໝາຍຄວາມສຳຄັນຢ່າງເລິກເຊິ່ງ.
ໂດຍ: ສົມພົງ ແກ້ວປະເສີດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ