POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນພະຫັດ, ວັນທີ 16 ມັງກອນ 2025

47 ປີ ແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ
ເວລາອອກຂ່າວ: 2022-11-30 08:44:18 | ຜູ້ຂຽນ : admin1 | ຈຳນວນຄົນເຂົ້າຊົມ: 1533 | ຄວາມນິຍົມ:

(ຕໍ່ຈາກສະບັບກ່ອນ) 2. ໄລຍະ 36 ປີແຫ່ງການຈັດຕັ້ງປະຕິບັດແນວທາງປ່ຽນແປງໃໝ່ (ແຕ່ປີ 1986 ເຖິງປັດຈຸບັນ). ຜ່ານການຈັດຕັ້ງປະຕິບັດແນວທາງປ່ຽນແປງໃໝ່ຮອບ ດ້ານທີ່ມີຫຼັກການຂອງພັກ ເລີ່ມແຕ່ປີ 1986 ເປັນຕົ້ນມາ, ເຖິງວ່າປະເທດຊາດເຮົາໄດ້ພົບກັບຄວາມຫຍຸ້ງຍາກ ແລະ ສິ່ງທ້າທາຍຫຼາຍປະການກໍຕາມ, ແຕ່ພວກເຮົາກໍ ສາມາດຍາດໄດ້ຜົນງານ ແລະ ໄຊຊະນະອັນໃຫຍ່ຫຼວງ ທີ່ມີຄວາມໝາຍປະຫວັດສາດ ເຊິ່ງສະແດງອອກໃນແຕ່ລະດ້ານດັ່ງນີ້: ດ້ານການເມືອງ: ພາຍໃຕ້ການນຳພາຂອງພັກປະຊາຊົນປະຕິວັດລາວທີ່ເປັນແກນນຳໃນລະບົບການ ເມືອງປະຊາທິປະໄຕປະຊາຊົນ, ລະບົບການເມືອງຂອງລະບອບປະຊາທິປະໄຕປະຊາຊົນ ແຕ່ລະຂັ້ນໄດ້ຮັບການປັບປຸງ ບູລະນະ ໃຫ້ໜັກແໜ້ນ, ເຂັ້ມແຂງ ຄວາມເປັນເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນ ຂອງປະເທດຊາດ ໄດ້ຮັບການປົກປັກຮັກສາໄວ້ໄດ້ຢ່າງໝັ້ນຄົງ, ສັງຄົມມີຄວາມສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ. ການພັດທະ ນາເສດຖະກິດ: ສປປ ລາວ ໄດ້ມີຜົນສຳເລັດອັນສຳຄັນ ແລະ ມີບາດກ້າວຂະຫຍາຍຕົວຕໍ່ເນື່ອງ, ໝັ້ນທ່ຽງ. ອັດຕາການເຕີບໂຕຂອງເສດຖະກິດສະເລ່ຍເພີ່ມຂຶ້ນ ໃນແຕ່ລະໄລຍະເຊັ່ນ: ປີ 1990 ສະເລ່ຍ 4,8% ຕໍ່ປີ, ປີ 1995 ເພີ່ມຂຶ້ນ 6,4%, ປີ 2005 ໄດ້ 6,2%, ປີ 2010 ສະເລ່ຍ 7,9%, ປີ 2015 ບັນລຸໄດ້ 7, 8%, ຄາດຄະເນໝົດປີ 2020 ຂະຫຍາຍຕົວຢູ່ໃນລະດັບ 3,3% ຫາ 3,6%, ປີ 2021 ຄາດຈະຂະຫຍາຍຕົວຢູ່ໃນລະດັບ3,0% ຍ້ອນການລະບາດຂອງ ພະຍາດໂຄວິດ-19 ທີ່ແກ່ຍາວ, ປີ 2022 ຄາດຈະຂະຫຍາຍຕົວຢູ່ໃນລະດັບ 4,5% GDP ສະເລ່ຍຕໍ່ຫົວຄົນ ກໍເພີ່ມຂຶ້ນເຊັ່ນ: ປີ 1985 ບັນລຸໄດ້ 114 ໂດລາສະຫະລັດ, ປີ 1995 ໄດ້ 380 ໂດລາ, ປີ 2006 ໄດ້ 534 ໂດລາ, ປີ 2015 ບັນລຸໄດ້ 1.970 ໂດລາ, ປີ 2020 ໄດ້ 2.742 ໂດລາສະຫະລັດ, ປີ 2021 ໄດ້ 2.649 ໂດລາສະຫະລັດ ແລະ ປີ 2022 ໄດ້ 1.841ໂດລາສະຫະລັດ. ວຽກງານກະສິກຳ-ປ່າໄມ້ ແລະ ການພັດທະນາຊົນນະບົດ. ການຜະລິດເຂົ້າຂະຫຍາຍຕົວມາເປັນກ້າວໆ, ສາມາດຜະລິດເຂົ້າກິນພຽງພໍ, ກຸ້ມກິນ, ມີສ່ວນແຮໄວ້ ແລະ ຂາຍເປັນສິນຄ້າສົ່ງອອກນັບມື້ເພີ່ມຂຶ້ນໃນແຕ່ລະປີຄື: ປີ 1990 ສາມາດຜະລິດເຂົ້າໄດ້ 1,4 ໂຕນ ເນື້ອທີ 650.300 ເຮັກຕາ, ສະມັດຕະພາບການຜະ ລິດ 2,29 ໂຕນຕໍ່ເຮັກຕາ; ປີ 2000 ຜະລິດໄດ້ 2,2 ໂຕນເນື້ອທີ່ 719.370 ເຮັກຕາ, ສະມັດຕະພາບການຜະລິດ 3,06 ໂຕນຕໍ່ເຮັກຕາ; ປີ 2010 ຜະລິດໄດ້ 2.321.330 ໂຕນ ໃນເນື້ອທ່ີ 627.865 ເຮັກຕາ, ສະມັດຕະພາບການຜະລິດ 3,71 ໂຕນຕໍ່ເຮັກຕາ, ໃນປີ 2015 ຜະລິດໄດ້ 4,1 ລ້ານໂຕນ, ປີ 2020 ຜະລິດໄດ້ 3,5 ລ້ານໂຕນ, ປີ 2021 ສາມາດຜະລິດໄດ້ 3,66 ລ້ານໂຕນ. ສຳລັບການປູກພືດ, ຜັກ ແລະ ໝາກໄມ້ຕ່າງໆ ໃນປີ 2020 ປະຕິບັດໄດ້ ປະມານ 85.477 ເຮັກຕາ, ຜົນຜະລິດໄດ້ຮັບປະມານ 813.970 ກວ່າໂຕນ ເທົ່າກັບ 68% ຂອງແຜນການ, ການຜະລິດພືດລະດູແລ້ງ ປະຕິບັດໄດ້ໃນເນື້ອທີ 14.518 ກວ່າເຮັກ ຕາ. ໃນປີ 2022 ຂະແໜງກະສິກຳ ແລະ ປ່າໄມ້ຂະຫຍາຍຕົວ 2,9% ລື່ນແຜນສະພາຮັບຮອງ 0.2%. ໃນນັ້ນ, ຜະລິດເຂົ້ານາແຊງ 438.000 ໂຕນ ລື່ນຄາດ ໝາຍ 2,9%, ເຂົ້ານາປີບັນລຸ 768.224 ເຮັກຕາ ລື່ນແຜນການ 1,7%, ຜະລິດສະບຽງອາຫານໄດ້ 2,03 ລ້ານໂຕນ, ການຜະລິດຊີ້ນ, ໄຂ່, ປາ ໄດ້ 392.016 ໂຕ ສ່ວນການຜະລິດຊີ້ນ, ປາ ສາມາດປະຕິບັດໄດ້ 333.130 ໂຕນ ເທົ່າ ກັບ 68,95% ຂອງແຜນ. ໃນນັ້ນ, ຜະລິດຊີ້ນໄດ້ 165.580 ໂຕນ, ໄຂ່ 34.500 ໂຕນ ແລະ ປາ (ປາລ້ຽງ ແລະ ປາທຳມະຊາດ ) ໄດ້ 13.050 ໂຕນ. ໃນປີ 2021 ອັດຕາການຂະຫຍາຍຕົວສັດ ລ້ຽງ ຢູ່ໃນລະດັບ 5-6% ຕໍ່ປີ. ໃນປີຜ່ານມາ ມີສັດລ້ຽງຈຳນວນທັງໝົດ 57,57 ລ້ານໂຕ. ວຽກງານພັດທະນາຊົນນະບົດ ແລະ ການແກ້ໄຂຄວາມທຸກຍາກ. ພັກເຮົາຖືເອົາໃຈໃສ່ໃນການພັດທະນາຊົນນະບົດ ແລະ ແກ້ໄຂຄວາມທຸກຍາກ ເຊິ່ງຖືເປັນວຽກສຳຄັນ ແລະ ເປັນບູລິມະສິດໃນການພັດທະນາເສດຖະກິດ-ສັງຄົມຂອງປະເທດໃນແຕ່ລະໄລຍະ ໂດຍສະເພາະພາຍຫຼັງພັກເຮົາໄດ້ວາງແນວທາງປ່ຽນແປງໃໝ່ ໄດ້ເອົາໃຈໃສ່ໃນວຽກງານປັບປຸງຊີວິດການເປັນຢູ່ຂອງປະຊາຊົນ ໂດຍສຸມໃສ່ການແກ້ໄຂສະບຽງອາຫານ ແລະ ຢຸດຕິການຖາງປ່າເຮັດໄຮ່, ວຽກງານທີ່ສຳ ຄັນໃນການພັດທະນາຊົນນະບົດໄດ້ສຸມໃສ່ການຂະຫຍາຍພື້ນຖານໂຄງລ່າງ, ສ້າງເສັ້ນທາງຊົນນະບົດ ແລະ ຂະຫຍາຍຊົນລະປະທານຂະໜາດນ້ອຍ, ຊຸກຍູ້ປະ ຊາຊົນເຮັດນາ, ການຫຼຸດຜ່ອນຄວາມທຸກຍາກຂອງປະຊາຊົນ ໄດ້ດຳເນີນໄປຢ່າງເປັນຂະບວນຟົດຟື້ນ; ປີ 2000 ຄອບຄົວທຸກຍາກ ມີ 266.000 ຄອບຄົວ, ປີ 2015 ຄອບຄົວທຸກຍາກຍັງເຫຼືອ 76.604 ຄອບຄົວ ເທົ່າກັບ 6,59% ຂອງຈຳນວນ 1.166.239 ຄອບຄົວ ໃນທົ່ວປະເທດ, ບ້ານທຸກຍາກຍັງເຫຼືອ 1.736 ບ້ານ ເທົ່າກັບ 20,50% ຂອງຈຳນວນ 8.514 ບ້ານ ໃນທົ່ວປະເທດ, ເມືອງທຸກຍາກ ມີ 23 ເມືອງ ກວມເອົາ15,54% ຂອງຈຳນວນ 148 ເມືອງໃນທົ່ວປະເທດ. ປີ 2021 ຄາດຄະເນວ່າຈະສາມາດບັນລຸຄົບມາດຖານສ້າງຄອບຄົວທຸກ ຍາກພົ້ນທຸກໄດ້ 13.079 ຄອບຄົວ ຂອງຈຳນວນຄອບຄົວທັງໝົດໃນທົ່ວປະເທດ, ບ້ານທຸກຍາກຍັງເຫຼືອ 1.351. ປີ (2021 ຈະສາມາດສ້າງບ້ານພົ້ນທຸກໄດ້ 237 ບ້ານ) ຂອງຈຳນວນບ້ານທັງໝົດໃນທົ່ວປະເທດ, ສຳລັບເມືອງທຸກຍາກ ຍັງ 23 ເມືອງ. ການພັດທະນາຊົນນະບົດ ແລະ ການສ້າງບ້ານພັດທະນາ, ສ້າງບ້ານໃຫຍ່ກາຍເປັນຕົວເມືອງໃນຊົນນະບົດຕາມທິດ 3 ສ້າງ (ການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງ ຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ) ໄດ້ສ້າງເງື່ອນໄຂໃຫ້ຫຼາຍບ້ານໄດ້ຮັບການພັດທະນາ ແລະ ສາມາດປະກາດເປັນບ້ານພັດທະນາ, ບ້ານໃຫຍ່ກາຍເປັນຕົວເມືອງໃນຊົນນະບົດ ເຊັ່ນ: ສາມາດສ້າງບ້ານພັດທະນາໄດ້ 2.694 ບ້ານມາເປັນ 3.577 ບ້ານ ໃນປີ 2015, ສ່ວນບ້ານພົ້ນທຸກທີ່ຍັງບໍ່ທັນໄດ້ເປັນບ້ານພັດທະນາມີ ຈຳນວນ 1.736 ບ້ານ ເທົ່າກັບ 37,27%. ປີ 2019 ສາມາດສ້າງບ້ານພັດທະນາ ໄດ້ 4.305 ບ້ານ; ສ້າງບ້ານໃຫຍ່ກາຍເປັນຕົວເມືອງໃນຊົນນະບົດ ໄດ້ 10 ບ້ານ, ເຮັດໃຫ້ບ້ານໃຫຍ່ກາຍເປັນຕົວເມືອງໃນຊົນນະບົດໄດ້ 66 ບ້ານ ປີ 2021 ສູ້ຊົນສ້າງບ້ານພັດທະນາ ໃຫ້ໄດ້ 15.022 ບ້ານຈາກ 4.305 ບ້ານໃນປີ 2019 ມາເປັນ 15.022 ບ້ານໃນ 2020, ສ້າງບ້ານໃຫຍ່ກາຍເປັນຕົວເມືອງໃນຊົນນະບົດ ໄດ້ 10 ບ້ານ, ປີ 2021 ສ້າງບ້ານໃຫຍ່ກາຍເປັນຕົວເມືອງໃນຊົນນະບົດໄດ້ເພີ່ມຂຶ້ນ. ປີ 2022 ສຳລັບການພັດທະນາຊົນນະບົດ ອີງຕາມມາດຖານໃໝ່ຂອງດຳລັດ 348/ລບ ມີເມືອງພົ້ນທຸກ 53 ເມືອງ ເທົ່າກັບ 35,82%, ບ້ານພົ້ນທຸກ 4.792 ບ້ານ ເທົ່າກັບ 56,87% ແລະ ຄອບຄົວພົ້ນທຸກ 964.149 ຄອບຄົວ ເທົ່າກັບ 77,78%, ມີຄອບຄົວພັດທະນາ 736.996 ຄອບຄົວ ເທົ່າກັບ 59,44%, ບ້ານພັດທະນາ 747 ບ້ານ ເທົ່າກັບ 8,86%, ບ້ານໃຫຍ່ເປັນຕົວເມືອງນ້ອຍໃນຊົນນະບົດ 14 ບ້ານ ແລະ ເມືອງເຂັ້ມແຂງຮອບດ້ານ 5 ເມືອງ ວຽກງານອຸດສາຫະກຳ ແລະ ການຄ້າ. ວຽກງານອຸດສາຫະກຳ-ການຄ້າ ແມ່ນໜຶ່ງໃນໂຄງການເສດຖະກິດທີ່ສຳຄັນ, ສະນັ້ນ ພັກ-ລັດ ໄດ້ຊີ້ນຳ-ນຳພາພັດ ທະນາຂົງເຂດນີ້ໃຫ້ມີການຂະຫຍາຍຕົວຕໍ່ເນື່ອງ. ປີ 1986-1990 ອຸດສາຫະກຳມີການຂະຫຍາຍຕົວເພີ່ມຂຶ້ນ ສະເລ່ຍ 8% ຕໍ່ປີ, ຕົ້ນຕໍແມ່ນອຸດສາຫະກຳປຸງ ແຕ່ງ. ໄລຍະປີ 2006-2010 ສະເລ່ຍ ອຸດສາຫະກຳຂະຫຍາຍຕົວ 12% ຕໍ່ປີ, ໄລຍະ 2011-2015 ອັດຕາການຂະຫຍາຍຕົວ ສະເລ່ຍ 13% ຕໍ່ປີ ແລະ ໄລຍະ 2016-2020 ຂະຫຍາຍຕົວສະເລ່ຍ ປະມານ 9,2% ຕໍ່ປີ. ປີ 2021 ອຸດສາຫະກຳ ແລະ ປຸງແຕ່ງສາມາດປະຕິບັດໄດ້ 8.310,28 ຕື້ກີບ, ເທົ່າກັບ 60,35% ຂອງແຜນການ, ທຽບໃສ່ໄລຍະດຽວກັນຂອງປີຜ່ານມາຫຼຸດລົງ 15,44%. ສາເຫດສຳຄັນທີ່ພາໃຫ້ການຜະລິດອຸດສາຫະກຳປຸງແຕ່ງ ແລະ ຫັດຖະກຳຫຼຸດລົງແມ່ນຈາກການແຜ່ລະບາດຂອງ ພະຍາດໂຄວິດ-19. ການຄ້າ: ທົ່ວປະເທດມີຕະຫຼາດທັງໝົດ 856 ແຫ່ງ, ໃນນັ້ນ ມີສູນການຄ້າ 28 ແຫ່ງ, ຕະຫຼາດໃຫຍ່ 48 ແຫ່ງ, ຕະຫຼາດກາງ 145 ແຫ່ງ, ຕະຫຼາດນ້ອຍ 406 ແຫ່ງ, ຕະຫຼາດນັດ 257 ແຫ່ງ ເຮັດໃຫ້ການຈໍລະຈອນແຈກຢາຍສິນຄ້າລົງເຖິງຊົນນະບົດ, ເຂດຫ່າງໄກສອກຫຼີກ. ການສົ່ງອອກປະຕິບັດໄດ້ 5.611 ລ້ານໂດລາສະຫະລັດ ເທົ່າກັບ 85%, ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 26,8%. ສຳລັບການນຳເຂົ້າ: ປະຕິບັດໄດ້ 4.452 ລ້ານໂດລາ, ເທົ່າກັບ 69,7% ເກີນດຸນປະມານ 1.160 ລ້ານໂດລາ. ( ອ່ານຕໍ່ສະບັບໜ້າ) ວຽກງານພະລັງງານ ແລະ ບໍ່ແຮ່. ການພັດທະນາພະລັງງານ ແລະ ບໍ່ແຮ່ແມ່ນການຂຸດຄົ້ນ ແລະ ນຳໃຊ້ທ່າແຮງບົ່ມຊ້ອນທາງດ້ານຊັບພະຍາກອນທຳມະຊາດຕາມແນວທາງຂອງພັກເຮົາ, ຍ້ອນແນວນັ້ນການພັດທະນາໃນຂົງເຂດທີ່ໄດ້ຮັບການເອົາໃຈໃສ່ເປັນຢ່າງດີ ແລະ ມີຜົນໄດ້ຮັບຫຼາຍສົມຄວນ. ອ່ານຕໍ່ສະບັບໜ້າດ້ານພະລັງງານ; ໃນປັດຈຸບັນ ທົ່ວປະເທດພວກເຮົາມີແຫຼ່ງໄຟ ຟ້າ 86 ແຫ່ງ, ມີກຳລັງຕິດຕັ້ງທັງໝົດ 10.447,93 ເມກາວັດ, ສາມາດຜະລິດພະລັງງານໄຟຟ້າ ໄດ້ເຖິງ 54.050,93 ລ້ານກິໂລງວັດໂມງຕໍ່ປີ ທົ່ວປະເທດມີລະບົບສາຍສົ່ງແຮງສູງ, ແຮງກາງ ແລະ ແຮງຕ່ຳ ແລະ ມີສະຖານີຈ່າຍໄຟຟ້າ 84 ແຫ່ງ ສາມາດສະໜອງໄຟຟ້າໄດ້ 100% ໃນເທສະບານ ແຂວງ, ນະຄອນຫຼວງ, ເທສະບານເມືອງ ແລະ ນະຄອນ. 93% ຂອງຈຳນວນບ້ານ ແລະ 95% ຂອງຈຳນວນຄອບຄົວໃນທົ່ວປະ ເທດໄດ້ໃຊ້ໄຟຟ້າແບບຖາວອນ. ນອກນີ້, ສປປ ລາວ ຍັງຈຳໜ່າຍໃຫ້ຕ່າງປະເທດ ໄດ້ 6.423 ລ້ານເມກາວັດໂມງ. ໃນນີ້, ສົ່ງໄປປະເທດໄທ 5.421 ເມກາວັດ, ຫວຽດນາມ 572 ເມກາວັດ, ກຳປູເຈຍ 320 ເມກາວັດ, ມຽນມາ 10 ເມກາວັດ ແລະ ຍັງເຊື່ອມໂຍງ ແລະ ຈຳໜ່າຍໄປ ມາເລເຊຍ 100 ເມກາວັດ. ດ້ານບໍ່ແຮ່: ເປັນຂະແໜງການໜຶ່ງທີ່ສ້າງລາຍຮັບໃຫ້ປະເທດຊາດຫຼາຍພໍສົມຄວນ ປີ 2019 ປະຕິບັດໄດ້ 10.967 ຕື້ກີບ ເທົ່າກັບ 92% ຂອງແຜນການ, ສະເພາະຕົ້ນປີ 2020 ປະຕິບັດໄດ້ 5.181 ຕື້ກີບ ເທົ່າກັບ 47% ຂອງ ແຜນການ ທຽບໃສ່ໄລຍະດຽວກັນຂອງປີຜ່ານມາຫຼຸດລົງ 8% ການຜະລິດແຮ່ທາດຈະສາມາດປະຕິບັດໄດ້ 10.851 ຕື້ກີບ ລື່ນແຜນການປະມານ 13%. ໃນປີ 2021 ຜະລິດໄດ້ 12.602.73 ຕື້ກີບ ເທົ່າກັບ 91,21%, ການ ຈຳໜ່າຍແຮ່ທາດ ທັງພາຍໃນ ແລະ ຕ່າງປະເທດ ໄດ້ 1.464,96 ລ້ານໂດລາສະຫະລັດ. ມາຮອດປັດຈຸບັນສາມາດຜະລິດພະລັງງານໄຟຟ້າໄດ້ທັງໝົດປະມານ 56.027,27 GWh/ປີ. ໃນນັ້ນ,ແຫຼ່ງຜະລິດໄຟຟ້າມາຈາກເຂື່ອນໄຟຟ້າພະລັງງານນ້ຳກວມເອົາ 81,33%, ມີ 77 ເຂື່ອນ, ມາຈາກພະລັງງານໄຟຟ້າຖ່ານຫີນ 17,14%. ນອກຈາກນີ້, ຍັງມີພະລັງງານຊີວະມວນກວມເອົາ 0,51% ແລະ ພະລັງງານແສງຕາເວັນ 1,02% ສ່ວນວຽກງານທໍລະນີສາດ ແລະ ບໍ່ແຮ່ກໍມີທ່າຂະຫຍາຍຕົວເຊັ່ນກັນຄື: ມີບໍລິສັດທີ່ໄດ້ຮັບອະນຸຍາດຊອກຄົ້ນ, ສຳຫຼວດ, ສຶກສາຄວາມເປັນໄປໄດ້ ທາງດ້ານເສດຖະກິດເຕັກນິກ, ຂຸດຄົ້ນ ແລະ ປຸງແຕ່ງແຮ່ທາດ ແບບປົກກະຕິ ມີທັງໝົດ 230 ບໍລິສັດ ໃນນັ້ນ: ຂະແໜງທໍລະນີສາດແຮ່ ທາດຄຸ້ມຄອງ ມີ 105 ບໍລິສັດ 124 ກິດຈະການ ແລະ ຂະແໜງບໍ່ແຮ່ຄຸ້ມຄອງ ມີ 125 ບໍລິສັດ205 ກິດຈະການ ປະກອບມີ: ບໍລິສັດ ທີ່ກຳລັງດຳເນີນວຽກງານສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກ ມີ 42 ບໍລິສັດ 60 ກິດຈະການ; ບໍລິສັດທີ່ລັດຖະບານອະນຸມັດໂຄງການສຳປະທານຂຸດຄົ້ນທົ່ວ ໄປ 83 ບໍລິສັດ 145 ກິດຈະການ. ວຽກງານໂຍທາທິການ ແລະ ຂົນສົ່ງ. ນັບແຕ່ ປີ 1975 ເປັນ ຕົ້ນມາ ໂດຍເລີ່ມຈາກແນວທາງອັນພື້ນຖານຂອງພັກເຮົາທີ່ວ່າ “ວຽກງານຄົມມະນາຄົມເປັນປາຍແຫຼມໃຫ້ແກ່ການພັດທະນາປະເທດຊາດ” ສະນັ້ນ, ວຽກງານຄົມມະນາຄົມໃນທົ່ວປະເທດກໍໄດ້ຮັບການປັບປຸງ ແລະ ຂະຫຍາຍຕົວຢ່າງຕໍ່ເນື່ອງທັງນັບມື້ມີຄວາມສາມາດເຊຶ່ອມຕໍ່ກັບອະນຸພາກພື້ນ, ເສັ້ນທາງແລວເສດຖະກິດຕາເວັນອອກ-ຕາ ເວັນຕົກ, ເໜືອ-ໃຕ້ມີເສັ້ນທາງໄປຮອດເຂດຈຸດສຸມໄປຮອດທຸກແຂວງ, ທຸກເມືອງ, ບ້ານ ແລະ ກຸ່ມບ້ານ. ປີ 1976 ທົ່ວປະເທດມີຄວາມຍາວຂອງເສັ້ນທາງພຽງແຕ່ 12.000 ກວ່າກິໂລແມັດ, ຮອດປີ 2019 ມີຄວາມຍາວຂອງເສັ້ນທາງທັງໝົດ 60.340.000 ກິໂລແມັດ, (ໃນນີ້ ທາງປູເບຕົງປູຢາງອັດສະຟານ ແລະ ປູຢາງ 11.637,77 ກິໂລແມັດ ສາມາດທຽວໄດ້ຕະລອດປີໄປເຖິງທຸກເມືອງໃນທົ່ວປະເທດ. ໃນນີ້, ມີເສັ້ນທາງປູຢາງໄປເຖິງທຸກເທສະບານແຂວງໃນທົ່ວປະເທດ ແລະ ມີ 138 ເມືອງ ມີເສັ້ນທາງປູຢາງເຂົ້າເຖິງ ເຊິ່ງກວມເອົາ 93,2%. ການຂົນສົ່ງສິນຄ້າ ແລະ ຂົນສົ່ງໂດຍສານກໍ່ຂະຫຍາຍຕົວເພີ່ມຂຶ້ນ, ບໍລິມາດການຂົນສົ່ງໂດຍສານປະຕິບັດ ໄດ້ 3.848 ພັນຄົນ, ຂົນ ສົ່ງສິນຄ້າປະຕິບັດໄດ້ 2.651 ພັນໂຕນ. ປີ 2021 ການຂົນສົ່ງຄົມມະນາຄົມ ແມ່ນໄດ້ຮັບຜົນກະທົບຈາກການລະບາດຂອງພະ ຍາດ ໂຄວິດ-19 ສົ່ງຜົນກະທົບໃຫ້ກັບການບໍລິການຂົນສົ່ງສິນຄ້າທາງບົກທາງນໍ້າ, ທາງອາກາດ ປະຕິບັດໄດ້ 4.395,10 ພັນໂຕນ ເທົ່າກັບ 38,54% ຂອງ ແຜນການ ແລະ ການຂົນສົ່ງຜູ້ໂດຍສານທຸກເສັ້ນທາງປະຕິບັດໄດ້ 46.216,20 ພັນຄົນ ເທົ່າກັບ 41,69% ເທົ່າກັບ 41,69% ຂອງແຜນການ ຄາດວ່າທ້າຍປີ ຈະສາມາດປະຕິບັດໄດ້ຕື່ມ 5.190,20 ພັນໂຕນ ແລະ 64.930 ພັນຄົນ ໂຄງການທາງດ່ວນ ນະຄອນຫຼວງວຽງຈັນ-ວັງວຽງ ມີຄວາມຍາວ 109 ກິໂລແມັດ ໄດ້ເປີດນຳໃຊ້ຢ່າງເປັນທາງການ ໃນປີ 2020 ແລະ ເສັ້ນທາງລົດໄຟຄວາມໄວສູງແຕ່ບໍ່ເຕັນ-ນະຄອນຫຼວງວຽງຈັນ ມີຄວາມຍາວ 426,5 ກິໂລແມັດ ໄດ້ເປີດນຳໃຊ້ແຕ່ປີ 2021 ໃນໄລຍະ 1 ປີຜ່ານມາ, ສາມາດຂົນສົ່ງ ຜູ້ໂດຍສານໄດ້ 739 ລ້ານເທື່ອຄົນ ແລະ ການຂົນສົ່ງສິນຄ້າສະສົມໄດ້ 851 ລ້ານໂຕນ. ປັດຈຸບັນໂຄງການກໍ່ສ້າງຂົວຂ້າມນ້ຳຂອງ ມິດຕະພາບ ລາວ-ໄທ ແຫ່ງທີ V ແຂວງບໍລິຄຳໄຊ ຫາ ແຂວງບຶງການ (ປະເທດໄທ) ແມ່ນໄດ້ເລີ່ມສ້າງຂື້ນມາແຕ່ເດືອນສິງຫາ 2019 ແລະ ມາຮອດປັດຈຸບັນມີຄວາມຄືບໜ້າ ຫຼາຍກວ່າ 56%, ຄາດຄະເນ ຈະສຳເລັດ ແລະ ເປີດນຳໃຊ້ ໃນຕົ້ນປີ 2024. ລັດຖະບານ ສປປ ລາວ ໄດ້ເຫັນດີເປັນເອກະພາບຕາມການກຳນົດເອົາແລວຂົວລົດໄຟແຫ່ງໃໝ່ ເຊິ່ງຫ່າງຈາກຂົວມິດຕະພາບ ລາວ-ໄທ ແຫ່ງທີ1 ໄປທາງໃຕ້ ຕາມທິດລຸ່ມນ້ຳໄຫຼ 30 ແມັດ ສຳລັບການ ອອກແບບ ແລະ ການກໍ່ສ້າງຂົວທາງລົດໄຟແຫ່ງໃໝ່ນີ້ ຈະເປັນຂົວສະເພາະຮັບໃຊ້ລົດໄຟ ເຊິ່ງບໍ່ລວມເອົາ ລົດໂອໂຕ ແລະ ຈະຮອງຮັບເອົາລົດໄຟຂະໜາດ 1,435 ແມັດ ແລະ ທາງລົດໄຟ 1 ແມັດ ໃນຂົວດຽວກັນ. ລະບົບນ້ຳປະປາ ກໍໄດ້ຂະຫຍາຍຕົວລົງສູ່ເທດສະບານຂອງບັນດາເມືອງໃນທົ່ວປະເທດ ແລະ ຢູ່ ເຂດຊຸມຊົນ ກໍຄືກຸ່ມບ້ານໃຫຍ່ຈຳນວນໜຶ່ງ, ປະຊາກອນທີ່ອາໄສຢູ່ໃນຕົວເມືອງໄດ້ຊົມໃຊ້ນ້ຳປະປາທີ່ ສະອາດປອດໄພໄດ້ 80%, ປັດຈຸບັນທົ່ວປະເທດ ໄດ້ມີໂຮງງານຜະລິດນ້ຳປະປາ 163 ແຫ່ງມີກຳລັງ ການຜະລິດ 674,232 ມໍ້ຕໍ່ວັນ ສາມາດສະໜອງນ້ຳປະປາໃຫ້ປະຊາກອນໃນຕົວເມືອງ ກວມ 76%ວຽກງານໄປສະນີ - ໂທລະຄົມມະນາຄົມ ແລະ ການສື່ສານ. ວຽກງານໄປສະນີ-ໂທລະຄົມມະນາຄົມ ແລະ ການສື່ສານ ໄດ້ຂະຫຍາຍຕົວໄວສົມຄວນ ແລະ ນັບມື້ນັບຫັນເປັນທັນສະໄໝເມື່ອທຽບໃສ່ປີ 1975 ເຊິ່ງມາຮອດປັດຈຸບັນແຕ່ລະເມືອງສາມາດນຳໃຊ້ ໂທລະ ສັບໄດ້ 100%. ຂະຫຍາຍຕາໜ່າງໄປສະນີ ໄດ້ 128 ກວ່າເມືອງມີຫ້ອງການ ໄປສະນີ 160 ແຫ່ງ, ຂະຫຍາຍ ສະ ຖານີຮັບສົ່ງສັນຍານໂທລະສັບມືຖືໄດ້ 1,106 ສະຖານີ ລວມທັງໝົດ 7.882 ສະຖານີ ເຮັດໃຫ້ເຄືອຄ່າຍສັນຍານໂທລະສັບມືຖື 2G-3G ແລະ 4G ຄວບຄຸມ 95%, 81% ແລະ 53% ຕາມລຳດັບຂອງ ບ້ານທັງໝົດໃນຂອບເຂດທົ່ວປະເທດ. ການພັດທະນາ ແລະ ປັບປຸງລະບົບຫ້ອງການທັນສະໄໝ ( EOFFICEV2) ແລະ ຂະຫຍາຍການນຳໃຊ້ລະບົບຫ້ອງການທັນສະໄໝໄປ ໃນ18 ພາກສ່ວນຂອງພະແນກເຕັກໂນໂລຊີ ແລະ ການສື່ສານແຂວງ, ນະຄອນຫຼວງວຽງຈັນ, ໄດ້ພັດທະນາລະບົບປະຊຸມທາງໄກ ເພື່ອຮັບໃຊ້ທາງວິຊາການ ແລະ ການຮຽນການສອນ ໂດຍສະເພາະການນຳໃຊ້ຂອງພາກລັດ ແລະ ອົງການຕ່າງໆການເປີດໃຊ້ບໍລິການລະບົບ 5G ໃນປີຜ່ານມາ, ກໍຄືສາຍກາບໄຍແສງ (OpticFiber) ໄດ້ 90, 258 ກິໂລແມັດ; ລົງທະບຽນນຳໃຊ້ ໂທລະສັບມືຖື-ຕັ້ງໂຕະ 6,090,188 ໝາຍເລກ, ຈຳນວນຜູ້ ລົງທະບຽນໃຊ້ອິນເຕີເນັດ 3,540,020 ບັນຊີ, ມີຜູ້ໃຊ້ໂທ ລະສັບມືຖືຜ່ານຊິມໂທ ແລະ ຊິມເນັດ ທັງໝົດ 9.5 ລ້ານເລກໝາຍ ເທົ່າກັບ 136% ທຽບໃສ່ປະຊາກອນລາວ ແລະ ມີປະຊາກອນທີ່ກຳລັງໃຊ້ອອນລາຍ ເຖິງ 50%, ໃນວັນທີ 21 ພະຈິກ 2015 ສຳເລັດການສົ່ງດາວທຽມຂອງ ສປປ ລາວ ຄັ້ງທຳອິດໃນຕຳ ແໜ່ງວົງໂຄຈອນ ວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ. ພາຍຫຼັງປະເທດຊາດໄດ້ຮັບການປົດປ່ອຍ, ພັກ-ລັດ ເຮົາໄດ້ໃຫ້ຄວາມສຳຄັນຂອງວຽກງານຊັບພະຍາກອນທຳມະຊາດ ແລະ ສິ່ງແວດລ້ອມຫຼາຍຂຶ້ນ ໂດຍໄດ້ວາງນະ ໂຍບາຍ ແລະ ກົນໄກທີ່ກ່ຽວພັນກັບ ວຽກງານດັ່ງກ່າວຢ່າງເປັນລະບົບຕໍ່ເນື່ອງ ພ້ອມທັງຈັດຕັ້ງປະຕິບັດມີຜົນສຳເລັດເປັນກ້າວໆ, ອັນພົ້ນເດັ່ນ ແມ່ນທີ່ດິນປະເພດຕ່າງໆໄດ້ຮັບການເອົາໃຈໃສ່ຄຸ້ມຄອງ ແລະ ນຳໃຊ້ດ້ານກົດໝາຍ ໄດ້ກາຍເປັນຖານລາຍ ຮັບສຳຄັນ ແລະ ໝັ້ນຄົງຂອງປະເທດເຮົາໃນເງື່ອນໄຂໃໝ່. ປີ 2020 ສາມາດອອກໃບຕາດິນໄດ້ຈຳນວນ 610.000 ກວ່າຕອນ ໃນຂອບເຂດທົ່ວປະເທດ. ສຳເລັດການພັດທະນາໂປຼແກມຈົດທະບຽນທີ່ດິນ ແລະ ນຳໃຊ້ທີ່ດິນໃນ 130 ເມືອງ ໃນທົ່ວປະເທດສ້າງ ນິຕິກຳຕ່າງໆທີ່ກ່ຽວຂ້ອງກັບການປົກປັກຮັກສາສິ່ງແວດລ້ອມຫຼາຍສະບັບ ແລະ ສ້າງແຜນແມ່ບົດການ ປັບປຸງວຽກງານອຸຕຸນິຍົມ-ອຸທົກກະສາດ. ຮອດປີ 2021 ສາມາດຂຶ້ນທະບຽນອອກໃບຕາດິນໃນຂອບເຂດທົ່ວປະເທດ ໄດ້ທັງໝົດ 60.000 ຕອນ, ເທົ່າກັບ 75 % ຂອງແຜນການ ( ມະຕິສະພາ 80.000 ຕອນ) ແລະ ຄາດຄະເນໝົດປີ ຈະປະຕິບັດໄດ້ ຈຳນວນ 90.000 ຕອນລື່ນແຜນການ 12,50%. 3). ຂົງເຂດວັດທະນະທຳ-ສັງຄົມ, (1) ວຽກງານການສຶກສາທິການ ແລະ ກິລາ. ການສຶກສາໄດ້ຮັບການພັດທະນາເປັນກ້າວໆ ນັບທັງດ້ານປະລິມານ ແລະ ຄຸນນະພາບ.ຈຳນວນໂຮງຮຽນລ້ຽງເດັກ ໃນປີ 1990 ມີ 858 ແຫ່ງ2000 ມີ 758 ແຫ່ງ, 2005 ມີ 969 ແຫ່ງ, 2010 ມີ 1.284 ແຫ່ງ, ປີ 2020 ມີ 3.496 ແຫ່ງ ແລະ ມີນັກຮຽນ 245.849 ຄົນ. ໂຮງຮຽນສາມັນສຶກສາ ໃນປີ 1990 ມີ 7,117 ແຫ່ງ, 2000 ມີ 10,696 ແຫ່ງ, 2010 ມີ 10, 204 ແຫ່ງປີ 2015 ມີ 10.547 ແຫ່ງ ແລະ ປີ 2020 ມີ 10.639 ແຫ່ງ, ມີນັກຮຽນ 1.395,280 ຄົນ. ອະຊີວະສຶກສາ ແລະ ສູນອົບຮົມວິຊາຊີບ; ປີ 2019 ມີໂຮງຮຽນອະຊີວະສຶກສາ 106 ແຫ່ງ, ມີ ນັກຮຽນ 741.563 ຄົນ. ມີໂຮງຮຽນວິຊາຊີບ 101 ແຫ່ງ ໃນນັ້ນພາກເອກະຊົນມີ 73 ແຫ່ງ ມີ 4 ລະບົບຄື: ຊັ້ນຕົ້ນ, ຊັ້ນກາງ, ຊັ້ນສູງ ແລະ ເຊື່ອມຕໍ່ປະລິນຍາຕີ. ການສຶກສາຊັ້ນສູງ ແລະ ມະຫາວິທະຍາໄລ: ສົກປີ 2018 - 2019 ທົ່ວປະເທດມີ ມະຫາ ວິທະຍາ ໄລທັງໝົດ 5 ແຫ່ງ, ໃນນັ້ນ 4 ແຫ່ງຂຶ້ນກັບກະຊວງສຶກສາທິການ, 1 ແຫ່ງຂຶ້ນກັບກະຊວງ ສາທາລະນະສຸກ; ໂຮງຮຽນວິທະຍາໄລມີ 133 ແຫ່ງ, ໂຮງຮຽນສ້າງຄູມີ 12 ແຫ່ງ ນັບທັງຄະນະສຶກສາ ສາດ ຂອງມະຫາວິທະຍາໄລແຫ່ງຊາດ. ດ້ານກິລາ - ກາຍະກຳ: ມີການຂະຫຍາຍຕົວຢ່າງກວ້າງຂວາງນັບແຕ່ສູນກາງເຖິງທ້ອງຖິ່ນ ແລະ ມີປວງຊົນເຂົ້າຮ່ວມໃນວຽກງານດັ່ງກ່າວນັບມື້ຫຼາຍ ປັດຈຸບັນໃນທົ່ວປະເທດພວກເຮົາມີສະໜາມກິລາທີ່ ໄດ້ມາດຕະຖານລະດັບຊາດ 4 ແຫ່ງ, ມາດຕະຖານລະດັບແຂວງ 10 ແຫ່ງ; ມີສະຫະພັນກິລາແຫ່ງຊາດ ທັງໝົດ 39 ສະຫະພັນ ແລະ 1 ສະມາຄົມກິລາຄົນພິການ. ຜົນສຳເລັດຫຼາຍປະການໃນວຽກງານກິລາ - ກາຍະກຳອັນໄດ້ສ້າງນັກກິລາ, ການແຂ່ງຂັນກິລາ ປະເພດຕ່າງໆນັບທັງພາຍໃນ ແລະ ຕ່າງປະເທດ. ພິເສດ ສປປ ລາວ ໄດ້ຮັບກຽດເປັນເຈົ້າພາບຈັດງານ ແຂ່ງຂັນກິລາຊີເກມຄັ້ງທີ 25 ປີ 2009 ຊຶ່ງຍາດໄດ້ 33 ຫຼຽນຄຳ ເປັນຄັ້ງປະຫວັດສາດ ຂອງວົງການກິລາ ຊາດລາວ, ເປັນເຈົ້າພາບຈັດການງານແຂ່ງຂັນກິລາມະຫາວິທະຍາໄລອາຊຽນຄັ້ງທີ 16 ແລະ ງານ ແຂ່ງຂັນອື່ນໆ ແລະ ໄດ້ເຂົ້າຮ່ວມງານແຂ່ງຂັນກິລາໃນລະດັບປະເທດ, ລະດັບພາກພື້ນ ແລະ ສາກົນນັບມື້ ຫຼາຍຂຶ້ນ. (2) ວຽກງານສາທາລະນະສຸກ. ພັກ ແລະ ລັດຖະບານ ໄດ້ເອົາໃຈໃສ່ຫັນເອົາວຽກງານສາທາລະນະສຸກໄປສູ່ຮາກຖານປະຊາຊົນ, ຖືເອົາການກັນພະຍາດສົ່ງເສີມສຸຂະພາບເປັນຕົ້ນຕໍ ແລະ ຖືເອົາການປິ່ນປົວທີ່ມີຄຸນນະພາບ ແລະ ສະ ໜອງການບໍລິການດ້ານສາທາລະນະສຸກຢ່າງທົ່ວເຖິງເປັນສຳຄັນ, ປະຕິບັດລະບອບປິ່ນປົວບໍ່ເສຍຄ່າຕໍ່ເປົ້າ ໝາຍທີ່ທຸກຍາກຂາດເຂີນ ແລະ ດ້ອຍໂອກາດ ຕາໜ່າງສາທາລະນະສຸກ ໄດ້ຂະຫຍາຍຕົວໄປເຖິງກຸ່ມບ້ານ. ໃນປີ 1986 ໂຮງໝໍຂັ້ນສູນກາງ 4 ແຫ່ງ, ປີ 2000 ມີໂຮງໝໍ 141 ແຫ່ງ, ມີສຸກສາລາ 533 ແຫ່ງ ເພີ່ມຂຶ້ນ 4,8 ເທື່ອ ທຽບໃສ່ ປີ 1976, ປີ 2010 ມີໂຮງໝໍ 147 ແຫ່ງ, ສຸກສາລາ ມີ 862 ແຫ່ງ, ປີ 2015 ມີໂຮງໝໍສູນກາງ 5 ແຫ່ງ, ແຂວງ 17 ແຫ່ງເມືອງ 1148 ແຫ່ງ ແລະ ສຸກສາລາ 959 ແຫ່ງໃນປີ 2021 ທົ່ວປະເທດມີ ສຸກສາລາ 1.223 ແຫ່ງ, ມີໂຮງໝໍເມືອງ 135 ແຫ່ງ, ໂຮງໝໍແຂວງ 18 ແຫ່ງໂຮງໝໍສູນກາງ 8 ແຫ່ງ ແລະ ສູນບໍລິການປິ່ນປົວສະເພາະ 7 ແຫ່ງ (ສູນການແພດຟື້ນຟູໜ້າທີ່ການ, ໄຂ້ຍຸງ, ຕາ, ວັນນະໂລກ, ວິເຄາະ ແລະ ລະບາດວິທະຍາ, ຜິວໜັງ, ເອສ ແລະ ອື່ນໆ); ມີບ້ານ ສາທາລະນະສຸກ 6.421 ບ້ານ, ປະຊາຊົນສາມາດເຂົ້າເຖິງການບໍລິການ ດ້ານສາທາລະນະສຸກ ໃນຂອບ ເຂດທົ່ວປະເທດ; ປະຊາຊົນຊົມໃຊ້ນ້ຳສະອາດ 85,87% ແລະ ການຊົມໃຊ້ວິດຖ່າຍຄົວເຮືອນ 75,9%. 2020-2022 ຜ່ານມານີ້, ຂະແໜງສາທາລະນະສຸກ ໄດ້ຮັບມືກັບການລະບາດຂອງພະຍາດໂຄ ວິດ-19 ໄດ້ດີເຮັດໃຫ້ຜູ້ຕິດເຊື້ອພະຍາດໂຄວິດຫຼຸກລົງ ໂດຍໄດ້ຈັດຕັ້ງປະຕິບັດການໃຫ້ບໍລິການສັກວັກ ຊິນກັນພະຍາດໂຄວິດ-19 ເຂັມທີ1 ໄດ້ 6,008,121 ໂດສ ອັດຕາປົກຄຸມ 81,9% ,ເຂັມທີ 2 ແມ່ນໄດ້ 2,366,651 ໂດສ ອັດຕາປົກຄຸມ 73.1% ແລະ ມີແຜນຂະຫຍາຍການສັກວັກຊິນໃຫ້ກຸ່ມອາຍຸ 9-11 ປີ ແລະ 12-17 ປີ, ຄາດໝາຍປີ 2022 ໃຫ້ບັນລຸຫຼາຍກວ່າ 70% ຂອງປະຊາກອນໃນທົ່ວປະເທດ ນອກຈາກນີ້ ຕົວເລກສະສົມຂອງພະຍາດໄຂ້ຍຸງລາຍທົ່ວປະເທດມີ ທັງໝົດ 30,413 ກໍລະນີ ແລະ ເສຍ ຊີວິດ 24 ຄົນ. ກອງທຶນປະກັນສຸຂະພາບແຫ່ງຊາດ ຂະຫຍາຍກວມເອົາ 17 ແຂວງ, ເທົ່າກັບ 71% ຂອງປະຊາ ກອນຖ້າລວມທັງ ອປສ ແລະ ອປລ ແມ່ນກວມຮອດ 94%, ຊຶ່ງເຫັນວ່າຕາໜ່າງບໍລິການສາທາລະນະສຸກ ໄດ້ມີການຂະຫຍາຍປົກຄຸມເພີ່ມຂຶ້ນ. (3) ວຽກງານຖະແຫຼງຂ່າວ, ວັດທະນະທຳ ແລະ ການທ່ອງທ່ຽວ. ພັກ ແລະ ລັດຖະບານ ຈຶ່ງໄດ້ເອົາໃຈໃສ່ຊີ້ນຳ - ນຳພາ ເປັນແຕ່ລະໄລຍະຢ່າງເປັນປົກກະຕິເຮັດໃຫ້ວຽກງານດັ່ງກ່າວຂະຫຍາຍຕົວທັງດ້ານຈຳນວນ ແລະ ຄຸນນະພາບ ປີ 1975 ມີສື່ສິ່ງພິມທັງໝົດ ພຽງແຕ່ 5 ສະບັບ, ຮອດປີ 2022 ມີສື່ສິ່ງທັງໝົດ 152 ສະບັບ ລວມທັງວາລະສານ, ໃບຂ່າວ, ໜັງສືພິມຢູ່ຂັ້ນສູນກາງ ແລະ ທ້ອງຖິ່ນໃນຂອບເຂດທົ່ວປະເທດ. ປີ 1975 ວິທະຍຸກະຈາຍສຽງ ມີສະຖານີວິທະຍຸກະຈາຍສຽງ 8 ສະຖານີ. ປີ 2022 ທົ່ວປະເທດ ມີສະຖານີວິທະຍຸທັງໝົດ 82 ສະຖານີ ຊຶ່ງແຜ່ກະແສຄື້ນກວມເອົາ 98% ຂອງພື້ນທີ່ທົ່ວປະເທດ; ໂທລະພາບ ສະຖານີໂທລະພາບແຫ່ງຊາດລາວ ໄດ້ຮັບການສ້າງຕັ້ງຂຶ້ນ ວັນທີ 1 ທັນວາ 1983. ປີ 2022 ມີສະຖານີໂທລະພາບທັງໝົດ 45 ສະຖານີ, ໄດ້ຕິດຕັ້ງລະບົບໂທລະໂຄງຢູ່ບ້ານ ຊຸມຊົນທັງໝົດ 5,918 ຊຸດ ໃນ 148 ເມືອງໃນຊອບເຂດທົ່ວປະເທດ. ວັດທະນະທຳ: ພັກໄດ້ມີທັດສະນະວ່າ: “ ວັດທະນະທຳເປັນພື້ນຖານແຫ່ງຄວາມຍືນຍົງຄົງຕົວ ຂອງຊາດ, ເປັນກຳລັງດັນໃຫ້ສັງຄົມຂະຫຍາຍຕົວ ແລະ ເປັນຈຸດໝາຍຂອງການພັດທະນາສັງຄົມ “. ພັກ- ລັດໄດ້ ເອົາໃຈໃສ່ຊີ້ນຳ-ນຳພາວຽກງານຂະຫຍາຍຕົວຢ່າງຮອບດ້ານ ຟື້ນຟູ ແລະ ກໍ່ສ້າງວັດທະນະທຳແຫ່ງ ຊາດ, ປຸກລະດົມຊຸກຍູ້ ແລະ ສົ່ງເສີມຂະບວນວັດທະນະທຳ, ສິລະປະວັນນະກຳ ທີ່ມີລັກສະນະຊາດ, ກ້າວໜ້າ ແລະ ລັກສະນະມະຫາຊົນ ໃຫ້ກາຍເປັນພື້ນຖານວັດທະນະທຳຂອງລະບອບໃໝ່. ປີ 2021 ໃນທົ່ວປະເທດມີຄອບຄົວວັດທະນະທຳ 963.543 ຄອບຄົວ ແລະ ປີ 2021 ເພີ້ມຂຶ້ນ 6.345 ຄອບຄົວ ເທົ່າກັບ 105% ຂອງຄອບຄົວທົ່ວປະເທດບ້ານວັດທະນະທຳ ເພີ້ມຂື້ນ 80 ບ້ານ ເທົ່າກັບ 53,33% ລວມ 6.455 ບ້ານ ຂອງບ້ານຂອບເຂດທົ່ວປະເທດ. ການທ່ອງທ່ຽວ: ເປັນທ່າແຮງອັນສຳຄັນໃນການສ້າງລາຍຮັບເຂົ້າງົບປະມານ. ລັດຖະບານໄດ້ ກຳນົດການພັດທະນາການທ່ອງທ່ຽວເຂົ້າໃນ 8 ແຜນງານບູລິມະສິດ ເພື່ອພັດທະນາເສດຖະ ກິດ - ສັງຄົມ ໃຫ້ມີບາດກ້າວຂະຫຍາຍຕົວຂຶ້ນ. ນັບແຕ່ປີ 1989 ເປັນຕົ້ນມາ ພັກ ແລະ ລັດໄດ້ສົ່ງເສີມການທ່ອງທ່ຽວ, ສະຖານທີ່ທ່ອງທ່ຽວແຫ່ງຕ່າງໆໄດ້ຮັບການພັດທະນາສາມາດດຶງດູດເອົານັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ອງທ່ຽວສະຖານທີ່ຕ່າງໆນັບມື້ນັບຫຼາຍຂຶ້ນ. ປີ 2012 ປະເທດເຮົາ ໄດ້ເປີດປີທ່ອງ ທ່ຽວລາວ ແລະ ເປັນເຈົ້າພາບຈັດກອງປະຊຸມລັດຖະມົນຕີທ່ອງທ່ຽວອາຊຽນ ແລະ ງານວາງສະແດງ ການທ່ອງທ່ຽວອາຊຽນ ແລະ ອື່ນໆ. ດ້ານການບໍລິການການອະນຸລັກການຮັກສາສະພາບສິ່ງແວດລ້ອມ ທາງດ້ານວັດທະນະທຳ ແລະ ທຳມະຊາດ, ເຮັດໃຫ້ ສປປ ລາວ ໄດ້ຮັບລາງວັນດີເດັ່ນ “ ເປັນປະເທດທີ່ ໜ້າທ່ອງທ່ຽວທີ່ສຸດໃນໂລກ ສຳລັບປີ 2013 “ ຈາກສະພາການທ່ອງທ່ຽວ ແລະ ການຄ້າ ປີ 2019 ມີນັກ ທ່ອງທ່ຽວເຂົ້າມາລາວທັງໝົດ ປະມານ 4,1 ລ້ານເທື່ອ ສ້າງລາຍຮັບຈາກການທ່ອງທ່ຽວໄດ້ກວ່າ 700 ລ້ານໂດລາ, ສຽງແຄນລາວໄດ້ເປັນມໍລະດົກໂລກທາງດ້ານວັດທະນະທຳນາມມະທຳ ແລະ ມີທົ່ງໄຫຫີນ ເຂົ້າເປັນມໍລະດົກໂລກ; ສົມທົບກັບອົງການ ອຸຍແນສໂກ ແລະ ຊ່ຽວຊານ ສສ ຫວຽດນາມ ເພື່ອສະເໜີເອົາປ່າສະຫງວນແຫ່ງຊາດ ພູຫີນໜາມໜໍ່ ຢູ່ເມືອງບົວລະພາ ແຂວງຄຳມ່ວນ ເຂົ້າເປັນມໍລະດົກໂລກ ທາງ ດ້ານທຳມະຊາດ ແຫ່ງທຳອິດ ຂອງ ສປປ ລາວ, ທັງເປັນມໍລະດົກຂ້າມຊາຍແດນ ກັບມໍລະດົກໂລກ ຟອງ ຍາແກບາງ ແຂວງກວາງບິງ ຂອງ ສສ ຫວຽດນາມ ຕື່ມອີກ. ໃນປີ 2021 ການທ່ອງທ່ຽວພົບຄວາມຫຍຸ້ງຍາກ ຍ້ອນການແຜ່ລະບາດຂອງພະຍາດໂຄວິດ-19 ຮອບໃໝ່ ເຮັດໃຫ້ນັກທ່ອງທ່ຽວໄດ້ຮັບຜົນກະທົບຢ່າງໜັກ ແລະ ບໍ່ສາມາດດຶງດູດນັກທ່ອງທ່ຽວໃຫ້ເຂົ້າ ມາປະເທດໄດ້ຕາມແຜນທີ່ວາງໄວ້. ເລີ່ມແຕ່ເດືອນ 5 ປີ 2022 ປະຕິບັດຕາມມາດຕະການເປີດປະເທດມີ ນັກທ່ອງທ່ຽວເຂົ້າມາທ່ອງທ່ຽວບັນລຸໄດ້ 1.681.000 ຄົນ. (4) ວຽກງານແຮງງານ - ສະຫວັດດີການສັງຄົມ. ໄດ້ຮັບການປັບປຸງດີຂຶ້ນເປັນກ້າວໆ ລັດຖະບານໄດ້ເພີ່ມຄ່າແຮງງານຂຶ້ນໃຫ້ຜູ້ອອກແຮງງານ ໃຫ້ຖືກກັບສະພາບການພັດທະນາເສດຖະກິດ - ສັງຄົມໃນແຕ່ລະໄລຍະ, ເອົາໃຈໃສ່ສ້າງບັນດານິຕິກຳ ເປັນຕົ້ນ ກົດໝາຍວ່າດ້ວຍປະກັນສັງຄົມ, ດຳລັດວ່າດ້ວຍການສ້າງ ແລະ ພັດທະນາສີມືແຮງງານ, ດຳລັດ ວ່າດ້ວຍການສົງເຄາະ, ດຳລັດວ່າດ້ວຍກອງທຶນປະກັນ ແລະ ຄຸ້ມຄອງໄພພິບັດ, ປັບປຸງດຳລັດວ່າດ້ວຍການ ປົກປ້ອງ ແລະ ສິດຜົນປະໂຫຍດຂອງຄົນພິການກົດໝາຍວ່າດ້ວຍການຄຸ້ມຄອງແຮງງານ, ກົດໝາຍວ່າ ດ້ວຍການຈັດຫາງານ ເພື່ອປົກປ້ອງສິດ ແລະ ຜົນປະໂຫຍດຂອງຜູ້ອອກແຮງງານ. ໄດ້ປັບປຸງ ແລະ ກໍ່ສ້າງ ສູນພັດທະນາສີມືແຮງງານ ໃນຂອບເຂດທົ່ວປະເທດ, ໃນທົ່ວປະເທດມີສູນພັດທະນາສີມືແຮງງານ ແລະ ສູນວິຊາຊີບທັງໝົດ 153 ກວ່າແຫ່ງ, ຮອດປີ 2020 ສາມາດພັດທະນາສີມືແຮງງານໄດ້ທັງໝົດ 409.107 ຄົນ, ຍິງ 19.793 ຄົນ ເທົ່າກັບ 62,17%, ສະໜອງແຮງງານເຂົ້າສູ່ຕະຫຼາດແຮງງານຢູ່ພາຍ ໃນ ແລະ ຕ່າງປະເທດໄດ້ທັງໝົດ 553.674 ຄົນ, ຍິງ 240.749 ຄົນ ເທົ່າກັບ 77,31%, ໃນປີ 2021 ການຝຶກສີມືແຮງງານໄດ້ທັງໝົດ 12.305 ຄົນ ລື່ນແຜນ 53,8 1%, ສາມາດສະໜອງແຮງງານເຂົ້າສູ່ ຕະຫຼາດແຮງງານທັງພາຍໃນ ແລະ ຕ່າງປະເທດໄດ້ທັງໝົດ 7.167 ຄົນ ເທົ່າກັບ 25,59% ຂອງ ແຜນການ, ຂະຫຍາຍອັດຕາປົກຄຸມປະກັນສັງຄົມໄດ້ 27.907 ຄົນ, ເທົ່າກັບ 89% ປະຕິບັດນະໂຍ ບາຍຕໍ່ຜູ້ມີຜົນງານ ແລະ ຄຸນງາມຄວາມດີໄດ້ 692 ທ່ານ ເທົ່າກັບ 22,7% ຂອງແຜນການ, ເປັນເງີນ 15.26 ຕື້ກີບ ເທົ່າກັບ 19,51% ຂອງແຜນການ, ເກັບກູ້ລະເບີດບໍ່ທັນແຕກອອກຈາກ ເນື້ອທີ່ການ ຜະລິດ ແລະ ເຂດຊຸມຊົນ, ເຂດຈຸດສຸມເສດຖະກິດ ໄດ້ປະມານ 1,699,21 ເຮັກຕາ ເທົ່າກັບ 26,7%, ແລະ ມີຜູ້ໄດ້ຮັບເຄາະຮ້າຍຈາກອຸບັດເຫດລະເບີດບໍ່ທັນແຕກຕົກຄ້າງ ຈຳນວນ 25 ຄົນ ແລະ ສາມາດ ລະດົມ ແລະ ຮັບບໍລິຈາກເລືອດ ໄດ້ປະມານ 44.157 ຖົງ ເທົ່າກັບ 68,56%. ໄດ້ປະຕິບັດນະໂຍບາຍ ອຸດໜູນວ່າງງານຕໍ່ຜູ້ປະກັນຕົນທີ່ໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19 ໃນ 9 ເດືອນປີ 2021, ມີ 719 ບໍລິສັດ/ຫົວໜ່ວຍແຮງງານມີຜູ້ປະກັນຕົນໄດ້ຮັບນະໂຍບາຍ 36.025 ເທື່ອ ຄົນ ເປັນເງິນ ທັງໝົດ 28.930 ລ້ານກີບ. ມາຮອດປະຈຸບັນ, ໄດ້ປະຕິບັດນະໂຍບາຍອຸດໜູນວ່າງງານ ສະເພາະໂຄວິດ-19 ທັງ ໝົດ 867 ບໍລິສັດ/ຫົວໜ່ວຍແຮງງານ, ມີຜູ້ອອກແຮງງານ 48.966 ເທື່ອຄົນ, ເປັນເງິນທັງໝົດ 42.187 ລ້ານກີບ. ການສ້າງວຽກເຮັດງານທຳ, ການຈັດຫາງານ ນັບແຕ່ເດືອນມີນາ 2020 ເປັນຕົ້ນມາ ມີຜູ້ອອກແຮງ ງານພາຍໃນໄດ້ຮັບຜົນກະທົບທັງໝົດ 74.104 ເທື່ອຄົນ ໃນຈຳນວນ 1.141 ບໍລິສັດ ແລະ ໄດ້ປະຕິບັດ ນະໂຍບາຍເງິນອຸດໜູນວ່າງງານທັງໝົດ 67,74 ຕື້ກີບ; ສະເພາະ 6 ເດືອນຕົ້ນປີ 2022, ມີຜູ້ໄດ້ຮັບເງິນ ນະໂຍບາຍອຸດໜູນວ່າງງານ 18.965 ເທື່ອຄົນ ເປັນເງິນ 21,28 ຕື້ກີບ. ສຳລັບແຮງງານລາວ ທີ່ກັບຄືນ ປະເທດມີທັງໝົດ 243.095 ຄົນ; ສະເພາະ 6 ເດືອນຕົ້ນປີນີ້, ມີ 21.218 ຄົນ ໃນນັ້ນ ແຮງງານທີ່ໄປຖືກຕ້ອງຕາມບົດບັນທຶກຄວາມເຂົ້າໃຈຂອງສອງຝ່າຍ ມີ 83.322 ຄົນ ແລະ ບໍ່ຖືກຕ້ອງແມ່ນ 159.773 ຄົນ; ໄດ້ສ້າງສູນຊ່ວຍເຫຼືອສຸກເສີນຢູ່ຂັ້ນສູນກາງ ແລະ ແນະນຳໃຫ້ຂະແໜງແຮງງານ ແລະ ສະຫວັດດີ ການສັງຄົມຂອງແຂວງ, ຂອງເມືອງ ໃນການຂຶ້ນທະບຽນ ເພື່ອຈັດເຂົ້າສູ່ຕຳແໜ່ງງານພາຍໃນ ແລະ ຈັດຕັ້ງ ການຝຶກຝີມືແຮງງານ ເພື່ອເຂົ້າສູ່ຕຳແໜ່ງງານ ແລະ ປະກອບອາຊີບອິດສະຫຼະ ຊຶ່ງສາມາດຈັດຫາວຽກເຮັດ ງານທຳໄດ້ທັງໝົດ 13.802 ຄົນ ແລະ ຈັດສົ່ງແຮງງານໄປເຮັດວຽກຢູ່ຕ່າງປະເທດໄດ້ 13.361 ຄົນ (5) ວຽກງານນິຕິບັນຍັດ. ນັບແຕ່ມື້ສ້າງຕັ້ງສະພາປະຊາຊົນສູງສຸດ ໃນວັນທີ 2 ທັນວາ 1975 ໃນເມື່ອກ່ອນກໍ່ຄືສະພາແຫ່ງ ຊາດໃນປັດຈຸບັນ ແລະ ສະພາປະຊາຊົນຂັ້ນແຂງ ໃນຖານະເປັນຕົວແທນສິດຜົນປະໂຫຍດຂອງປະຊາຊົນ ໄດ້ມີບົດບາດພົ້ນເດັ່ນກ່ອນເກົ່າໃນການເຄື່ອນໄຫວຄົ້ນຄວ້າ ແລະ ຕົກລົງບັນຫາສຳຄັນຕົວຈິງຂອງຊາດກໍ່ຄື ທ້ອງຖິ່ນຕາມພາລະບົດບາດຂອງຕົນ. ອົງການບໍລິຫານລັດໄດ້ເພີ່ມທະວີຄວາມເຂັ້ມງວດໃນການຄຸ້ມຄອງເສດຖະກິດ-ສັງຄົມ ສ້າງ ພື້ນຖານອັນເຂັ້ມແຂງໃຫ້ແກ່ການຫັນໄປສູ່ການຄຸ້ມຄອງລັດຕາມກົດໝາຍ ແລະ ເປັນການຈັດຕັ້ງປະຕິບັດ ຕົວຈິງທີ່ສອດຄ່ອງກັບເປົ້າໝາຍສ້າງລັດປະຊາທິປະໄຕປະຊາຊົນ ທີ່ປົກຄອງດ້ວຍກົດໝາຍ ປີ 2022 ພວກເຮົາມີກົດໝາຍທີ່ປະກາດໃຊ້ທັງໝົດ 169 ກວ່າສະບັບ, ລັດຖະບັນຍັດ 40 ກວ່າສະບັບ, ດຳລັດ 160 ກວ່າສະບັບ ແລະ ນິຕິກຳອື່ນໆ 190 ກວ່າສະບັບ. 4. ວຽກງານປ້ອງກັນຊາດ - ປ້ອງກັນຄວາມສະຫງົບ. ພາລະກິດການປົກປັກຮັກສາປະເທດຊາດ ແມ່ນໜຶ່ງໃນສອງໜ້າທີ່ຍຸດທະສາດສຳຄັນຂອງປະເທດ ພວກເຮົາ. ສະນັ້ນ ພັກເຮົາໄດ້ຊີ້ນຳ - ນຳພາໂດຍກົງ, ເດັດຂາດ ແລະ ຮອບດ້ານຕໍ່ກຳລັງປ້ອງກັນຊາດ - ປ້ອງກັນຄວາມສະຫງົບ; ບັນຫາທີ່ເປັນໃຈກາງຕົ້ນຕໍແມ່ນເອົາໃຈໃສ່ສຶກສາອົບຮົມໃຫ້ພະນັກງານ, ນັກຮົບ ມີຄວາມໜັກ ແໜ້ນທາງດ້ານການເມືອງ - ແນວຄິດ, ເຂັ້ມແຂງດ້ານການຈັດຕັ້ງ, ເປັນກຳລັງທີ່ຈົງຮັກ ພັກດີ, ບໍລິສຸດສັດຊື່ຕໍ່ຊາດ, ຕໍ່ພັກຕໍ່ປະຊາຊົນ ແລະ ອຸດົມການສັງຄົມນິຍົມ, ສົມກັບເປັນເຄື່ອງມືອັນ ແຫຼມຄົມຂອງພັກ, ເສີມຂະຫຍາຍທາດແທ້ມູນເຊື້ອປະຕິວັດກຳລັງປະກອບອາວຸດປະຊາຊົນເຮົາຢ່າງບໍ່ຢຸດ ຢັ້ງ, ຕັ້ງໜ້າອົບຮົມ, ຫັດແອບສິລະປະຍຸດ, ຍຸດທະວິທີ ໃຫ້ມີຄວາມຊຳນານ ຕິດພັນກັບການຍົກລະດັບ ຄວາມສາມາດບັນຊາສູ້ຮົບທີ່ມີແບບແຜນທັນສະໄໝເປັນກ້າວໆ ໂດຍສຸມໃສ່ສ້າງທັງ 3 ປະເພດກຳລັງ ໄປພ້ອມໆກັນ, ໃນນັ້ນຕ້ອງສ້າງກຳລັງຫຼວງໃຫ້ເປັນກຳລັງຫຼັກແຫຼ່ງທີ່ເຂັ້ມແຂງ ມີກຳລັງແຮງ ແລະ ຄວາມ ສາມາດສູ້ຮົບມີໄຊໃນທຸກສະຖາ ນະການສ້າງກຳລັງທ້ອງຖິ່ນໃຫ້ເປັນຫົວໜ່ວຍສູ້ຮົບເຂັ້ມແຂງ ນອນຢູ່ ໃນຍຸດທະສາດຂອງທ້ອງຖິ່ນ, ມີກຳລັງແຮງ ແລະ ມີຄວາມສາມາດປົກປັກຮັກສາທ້ອງຖິ່ນຂອງຕົນ; ສ້າງ ກຳລັງກອງຫຼອນ - ກຳລັງປ້ອງກັນຄວາມສະຫງົບບ້ານໃຫ້ມີຄວາມໜັກແໜ້ນ, ມີຄວາມສາມາດເຮັດໜ້າທີ່ ເຄື່ອນໄຫວຮັກສາຄວາມສະຫງົບ, ຕອບຕ້ານ ແລະ ແກ້ໄຂປະກົດການຫຍໍ້ທໍ້ຕ່າງໆທັງໄດ້ສຸມໃສ່ຜັນ ຂະຫຍາຍວາລະແຫ່ງຊາດ ວ່າດ້ວຍບັນຫາຢາເສບຕິດ ອອກເປັນນິຕິກຳ, ແຜນງານ ແລະ ແບ່ງຄວາມ ຮັບຜິດຊອບລະອຽດ ເຊິ່ງໄດ້ເລີ່ມຈັດຕັ້ງປະຕິບັດຢ່າງຈິງຈັງ ແຕ່ເດືອນສິງຫາ ປີ 2001 ເປັນຕົ້ນມາ ໄດ້ມີ ຄວາມຄືບໜ້າໃນຫຼາຍດ້ານ ເປັນຕົ້ນ: ທຳລາຍແຫຼ່ງການຜະລິດ, ເຄືອຂ່າຍການຂົນສົ່ງ ແລະ ຈຳໜ່າຍ ໄດ້ ເປັນຈຳນວນຫຼວງຫຼາຍ. 5. ວຽກງານການຕ່າງປະເທດ. ສປປ ລາວ ໄດ້ເປີດກວ້າງການພົວພັນກັບຕ່າງປະເທດ ແລະ ຮ່ວມມືສາກົນໂດຍຢຶດໝັ້ນແນວທາງ ການຕ່າງປະເທດ “ສັນຕິພາບ ເອກະລາດ ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍເປັນເຈົ້າການເຊື່ອມໂຍງກັບພາກພື້ນ ແລະ ສາກົນ, ປະກອບສ່ວນຢ່າງຕັ້ງໜ້າເຂົ້າໃນການສ້າງປະຊາຄົມ ອາຊຽນ”; ສົ່ງເສີມການພົວພັນຮ່ວມມືກັບຕ່າງປະເທດແບບຫຼາຍທິດ, ຫຼາຍຝ່າຍ, ຫຼາຍລະດັບ ແລະ ຫຼາຍ ຮູບແບບ ບົນພື້ນຖານຫຼັກການເຄົາລົບຊຶ່ງກັນ ແລະ ກັນ, ຕ່າງຝ່າຍຕ່າງມີຜົນປະໂຫຍດ. ການເຄື່ອນໄຫວພົວພັນຢ່າງຕັ້ງໜ້າໃນຂອບການຮ່ວມມືຂອງອະນຸພາກພື້ນ, ພາກພື້ນ ແລະ ສາກົນ, ໃນປີ 1995 ສປປ ລາວ ໄດ້ຖືກເລືອກຕັ້ງໃຫ້ເປັນຮອງປະທານກອງປະຊຸມສະມັດຊາໃຫຍ່ອົງການ ສະຫະປະຊາຊາດ (ສປຊ) ວັນທີ 23 / 7 / 1997 ສປປ ລາວ ໄດ້ເຂົ້າເປັນສະມາຊິກສົມບູນຂອງ ສະມາຄົມບັນດາປະຊາຊາດອາຊີຕາເວັນອອກສ່ຽງໃຕ້ (ອາຊຽນ- ASEAN); ສປປ ລາວ ເປັນສະມາຊິກ ຂອງຂະບວນການບໍ່ຮ່ວມກຸ່ມ, ຂອງອົງການບັນດາປະເທດທີ່ໃຊ້ພາສາຝຣັ່ງ, ສະມາຊິກຂອງກອງທຶນການ ເງິນລະຫວ່າງປະເທດ ( IMF), ສະມາຊິກຂອງທະນາຄານພັດທະນາແຫ່ງເອເຊຍ (ADB), ເປັນ ສະມາຊິກແຫ່ງສົນທິສັນຍາກ່ຽວກັບບັນຫາຢາເສບຕິດ, ສິ່ງແວດລ້ອມ ແລະ ສົນທິສັນຍາສາກົນອື່ນໆ; ເຂົ້າຮ່ວມໃນລັດຖະສະພາສາກົນ ( IPO ); 26 /10/ 2013 ສປປ ລາວ ໄດ້ເຂົ້າເປັນສະມາຊິກອົງການ ການຄ້າໂລກ( WTO ). ປັດຈຸບັນ ສປປ ລາວ ມີການພົວພັນການທູດກັບ 148 ປະເທດ(ຈາກ 193 ປະເທດທົ່ວໂລກ) ມີ ສຳນັກງານຜູ້ຕາງໜ້າການທູດຂອງ ສປປ ລາວ ຢູ່ຕ່າງປະເທດ 41 ແຫ່ງ, ໃນນັ້ນ ມີສະຖານເອກອັກຄະ ລັດຖະທູດ 27 ແຫ່ງ, ສຳນັກງານຜູ້ຕາງໜ້າຖາວອນ 3 ແຫ່ງ, ສະຖານກົງສູນໃຫຍ່ 10 ແຫ່ງ, ຫ້ອງການ ກົງສູນ 1 ແຫ່ງກົງສູນກິຕິມະສັກຂອງ ສປປ ລາວ ຢູ່ຕ່າງປະເທດ 19 ແຫ່ງ, ສະຖາທູດຕ່າງປະເທດ ມີ ສຳນັກງານຢູ່ລາວ 28 ແຫ່ງ, ກົງສຸນໃຫຍ່ 6 ແຫ່ງ, 18 ອົງການສາກົນທີ່ຂຶ້ນກັບລັດຖະບານ ແລະ ມີກົງ ສູນກິຕິມະສັກ 18 ປະເທດປະຈຳລາວ, ມີດ່ານສາກົນ 28 ແຫ່ງ, ໄດ້ສ້າງຕັ້ງສະມາຄົມມິດຕະພາບກັບ 18 ປະເທດ, ໄດ້ເຊັນສັນຍາຍົກເວັ້ນວີຊາກັບ 37 ປະເທດ, ສຳລັບຜູ້ຖືໜັງສືຜ່ານແດນການທູດ ແລະ ລັດຖະການ, ຍົກເວັ້ນວີຊາສອງຝ່າຍສຳລັບຜູ້ຖືໜັງສືຜ່ານແດນທໍາມະດາກັບ 11 ປະເທດ, ໃນນັ້ນມີ 9 ປະເທດສະມາຊິກອາຊຽນ, ລັດເຊຍ ແລະ ມົງໂກລີ. ຍົກເວັ້ນວິຊາຝ່າຍດຽວສໍາລັບຜູ້ຖືໜັງສືຜ່ານແດນທຳ ມະດາກັບ 8 ປະເທດຄື: ສ.ເກົາຫຼີ, ຍີ່ປຸ່ນ, ສະຫະພັນສະວິດ, ລຸກຊຳບວກ, ດານມາກ, ສະວີເດັນ, ຟືນ ແລນ ແລະ ນອກແວ, ມີການພົວພັນກັບພັກການເມືອງຫຼາຍກວ່າ 140 ພັກ ແລະ ມີການພົວພັນດ້ານ ເສດຖະກິດ ຫຼາຍກວ່າ 50 ປະເທດ; ການເຄື່ອນໄຫວວຽກງານການທູດລາວໃນໄລຍະ 47 ປີ ຜ່ານມາ ແມ່ນມີຜົນສຳເລັດອັນໃຫຍ່ຫຼວງເມື່ອທຽບກັບປີ 1975 ສປປ ລາວ ມີສາຍພົວພັນການທູດພຽງແຕ່ 44 ປະເທດ, ຍ້ອນມີການພົວພັນຮ່ວມມືດັ່ງກ່າວ ຈຶ່ງເຮັດໃຫ້ ສປປ ລາວ ມີບົດບາດພົ້ນເດັ່ນຂຶ້ນໃນເວທີພາກ ພື້ນ ແລະ ສາກົນ. ການພົວພັນລາວ - ຫວຽດນາມ ໄດ້ສືບຕໍ່ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ ຄວາມສາມັກຄີແບບພິເສດ ແລະ ການຮ່ວມມືຮອບດ້ານຢູ່ໃນລະດັບສູງສຸດ ໂດຍການນຳພັກ-ລັດ ຂັ້ນສູງ ສຸດຂອງສອງປະເທດ ໄດ້ໄປມາຫາສູ່ກັນຢ່າງເປັນປົກກະຕິ ຊຶ່ງປະກອບມືເລຂາທິການໃຫຍ່, ປະທານປະ ເທດ, ປະທານສະພາແຫ່ງຊາດ, ນາຍົກລັດຖະມົນຕີ, ລັດຖະມົນຕີ ແລະ ການນຳລະດັບຕ່າງໆ. ໂດຍສະເພາະ ປີ 2022 ເປັນປີສາມັກຄີມິດຕະພາບ ລາວ-ຫວຽດນາມ ວັນສ້າງຕັ້ງສາຍພົວພັນ ການທູດ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ-ການຮ່ວມມື ຄົບຮອບ 45 ປີ ໂດຍມີ ການຈັດຕັ້ງສະເຫຼີມສະຫຼອງຢ່າງເປັນຂະບວນການຟົດຟື້ນແຕ່ຂັ້ນສູນກາງຮອດທ້ອງຖິ່ນ. ການພົວພັນ ສປປ ລາວ - ສປ ຈີນ ມີມູນເຊື້ອມິດຕະພາບອັນດີງາມມາແຕ່ບູຮານນະການ, ສອງ ພັກ - ລັດ ເລີ່ມມີການພົວພັນກັນມາແຕ່ປີ 1959 ແລະ ສ້າງຕັ້ງສາຍພົວພັນການທູດໃນປີ 1961 ແລະ ໄດ້ຮັບການຊຸກຍູ້ສົ່ງເສີມ, ຍົກລະດັບການພົວພັນຢ່າງຕໍ່ເນື່ອງນັບມື້ນັບເຂົ້າສູ່ລວງເລິກ, ສະແດງອອກໃນປີ 2000, 2009, 2016, 2017, 2018 ແລະ ປີ 2019 ການນຳຂອງສອງພັກລາວ-ຈີນ ໄດ້ກຳນົດການ ພົວພັນລະຫວ່າງສອງປະເທດ ຕາມທິດ “ໝັ້ນຄົງຍາວນານບ້ານໃກ້ເຮືອນຄຽງທີ່ດີໄວ້ເນື້ອເຊື່ອໃຈກັນ, ຮ່ວມມືຮອບດ້ານ”; ການພົວພັນລະຫວ່າງສອງປະເທດ ໄດ້ຍົກລະດັບຂຶ້ນເປັນ “ຄູ່ຮ່ວມມືຍຸດທະສາດ ຮອບດ້ານ”; ການນຳສອງພັກລາວ - ຈີນ ໄດ້ຕີລາຄາ ແລະ ສະເໜີວ່າ “ການພົວພັນລາວ - ຈີນ ບໍ່ແມ່ນ ການພົວພັນທົ່ວໄປ ແຕ່ເປັນການພົວພັນຄູ່ຮ່ວມຊາຕາກຳ ທີ່ມີຄວາມໝາຍຍຸດທະສາດ”ຍັງໄດ້ລະບຸເຂົ້າ ໃນຖະແຫຼງການຮ່ວມລາວ - ຈີນ ຄັ້ງທຳອິດວ່າ “ສອງປະເທດເປັນຄູ່ຮ່ວມຊາຕາກຳ ທີ່ມີຄວາມໝາຍຍຸດ ທະສາດ” ໃນເດືອນພະຈິກ 2017 ການນຳສອງຝ່າຍໄດ້ຢືນຢັນຄືນອີກຄັ້ງໜຶ່ງເຖິງຄວາມຮັບຮູ້ການເປັນຄູ່ ຮ່ວມຊາຕາກຳລາວ - ຈີນ; ການນຳສອງຝ່າຍເຫັນດີເປັນເອກະພາບກັນເລີ່ມຕົ້ນສ້າງ “ແຜນແມ່ບົດ ວ່າ ດ້ວຍການສ້າງຄູ່ຮ່ວມຊາຕາກຳລາວ - ຈີນ”ພ້ອມກັນນັ້ນກໍ່ໄດ້ລົງນາມຮ່ວມກັນໃນວັນທີ 30 ເມສາ 2019 ທີ່ນະຄອນຫຼວງປັກກິ່ງ ສປ ຈີນ. ອັນພົ້ນເດັ່ນແມ່ນ ສປປ ລາວ ແລະ ສປ ຈີນ ລົງນາມໃນແຜນ ແມ່ບົດ ວ່າດ້ວຍການຮ່ວມມືກັນຊຸກຍູ້ເພື່ອສ້າງ “ໜຶ່ງແລວ ໜຶ່ງເສັ້ນທາງ” ທີ່ປິ່ນອ້ອມກໍຄືມີການສ້າງແມ່ ບົດແລວເສດຖະກິດລາວ - ຈີນພ້ອມດຽວກັນນັ້ນ ສປປ ລາວ ໄດ້ເປີດສະຖານກົງສຸນໃຫຍ່ແຫ່ງ ສປປ ລາວ ຕື່ມອີກ ທີ່ນະຄອນຊາງຊາ ເພື່ອເປັນການສົ່ງເສີມການພົວພັນລະຫວ່າງສອງປະເທດ.

news to day and hot news