ວັນພຸດ, ວັນທີ 04 ທັນວາ 2024
ໂຮງໝໍບໍລິເວນ 107 ຈັດກອງປະຊຸມສະຫຼຸບຜົນການຈັດຕັ້ງປະຕິບັດການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ສົກປີ 2022-2023
ເວລາອອກຂ່າວ: 2023-06-09 10:27:30 | ຜູ້ຂຽນ : admin2 | ຈຳນວນຄົນເຂົ້າຊົມ: 838 | ຄວາມນິຍົມ: 
ໃນທີ 08 ມິຖຸນາ 2023 ນີ້, ໂຮງໝໍບໍລິເວນ 107 ໄດ້ຈັດກອງປະຊຸມສະຫຼຸບຜົນຂອງການຈັດຕັ້ງປະຕິບັດການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ສົກປີ 2022-2023 ແລະ ທິດທາງແຜນການ ປີ 2023-2024 ໂດຍການເປັນປະທານຂອງ ສະຫາຍ ພົນຈັດຕະວາ ສີທອງ ຖິ່ນສະຫວັນ ຄະນະພັກອົງການກົມໃຫຍ່ພະລາທິການ, ຫົວໜ້າກົມເສນາພະລາ ກົມໃຫຍ່ພະລາທິການກອງທັບ, ມີສະຫາຍ ພັນເອກ ໄພວັນ ຈັນທະສຸກ ເລຂາຄະນະພັກຮາກຖານ, ອໍານວຍການໂຮງໝໍບໍລິເວນ 107 ພ້ອມດ້ວຍຄະນະ, ມີບັນດາສະຫາຍຄະນະໜ່ວຍພັກຕະຫຼອດຮອດສະມາຊິກພັກສົມບູນ-ສໍາຮອງ ເຂົ້າຮ່ວມ.
ສະຫາຍ ພັນເອກ ຍຸຄອນ ຜາລີເພັງ ຮອງເລຂາຄະນະພັກຮາກຖານ, ຫົວໜ້າການເມືອງໂຮງໝໍບໍລິເວນ 107 ໄດ້ຜ່ານບົດລາຍງານຜົນການຈັດຕັ້ງປະຕິບັດວຽກງານກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ໃນໄລຍະ 1 ປີຜ່ານມາ ໂດຍຍົກໃຫ້ເຫັນເຖິງຈຸດພິເສດ, ທີ່ຕັ້ງ, ລະບົດບາດ, ໜ້າທີ່ການເມືອງ ແລະ ສະພາບທີ່ສົ່ງຜົນກະທົບຕໍ່ການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ. ໂຮງໝໍຂອງພວກເຮົາມີ ສະມາຊິກພັກກວມ 66,92% ຂອງຈຳນວພົນທັງໝົດ, ສ້າງສະມາຊິກພັກແຂງໄດ້ 98,47%, ກາງ 0,76%, ບໍ່ໄດ້ແບ່ງ 0,77%, ໜ່ວຍພັກແຂງ 12 ໜ່ວຍ, ຄະນະພັກແຂງ 1 ຄະນະພັກ, ສະເໜີເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ສະໄໝທີ III ຈໍານວນ 4 ໜ່ວຍພັກ, ສະໄໝທີ V ຈໍານວນ 7 ໜ່ວຍພັກ, ພ້ອມທັງວາງທິດທາງແຜນການ, ການຄາດໝາຍສູ້ຊົນໃນຕໍ່ໜ້າ. ຈາກນັ້ນ ສະຫາຍ ພັນໂທ ທອງຈັນ ພົງສີພັນ ຮອງຫົວໜ້າຫ້ອງການເມືອງ, ກົມໃຫຍ່ພະລາທິການກອງທັບ ໄດ້ຜ່ານຂໍ້ຕົກລົງຂອງກົມໃຫຍ່ການເມືອງກອງທັບ ແລະ ກະຊວງປ້ອງກັນປະເທດ ວ່າດ້ວຍການເລື່ອນຊັ້ນ, ເລື່ອນທຽບຊັ້ນໃຫ້ນາຍທະຫານ ຢູ່ກົມໃຫຍ່ພະລາທິການກອງທັບ ໂດຍອີງຕາມກົດໝາຍຂອງນາຍທະຫານກອງທັບປະຊາຊົນລາວ (ສະບັບປັບປຸງ) ໃນພາກທີ II ໝວດທີ 3 ມາດຕາ 22 ແລະມາດຕາ 23 ວ່າດ້ວຍການເລື່ອນຊັ້ນ, ເລື່ອນທຽບຊັ້ນນາຍທະຫານ ໃນນັ້ນ ມີນາຍທະຫານໄດ້ຮັບການເລື່ອນຊັ້ນ-ເລື່ອນທຽບຊັ້ນ ຮ້ອຍເອກ ຂຶ້ນ ພັນຕີ ຈໍານວນ 20 ສະຫາຍ, ຮ້ອຍໂທ ຂຶ້ນ ຮ້ອຍເອກ ຈໍານວນ 11 ສະຫາຍ ແລະ ເລື່ອນທຽບຊັ້ນ ຮ້ອຍຕີ ຂຶ້ນ ຮ້ອຍໂທ 4 ສະຫາຍ.
ໃນໂອກາດອັນສະຫງ່າລາສີນີ້ ສະຫາຍ ພົນຈັດຕະວາ ສີທອງ ຖິ່ນສະຫວັນ ໄດ້ສະແດງຄວາມຍ້ອງຍໍຊົມເຊີຍຕໍ່ກັບຜົນສໍາເລັດການກໍ່ສ້າງໜ່ວຍພັກປອດໃສ ເຂ້ມແຂງ ໜັກແໜ້ນ ແລະ ນາຍທະຫານທີ່ໄດ້ຮັບການເລື່ອນຊັ້ນໃໝ່ ນັ້ນກໍ່ຍ້ອນໄດ້ຮັບການເອົາໃຈໃສ່ຊີ້ນໍາ-ນໍາພາຈາກຄະນະພັກຂັ້ນເທິງ ທີ່ໄດ້ໃກ້ຊິດຕິດແທດ, ຄະນະພັກ-ຄະນະບັນຊາມີແບບແຜນວິທີເຮັດວຽກທີ່ດີ ແລະ ພະນັກງານນັກຮົບໄດ້ມີຄວາມຫ້າວຫັນ, ບຸກບືນ. ສະຫາຍໄດ້ເນັ້ນໜັກໃຫ້ພະນັກງານ, ນາຍທະຫານ ເອົາໃຈໃສ່ຕໍ່ການສຶກສາອົບຮົມການເມືອງ-ແນວຄິດ, ມີຄຸນສົມບັດສິນທຳປະຕິວັດ, ມີຄຸນທາດການເມືອງໜັກແໜ້ນ, ອຸ່ນອຽນທຸ່ນທ່ຽງ, ເຊື່ອໝັ້ນຕໍ່ການຈັດຕັ້ງ, ເອົາໃຈໃສ່ປັບປຸງແບບແຜນການນໍາພາໃຫ້ໜັກແໜ້ນ, ເຮັດວຽກແບບລວມສູນປະຊາທິປະໄຕ, ແບ່ງປັນໃຫ້ບຸກຄົນຮັບຜິດຊອບ, ເສີມຂະຫຍາຍກຳລັງແຮງສັງລວມ, ກໍ່ສ້າງພັກ-ພະນັກງານ, ອົງການຈັດຕັ້ງມະຫາຊົນໃຫ້ເຂັ້ມແຂງ, ເພີ່ມທະວີວຽກງານກວດກາໃຫ້ແຂງແຮງ ຕິດພັນກັບການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ. ອີກເທື່ອໜຶ່ງສະຫາຍໄດ້ຮຽກຮ້ອງໃຫ້ນາຍທະຫານທີ່ໄດ້ຮັບຊັ້ນໃໝ່ໃຫ້ຝຶກຝົນຫຼ່ໍຫຼອມຕົນເອງຮອບດ້ານ, ສືບຕໍ່ຍົກສູງຄວາມຮັບຜິດຊອບຕໍ່ໜ້າທີ່ການເມືອງ-ວິຊາສະເພາະການແພດ, ຮັກສາຄວາມສາມັກຄີພາຍໃນ-ພາຍນອກໃຫ້ແໜ້ນແຟ້ນ, ມີພິບໄຫວຄ່ອງຄ່ອງ-ວິທະຍາສາດ ທັນສະໄໝ, ປັບປຸງແຜນແຜນດຳລົງຊີວິດໃຫ້ຖືກຕ້ອງ, ປະຢັດມັດທະຍັດ ຕ້ານການຟຸມເຟືອຍ, ປະຕິບັດກົດລະບຽບຂອງພັກ, ຂອງກອງທັບໃຫ້ໄດ້ດີ ພ້ອມກັນສ້າງກົມກອງໃຫ້ມີຄວາມເຕີບໃຫຍ່ເຂັ້ມແຂງຂຶ້ນເລື້ອຍໆ.
ພາບ-ຂ່າວ: ສົມພອນ ພວງແກ້ວ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
