POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນຈັນ, ວັນທີ 14 ຕຸລາ 2024

ຈຸດເລີ່ມຕົ້ນແຫ່ງການເຄື່ອນໄຫວປະຕິວັດຂອງ ປະທານ ຄຳໄຕ ສີພັນດອນ
ເວລາອອກຂ່າວ: 2023-11-16 09:13:09 | ຜູ້ຂຽນ : admin1 | ຈຳນວນຄົນເຂົ້າຊົມ: 6107 | ຄວາມນິຍົມ:

ປະທານ ຄຳໄຕ ສີພັນດອນ ເກີດເມື່ອວັນທີ 8 ກຸມພາ 1923 ໃນຄອບຄົວຊາວນາທີ່ດຸໝັ່ນຢູ່ບ້ານຫົວໂຂງພະໃຫຍ່ ເມືອງໂຂງແຂວງ ສີທັນດອນ ( ແຂວງ ຈຳປາສັກ ໃນປັດຈຸບັນ). ໃນເວລາຍັງນ້ອຍ ປະທານເຄີຍໄດ້ຟັງຜູ້ເປັນພໍ່ເລົ່າເລື່ອງ ພໍ່ເຖົ້າ ລາດຊະວົງໄຊ ເຊິ່ງເປັນປູ່ທວດຂອງເພິ່ນເອງ ທີ່ໄດ້ຈັດຕັ້ງນຳພາປະຊາຊົນດອນໂຂງ ຕີຕ້ານກອງທະຫານພວກລ່າເມືອງຂຶ້ນຝຣັ່ງ ຢູ່ລະຫວ່າງ ດອນໂສມ ກັບດອນເດດ ໃນເວລາທີ່ພວກລ່າເມືອງຂຶ້ນຝຣັ່ງ ເລີ່ມປະຕິບັດການເຊື່ອມຍຶດເອົາດິນແດນລາວເປັນເມືອງຂຶ້ນຂອງພວກເຂົາ. ພໍ່ຂອງເພິ່ນເອງ ກໍເປັນຜູ້ໜຶ່ງທີ່ມີຈິດໃຈຄຽດຊັງພວກລ່າເມືອງຂຶ້ນຝຣັ່ງ ແລະ ພວກສັກດີນາອາດຍາສິດທ້ອງຖິ່ນ, ເຊິ່ງເພິ່ນເຄີຍໄດ້ສະແດງທ່າທີຂັດຄ້ານຕ້ານເກັບສ່ວຍ, ເກັບເກນກຸລີ; ເພິ່ນຍັງ ໄດ້ຮັບຟັງການເລົ່າເລື່ອງຕ່າງໆ ກ່ຽວກັບການຕໍ່ສູ້ຕ້ານການກົດ ຂີ່ຂູດຮີດຂອງຝຣັ່ງ ແລະ ສັກດີນາທ້ອງຖິ່ນ ເຊັ່ນ: ຂະບວນການ ຜູ້ມີບຸນ, ຂະບວນການຕໍ່ສູ້ຂອງອົງແກ້ວ, ອົງກົມມະດຳ ຢູ່ເຂດພາກໃຕ້ເຊິ່ງໄດ້ເປັນການປູກຝັງຈິດໃຈຮັກຊາດ, ຄຽດແຄ້ນສັດຕູ ຕັ້ງແຕ່ໄວເດັກ ພໍອາຍຸໄດ້ 7 ປີ (1931), ທ່ານ ມະຫາ ແກ້ວ ເຊິ່ງເປັນ ຂ້າລາຊະການ ດ້ານການສຶກສາ ຢູ່ວຽງຈັນ ໄດ້ຮັບເອົາປະທານ ຄຳໄຕ ສີພັນດອນ ຂຶ້ນມາຢູ່ນຳ ແລະ ຮຽນໜັງສືຢູ່ວຽງຈັນ, ຕະຫຼອດເວລາ 10 ປີ ທີ່ທັງຮຽນໜັງສືທັງອອກແຮງງານຊ່ວຍ ວຽກຄອບຄົວ, ປະທານໄດ້ຮັບການອົບຮົມບົ່ມສອນ ແລະ ຮຽນຮູ້ຫຼາຍສິ່ງຫຼາຍຢ່າງ ທີ່ເປັນປະໂຫຍດຈາກ ທ່ານ ມະຫາ ແກ້ວ ແລະ ໄດ້ສຳພັດກັບຄວາມບໍ່ຍຸຕິທຳຂອງສັງຄົມໃນເວລານັ້ນ ນັບທັງການຈຳແນກຊັ້ນວັນນະຢູ່ໃນໝູ່ນັກຮຽນທີ່ມີຕົ້ນການກຳເນີດແຕກຕ່າງກັນ ເມື່ອຮຽນຈົບຢູ່ໂກລ ແລ ປາວີ (ແມ່ນໂຮງຮຽນມັດທະຍົມ ລະບົບຝຣັ່ງເສດ ທີ່ວຽງຈັນ) ເພິ່ນໄດ້ໄປສຶກສາຕໍ່ທີ່ໄຊງ່ອນ ພາກໃຕ້ຫວຽດນາມ. ຫຼັງຈາກຈົບການສຶກສາແລ້ວ, ປີ 1945 ເພິ່ນໄດ້ຮັບລາຊະການ ແລະ ໄປປະຈຳການຢູ່ ແຂວງຜົ້ງສາລີ ເຊິ່ງເປັນແຂວງທີ່ທຸລະກັນດານ ແລະ ຕັ້ງຢູ່ເໜືອສຸດຂອງດິນລາວ. ຕໍ່ມາພວກຂຸນເສິກຍີ່ປຸ່ນໄດ້ ເຂົ້າມາຍຶດເອົາອິນດູຈີນ ພວກຝຣັ່ງ ໄດ້ຍອມຈຳນົນຕໍ່ຍີ່ປຸ່ນ, ປະທານ ຄຳໄຕ ສີພັນດອນ ຖືກສົ່ງໄປ ຄຸນໝິງ ( ມົນທົນຢູນນານ ປະເທດຈີນ) ຈາກນັ້ນ ເດີນທາງໄປ ການກຸດຕາ ( ປະເທດອິນເດຍ ) ແລະ ໄປໄຊງ່ອນ ( ປະເທດ ຫວຽດນາມ ). ໃນເວລາທີ່ເພິ່ນຜ່ານປະເທດຕ່າງໆ ນັ້ນ ລ້ວນແຕ່ໄດ້ຮູ້ໄດ້ເຫັນ ແລະ ໄດ້ສຳຜັດໂດຍກົງ ກັບຂະບວນການຕໍ່ສູ້ຕ້ານຈັກກະພັດຜູ້ຮຸກຮານຂອງປະຊາຊົນປະເທດເຫຼົ່ານັ້ນ ເຊັ່ນ: ຂະບວນການລຸກຮືຂຶ້ນຕ້ານພວກຂຸນເສິກຍີ່ປຸ່ນ ຂອງປະຊາຊົນຈີນ, ຂະບວນການຕ້ານຈັກກະພັດອັງກິດ ຂອງປະຊາຊົນອິນເດຍ ແລະ ຂະບວນການຕໍ່ຕ້ານ ພວກລ່າເມືອງຂຶ້ນຝຣັ່ງ ຂອງປະຊາຊົນພາກໃຕ້ ຫວຽດນາມ. ຮອດປີ 1946, ປະທານ ຄຳໄຕ ສີພັນດອນ ໄດ້ກັບມາລາວ ແລະ ຮັບລາຊະການຢູ່ ປາກເຊ. ເວລານັ້ນຢູ່ແຂວງພາກໃຕ້ ໄດ້ມີຂະບວນການຕໍ່ສູ້ ຂອງປະຊາຊົນລາວຕ້ານ ລ່າເມືອງຂຶ້ນຝຣັ່ງທີ່ກັບມາຮຸກຮານລາວອີກເທື່ອໃໝ່ ແລະ ປະທານ ຄຳໄຕ ສີພັນດອນ ກໍແມ່ນຜູ້ໜຶ່ງທີ່ໄດ້ນຳພາຂະບວນຊາວນັກຮຽນ ນັກສຶກສາ ແລະ ຂ້າ ລາຊະການຢູ່ເມືອງປາກເຊເນີນການຕໍ່ສູ້ຂັດຂວາງການປະຕິບັດໜ້າທີ່ຂອງພວກທະຫານຝຣັ່ງໂດຍເພິ່ນໄດ້ຈັດຕັ້ງສາມະຄົມກິລາບານເຕະບານບ້ວງ,ຊ່ວງ ເຮືອ.... ເພື່ອເປັນການສ້າງທ່າຖືກກົດໝາຍໃນການນຳພາການຕໍ່ສູ້ແບບປິດລັບ ຈົນເຮັດໃຫ້ພວກຝຣັ່ງມີຄວາມລະແວງ ແລະ ຮຽກຕົວເພິ່ນໄປສອບສວນຫຼາຍ ຄັ້ງ. ໃນເງື່ອນໄຂທີ່ບໍ່ສາມາດ ສືບຕໍ່ເຄື່ອນໄຫວຕໍ່ຕ້ານພາຍໃຕ້ຮູບການຕ່າງໆຂ້າງເທິງ, ປະທານ ຄຳໄຕ ສີພັນດອນ ໄດ້ຕິດຕໍ່ກັບ ຂະບວນການລາວອິດສະຫຼະ ເຊິ່ງມີເຂດທີ່ໝັ້ນ ຢູ່ແຖບຊາຍແດນລາວ-ໄທ. ຈົນຮອດເດືອນ ມີນາ 1947 ເພິ່ນຈຶ່ງໄດ້ປິດລັບອອກຈາກຕົວເມືອງປາກເຊໄປສູ່ຊາຍແດນໄທ ເພື່ອເຂົ້າຮ່ວມໃນຖັນ ແຖວກຳລັງຕໍ່ຕ້ານ. ຜ່ານການສຶກສາຮ່ຳຮຽນ ແລະ ການຮັບລາຊະການ; ປະທານໄດ້ເຫັນແຈ້ງເຖິງຖານະອັນຕ່ຳຕ້ອຍຂອງຄົນລາວ, ເຫັນແຈ້ງເຖິງການສູນເສຍປະເທດຊາດ ແລະ ປະຊາຊົນລາວບັນດາ ເຜົ່າຕົກເປັນຂ້ອຍຂ້າຂອງພວກຈັກ ກະພັດລ່າເມືອງຂຶ້ນ ສົມທົບກັບການໄດ້ຮັບຜົນສະທ້ອນຈາກ ຂະບວນການຕໍ່ຕ້ານຂອງປະຊາຊົນລາວ ກໍຄືປະຊາຊົນປະເທດຕ່າງໆ ໃນການຕ້ານກັບພວກລ່າເມືອງຂຶ້ນຜູ້ຮຸກຮານໄດ້ເຮັດໃຫ້ປະທານມີສະຕິຕື່ນຕົວຮັກຊາດ, ຄຽດແຄ້ນສັດຕູຜູ້ຮຸກຮານ ໄດ້ຕັດສິນໃຈເຂົ້າຮ່ວມໃນຖັນແຖວກຳລັງຕໍ່ຕ້ານ. ນັ້ນເປັນ ບາດລ້ຽວ ທີ່ສຳຄັນໃນຊິວິດ, ເປັນຈຸດເລີ່ມຕົ້ນແຫ່ງການເຄື່ອນໄຫວປະຕິວັດຂອງປະທານ ຄຳໄຕ ສີພັນດອນ.

news to day and hot news