ກອງທັບປະຊາຊົນລາວ
 
ວັນຈັນ, ວັນທີ 26 ກຸມພາ 2024

  

ກອງຍິງປືນ 199 ເປັນ​ເຈົ້າ​ການ​ປະຕິບັດ 4 ໜ້າທີ່​ໃຫຍ່ 26 ແຜນ​ງານ ທີ່ຄະນະພັກ​ກະຊວງ​ປ້ອງ​ກັນ​ປະເທດ​ວາງ​ອອກ
ເວລາອອກຂ່າວ: 2023-11-17 10:02:12 | ຜູ້ຂຽນ : admin1 | ຈຳນວນຄົນເຂົ້າຊົມ: 92 | ຄວາມນິຍົມ:



ກອງພັນ​ຍິງ​ປືນ 199 ແມ່ນ​ກົມ​ກອງ​ຮາກ​ຖານ​ໜຶ່ງ ທີ່​ຂຶ້ນ​ກັບ​ກົມ​ໃຫຍ່​ເສນາ​ທິ​ການ​ກອງທັບ, ເປັນ​ກົມ​ກອງ​ທີ່​ໄດ້​ຕາງໜ້າ​ໃຫ້​ຊາດ​ລາວ ກໍ​ຄືກອງທັບ​ປະຊາຊົນ​ລາວ ໄປ​ຮ່ວມ​ການ​ແຂ່ງຂັນ ຍຸດທະວິທີ ກັບ​ບັນດາ​ປະເທດ​ອາ​ຊຽນ ສາມາດ​ຍາດ​ໄດ້​ຜົນສຳເລັດ​ຫຼາຍ​ລາງວັນ ແລະ ຍັງ​ຖືກ​ຈັດ​ຢູ່​ໃນ​ອັນ​ດັບ​ຕົ້ນໆ​ໃນ​ຫຼາຍ​ປະເທດ ນອກ​ນັ້ນ, ຍັງ​ເປັນ​ກົມ​ກອງ​ແປ​ພາສາ​ບັນດາ​ຫຼັກການດ້ານ​ສິລະ​ປະຍຸດ-ຍຸດທະວິທີ ຕາມ​ທິດ​ຊີ້​ນຳ​ຂອງ​ຂັ້ນ​ເທິງ, ມີໜ້າ​ທີ່ເຝິກແອບ​ຮໍ່າຮຽນ​ໃຫ້​ບັນດາ​ກົມ​ກອງ ກຳລັງ​ຫຼວງ-ກຳລັງ​ທ້ອງຖິ່ນ ໃນ​ທົ່ວ​ປະເທດ. ໄລຍະ​ຜ່ານ​ມາ, ນອກຈາກ​ກົມ​ກອງ​ໄດ້​ເຮັດ​ສຳເລັດ​ໜ້າທີ່​ການເມືອງ​ຂອງ​ຕົນ​ເປັນ​ຢ່າງ​ດີແລ້ວຄະນະ​ພັກ-ຄະນະ​ບັນຊາ​ກົມ​ກອງ ຍັງ​ໄດ້​ເປັນ​ເຈົ້າ​ການ​ນຳພາ​ພະນັກງານ-ນັກຮົບ ຈັດ​ຕັ້ງ​ປະຕິບັດ​ຂົງເຂດ​ວຽກ​ງານປິ່ນ​ອ້ອມ 4 ໜ້າທີ່​ໃຫຍ່ 26 ແຜນ​ງານ​ທີ່​ຄະນະ​ພັກ​ກະຊວງ​ປ້ອງ​ກັນ​ປະເທດ​ວາງ​ອອກ ໄດ້​ຮັບ​ຜົນສຳເລັດ​ທີ່​ເປັນ​ພື້ນຖານ​ຫຼາຍ​ດ້ານ. ສະຫາຍ ພັນ​ໂທ ພອນ​ແກ້ວ ສຸ​ລິ​ວັນ​ວົງສາ ຫົວໜ້າ​ການເມືອງ ກອງ​ຍິງ​ປືນ 199 ໄດ້​ໃຫ້​ຮູ້​ວ່າ: ໃນ​ການ​ປະຕິບັດ 4 ໜ້າທີ່​ໃຫຍ່ 26 ແຜນ​ງານ​ນັ້ນ ບັນຫາ​ສຳຄັນ​ແມ່ນ​ຂົງເຂດ​ວຽກ​ງານ​ເຮັດ​ໃຫ້​ສະພາບ​ມີ​ຄວາມ​ສະຫງົບ ຄະນະ​ພັກ-ຄະນະ​ບັນຊາໄດ້​ຈັດ​ຕັ້ງ​ພະນັກງານ​ລົງ​ກໍ່ສ້າງ​ຮາກ​ຖານ​ຢູ່ 2 ກຸ່ມ​ບ້ານ ຄື: ບ້ານ​ຫຼັກ 36 ແລະ ບ້ານ​ຫຼັກ 31 ໂດຍ​ໄດ້​ສົມທົບ​ແໜ້ນ​ກັບ​ອຳນາດ​ການ​ປົກຄອງ​ບ້ານເຮັດ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ ເຮັດ​ໃຫ້​ຂອບ​ເຂດ​ກົມ​ກອງ​ຮັບຜິດຊອບ ມີ​ຄວາມ​ສະຫງົບ​ໂດຍ​ພື້ນຖານພ້ອມ​ກັນ​ນັ້ນ, ຍັງ​ໄດ້​ຈັດ​ຕັ້ງ​ລະບົບ​ປະຈຳການ 3 ຂັ້ນ​ຄື: ຄະນະ​ປະຈຳການ, ສິດ​ປະຈຳການ​ສູ້​ຮົບ​ບໍລິຫານ, ສິດ​ປະຈຳການ​ປະຈຳ​ ວັນ ນັບ​ທັງ​ຂັ້ນ​ກອງຮ້ອຍໃຫ້​ມີ​ປະຈຳການ ເພື່ອ​ຮັບປະກັນ​ເຮັດ​ໃຫ້​ພາຍ​ໃນ​ກົມ​ກອງ​ມີ​ຄວາມ​ສະຫງົບ​ປອດ​ໄພ, ໄດ້​ເອົາໃຈໃສ່​ວຽກ​ງານ​ກໍ່ສ້າງ​ກຳລັງ ດ້ານ​ລະບຽບ​ການ ໂດຍ​ຖື​ເອົາ 7 ລະບອບ 18 ວຽກ​ເປັນ​ຫຼັກ ທັງ​ເປັນ​ມາດຖານ​ຂອງ​ພະນັກງານ​ນັກຮົບ, ນັບ​ທັງ​ການ​ນຸ່ງ​ຖື, ການ​ເຂົ້າ​ອອກ​ປະຕູໂຂງ ຈະ​ມີ​ບັດ​ເຂົ້າ​ອອກ ເພື່ອ​ຄວາມ​ເປັນ​ລະບຽບ​ຂອງ​ກົມ​ກອງ, ພ້ອມ​ທັງ​​ສຸມ​ໃສ່​ອົບຮົມ-ຫັດ​ແອບ 2 ຮູບ​ແບບ​ຄື: ຫັດ​ແອບ ນັກ​ກິລາ ຍິງ​ປືນ​ອາ​ຊຽນ ແລະ ອົບຮົມ-ຫັດ​ແອບ ປະຈຳ​ປີ ຕາມ​ແຜນການ​ຂອງ​ກົມ​ກອງ, ສ່ວນ​ວຽກ​ງານ​ປັບປຸງ​ກໍ່ສ້າງ​ກຳລັງ​ທາງ​ດ້ານ​ການເມືອງ-​ແນວ​ຄິດ ຄະນະ​ພັກ-ຄະນະ​ບັນຊາ ໄດ້​ສຸມ​ໃສ່​ສຶກ​ສາ​ອົບຮົມ​ການເມືອງ-​ແນວ​ຄິດ ໃຫ້​ພະນັກງານ​ນັກຮົບ​ເປັນ​ປົກກະຕິ, ຊຸກຍູ້​ພະນັກງານ-ນັກຮົບ ປະຕິບັດ​ໜ້າທີ່​ວິຊາ​ສະເພາະ​​ໃຫ້​ໄດ້​ຮັບ​ຜົນສຳເລັດ, ດ້ານ​ວຽກ​ງານ​ຮັບປະກັນ​ຊີວິດ​ການ​ເປັນ​ຢູ່​ຂອງ​ພະນັກງານ-ນັກຮົບ ໄດ້​ປະຕິບັດ​ຕາມ​ທິດ​ນຳ 4 ປູກ 4 ລ້ຽງ ກໍ​ຄືທິດ​ນໍາ​ເພິ່ງ​ຕົນ​ເອງ, ກຸ້ມ​ຕົນ​ເອງ ແລະ ສ້າງ​ຄວາມ​ເຂັ້ມແຂງ​ດ້ວຍ​ຕົນ​ເອງ, ໄດ້​ຮັບ ປະກັນ​ດ້ານ​ສະບຽງ​ອາຫານໃຫ້​ພະນັກງານ-ນັກຮົບ​ໄດ້​ກິນ​ເຂົ້າ​ມື້ໜຶ່ງ 3 ຄາບ​ເປັນ​ປົກກະຕິ, ມີ​ອາຫານ 3 ເຍື່ອງ​ຂຶ້ນ​ໄປ, ສ່ວນ​ປະເພດ​ຊີ້ນ ແລະ ພືດ​ຜັກ ພື້ນຖານ​ແມ່ນ​ກົມ​ກອງ​ເປັນ​ຜູ້​ສະໜອງ​ໃຫ້​ເຮືອນຄົວ ແລະ ເກັບ​ຊື້​ຈາກ​ຕະຫຼາດ​ຈຳນວນ​ໜຶ່ງ, ກົມ​ກອງ​ມີ​ເຮືອນຄົວ​ລວມ 2 ຫຼັງ ເພື່ອ​ຈັດ​ຕັ້ງ​ກິນ​ດື່ມ​ລວມ​ໝູ່ ເຊິ່ງ​ໄດ້​ຫັນ​ເຂົ້າ​ສູ່​ລະບົບ​ແບບແຜນ​ທີ່​ດີ​ຂຶ້ນ, ໄດ້​ຮັບປະກັນ​ການ​ເບີກ​ຈ່າຍ​ເຄື່ອງນຸ່ງ​ຫົ່ມ​ຕາມ​ລະບອບ​ອັດຕາ​ທີ່​ຂັ້ນ​ເທິງ​ກຳນົດ​ໃຫ້, ຮັບປະກັນ​ການ​ເບີກ​ຈ່າຍ​ນ້ຳມັນ​ເຊື້ອ​ໄຟ ຕາມ​ລະບຽບ​ຫຼັກການ​ຂອງ​ກົມ​ວິຊາ​ສະເພາະ​ວາງ​ອອກ​ໄດ້​ດີ. ດ້ານ​ວຽກ​ງານ​ເຕັກນິກ, ຂົນສົ່ງ ພື້ນຖານ​ແມ່ນ​ສາມາດ​ຕອບ​ສະໜອງ​ໄດ້​ຕາມ​ຄວາມ​ຮຽກຮ້ອງຕ້ອງການ​ຕາມ​ໜ້າທີ່​ການເມືອງ​ຂອງ​ກົມ​ກອງ. ດ້ານ​ການ​ປັບປຸງ​ກໍ່ສ້າງ​ກົມ​ກອງ ຄະນະ​ພັກ-ຄະນະ​ບັນຊາ​ໄດ້​ສຶກ​ສາ​ອົບຮົມ​ໃຫ້​ພະນັກງານ-ນັກຮົບ ເປັນ​ເຈົ້າ​ການ​ປົກ​ປັກ​ຮັກສາ​ຄ້າຍ​ຄູ ​ເປັນຕົ້ນ​ແມ່ນ ຫ້ອງການ, ເຮືອນນອນ, ເຮືອນຄົວ, ຜາມໄຊ ແລະ ອື່ນໆ ໃຫ້​ມີ​ຄວາມ​ເປັນ​ລະບຽບ​ຮຽບ​ຮ້ອຍ ເພື່ອ​ຮັບປະກັນ​ໃຫ້​ນຳ​ໃຊ້​ໄດ້​ຍາວ​ນານ, ອັນ​ທີ່​ເປ່​ ເພ​ເສຍ​ຫາຍ ​ໄດ້​ປັບປຸງ​ແກ້​ໄຂ​ໃຫ້​ດີ​ຂຶ້ນ, ໃນ​ໄລຍະ 2 ເດືອນ​ຜ່ານ​ມາ ໄດ້​ສ້າງ​ກະລາ​ລົດ 1 ຫຼັງປັດຈຸບັນ, ພວມ​ປຸກ​ສ້າງ​ສະໂມສອນ, ຮ້ານ​ຂາຍເຄື່ອງ, ຫໍ​ຂ່າວ ແລະ ຫໍສະໝຸດ ຄາດຄະເນ​ວ່າ​ຈະ​ໃຫ້​ສຳເລັດ​ພາຍ​ໃນ​ປີ​ນີ້ ເພື່ອ​ເອກອ້າງ​ໄວ້​ເປັນ​ຜົນງານຂໍ່ານັບ​ຮັບ​ຕ້ອນ​ວັນ​ສ້າງຕັ້ງ​ກອງທັບ​ປະຊາຊົນ​ລາວ ​ຄົບຮອບ 75 ປີ​ ທີ່​ຈະ​ມາ​ເຖິງ​ນີ້. ດ້ານ​ວຽກ​ງານ​ເພີ່ມ​ພູນ​ຜະລິດຜົນ ກົມ​ກອງ​ມີ​ເຮືອນ​ຮົ່ມປູກ​ພືດ​ຜັກ 1 ຫຼັງ​ຂະໜາດ 8x20 ແມັດ ສາມາດ​ປູກ​ຜັກ​ໄດ້​ຕະຫຼອດ​ປີ ແລະ ມີ​ສວນ​ ປູກ​ພືດ​ຜັກ​ກາງແຈ້ງ​ຕື່ມ​ອີກ ​ສັງລວມ​ແລ້ວ ໃນ​ໄລຍະ 1 ປີ​ ສາມາດ​ປູກ​ພືດ​ຜັກ​ໄດ້ 12.112 ກິ​ໂລກຣາມ, ກົມ​ກອງ​ຍັງ​ໄດ້​ລ້ຽງ​ງົວ 13 ໂຕ, ລ້ຽງ​ໝູ່-ເປັດ-ໄກ່ ອີກ​ຈຳນວນ​ໜຶ່ງ, ມີ​ໜອງ​ລ້ຽງ​ປາ 12 ໜອງເຊິ່ງ​ໄດ້​ແບ່ງປັນໃຫ້​ແຕ່​ລະ​ພາກສ່ວນ​ຮັບຜິດຊອບ ແລະ ໄດ້​ປ່ອຍ​ປາ​ລ້ຽງ​ 60 ພັນ​ກວ່າ​ໂຕ. ໃນ​ປີ 2023 ນີ້ ສາມາດ​ສ້າງ​ລາຍ​ຮັບ​ຈາກ​ການ​ປູກຝັງ-ລ້ຽງສັດ ແລະ ບໍລິການ​ຕ່າງໆ ໄດ້​ທັງ​ໝົດ 160.700.000 ກີບ, ສະເລ່ຍ​ໃສ່​ຈຳນວນ​ພົນ​ສາມາດ​ປະຕິບັດ​ໄດ້ 750.000 ກີບ​ຕໍ່​ຄົນ​ຕໍ່​ປີ. ສຳລັບ​ທິດ​ທາງ​ແຜນການ​ໃນຕໍ່ໜ້າ​ນີ້, ກອງ​ຍິງ​ປືນ 199 ຈະ​ສຸມ​ໃສ່​ປະຕິບັດ​ໜ້າທີ່​ການເມືອງ​ຂອງ​ກົມ​ກອງ ໂດຍ​ສະເພາະ​ແມ່ນ​ເລັ່ງ​ໃສ່ ຫັດ​ແອບ​ເຝິກ ຊ້ອມນັກ​ຍິງ​ປືນ ທາງ​ດ້ານ​ຍຸດທະວິທີ ກອງທັບ​ບົກ​ອາ​ຊຽນ ໃຫ້​ມີ​ຄວາມ​ຊຳນານ​ຄ່ອງ​ແຄ່ວ ແລະ ມີ​ການ​ຮັບປະກັນ​ດີ ເພື່ອ​ກຽມພ້ອມ​ເຂົ້າ​ຮ່ວມ​ແຂ່ງຂັນ​ກັບ​ບັນດາ​ປະເທດ​ອາ​ຊຽນ ໃນ​ແຕ່​ລະ​ປີ, ເອົາໃຈໃສ່​ຄຸ້ມ​ຄອງ​ປົກ​ປັກ​ຮັກສາ, ບົວລະບັດ​ຜັດ​ເຊັດອາວຸດ ໃຫ້​ເປັນ​ປົກກະຕິ, ສືບຕໍ່​ຂຸດ​ຄົ້ນ​ທ່າແຮງ​ບົ່ມ​ຊ້ອນ​ທີ່​ມີ​ພາຍ​ໃນ​ກົມ​ກອງ ເພື່ອ​ທຳ​ການ​ຜະລິດແກ້​ໄຂ​ຊີວິດ​ການ​ເປັນ​ຢູ່​ຂອງ​ພະນັກງານ-ນັກຮົບ​ໃຫ້​ດີ​ຂຶ້ນ​ເທື່ອ​ລະ​ກ້າວ, ປັບປຸງ​ສະຖານທີ່​ຄ້າຍ​ຄູ​ໃຫ້​ມີ​ຄວາມ​ແໜ້ນໜາ​ຖາວອນ, ຄຸ້ມ​ຄອງ​ປົກ​ປັກ​ຮັກສາ​ວັດຖຸ, ອຸປະກອນທີ່​ຂັ້ນ​ເທິງ​ປະກອບໃຫ້​ນຳ​ໃຊ້​ໄດ້​ຍາວ​ນານ ແລະ ສືບ ຕໍ່​ຊີ້​ນຳ-ນຳພາ​ປະຕິບັດ ຂົງເຂດ​ວຽກ​ງານ​ດ້ານ​ຕ່າງໆ ປິ່ນ​ອ້ອມ 4 ໜ້າທີ່​ໃຫຍ່ 26 ແຜນ​ງານ ທີ່​ຄະນະ​ພັກ​ກະຊວງ​ປ້ອງ​ກັນ​ປະເທດ​ວາງ​ອອກ ໃຫ້​ໄດ້​ຮັບ​ໝາກ ຜົນ​ສູງ​ກວ່າ​ເກົ່າ. ໂດຍ: ສຸພາ​ວັນ ສີ​ລາ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ