ກອງທັບປະຊາຊົນລາວ
 
ວັນຈັນ, ວັນທີ 26 ກຸມພາ 2024

  

ອາຊີ​ຕາເວັນ​ອອກ​ສ່ຽງ​ໃຕ້​ຍັງ​ເປັນ​ໜຶ່ງ​ໃນ​ຈຸດໝາຍ​ປາຍທາງ​ ການທ່ອງທ່ຽວ ທີ່​ໄດ້​ຮັບ​ຄວາມ​ນິຍົມ​ຫຼາຍ​ທີ່​ສຸດ
ເວລາອອກຂ່າວ: 2023-12-21 10:01:02 | ຜູ້ຂຽນ : admin3 | ຈຳນວນຄົນເຂົ້າຊົມ: 41 | ຄວາມນິຍົມ:



ຕາມ​ຂ່າວສານ​ຊິນ​ຮວາ​ລາຍ​ງານ​ໃຫ້​ຮູ້​ວ່າ: ປີ​ໃໝ່​ 2024 ໃກ້​ຈະ​ໝູນວຽນ​ມາ​ເຖິງ​ແລ້ວ, ຫຼາຍ​ຄົນ​ເລີ່ມວາງ​ແຜນ​ຈະ​ອອກ​ເດີນທາງ​ໄປ​ທ່ຽວ. ຜົນ​ກະທົບ​ຈາກການ​ແພ່​ລະບາດ​ຂອງ​ພະຍາດ​ໂຄ​ວິດ-19 ທີ່​ມີ​ຕໍ່​ການທ່ອງທ່ຽວ​ຂອງ​ຊາວ​ຈີນ​ກຳລັງ​ຫາຍ​ໄປ. ໃນ​ໄລຍະ​ພັກ​ບຸນ​ໄຫວ້​ພະຈັນ ແລະ ວັນຊາດ​ຈີນ​ປີ​ນີ້, ການທ່ອງທ່ຽວ​ພາຍ​ໃນ​ປະເທດ​ຈີນ​ໄດ້​ບັນລຸ​ເຖິງ 826 ລ້ານ​ເທື່ອ​ຄົນ ແລະ ມີ​ລາຍ​ຮັບ​ດ້ານ​ການທ່ອງທ່ຽວ​ຫຼາຍ​ກວ່າ 753 ຕື້​ຢວນ ເຮັດ​ໃຫ້​ຕະຫຼາດ​ທົ່ວ​ໂລກ​ໄດ້​ເຫັນ​ຄວາມ​ກະ​ຕື​ລື​ລົ້ນ​ຂອງ​ຊາວ​ຈີນ​ທີ່​ມີ​ຕໍ່​ການທ່ອງທ່ຽວ. ໄລຍະ​ກ່ອນ​ເກີດ​ການ​ແພ່​ລະ ບາດ​ຂອງ​ພະຍາດ​ໂຄ​ວິດ-19, ຈີນ​ເຄີຍ​ຄອງ​ຖານະ​ເປັນ​ຕະຫຼາດ​ການ​ໄປ​ທ່ອງ​ທ່ຽວ​ຕ່າງປະເທດ​ໃຫຍ່​ທີ່​ສຸດ​ໃນ​ໂລກ​ເປັນ​ເວລາ​ຫຼາຍ​ປີ​ລຽນຕິດ ແລະ ເປັນ​​ແຂກ​ທ່ອງ​ທ່ຽວ​ໃຫຍ່​ທີ່​ສຸດ​ສຳລັບ ​ຫຼາຍ​ປະເທດ​ໃນ​ອາຊີ​ຕາເວັນ​ອອກ​ສ່ຽງ​ໃຕ້. ໃນ​ປີ 2023 ນີ້, ເພື່ອ​ດຶງ​ດູດ ແລະ ຕ້ອນຮັບ​ນັກ​ທ່ອງ​ທ່ຽວ​ຈີນ, ຫຼາຍ​ປະເທດ​ຢູ່​ອາຊີ​ຕາເວັນ​ອອກ​ສ່ຽງ​ໃຕ້​ໄດ້​ປະຕິບັດ​ມາດ​ຕະການ​ດຶງ​ດູດ​ນັກ​ທ່ອງ​ທ່ຽວ ເຊັ່ນ: ກຳປູເຈຍ ໄດ້​ວາງ​ຍຸດ​ທະ​ສາດ “China Ready”, ສົ່ງເສີມ​ໃຫ້​ໂຮງແຮມ, ຮ້ານ​ອາຫານ ແລະ ສະຖານທີ່​ທຸລະ​ກິດ​ຕ່າງໆ​ຊຳລະ​ບັນຊີ​ດ້ວຍ​ເງິນ​ຢວນ, ອະ​ນຸດ​ຍາດ​ໃຫ້​ນັກ​ທ່ອງ​ທ່ຽວ​ຈີນ​ຈ່າຍ​ເງິນ​ຜ່ານ​ທາງ​ວີ​ແຊັດ, Alipay ແລະ ທາງ​ດີ​ຈີ​ຕອນ​ອື່ນໆ, ປະເທດ​ໄທ​ໄດ້​ຈັດ​ກິດຈະກຳ Amazing Thailand Amazing New Chapters Road Show to China 2023 ຢູ່​ນະຄອນ​ຊຽງ​ໄຮ້, ນະຄອນ​ເສີງ​ຕູ່ ແລະ ນະຄອນ​ກວາງ​ໂຈ່ວ​ຂອງ​ຈີນ​ໃນ​ເດືອນ​ກຸມພາ​ປີ​ນີ້ ເພື່ອ​ໂຄສະ​ນາ​ການທ່ອງທ່ຽວ​ຂອງ​ໄທ​ຢູ່​ຕົວ​ເມືອງ​ໃຫຍ່​ຕ່າງໆ​ຂອງ​ຈີນ, ເມື່ອ​ບໍ່​ດົນ​ມາ​ນີ້, ສິງກະໂປ, ມາ​ເລ​ເຊຍ ແລະ ໄທ ຕ່າງ​ກໍ​ໄດ້​ປະກາດ​ນະໂຍບາຍ​ຍົກເວັ້ນ​ວີ​ຊາ​ຕໍ່​ຈີນ. ກ່ອນ​ໜ້າ​ນີ້​ບໍ່​ດົນ, ປະເທດ​ລາວ​ໄດ້​ປະກາດ​ເປີດ​ປີ​ທ່ອງ​ທ່ຽວ​ລາວ 2024, ລັດຖະບານ​ລາວ​ຈະ​ຕ້ອນຮັບ​ນັກ​ທ່ອງ​ທ່ຽວ​ຈາກ​ທົ່ວ​ໂລກ​​ລວມ​ທັງ​ນັກ​ທ່ອງ​ທ່ຽວ​ຂອງ​ຈີນ ພ້ອມ​ທັງ​ຈະ​ໃຫ້ການ​ປະສານ​ງານ ແລະ ການ​ບໍລິການ​ທີ່​ດີ. ຄວາມຈິງ​ແລ້ວ, ມີ​ນັກ​ທ່ອງ​ທ່ຽວ​ຈຳນວນ​ບໍ່​ໜ້ອຍ​ໄດ້​ຂີ່​ລົດໄຟ​ຕາມ​ທາງ​ລົດໄຟ​ຈີນ-ລາວ​ເພື່ອ​ເດີນທາງ​ທ່ອງ​ທ່ຽວ​ຂ້າມ​ປະເທດ. ວັນ​ທີ 13 ເມສາ 2023, ຂະ​ບວນ​ລົດໄຟ​ໂດຍສານ​ສາກົນ​ຕາມ​ທາງ​ລົດໄຟ​ຈີນ-ລາວ​ໄດ້​ເປີດ​ບໍລິການ, ຜູ້ໂດຍສານ​ສາມາດ​ຂີ່​ລົດໄຟ​ຈາກ​ນະຄອນ​ຄຸນ​ໝີງ​ໄປ​ຮອດ​ນະຄອນຫຼວງ​ວຽງ​ຈັນ ພາຍ​ໃນ​ມື້​ດຽວ. ຕາມ​ສະຖິຕິ​ສະແດງ​ໃຫ້​ເຫັນ​ວ່າ: ນັບ​ແຕ່​ຂະ​ບວນ​ລົດໄຟ​ໂດຍສານ​ສາກົນ​ຕາມ​ທາງ​ລົດໄຟ​ຈີນ-ລາວ​ເປີດ​ບໍລິການ​ຈົນ​ຮອດ​ວັນ​ທີ 14 ພະຈິກ ​ປີ​ນີ້, ໄດ້​ຂົນສົ່ງ​ຜູ້ໂດຍສານ 348.000 ເທື່ອ​ຄົນ, ໃນ​ນັ້ນ ຜູ້ໂດຍສານ​ຂ້າມ​ຊາດ​ມີ​ຫຼາຍ​ກວ່າ 85.000 ເທື່ອ​ຄົນ. ຕາມ​ສະຖິຕິ​ຫຼ້າ​ສຸດ​ຈາກ​ບໍລິສັດ Ctrip ຂອງ​ຈີນ​ສະແດງ​ໃຫ້​ເຫັນ​ວ່າ: ໃບ​ສັ່ງ​ຈອງ​ການ​ໄປ​ທ່ຽວ​ຕ່າງປະເທດ​ໃນ​ໄລຍະ​ບຸນ​ກຸດ​ຈີນ​ໄດ້​ເພີ່ມ​ຂຶ້ນ​ເກືອບ 20 ເທົ່າ, ຈຸດໝາຍ​ປາຍທາງ​ການທ່ອງທ່ຽວ​ຕ່າງປະເທດ​ທີ່​ໄດ້​ຮັບ​ຄວາມ​ນິຍົມ​ຫຼາຍ​ທີ່​ສຸດ​ຢູ່​ຈີນ​ລວມ​ມີ: ໂຕ​ກຽວ, ສິງກະໂປ, ບາງກອກ, ພູ​ເກັດ, ໂອຊາ​ກາ, ກົວ​ລາ​ລຳ​ເປີ, ຊິດ​ນີ ແລະ ອື່ນໆ, ໃນ​ນັ້ນ, ຕົວ​ເມືອງ​ຕ່າງໆ​ປະເທດ​ອາຊີ​ຕາເວັນ​ອອກສ່ຽງ​ໃຕ້​ກວມ​ເອົາ​ອັດຕາ​ສ່ວນ​ຫຼາຍ​ທີ່​ສຸດ ເຊິ່ງ​ສະແດງ​ໃຫ້​ເຫັນ​ວ່າ: ອາຊີ​ຕາເວັນ​ອອກ​ສ່ຽງ​ໃຕ້​ຍັງ​ເປັນ​ໜຶ່ງ​ໃນ​ຈຸດໝາຍ​ປາຍທາງ ການທ່ອງທ່ຽວ​ຕ່າງປະເທດ​ທີ່​ໄດ້​ຮັບ​ຄວາມ​ນິຍົມ​ຫຼາຍ​ທີ່​ສຸດ​ຈາກ​ນັກ​ທ່ອງ​ທ່ຽວ​ຈີນ. ແຕ່​ວ່າ ການ​ຟື້ນ​ຟູ​ການທ່ອງ ທ່ຽວ​ຫຼັງ​ການ​ແພ່​ລະບາດ​ຂອງ​ພະຍາດ​ໂຄ​ວິດ-19 ບໍ່​ແມ່ນ​ເລື່ອງ​ງ່າຍ, ຂະແໜງ​ການທ່ອງທ່ຽວ​ຂອງ​ອາຊີ​ຕາເວັນ​ອອກ​ສ່ຽງ​ໃຕ້​ຍັງ​ປະ​ເຊີນ​ກັບ​ບັນຫາ​ດ້ານ​ການ​ປ້ອງ​ກັນ​ຄວາມ​ສະຫງົບ, ຜະລິດ​ຕະ​ພັນ​ດ້ານ​ການທ່ອງທ່ຽວ​ທີ່​ສົມ​ຄູ່​ກັນ​ບໍ່​ພຽງພໍ ແລະ ບັນຫາ​ອື່ນໆ. ນອກ​ນີ້, ພາຍ​ໃຕ້​ສະພາບ​ການ​ຕະຫຼາດ​ໃນ​ປັດຈຸບັນ​ທີ່​ຄວາມ​ຕ້ອງການ​ດ້ານ​ການທ່ອງທ່ຽວ​ມີ​ຄວາມ​ຫຼາກ​ຫຼາຍ​ກວ່າ​ເກົ່າ​ໃນ​ ປັດຈຸບັນ, ການ​ສະໜອງ​ຜະລິດ ​ຕະ​ພັນ​ການທ່ອງທ່ຽວ​ທີ່​ຜູ້​ບໍລິ ໂພກ​ເຫັນ​ວ່າ “ກຸ້ມ​ຄ່າ”ນັ້ນ ແມ່ນ​ ເລື່ອງ​ທີ່​ບັນດາ​ປະເທດ​ອາຊີ​ຕາ ເວັນ​ອອກ​ສ່ຽງ​ໃຕ້​ຕ້ອງ​ຄົ້ນຄວ້າ​ພິຈາລະນາ. ແນວໃດກໍຕາມ, ເຊື່ອ​ໝັ້ນ​ວ່າ​ອາຊີ​ຕາເວັນ​ອອກ​ສ່ຽງ​ ໃຕ້​ທີ່​ເປັນ​ດິນແດນ​ອັດສະຈັນ ແລະ ມີ​ສະ​ເໜ່ ຈະ​ສາມາດ​ຄົ້ນ​ພົບ​ທາງ​ອອກ​ດ້ານ​ການທ່ອງທ່ຽວ​ຂອງ​ຕົນ​ໄດ້​ຢ່າງ​ແນ່ນອນ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ