ກອງທັບປະຊາຊົນລາວ
 
ວັນອັງຄານ, ວັນທີ 05 ມີນາ 2024

  

ສູນ​ເຝິກອົບຮົມ​ ກອງ​ພົນ​ທີ 1 ສຸມ​ໃສ່​ວຽກ​ງານ​ອົບຮົມ​ກໍ່ສ້າງ​ນາຍ​ທະຫານ​ຮຸ່ນ​ສືບ​ທອດ
ເວລາອອກຂ່າວ: 2023-12-26 09:11:38 | ຜູ້ຂຽນ : admin1 | ຈຳນວນຄົນເຂົ້າຊົມ: 266 | ຄວາມນິຍົມ:



ວຽກ​ງານ​ອົບຮົມ-ຫັດ​ແອບກໍ່ສ້າງ​ກຳລັງ ແມ່ນ​ວຽກ​ງານ​ທີ່​ມີ​ຄວາມ​ສຳຄັນ​ໃນ​ຖັນ​ແຖວ​ກອງທັບ ເພື່ອ​ຮັບປະກັນ​ໃນ​ການເຄື່ອນໄຫວ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ໃນ​ທົ່ວ​ປວງ​ຊົນ ໂດຍ​ສະເພາະ​ແມ່ນ​ການເຄື່ອນໄຫວ​ເຮັດ​ສຳເລັດ​ໜ້າທີ່​ການເມືອງ​ຂອງ​ກົມ​ກອງ​ໃນ​ສະເພາະ​ໜ້າ ແລະ ຍາວ​ນານ. ພ້ອມ​ກັນ​ນັ້ນ, ກໍ​ເພື່ອ​ແນໃສ່​ຍົກ​ລະດັບ​ຄວາມ​ຮູ້ ​ຄວາມ​ສາມາດ​ເຮັດ​ໃຫ້​ພະນັກງານ-ນັກຮົບ ມີ​ຄວາມ​ຊຳນານ​ດ້ານ​ສິລະ​ປະຍຸດ-ຍຸດທະວິທີ ແລະ ວິຊາ​ສະເພາະ ທັງ​ເປັນ​ການ​ຊຸກຍູ້​ການ​ປະຕິບັດ​ຂໍ້​ກຳນົດ, ກົດ​ລະບຽບຂອງ​ກອງທັບ, ເຮັດ​ໃຫ້​ພະນັກງານ-ນັກຮົບ ມີ​ຄວາມ​ສະດຸ້ງ​ໄວ​ຕໍ່ໜ້າ​ທີ່​ວິຊາ​ສະເພາະ ກ້າວ​ໄປ​ສູ່​ການ​ເຮັດ​ສຳເລັດ​ໜ້າທີ່​ທີ່​ການຈັດຕັ້ງ​ຂັ້ນ​ເທິງ​ມອບ​ໝາຍ​ໃຫ້ ໃນ​ນັ້ນ, ສູນ​ເຝິກອົບຮົມ ກອງ​ພົນ​ທີ 1 ກໍ​ແມ່ນ​ກົມ​ກອງ​ໜຶ່ງ​ເຊິ່ງ​ມີໜ້າ​ທີ່​ຕົ້ນຕໍ​ໃນ​ການ​ກໍ່ສ້າງ-ບຳລຸງ ພະນັກງານ-ນັກຮົບ ຮຸ່ນ​ສືບ​ທອດ​ຫຼາຍ​ຫຼັກສູດ ເປັນຕົ້ນ​ແມ່ນ ອົບຮົມ​ທະຫານ​ໃໝ່​ລະບົບ 3 ເດືອນ, ກໍ່ສ້າງ​ນາຍ​ສິບ​ລະບົບ 1 ປີ ແລະ ບຳລຸງ​ການ​ທະຫານ​ຂັ້ນ​ພື້ນຖານ ໃຫ້​ພະນັກງານ​ບັນຊາ​ ລະບົບ 6 ເດືອນ ຮັບປະກັນ​ທາງ​ດ້ານ​ປະລິມານ ແລະ ຄຸນ​ນະ​ພາບ​ສູງ. ສະຫາຍ ພັນ​ໂທ ສີ​ພອນ ກອງ​ພະຈັນ ຫົວໜ້າ​ການ​ທະຫານ​ ສູນ​ເຝິກ​ອົບຮົມ ໄດ້​ໃຫ້​ຮູ້​ວ່າ: ໃນ​ໄລຍະ​ຜ່ານ​ມາ ກົມ​ກອງ​ໄດ້​ສຳເລັດ​ຊຸດ​ອົບຮົມ​ກໍ່ສ້າງ​ນາຍ​ສິບ​ຈຳນວນ 12 ຊຸດ ມີ​ຈຳນວນ​ພົນ 1.310 ສະຫາຍ, ອົບຮົມ-ຫັດ​ແອບ​ທະຫານ​ໃໝ່ 44 ຊຸດ ຈຳນວນ​ພົນ 3.681 ສະຫາຍ, ອົບຮົມ​ວິຊາ​ສະເພາະ​ແພດ ​ຊັ້ນ​ຕົ້ນ 9 ຊຸດ ຈຳນວນ​ພົນ 777 ສະຫາຍ, ເປີດ​ອົບຮົມ​ວິຊາ​ສະເພາະ ອຸປະໂພກ-ບໍລິໂພກ 5 ຊຸດ ຈຳນວນ​ພົນ 305 ສະຫາຍ, ເປີດ​ຊຸດ​ອົບຮົມ​ວຽກ​ງານ​ຍຸດ​ໂທ 1 ຊຸດ ຈຳນວນ​ພົນ 50 ສະຫາຍ, ເປີດ​ອົບຮົມ​ວິຊາ​ສະເພາະ​ປຸງ​ແຕ່ງ 1 ຊຸດ ຈຳ ນວນ​ພົນ​ເຂົ້າ​ຮ່ວມ 68 ສະຫາຍ ແລະ ເປີດ​ຊຸດ​ອົບຮົມ​ວຽກ​ງານ ນ້ຳມັນ​ເຊື້ອ​ໄຟ 1 ຊຸດ ຈຳນວນ​ພົນ​ເຂົ້າ​ຮ່ວມ 52 ສະຫາຍ. ປັດຈຸບັນ​ນີ້, ກົມ​ກອງ​ກຳລັງ​ສຸມ​ໃສ່​ອົບຮົມ​ກໍ່ສ້າງ​ນາຍ​ສິບ ຊຸດ​ທີ 12 ສົກ​ປີ 2023-2024. ເພື່ອ​ຮັບປະກັນ​ໃຫ້​ວຽກ​ງານ​ຮົບ​ຮົມ-ຫັດ​ແອບ​ດຳເນີນ​ໄປ​ຢ່າງ​ຖືກ​ ທິດ, ມີ​ປະ​ສິດທິ​ຜົນ​ສູງ​ນັ້ນ, ຄະນະ​ພັກ-ຄະນະ​ບັນຊາ ແຕ່​ລະ​ຂັ້ນ ໄດ້​ຖື​ສຳຄັນ​ວຽກ​ງານ​ສຶກ​ສາ​ອົບຮົມ​ການເມືອງ​-ນຳພາ​ແນວ​ຄິດ ສອດ​ຫ້ອຍ​ເຂົ້າ​ໃນ​ທຸກ​ຂົງເຂດ​ວຽກ​ງານ​ລວມ​ຂອງ​ກົມ​ກອງ; ເອົາໃຈໃສ່​ຊີ້​ນຳ​ພະແນກການ​ທີ່​ກ່ຽວຂ້ອງ, ຄູ​-ອາຈານ​ທີ່​ຮັບຜິດຊອບ​ໃນ​ການ​ສິດສອນ​ວິຊາ​ຕ່າງໆ ກຳ​ແໜ້ນ​ກ່ຽວ​ກັບ​ເນື້ອ​ໃນ​ເອກະສານ, ຄຳ​ສັ່ງ​ແນະນຳ ແລະ ຄາດໝາຍ​ສູ້​ຊົນ ທີ່​ກົມ​ໂຮງຮຽນ​ກົມ​ໃຫຍ່​ເສນາ​ທິ​ການ​ກອງທັບ ກໍ​ຄືພະ​ແນກ​ໂຮງຮຽນ ຫ້ອງ​ເສນາ​ທິ​ການ ກອງ​ພົນ​ທີ 1 ກຳນົດ​ໄວ້, ສຸມ​ໃສ່​ຄົ້ນຄວ້າ​ປັບປຸງ​ເນື້ອ​ໃນ ແລະ ວິທີ​ການ​ໃນ​ການ​ອົບຮົມ-ຫັດ​ແອບ ໃຫ້​ແທດເໝາະ​ກັບ​ເງື່ອນໄຂ​ຕົວ​ຈິງ​ໃນ​ປັດຈຸບັນ ເພື່ອ​ເຮັດ​ໃຫ້ການ​ອົບຮົມ​ກໍ່ສ້າງ-ບຳລຸງ​ນາຍ​ທະຫານ ສະໜອງ​ໃຫ້​ບັນດາ​ກົມ​ກອງ ມີ​ຄຸນ​ນະ​ພາບ​ສູງ, ສາມາດ​ຕອບ​ສະໜອງ​ໄດ້​ຕາມ​ຄວາມ​ຮຽກຮ້ອງ​ຕ້ອງການ​ຂອງ​ໜ້າທີ່​ວຽກ​ງານ​ໃນ​ໄລຍະ​ໃໝ່. ​ໂດຍ: ຄຳ​ໄຕ ພັນທະ​ວົງ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ