ກອງທັບປະຊາຊົນລາວ
 
ວັນພະຫັດ, ວັນທີ 18 ເມສາ 2024

  

ປະຫວັດ​ການ​ກຳເນີດ ກອງທັບ​ປະຊາຊົນ​ລາວ
ເວລາອອກຂ່າວ: 2024-01-10 09:10:07 | ຜູ້ຂຽນ : admin1 | ຈຳນວນຄົນເຂົ້າຊົມ: 3241 | ຄວາມນິຍົມ:



ຊາດ​ລາວ​ ແມ່ນ​ຊາດ​ໜຶ່ງ​ທີ່​ມີ​ປະຫວັດສາດ​ອັນ​ຍາວ​ນານ​ນັບ​ຫຼາຍ​ພັນ​ປີ, ປະຊາຊົນ​ລາວ​ບັນດາເຜົ່າ​ມີ​ນໍ້າໃຈ​ຮັກ​ຊາດ​ອັນ​ດູດດື່ມ, ມີ​ຄວາມ​ສາມັກຄີ​ເປັນ​ປຶກ​ແຜ່ນ, ມີ​ຄວາມ​ດຸໝັ່ນ​ຂະຫຍັນ​ພຽນ ແລະ ມູນເຊື້ອພິລະ​ອາດ​ຫານ​ຕໍ່ສູ້​ບໍ່​ຍອມຈຳນົນ​ສັດຕູ ເພື່ອ​ປົກ​ປັກ​ຮັກສາ​ຄວາມ​ເປັນ​ເອກະລາດ ແລະ ອິດສະຫຼະພາບ​ແຫ່ງ​ຊາດ​ໄວ້​ໃຫ້​ໝັ້ນຄົງ; ພາຍ ຫຼັງ​ເຈົ້າຟ້າ​ງຸ່ມ ທ້ອນໂຮມ​ປະເທດ​ລາວ​ເປັນ​ອະ​ນາ​ຈັກ​ລາວ​ລ້ານ​ຊ້າງ ໃນ​ສະຕະວັດ​ທີ 14 ແລະ ໃນ​ສະຕະວັດ​ທີ 16 ຖືກ​ສັກດິນາ​ຕ່າງ​ດ້າວ​ເຂົ້າ​ມາ​ຮຸກ​ຮານ​ເອົາ​ເປັນ​ຫົວ​ເມືອງ​ສ່ວຍ​ແກ່​ພວກ​ເຂົາ; ມາ​ຮອດ​ທ້າຍ​ສະຕະວັດ​ທີ 19 ຫາ​ຕົ້ນ​ສະຕະວັດ​ທີ 20 ພວກ​ລ່າ​ເມືອງ​ຂຶ້ນ​ຝຣັ່ງ ໄດ້​ເຂົ້າ​ມາ​ຮຸກ​ຮານ ແລະ ຍຶດ​ຄອງ​ປະເທດ​ລາວ 2 ຄັ້ງ. ຄັ້ງ​ທີ 1 ແຕ່​ປີ 1893-1945 ແລະ ຄັ້ງ​ທີ 2 ແຕ່​ປີ 1946-1954, ຕະຫຼອດ​ໄລຍະ​ເວລາທີ່​ຈັກກະພັດ​ຝຣັ່ງ​ປົກຄອງ​ລາວ​ນັ້ນ, ປະຊາຊົນ​ລາວ​ບັນດາເຜົ່າ ສຸດ​ທີ່​ທຸກ​ຍາກ​ລຳບາກ, ບໍ່​ມີ​ສິດ​ເສລີພາບ ຍິ່ງ​ໄປ​ກວ່າ​ນັ້ນ ປະຊາຊົນ​ຍັງ​ປະ​ເຊີນ​ກັບ​ໄພ​ອຶດ​ຫົວ, ກືກ​ໜັງສື, ໂຣກລະບາດ ແລະ ໄພ​ສັງຄົມ​ເກີດ​ຂຶ້ນ​ຢ່າງ​ໜັກໜ່ວງ ຍ້ອນ​ທົນ​ຕໍ່​ການ​ກົດ​ຂີ່​ຂູດ​ຮີດ​ຂອງ​ພວກ​ຈັກກະພັດ​ຜູ້​ຮຸກ​ຮານ​ບໍ່​ໄດ້ ປະຊາຊົນ​ລາວ​ບັນດາເຜົ່າ ຈຶ່ງ​ລຸກ​ຂຶ້ນ​ຕໍ່ສູ້ ເດັ່ນ​ກວ່າ​ໝູ່​ແມ່ນ​ຂະ​ບວນ​ການ​ຕໍ່ສູ້ຂອງ​ພໍ່​ກະ​ດວດ, ອົງ​ແກ້ວ-ອົງ​ກົມ​ມະ​ດຳ, ເຈົ້າຟ້າ​ເມືອງ​ສິງ, ເຈົ້າຟ້າ​ປັດ​ໄຈ ແລະ ອື່ນໆ, ແຕ່​ວ່າ​ຂະ​ບວນ​ການ​ຕໍ່ສູ້​ດັ່ງກ່າວບໍ່​ໄດ້​ຮັບ​ໄຊຊະນະ ຍ້ອນ​ປັດ​ໄຈ ​ຕົ້ນຕໍ​ແມ່ນ​ບໍ່​ມີ​ພັກ​ນຳພາ. ວັນ​ທີ 3 ກຸມພາ 1930 ພັກ​ກອມ​ມູ​ນິດ ອິນດູຈີນ ໄດ້​ຮັບ​ການ​ສ້າງຕັ້ງ​ຂຶ້ນ ໂດຍ​ແມ່ນ​ປະທານ ໂຮ່​ຈີ​ມິນ ເປັນ​ຜູ້ນຳ​ພາ. ນັບ​ແຕ່​ນັ້ນ​ມາ, ຂະ​ບວນ​ການ​ຕໍ່ສູ້​ຂອງ​ປະຊາຊົນ 3 ຊາດ​ອິນດູຈີນ ກໍ​ໄດ້​ຮັບ​ແສງ​ສະຫວ່າງ​ການ​ນຳພາ​ຂອງ​ພັກ, ເຮັດ​ໃຫ້ການ​ຕໍ່ສູ້​ຕ້ານ​ພວກ​ລ່າ​ເມືອງ​ຂຶ້ນ​ຝຣັ່ງຂອງ​ປະ ຊາຊົນ 3 ຊາດ​ອິນດູຈີນ ນັບ​ມື້​ ນັບແຂງແຮງ ແລະ ໄດ້​ຮັບ​ໄຊ ຊະນະ​ຢ່າງ​ຕໍ່​ເນື່ອງ. ເດືອນສິງຫາ 1945 ກອງທັບ​ແດງ​ໂຊ​ວຽດ ແລະ ພັນທະ​ມິດ ໄດ້ຜາບ​ແພ້​ພວກ​ຟາດ​ຊິດ ເຮັດ​ໃຫ້​ສົງຄາມ​ໂລກ ​ຄັ້ງ​ທີ 2 ສິ້ນ​ສຸດ ​ລົງ. ໄຊຊະນະ​ອັນ​ໃຫຍ່​ຫຼວງ​ຂອງ​ ການ​ປະຕິວັດ​ເດືອນ​ສິງຫາ 1945 ຢູ່​ຫວຽດນາມ ເປັນ​ເງື່ອນໄຂອັນ​ສະດວກ, ເໝາະ​ສົມ​ໃຫ້​ແກ່​ຂະ​ບວນ​ການ​ຕໍ່ສູ້​ຂອງ​ກຳລັງ​ປະ ກອບ​ອາວຸດ ແລະ ປະຊາຊົນ​ລາວ​ບັນດາເຜົ່າ. ໂດຍ​ກຳ​ແໜ້ນ​ກາລະ​ໂອກາດ​ທີ່​ອຳນວຍ​ດັ່ງກ່າວ, ພັກ​ໄດ້​ເດັດດ່ຽວ​ນຳພາ​ປະຊາຊົນ​ລຸກ​ຮື​ຂຶ້ນ​ຍຶດ​ອຳນາດ​ການ​ປົກຄອງ​ຈາກ​ຂຸນ​ເສິກ​ຍີ່ປຸ່ນ ແລະ ພວກ​ລ່າ​ເມືອງ​ຂຶ້ນ​ຝຣັ່ງ ໃນ​ວັນ​ທີ 23 ສິງຫາ 1945 ແລະ ໄດ້​ປະກາດ​ເອກະລາດ​ຕໍ່​ຊາວ​ໂລກ ເມື່ອ​ວັນ​ທີ 12 ຕຸລາ 1945. ປີ 1946 ພວກ​ລ່າ​ເມືອງ​ຂຶ້ນ​ຝຣັ່ງ ໄດ້​ກັບ​ຄືນ​ມາ​ຮຸກ​ຮານ​ລາວ​ເປັນ ຄັ້ງ​ທີ 2, ພາຍ​ໃຕ້​ການ​ນຳ ພາຂອງ​ພັກ​ກອມ​ມູ​ນິດ​ອິນດູຈີນ, ປະຊາຊົນ​ລາວ​ບັນດາເຜົ່າ ໄດ້ສືບ ຕໍ່​ດຳເນີນ​ການ​ຕໍ່ສູ້​ຕ້ານ​ການ​ຮຸກ​ ຮານຂອງ​ພວກ​ລ່າ​ເມືອງ​ຂຶ້ນ​ ຝຣັ່ງ ເດັ່ນ​ກວ່າ​ໝູ່​ແມ່ນ​ບັ້ນ​ຮົບ​ ປ້ອງ​ກັນ​ຕົວ​ເມືອງ​ທ່າ​ແຂກ ໃນ​ ວັນ​ທີ 21 ມີນາ 1946 ພາຍ​ໃຕ້​ ການ​ບັນຊາ​ຂອງສະເດັດ​ເຈົ້າສຸ​ ພານຸ​ວົງ. ໃນ​ໄລຍະ​ປີ 1946-1949 ປະຕິບັດ​ຕາມ​ແນວທາງ​ການຕໍ່ ຕ້ານ “ຍືດ​ເຍື້ອ​ຍາວ​ນານ​ເດັດ ຂາດ​ມີ​ໄຊ” ຂອງ​ພັກ, ທຸກ​ກຳລັງ​ໄດ້​ຫັນ​ລົງ​ສູ່​ຊົນນະບົດ​ສ້າງ​ເຂດ​ທີ່​ໝັ້ນ, ກໍ່ສ້າງ​ຮາກ​ຖານ​ໃນ​ໝູ່​ປະຊາຊົນ, ປຸກລະດົມຂົນຂວາຍ​ປະຊາຊົນ ກໍ່ສ້າງ​ກຳລັງ​ປະກອບ​ອາວຸດ​ຢູ່​ທ້ອງຖິ່ນ, ປະຕິບັດ​ຍຸດ​ທະ​ສາດ​ສົງຄາມ​ກອງ​ຫຼອນ; ໄລ ຍະ​ນີ້, ສົງຄາມ​ກອງ​ຫຼອນ​ໄດ້​ປະກົດ​ຕົວ​ຂຶ້ນ​ຢູ່​ຫຼາຍ​ທ້ອງຖິ່ນ ແລະ ການຈັດຕັ້ງ​ກຳລັງ​ປະກອບ​ອາວຸດ ໄດ້​ຮັບ​ການ​ສ້າງຕັ້ງ​ຂຶ້ນ​ຢ່າງ​ລຽນຕິດ​ເຊັ່ນ: ສ້າງຕັ້ງກອງ​ຟ້າ​ງຸ່ມຢູ່​ວຽງ​ຈັນ ໃນ​ເດືອນມັງ ກອນ 1947, ສ້າງຕັ້ງກອງ​ໄຊ​ຈັກກະພັດຢູ່​ພາກ​ໃຕ້ ໃນ​ເດືອນ​ພຶດສະພາ 1947, ສ້າງຕັ້ງ​ກອງ​ປັດ​ໄຈຢູ່​ຊຽງ​ຂວາງ ໃນ​ເດືອນ​ເມສາ 1948, ສ້າງຕັ້ງກອງ​ໄຊ​ເຊດ​ຖາຢູ່​ພາກ​ກາງ ໃນ​ເດືອນ ຕຸລາ 1948, ສ້າງຕັ້ງຄະນະ​ຕະ ລຸມບອນ​ລາວ​ເໜືອ, ກອງ​ໂຄສະ ນາ​ປະກອບ​ອາວຸດ​ທີ 12,15 ໃນ​ປີ 1948. ຈາກ​ສະພາບ​ແວດ​ລ້ອມ​ດັ່ງ ກ່າວ, ໂດຍ​ປະຕິບັດ​ຕາມ​ຄຳສັ່ງ ຂອງ​ສູນ​ກາງ​ພັກ​ກອມ​ມູ​ນິດ​ອິນ ດູຈີນ ມາ​ຮອດ ວັນ​ທີ 20 ມັງ ກອນ 1949 ຢູ່​ເຂດ​ທີ່​ໝັ້ນ​ຖໍ້າແມ ເຂດ​ລາວ​ຮຸ່ງ​ພຽງ​ສາ ເມືອງ​ຊຽງ​ຄໍ້ ແຂວງຫົວພັນ, ທ່ານ ໄກສອນ ພົມວິຫານ ໄດ້​ປະກາດ​ສ້າງຕັ້ງ “ກອງ​ລາດ​ຊະ​ວົງ” ຂຶ້ນ​ຢ່າງ​ເປັນ​ທາງ​ການ, ໂດຍ​ແມ່ນ​ ທ່ານ ເພັດ​ສະ​ວົງ ເປັນ​ຫົວໜ້າ​ການ​ທະຫານ, ທ່ານ ສີ​ສະຫວາດ ແກ້ວ​ບຸນ​ພັນ ເປັນ​ຫົວໜ້າ​ການ ເມືອງ ແລະ ທ່ານ ຄຳ​ມູນ ເປັນ​ຮອງ​ຜູ້​ບັນຊາ​ການ. ໃນ​ມື້​ດຽວ​ ກັນ​ນັ້ນ, ໂດຍ​ພາຍ​ໃຕ້​ການ​ນຳ ພາ​ອັນ​ແທດ​ເຖິງ​ຂອງ​ສາຂາ​ພັກ ກອມ​ມູ​ນິດ​ອິນດູຈີນ ປະຈຳ​ແຄວ້ນ​ລາວ ໄດ້​ຈັດ​ຕັ້ງ​ກອງ​ປະຊຸມໂດຍ ​ເອົາ​ສະຖານທີ່ກອງ​ລາດ​ຊະວົງ ເປັນ​ບ່ອນ​ປະຊຸມ ແລະ ໄດ້​ປະ ກາດ​ສ້າງຕັ້ງກອງທັບ​ລາວ​ອິດ ສະຫຼະຢ່າງ​ເປັນ​ທາງ​ການ ໂດຍ​ແມ່ນ ທ່ານ ໄກສອນ ພົມວິຫານ ເປັນ​ຜູ້​ປະກາດ​ສ້າງຕັ້ງ ແລະ ເປັນ​ຜູ້​ບັນຊາ​ໂດຍ​ກົງ. ຈາກ​ນັ້ນ​ ມາກໍ​ໄດ້​ປະກາດ​ຮັບ​ເອົາ, ບັນ ດາກອງ​ເອກະລາດ​ອື່ນໆ​ເຊັ່ນ: ກອງ​ໄຊ​ຈັກກະພັດ, ກອງ​ຟ້າ​ງຸ່ມ, ກອງ​ປັດ​ໄຈ ແລະ ກອງ​ໄຊ​ເຊດ​ຖາ ໂຮມ​ເຂົ້າ​ເປັນ​ກອງທັບ​ລາວ​ອິດສະຫຼະ; ນັບ​ແຕ່​ນັ້ນ​ມາ​ວັນ​ທີ 20 ມັງກອນ 1949 ຈຶ່ງ​ກາຍເປັນ​ວັນ​ປະຫວັດສາດ​ແຫ່ງ​ການສ້າງຕັ້ງ​ກອງທັບ​ປະຊາຊົນ​ລາວ. ຄວາມ​ຈຳເປັນ​ພາວະ​ວິໄສ ຂອງການ​ສ້າງຕັ້ງ​ກອງທັບ​ປະ ຊາຊົນ​ລາວ ແມ່ນ​ຍ້ອນ​ຂະ​ບວນ​ການ​ປະຕິວັດຂອງ​ປະຊາຊົນ​ລາວ​ບັນດາເຜົ່າ​ຜູ້​ຮັກ​ຊາດ ໄດ້​ເຕີບ​ໃຫຍ່​ຂະຫຍາຍຕົວຢ່າງ​ວ່ອງໄວ, ແຂງແຮງ ແລະ ກວ້າງຂວາງ, ເພື່ອ​ຕອບ​ສະໜອງ​ກັບ​ຄວາມ​ຮຽກຮ້ອງ​ຕ້ອງການຂອງ​ພາລະ ກິດ​ຕໍ່ສູ້​ກອບ​ກູ້​ເອົາ​ປະເທດ​ຊາດ​ອອກ​ຈາກ​ການ​ຮຸກ​ຮານ ແລະ ຍຶດ​ຄອງ​ຂອງ​ພວກ​ລ່າ​ເມືອງ​ຂຶ້ນ​ຝຣັ່ງ ແລະ ລູກມື ຂອງ​ພວກເຂົາ, ຢືນ​ຢູ່​ຕໍ່ໜ້າ​ເລ່ກົນ​ເພີ່ມ​ທະວີ​ການ​ຮຸກ​ຮານ, ຍຶດ​ຄອງ​ຂອງ​ພວກ​ລ່າ ​ເມືອງ​ຂຶ້ນ​ຝຣັ່ງ ແລະ ຂະບວນ​ ການ​ປະຕິວັດ​ຕໍ່ສູ້ຂອງ​ປະຊາ ຊົນ​ລາວ​ບັນດາເຜົ່າ ນັບ​ມື້​ໄດ້​ ເປີດ​ກວ້າງ, ຮຽກຮ້ອງ​ໃຫ້​ມີ​ກຳລັງ​ປະກອບອາວຸດ​ອັນ​ເຂັ້ມແຂງ ​ມີ​ການຈັດຕັ້ງ​ນຳພາ, ບັນຊາ​ເປັນ​ເອກະ​ພາບ ເພື່ອ​ເປັນ​ຫຼັກ​ແຫຼ່ງ​ແກ່ນສານ​ຊຸກ​ດັນ​ໃຫ້​ສົງຄາມ​ປະຊາຊົນ​ກ້າວ​ໄປ​ເຖິງ​ໄຊຊະນະ​ສົມບູນ ແລະ ອີງ​ຕາມ​ທິດ​ສະ​ດີ​ຂອງ​ ທ່ານ ເລ​ນິນ ເວົ້າ​ວ່າ: “ຢາກ​ກູ້​ຊາດ, ປົດ​ປ່ອຍ​ຊາດ ບໍ່​ມີ​ເສັ້ນທາງ​ອື່ນ​ໃດ ນອກຈາກ​ເສັ້ນທາງ​ການ​ປະຕິວັດ ກຳ​ມະ​ ຊີບ ແລະ ຕ້ອງ​ມີ​ເຄື່ອງມື​ພະ​ເດັດ​ການ​ກຳ​ມະ​ຊີບ”. ການ​ສ້າງຕັ້ງ​ກອງທັບ​ປະຊາ ຊົນ​ລາວ ເປັນ​ເຫດການ​ປະຫວັດ ສາດ​ໜຶ່ງ​ທີ່​ສຳຄັນ ແລະ ເປັນ​ບາດກ້າວ​ແຫ່ງ​ການ​ເຕີບ​ໃຫຍ່​ຂະ ຫຍາຍຕົວ​ຂອງ​ການ​ປະຕິວັດ, ແມ່ນ​ບາດກ້າວ​ການ​ເຕີບ​ໃຫຍ່​ເຂັ້ມແຂງ ຂອງ​ກຳລັງ​ປະກອບ​ອາວຸດ​ປະຕິວັດ ແລະ ເປັນ​ກຳລັງ​ຫຼັກ​ແຫຼ່ງ ໃຫ້​ຂະ​ບວນ​ການ​ຕໍ່ສູ້ ຂອງ​ປະຊາຊົນ​ລາວ ເພື່ອ​ຄວາມ​ເປັນ​ເອກະລາດ​ແຫ່ງ​ຊາດ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ