ກອງທັບປະຊາຊົນລາວ
 
ວັນພຸດ, ວັນທີ 24 ເມສາ 2024

  

ຫ້ອງ​ການເມືອງ ກົມ​ໃຫຍ່​ການເມືອງ​ກອງທັບ ສະຫຼຸບ​ວຽກ​ງານ​ຮອບດ້ານ ປະຈຳ​ປີ 2023
ເວລາອອກຂ່າວ: 2024-02-22 08:55:06 | ຜູ້ຂຽນ : admin1 | ຈຳນວນຄົນເຂົ້າຊົມ: 339 | ຄວາມນິຍົມ:



ວັນ​ທີ 21 ກຸມພາ 2024 ນີ້, ຫ້ອງ​ການເມືອງ ກົມ​ໃຫຍ່​ການເມືອງ​ກອງທັບ​ໄດ້​ສະຫຼຸບ​ການເຄື່ອນໄຫວ​ວຽກ​ງານ​ຮອບດ້ານ ປະຈຳ​ປີ 2023 ແລະ ວາງ​ທິດ​ທາງ​ແຜນການ ປະຈຳ​ປີ 2024, ໂດຍ​ການ​ເປັນ​ປະທານ ຂອງ​ສະຫາຍ ພົນ​ຈັດຕະວາ ບຸນ​ເຫຼືອ ໄຊ​ຍະ​ເພັນ ກຳມະການ​ຄະນະ​ພັກ​ກົມ​ໃຫຍ່, ຫົວໜ້າ​ຫ້ອງ​ການເມືອງ ກົມ​ໃຫຍ່​ການເມືອງ​ກອງທັບ, ມີ​ຄະນະ​ພັກ-ຄະນະ​ບັນຊາ​ຫ້ອງ​ການເມືອງ ພ້ອມ​ດ້ວຍ​ພະນັກງານ-ນັກຮົບ ເຂົ້າ​ຮ່ວມ. ສະຫາຍ ພັນ​ເອກ ອຳພອນ ສຸກ​ວິ​ໄຊ ຮອງ​ຫົວໜ້າ​ຫ້ອງ​ການເມືອງ ໄດ້​ຜ່ານ​ບົດ​ສະຫຼຸບ​ວຽກ​ງານ​ຮອບດ້ານ ປະຈຳ​ປີ 2023 ແລະ ວາງ​ທິດ​ທາງ​ແຜນການ ປະຈຳ​ປີ 2024 ຂອງ​ຫ້ອງ​ການເມືອງ ກົມ​ໃຫຍ່​ການເມືອງ​ກອງທັບ ໂດຍ​ຖື​ເອົາ​ວຽກ​ສຶກ​ສາ​ອົບຮົມ​ການເມືອງ-ແນວ​ຄິດ​ເປັນ​ຫຼັກ​ສອດ​ຫ້ອຍ​ເຂົ້າ​ໃນ​ທຸກ​ຂົງ ເຂດ​ວຽກ​ງານ ແລະ ເຊື່ອມ​ຊຶມ​ຕໍ່​ແນວທາງ​ແຜນ​ນະໂຍບາຍ​ຂອງ​ພັກ-ລັດ ແລະ ມີ​ຄວາມ​ຮັບຜິດຊອບ​ຕໍ່ໜ້າ​ທີ່​ການເມືອງ​ທີ່​ພັກ-ລັດ​ມອບ​ໝາຍ​ໃຫ້, ມີ​ຄວາມ​ຫ້າວຫັນ​ເຂົ້າ​ໃນ​ການ​ປະຕິວັດ ເຮັດ​ໜ້າທີ່​ວຽກ​ງານ​ວິຊາ​ສະເພາະ​ໄດ້​ດີ, ຈັດ​ຕັ້ງ​ພິທີ​ປາຖະກະຖາ ວັນ​ສຳຄັນ​ຕ່າງໆ 6 ຄັ້ງ ມີ​ຈຳນວນ​ຄົນ​ເຂົ້າ​ຮ່ວມ 1.800 ສະຫາຍ, ຍິງ 664 ສະຫາຍ, ຈັດຕັ້ງ​ເຊື່ອມ​ຊຶມ​ເອກະສານ​ວຽກງານ​ການເມືອງ-ແນວ​ຄິດ ແລະ ຄຳ​ສັ່ງ ​ຂອງ​ນາຍົກລັດຖະມົນຕີ​ກ່ຽວ​ກັບ​ການ​ແກ້​ໄຂ​ບັນຫາ​ເຄັ່ງຮ້ອນ​ທາງ​ດ້ານ​ເສດຖະກິດ, ການ​ເງິນ, ລາຄາ​ສິນຄ້າ ແລະ ໜີ້​ສິນ​ຕ່າງໆ, ຂຽນ​ຂ່າວ​ສົ່ງ​ໃຫ້​ໜັງສືພິມ​ກອງທັບ 3 ສະບັບ, ນຳພາ​ນັກ​ຮ້ອງ-ຂັບ​ລຳ​ສຽງ​ດີ​ໄປ​ແຂ່ງຂັນ​ປະ​ກວດ​ນັກ​ຮ້ອງ-ຂັບ​ລຳ​ສຽງ​ດີ​ທົ່ວ​ກອງທັບ ຄັ້ງ​ທີ IV ເນື່ອງ​ໃນ​ໂອກາດ​ຂ່ຳນັບ​ຮັບ​ຕ້ອນ​ວັນ​ສ້າງຕັ້ງ​ກອງທັບ​ປະຊາຊົນ​ລາວ ຄົບຮອບ 75 ປີ ຢູ່​ກອງ​ບັນຊາ​ການ​ທະຫານແຂວງ​ຄຳ​ມ່ວນ ສາມາດ​ຍາດ​ໄດ້​ລາງວັນ​ທີ I ປະເພດ​ຂັບ​ລຳ, ຈັດ​ຕັ້ງ​ສະຫຼຸບ​ວຽກ​ງານ​ແຂ່ງຂັນ ຮັກ​ຊາດ ແລະ ພັດທະນາ ປະຈຳ​ປີ 2023, ຈັດ​ຕັ້ງ​ເປີດ​ການ​ແຂ່ງຂັນ​ໄລຍະ​ສັ້ນ​ຂ່ຳນັບ​ຮັບ​ຕ້ອນ​ວັນ​ສ້າງຕັ້ງ​ກອງທັບ​ປະຊາຊົນ​ລາວ ຄົບຮອບ 75 ປີ, ເປີດ​ຮຽນ ແລະ ອອກ​ໃບຢັ້ງຢືນ​ຮຽນ​ສະໜັບສະໜູນ​ໃຫ້​ມະຫາຊົນ​ກ້າວໜ້າ 109 ສະຫາຍ, ຍິງ 30 ສະຫາຍ, ອອກ​ໃບຢັ້ງຢືນ ຮຽນ​ກົດ​ລະບຽບ​ພັກ​ໃຫ້​ມະຫາຊົນ​ຂະຫຍາຍ​ເຂົ້າ​ເປັນ​ສະມາຊິກ​ພັກ 93 ສະຫາຍ, ຍິງ 31 ສະຫາຍ, ເປີດ​ກອງ​ປະຊຸມ​ບັ້ນ​ດຳເນີນ​ຊີວິດ​ການເມືອງ​ໃນ​ໂອກາດ​ວັນ​ສ້າງຕັ້ງ​ກອງ​ປະຊາ ຊົນ​ລາວ ຄົບຮອບ 75 ປີ ຈຳນວນ​ພົນ​ເຂົ້າ​ຮ່ວມ 798 ສະຫາຍ, ຍິງ 262 ສະຫາຍ. ຮັບ ແລະ ແຈກ​ຍາຍ​ປຶ້ມ​ວາລະສານ 120 ຫົວ, ແຈກ​ຢາຍ​ໜັງສືພິມ​ໃຫ້​ແຕ່ ລະ​ກົມ​ກອງ ທົ່ວ ​ກົມໃຫຍ່ການເມືອງກອງທັບ 6.480 ສະບັບ. ນອກຈາກ​ນີ້, ຍັງ​ໄດ້​ເອົາໃຈໃສ່​ຊີ້​ນຳ​ວຽກ​ງານ​ອົງ​ການຈັດຕັ້ງ​ມະຫາຊົນ​ປຸກລະດົມ​ຊຸກຍູ້​ໃຫ້​ເຂົາເຈົ້າ​ໄດ້​ເຄື່ອນ​ໄຫວ​ຕາມ​ພາລະ​ບົດບາດ​ຂອງ​ຕົນ ແລະ ເປັນ​ກຳລັງ​ແຮງ​ສຳຄັນ​ ໃນ​ການ​ເຮັດ​ສຳເລັດ​ໜ້າທີ່​ການເມືອງ​ຂອງ​ກົມ​ກອງ ພ້ອມ​ທັງ​​ປະຕິບັດ​ນະໂຍບາຍ​ຕໍ່​ພະນັກງານ-ນັກຮົບ ເປັນຕົ້ນ​ແມ່ນ​ຄົ້ນຄວ້າ​ປະຕິບັດ​ນະໂຍບາຍ​ຍ້ອງຍໍ, ເລື່ອນ​ຊັ້ນ, ຍົກ​ຂັ້ນ​ເງິນເດືອນ, ຜັກ​ຜ່ອນ​ບຳນານ, ລາ​ພັກ​ປະຈຳ​ປີ, ສ້າງ​ຄອບຄົວ​ໃໝ່ ແລະ ວຽກ​ງານ​ອື່ນໆ ທີ່​ປິ່ນ​ອ້ອມ​ໜ້າທີ່​ການເມືອງ​ຂອງ​ກົມ​ກອງ​ໄດ້​ຮັບ​ຜົນສຳເລັດ​ໃນ​ຂັ້ນ​ພື້ນຖານ. ຈາກ​ນັ້ນ, ເພື່ອ​ເຮັດ​ໃຫ້​ກອງ​ປະຊຸມ​ຄັ້ງ​ນີ້​ດຳເນີນ​ດ້ວຍ​ບັນຍາກາດ​ອັນ​ດີ, ມີ​ຜົນ​ໄດ້​ຮັບ​ສູງ, ບັນລຸ​ຕາມ​ຈຸດປະສົງ, ຄາດໝາຍ ແລະ ແຜນການ​ທີ່​ວາງ​ໄວ້ ປະທານ​ກອງ​ປະຊຸມ​ກໍ​ໄດ້​ມີ​ຄຳ​ເຫັນ​ຊີ້​ນຳ​ກອງ​ປະຊຸມ ພ້ອມ​ດ້ວຍ​ສະມາຊິກ ປະ ກອບ​ຄຳ​ເຫັນ​ໃສ່​ບົດ​ສະຫຼຸບ​ຢ່າງ​ກົງ​ໄປ​ກົງ​ມາ. ໂອກາດ​ນີ້, ສະຫາຍ ພົນ​ຈັດຕະວາ ບຸນ​ເຫຼືອ ໄຊ​ຍະ​ເພັນ ​ໄດ້​ເນັ້ນ​ໜັກ​ໃຫ້​ຄະນະ​ພັກ-ຄະ​ບັນຊາ ຫ້ອງ​ການເມືອງ​ໃຫ້​ເອົາໃຈໃສ່​ວຽກ​ງານ​ເຮັດ​ໃຫ້​ສະພາບ​ພາຍ​ໃນ​ກົມ​ກອງ ກໍ​ຄື​ທົ່ວ​ອົງການ​ກົມ​ໃຫຍ່​ມີ​ຄວາມ​ສະຫງົບ​ໜັກ​ແໜ້ນ, ຕັ້ງໜ້າ​ສຶກ​ສາ​ອົບຮົມ​ການເມືອງ-ນຳພາ​ແນວ​ຄິດ​ ຕິດ​ພັນ​ກັບ​ການ​ເກັບ​ກຳ​ສະພາບ​ການເມືອງ-ແນວ​ຄິດ​ຂອງ​ພະນັກງານ-ນັກຮົບ​ໃນ​ກົມ​ກອງ, ເອົາໃຈໃສ່​ວຽກ​ງານ​ກໍ່ສ້າງ​ພັກ-ພະນັກງານ ໃຫ້​ມີ​ຄຸນນະ ພາບ​ດີ​ຂຶ້ນ, ສຸມ​ໃສ່​ປັບປຸງ​ແບບແຜນ​ວິທີ​ເຮັດ​ວຽກ ໃຫ້​ມີ​ວິທະຍາສາດ​ແທດ​ເຖິງ​ຕົວ​ຈິງ, ການຈັດຕັ້ງ​ປະຕິບັດ​ນະໂຍບາຍ​ຕໍ່​ພະນັກງານ-ນັກຮົບ ຕ້ອງ​ປະຕິບັດ​ໃຫ້​ສະເໝີ​ຕົ້ນ​ສະເໝີ​ປາຍ ແລະ ເຂັ້ມ​ງວດ ພ້ອມ​ນີ້, ກໍ​ຕ້ອງ​ເພີ່ມ​ທະວີ​ວຽກ​ງານ​ກວດກາ, ວຽກ​ງານ​ປ້ອງ​ກັນ​ພາຍ​ໃນ ໃຫ້​ໜັກ​ແໜ້ນ​ເຂັ້ມແຂງ, ຕິດຕາມ​ສະພາບ​ການເມືອງ​ພາຍ​ໃນ ຊຸກຍູ້​ຂະ​ບວນ​ການ​ກໍ່ສ້າງ​ກອງ 3 ປອດ, ກອງ​ວັດທະນະທຳ ແລະ ນັກຮົບ​ວັດທະນະທຳ ໃຫ້​ໄດ້​ຕາມ ເງື່ອນໄຂ​ມາດ ຖານ​ທີ່​ວາງ​ໄວ້. ໂດຍ: ສຸ​ເວດ ສີດາ​ຄຳ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ