ວັນເສົາ, ວັນທີ 12 ຕຸລາ 2024
ປິດການຫັດແອບ ປັບປຸງລະບຽບແບບແຜນ ລະບຽບການຕ່າງໆກ່ຽວກັບການຮຽນ- ການສອນ
ເວລາອອກຂ່າວ: 2024-02-22 13:49:41 | ຜູ້ຂຽນ : admin2 | ຈຳນວນຄົນເຂົ້າຊົມ: 1562 | ຄວາມນິຍົມ: 
ບັ້ນຫັດແອບປັບປຸງບັນດາລະບຽບແບບແຜນ ແລະ ລະບຽບການຕ່າງໆກ່ຽວກັບການຮຽນ-ການສອນຂອງໂຮງຮຽນກໍ່ສ້າງນາຍສິບເລກ1 ໄດ້ປິດລົງໃນວັນທີ 20 ກຸມພາ 2024ນີ້, ຢູ່ເດີ່ນຜາມໄຊຂອງຕົນ ໂດຍການເຂົ້າຮ່ວມເປັນປະທານຂອງ ສະຫາຍ ພົນຈັດຕະວາ ສີລາວົງ ບຸນມີໄຊ ຫົວໜ້າການເມືອງໂຮງຮຽນ,ມີບັນດາໜ່ວຍງານຂອງກະຊວງ,ມີຄະນະພັກ-ຄະນະອຳນວຍການໂຮງຮຽນ, ອົງການ 5 ຫ້ອງ, 4 ກອງພັນ, ຕະຫຼອດຮອດນັກຮຽນທັງ 3ລະບົບເຂົ້າຮ່ວມ.
ສະຫາຍ ພັນເອກ ພົງສຸລິຍາ ເພັງຄູນ ຮອງຫົວໜ້າກົມໂຮງຮຽນ ກົມໃຫ່ຍເສນາທິການກອງ ທັບໄດ້ຂຶ້ນສະຫຼຸບສັງເກດຕີລາຄາຄືນດ້ານດີ, ດ້ານອອ່ນ ຜ່ານການຈັດຕັ້ງປະຕິບັດ ປັບປຸງບັນດາລະບຽບແບບແຜນ, ລະບຽບການຕ່າງໆລະບຽບການຮຽນ-ການສອນຂອງໜວ່ຍງານລົງມາປັບປຸງຂອງກະຊວງ ແລະ ໜ່ວຍງານປັບປຸງຂອງໂຮງຮຽນກໍ່ສ້າງນາຍສິບເລກ1 ເຫັນວ່າ ແຕ່ລະຄະນະຮັບຜິດຊອບແຕ່ລະໜ່ວຍງານ,ພະນັກງານ-ນັກຮົບ ແລະ ນັກຮຽນ ກໍ່ໄດ້ປະຕິບັດຕາມແຜນການ, ຕາມວາລະ ແລະ ເນື້ອໃນຢ່າງເປັນລະບົບຄົບຖວ້ນ, ໄດ້ມີການປືກສາຫາລື ຕົກລົງເຫັນດີເປັນເອກະພາບບັນດາເນື້ອໃນ, ບັນດາບັນຫາຕ່າງໆ ແລະ ໄດ້ຂໍ້ສະຫຼຸບເປັນເອກະພາບກັນ, ສົມທຽບຈາກບໍ່ທັນປັບປຸງ ແລະ ພາຍຫຼັງປັບປຸງມີການປ່ຽນແປງທີ່ແຂງແຮງ, ມີຄວາມເປັນເອກະພາບ,ເປັນລະບຽບຈົບງາມ ແລະ ມີການຫັນປ່ຽນຢ່າງຕັ້ງໜ້າ. ພ້ອມກັນນີ້ກໍ່ເພື່ອເຮັດໃຫ້ພະນັກງານ-ນັກຮົບ-ນັກຮຽນກຳແໜ້ນໄດ້ບັນດາລະບຽບການທີ່ຂັ້ນເທິງວາງອອກໄດ້ນຳມາໝູນໃຊ້ເຂົ້າໃນຊີວິດປະຈຳວັນ, ແນໃສ່ດ້ານລະບຽບຂອງກົມກອງມີຄວາມໜັກແໜ້ນເຂັ້ມແຂງ, ມີລະບຽບວິໄນທີ່ເຂັ້ມງວດ ຖືກຕ້ອງຕາມລະບຽບການປະກອບຂອງກອງທັບ. ໂອກາດດຽວກັນນີ້ກໍ່ໄດ້ຟັງການໂອ້ລົມຂອງ ສະຫາຍ ພົນຈັດຕະວາ ສີລາວົງ ບຸນມີໄຊ ກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ບັນດາສະຫາຍຄະນະຊີ້ນຳຂອງກະຊວງປ້ອງກັນປະເທດ, ຄະນະຊີ້ນຳຂອງໂຮງຮຽນ ແລະ ພະນັກງານ-ນັກຮົບ-ນັກຮຽນທີ່ໄດ້ມີຄວາມຕັດສິນໃຈຜ່ານຜ່າເຮັດສຳເລັດໜ້າທີ່ຕາມແຜນການ ແລະ ຮຽກຮ້ອງມາຍັງຄະນະພັກ-ຄະນະບັນຊາແຕ່ລະຂັ້ນຕ້ອງເອົາໃຈໃສ່ຍົກສູງຄວາມຮັບຜິດຊອບຂອງຕົນ ຕ້ອງສ້າງເປັນມະຕິ ເປັນແຜນການອັນລະອຽດຂອງກົມກອງ ເພື່ອຕິດຕາມ ກວດກາ ເອົາໃຈໃສ່ສຶກສາການເມືອງນຳພາແນວຄິດໃຫ້ນາຍ ແລະ ພົນທະຫານ-ນັກຮຽນ ມີສະຕິຈັດຕັ້ງປະຕິບັດໃຫ້ຖືກຕ້ອງເຂັ້ມງວດ, ມີການຫັນປ່ຽນຢ່າງຕັ້ງໜ້າໃຫ້ດີກວ່າເກົ່າ ຖືເອົາການປັບປຸງຄັ້ງນີ້ເປັນຈຸດລິເລີ່ມເພື່ອຕີລາຄາ ຊົມເຊີຍ ກ່າວເຕືອນ ແລະ ນຳໄປຈັດຕັ້ງປະຕິບັດໃຫ້ຖືກຕ້ອງຕາມລະບຽບການຂອງກອງທັບ.
ຮ.ອ ນ້ອຍຈັນໄພ ແກ້ວວັນເຮືອງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
