ວັນຈັນ, ວັນທີ 14 ຕຸລາ 2024
ທະຫານແຂວງອຸດົມໄຊເຜີຍແຜ່ກົດໝາຍວ່າດ້ວຍອົງການໄອຍະການທະຫານ ( ສະບັບປັບປຸງ ) ປີ 2022
ເວລາອອກຂ່າວ: 2024-02-22 13:54:47 | ຜູ້ຂຽນ : admin2 | ຈຳນວນຄົນເຂົ້າຊົມ: 1578 | ຄວາມນິຍົມ: 
ໃນຕອນເຊົ້າຂອງວັນທີ 20 ກຸມພາ 2024, ກອງບັນຊາການທະຫານແຂວງອຸດົມໄຊ ໄດ້ໂຄສະນາເຜີຍແຜ່ກົດໝາຍວ່າດ້ວຍ ອົງການໄອຍະການທະຫານ ( ສະບັບປັບປຸງ ) ປີ 2022 ໂດຍເປັນກຽດເຂົ້າຮ່ວມເປັນປະທານຂອງ ສະຫາຍ ພົນຈັດຕະວາ ສີໄຫວ ໄມພອນ ຮອງຫົວໜ້າອົງການໄອຍະການປະຊາຊົນສູງສຸດ ຫົວໜ້າອົງການໄອຍະການທະຫານຂັ້ນສູງ, ມີ ສະຫາຍ ພັນເອກ ໄຊພອນ ກໍຊົມພູ ຫົວໜ້າຫ້ອງການເມືອງກອງບັນຊາການທະຫານແຂວງອຸດົມໄຊ, ມີຄະນະພັກ-ຄະນະກອງບັນຊາການ, ຄະນະພັກ-ຄະນະບັນຊາ, ອົງການ 5 ຫ້ອງ, ກົມກອງເອກະລາດອ້ອມຂ້າງກອງບັນຊາການຕະຫຼອດຮອດພະນັກງານຫຼັກແຫຼ່ງເຂົ້າຮ່ວມ.
ໃນກອງປະຊຸມ, ສະຫາຍ ພັນໂທ ອໍາພອນ ທໍາມະວົງ ຫົວໜ້າຫ້ອງການອົງການໄອຍະການທະຫານຂັ້ນສູງ ໄດ້ຂື້ນເຜີຍແຜ່ກົດໝາຍວ່າດ້ວຍອົງການໄອຍະການທະຫານ ( ສະບັບປັບປຸງ ) ປີ 2022 ປະກອບມີ 09 ພາກ, 9 ໝວດ, ມີ 66 ມາດຕາ. ກົດໝາຍສະບັບນີ້ ກໍານົດຫຼັກການ, ລະບຽບການ ແລະ ມາດຕະການກ່ຽວກັບການຈັດຕັ້ງ, ການເຄື່ອນໄຫວ ແລະ ການຕິດຕາມກວດກາຂອງອົງການໄອຍະການທະຫານ ເພື່ອຮັບປະກັນການປະຕິບັດວຽກງານໄອຍະການທະຫານ ໃຫ້ມີປະສິດທິຜົນແນ່ໃສ່ປົກປ້ອງຜົນປະໂຫຍດຂອງກອງທັບ, ສິດ ແລະ ຜົນປະໂຫຍດອັນຊອບທຳຂອງນາຍ ແລະ ພົນທະຫານ, ກຳມະກອນ, ພາລະກອນ, ກຳລັງສຳຮອງ ໃນເວລາປະຕິບັດໜ້າທີ່ປ້ອງກັນຊາດ, ເຮັດໃຫ້ກອງທັບມີຄວາມສະຫງົບ, ຄວາມເປັນລະບຽບຮຽບຮ້ອຍ, ມີຄວາມໜັກແໜ້ນ, ເຂັ້ມແຂງທາງດ້ານກົດໝາຍ ແລະ ມີແບບແຜນທັນສະໄໝປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ.
ໃນໂອກາດດັ່ງກ່າວ, ສະຫາຍ ພົນຈັດຕະວາ ສີໄຫວ ໄມພອນ ຮອງຫົວໜ້າອົງການໄອຍະການປະຊາຊົນສູງສຸດ ຫົວໜ້າອົງການໄອຍະການທະຫານຂັ້ນສູງ ເຊິ່ງສະຫາຍໄດ້ຮຽກຮ້ອງໃຫ້ຄະນະພັກ-ຄະນະບັນຊາແຕ່ລະຂັ້ນນໍາເອົາເນື້ອໃນກົດໝາຍດັ່ງກ່າວໄປຜັນຂະຫຍາຍໃຫ້ກວ້າງຂວາງເລິກເຊິ່ງ, ສອດຫ້ອຍເຂົ້າໃນທຸກຂົງຂົງເຂດວຽກງານ ແລະ ພ້ອມກັນຜັນຂະຫຍາຍໃຫ້ເຂົ້າສູ່ຊິວິດຕົວຈິງ, ຕິດພັນກັບການປະຕິບັດໜ້າທີ່ວິຊາສະເພາະ, ມີສະຕິເຄົາລົບກົດໝາຍ, ຄຽງຄູ່ກັບການການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ, ກໍ່ສ້າງກອງປອດໃສ, ປອດໄພ, ປອດຄະດີ, ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆທີ່ຂັດກັບລະບຽບກົດໝາຍ, ມີສະຕິຕໍ່ການຈັດຕັ້ງ, ມີຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບການມອບໝາຍ.
ຂ່າວ-ພາບ: ສົມພູນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
