ກອງທັບປະຊາຊົນລາວ
 
ວັນພຸດ, ວັນທີ 24 ເມສາ 2024

  

ຫ້ອງການ​ກຳມະບານ​ກອງທັບ ເອົາໃຈໃສ່​ຈັດ​ຕັ້ງ​ປະຕິບັດ​ເນື້ອ​ໃນ​ຂໍ້​ແຂ່ງຂັນ 5 ເປັນ​ເຈົ້າ
ເວລາອອກຂ່າວ: 2024-02-29 09:20:55 | ຜູ້ຂຽນ : admin1 | ຈຳນວນຄົນເຂົ້າຊົມ: 155 | ຄວາມນິຍົມ:



ຫ້ອງການ​ກຳມະບານ​ກອງທັບ ແມ່ນ​ອົງ​ການຈັດຕັ້ງ​ມະຫາຊົນ​ໜຶ່ງ ມີ​ພາລະ​ບົດບາດ​ເປັນ​ເສນາ​ທິ​ການ​ໃຫ້​ແກ່​ຄະນະ​ພັກ​ກະຊວງ​ປ້ອງ​ກັນ​ປະເທດ ກໍ​ຄື​ກົມ​ໃຫຍ່​ການເມືອງ​ກອງທັບ, ໂດຍ​ພາຍ​ໃຕ້​ການ​ນຳພາ-ຊີ້​ນຳ​ໂດຍ​ກົງ​ຈາກ​ກົມ​ໃຫຍ່​ການເມືອງ​ກອງທັບ ແລະ ດ້ານ​ວິຊາ​ສະເພາະ ໄດ້​ຮັບ​ການ​ຊີ້​ນຳ​ໂດຍ​ສູນ​ກາງ​ສະຫະພັນ​ກຳມະບານ​ລາວ, ໃນ​ໄລຍະ 1 ປີ ຜ່ານ​ມາ, ຫ້ອງການ​ກຳມະບານ ໄດ້​ເອົາໃຈໃສ່​ຈັດ​ຕັ້ງ​ປະຕິບັດ​ເນື້ອ​ໃນ​ຂໍ້​ແຂ່ງຂັນ 5 ເປັນ​ເຈົ້າ​ຂອງ​ສູນ​ກາງ​ສະຫະພັນ​ກຳມະບານ​ລາວ​ວາງ​ອອກ, ຍາມ​ໃດ​ກໍ​ໃຫ້​ຄວາມ​ສຳຄັນ, ຖື​ເອົາ​ວຽກ​ງານ​ສຶກ​ສາ​ອົບຮົມ​ການເມືອງ-ນຳພາ​ແນວ​ຄິດ​ເປັນ​ກົກ ເພື່ອ​ເຮັດ​ໃຫ້​ພະນັກງານ, ສະມາຊິກ​ກຳມະບານ, ກຳມະກອນ ແລະ ຜູ້​ອອກແຮງ​ງານ ໃນ​ຖັນ​ແຖວ​ກອງທັບ ມີ​ຄວາມ​ຮັບ​ຮູ້​ເຊື່ອມ​ຊຶມ​ກຳ​ແໜ້ນ​ແນວທາງ​ນະໂຍບາຍ​ຂອງ​ພັກ, ລະບຽບ​ກົດໝາຍ​ຂອງ​ລັດ, ມີ​ທັດສະນະ​ຫຼັກ​ໝັ້ນ​ຕໍ່​ຊົນ​ຊັ້ນ​ກຳມະກອນ, ມີ​ຄວາມ​ຈົງ​ຮັກ​ພັກດີ​ຕໍ່​ປະເທດ​ຊາດ, ຕໍ່​ພັກ, ຕໍ່​ກອງທັບ, ມີ​ຄຸນສົມບັດ​ສິນ​ທຳ​ປະຕິວັດ, ມີ​ສະຕິ​ເຄົາລົບ​ລະບຽບ​ກົດໝາຍ​ຂອງ​ລັດ ແລະ ມີ​ລະບຽບ​ວິໄນ​ໃນ​ການ​ອອກແຮງ​ງານ, ໄດ້​ຈັດ​ຕັ້ງ​ ຄົ້ນຄວ້າ​ເຊື່ອມ​ຊຶມ​ມະຕິ​ກອງ​ປະຊຸມ​ໃຫຍ່ ຄັ້ງ​ທີ XI ຂອງ​ພັກ, ແຜນ​ພັດທະນາ​ເສດຖະກິດ​ສັງຄົມ​ແຫ່ງ​ລັດ 5 ປີ ຄັ້ງ​ທີ IX, ມະຕິ​ກອງ​ປະຊຸມ​ໃຫຍ່ ຄັ້ງ​ທີ V ຂອງ​ອົງຄະ​ນະ​ພັກ​ກະຊວງ​ປ້ອງ​ກັນ​ປະເທດ, ມະຕິ​ກອງ​ປະຊຸມ​ໃຫຍ່​ຜູ້​ແທນ​ກຳມະບານ​ລາວ​ທົ່ວ​ປະເທດ ຄັ້ງ​ທີ VIII ແລະ ມະຕິ​ກອງ​ປະຊຸມ​ໃຫຍ່​ຜູ້​ແທນ​ກຳມະບານ​ທົ່ວ​ກອງທັບ ຄັ້ງ​ທີ V ມີ​ຜູ້​ເຂົ້າ​ຮ່ວມ 2.546 ເທື່ອ​ຄົນ, ຮ່ຳຮຽນ​ກົດ​ລະບຽບ​ສະຫະພັນ​ກຳມະບານ​ລາວ ສະໄໝ​ທີ VIII, ເຜີຍແຜ່​ແຜນ​ພັດທະນາ​ວຽກ​ງານ​ກຳມະບານ ຄັ້ງ​ທີ V ແລະ ເຂົ້າ​ຮ່ວມ​ຮັບ​ຟັງ​ປາຖະກະຖາ​ມູນເຊື້ອ​ປະຫວັດສາດ​ທີ່​ສຳຄັນ​ຂອງ​ຊາດ, ຂອງ​ພັກ, ຂອງ​ກອງທັບ ແລະ ຂອງ​ອົງ​ການຈັດຕັ້ງ​ກຳມະບານ​ລາວ ມີ​ຜູ້​ເຂົ້າ​ຮ່ວມ 2.842 ເທື່ອ​ຄົນ. ໃນ​ປັດຈຸບັນ, ຫ້ອງການ​ກຳມະບານ​ກອງທັບ ໄດ້​ຂະຫຍາຍ​ການຈັດຕັ້ງ​ກຳມະບານ​ໃນ​ທົ່ວ​ກອງທັບ ປະກອບ​ມີ 12 ສະຫະພັນ​ກຳມະບານ, ມີ​ກຳມະບານ​ຮາກ​ຖານ 74 ຮາກ​ຖານ, ມີ​ກຳມະກອນ​ທັງ​ໝົດ 5.714 ຄົນ, ມີ​ສະມາຊິກ​ກຳມະບານ​ທັງ​ໝົດ 3.456 ສະຫາຍ ໃນ​ນັ້ນ, ມີ​ພະນັກງານ​ກຳມະບານ​ອາຊີບ 16 ສະຫາຍ, ສະມາຊິກ​ກຳມະບານ ເປັນ​ສະມາຊິກ​ພັກ 1.750 ສະຫາຍ, ໄດ້​ສ້າງຕັ້ງ​ພະ​ແນກ​ກຳມະບານ​ຢູ່​ກົມ​ໃຫຍ່​ພະລາທິການ​ກອງທັບ, ສ້າງຕັ້ງ​ກຳມະບານ​ຮາກ​ຖານ​ໄດ້ 2 ຮາກ​ຖານ ແລະ ຂະຫຍາຍ​ສະມາຊິກ​ກຳມະບານ​ໃໝ່ ຢູ່​ຫົວໜ່ວຍ​ແຮງ​ງານ​ການ​ຜະລິດ​ທີ່​ຂຶ້ນ​ກັບ​ກອງທັບ​ໄດ້ 198 ຄົນ, ເອົາໃຈໃສ່​ຍົກ​ລະດັບ​ບຳລຸງ, ກໍ່ສ້າງ​ພະນັກງານ, ສະມາຊິກ​ກຳມະບານ ໃຫ້​ມີ​ຄວາມ​ເຂັ້ມແຂງ​ໜັກ​ແໜ້ນ ເພື່ອ​ສ້າງ​ເປັນ​ພະນັກງານ​ສືບ​ທອດ​ປ່ຽນ​ແທນ, ໄດ້​ສົ່ງ​ພະນັກງານ ໄປ​ເຝິກອົບຮົມ​ວຽກ​ງານ​ກຳມະບານ​ໄລຍະ​ສັ້ນ​ຢູ່ ​ສສ ຫວຽດນາມ ຈຳນວນ 22 ສະຫາຍ ນອກ​ນັ້ນ, ກຳມະບານ​ຮາກ​ຖານ​ບັນດາ​ກົມ​ກອງ​ຕ່າງໆ ຍັງ​ໄດ້​ສົ່ງ​ພະນັກ ງານ, ສະມາຊິກ​ກຳມະບານ ໄປ​ຍົກ​ລະດັບ​ທັງ​ບຳລຸງ ແລະ ກໍ່ສ້າງ​ທາງ​ດ້ານ​ວິຊາ​ການ​ຢູ່​ພາຍ​ໃນ ແລະ ຕ່າງປະເທດ ຈຳນວນ 203 ສະຫາຍ, ໄດ້​ຊີ້​ນຳ​ບັນດາ​ການຈັດຕັ້ງ​ກຳມະບານ​ຮາກ​ຖານ​ແຕ່​ລະ​ຂັ້ນ​ໃນ​ກອງທັບ ເຄື່ອນ​ໄຫວ​ຕາມ​ພາລະ​ບົດບາດ, ສິດ ແລະ ໜ້າທີ່​ຂອງ​ຕົນ​ຢ່າງ​ຕັ້ງໜ້າ, ເປັນ​ເຈົ້າ​ການ​ດຳເນີນ​ຊີວິດ​ການເມືອງ​ພາຍ​ໃນ​ຢ່າງ​ເປັນ​ປົກກະຕິ, ຕຳ​ນິຕິ​ຊົມ​ເຊິ່ງ​ກັນ ແລະ ກັນ ເພື່ອ​ພ້ອມ ​ກັນ​ກ້າວໜ້າ ແລະ ເຮັດ​ສຳເລັດ​ໜ້າທີ່​ຕາມ​ການຈັດຕັ້ງ​ຂັ້ນ​ເທິງ​ມອບ​ໝາຍ​ໃຫ້, ພະນັກງານ, ສະມາຊິກ​ກຳມະບານ​ໄດ້​ເອົາໃຈໃສ່​ຢ່າງ​ຕັ້ງໜ້າ​ໃນ​ການ​ຄົ້ນຄວ້າ​ຮ່ຳ ຮຽນ​ດ້ວຍ​ຫຼາຍ​ວິທີ​ການ ເປັນຕົ້ນ​ແມ່ນ ໄປ​ຍົກ​ລະດັບ​ດ້ານ​ວິຊາ​ສະເພາະ​ຮ່ຳຮຽນ​ຢູ່ ວິທະຍາໄລ, ໂຮງຮຽນ​ວິຊາ​ຊີບ​ຕ່າງໆ ແລະ ຄົ້ນຄວ້າ​ຮ່ຳຮຽນ​ດ້ວຍ​ຕົນ​ເອງ ໂດຍ​ການ​ຊອກ​ຮູ້​ຮ່ຳຮຽນ​ຕາມ​ປຶ້ມ​ວາລະສານ, ໜັງສືພິມ ແລະ ຮ່ຳຮຽນ​ນຳ​ໝູ່​ເພື່ອນ​ທີ່​ມີ​ປະສົບ​ການ ເພື່ອ​ເປັນ​ການ​ພັດທະນາ​ຕົນ​ເອງ ໃຫ້​ມີ​ຄວາມ​ຮູ້ ​ຄວາມ​ສາມາດ ທາງ​ດ້ານ​ທິດ​ສະ​ດີ​ການເມືອງ, ວິຊາ​ສະເພາະ, ເຕັກນິກ​ວິທະຍາສາດ ແລະ ເຕັກ​ໂນ​ໂລ​ຊີ​ທີ່​ທັນ​ສະໄໝ ໝູນ​ໃຊ້​ເຂົ້າ​ໃນ​ໜ້າທີ່​ວຽກ​ງານ​ຢ່າງ​ມີ​ປະສິດທິພາບ ແລະ ປະ​ສິດທິ​ຜົນ​ສູງ, ອົງ​ການຈັດຕັ້ງ​ກຳມະບານ​ຮາກ​ຖານ ຍັງ​ໄດ້​ເຄື່ອນ​ໄຫວ​ປັບປຸງ ແລະ ຂະຫຍາຍ​ການຈັດຕັ້ງ​ໃຫ້​ກວ້າງຂວາງ, ມີ​ຄວາມ​ເຕີບ​ໃຫຍ່​ເຂັ້ມແຂງ​ໜັກ​ແໜ້ນ ສາມາດ​ເຄື່ອນ​ໄຫວ​ປະຕິບັດ​ພາລະ​ບົດບາດ, ສິດ, ໜ້າທີ່​ຂອງ​ຕົນ ດ້ວຍ​ ຄວາມ​ຮັບຜິດຊອບ​ສູງ, ເອົາໃຈໃສ່​ໃນ​ການ​ປຸກລະດົມ​ຊຸກຍູ້​ຂະ​ບວນ​ການ​ດ້ານ​ຕ່າງໆ ເພື່ອ​ຂ່ຳນັບ​ຮັບ​ຕ້ອນ​ວັນ​ສຳຄັນ​ຕ່າງໆ​ຂອງ​ຊາດ, ຂອງ​ພັກ, ຂອງ​ກອງທັບ ແລະ ອົງ​ການຈັດຕັ້ງ​ກຳມະບານ ເປັນຕົ້ນ​ແມ່ນ​ຂະ​ບວນ​ການ​ຍ່າງ​ເພື່ອ​ສຸຂະພາບ, ຂະ​ບວນ​ການ​ສິລະ​ປະ-ວັນນະຄະດີ ແລະ ກິລາ​ມວນ​ຊົນ ເພື່ອ​ເປັນ​ການ​ພົບ​ປະ​ຮັດ​ແໜ້ນ​ຄວາມ​ສາມັກຄີ​ເຊິ່ງ​ກັນ ແລະ ກັນ ທັງ​ເຮັດ​ໃຫ້​ສຸຂະພາບ​ແຂງແຮງ ສາມາດ​ປະຕິບັດ​ໜ້າທີ່ ທີ່​ໄດ້​ຮັບ​ການ​ມອບ​ໝາຍ​ຢ່າງ​ມີ​ຜົນສຳເລັດ​ສູງ, ໄປ​ພ້ອມ​ກັນ​ນັ້ນ, ກໍ​ໄດ້​ເອົາໃຈໃສ່​ເຄື່ອນ​ໄຫວ​ວຽກ​ງານ ປົກ​ປ້ອງ​ສິດ ແລະ ຜົນ​ປະໂຫຍດ​ອັນ​ຊອບ​ທຳ​ຂອງ​ກຳມະກອນ ແລະ ຜູ້​ອອກແຮງ​ງານ ໂດຍ​ຕິດ​ພັນ​ກັບ​ການ​ພັດທະນາ​ສີມື​ແຮງ​ງານ ໃນ​ນັ້ນ, ຄະນະ​ສະຫະພັນ​ກຳມະບານ, ກຳມະບານ​ຮາກ​ຖານ ບັນດາ​ກົມ​ກອງ ໄດ້​ເຂົ້າ​ຮ່ວມ​ຄົ້ນຄວ້າ​ປະກອບ​ຄຳ​ຄິດ​ຄຳ​ເຫັນ​ຕໍ່​ການ​ປັບປຸງ​ກົດ​ລະບຽບ​ຂອງ​ກົມ​ກອງ ເພື່ອ​ໃຫ້​ແທດເໝາະ​ກັບ​ເງື່ອນໄຂ​ຕົວ​ຈິງ ເຊັ່ນ: ລະບຽບ​ການ​ອອກແຮງ​ງານ, ການ​ຮັກສາ​ສິ່ງແວດລ້ອມ, ການ​ປ້ອງ​ກັນ​ບໍ່​ໃຫ້​ເກີດ​ພະຍາດ​ອາຊີບ, ປ້ອງ​ກັນ​ອຸບັດ​ຕິ​ເຫດ​ແຮງ​ງານ ແລະ ການ​ສ້າງ​ນິຕິ​ກຳ​ອື່ນໆ ທີ່​ພົວພັນ​ເຖິງ​ສິດຜົນປະໂຫຍດ​ອັນ​ຊອບ​ທຳ​ຂອງ​ສະມາຊິກ​ກຳມະບານ, ກຳມະກອນ ແລະ ຜູ້​ອອກແຮງ​ງານ​ໃນ​ຂົງເຂດ​ຫົວໜ່ວຍ​ແຮງ​ງານ​ການ​ຜະລິດ​ທີ່​ຂຶ້ນ​ກັບ​ກອງທັບ ໂດຍ​ປະຕິບັດ​ຕາມ​ກົດໝາຍ​ແຮງ​ງານ ກໍ​ຄື​ກົດໝາຍ ວ່າ​ດ້ວຍ​ກຳມະບານ​ລາວ, ໄດ້​ເອົາໃຈໃສ່​ຊອກ​ແຫຼ່ງ​ລາຍ​ຮັບ​ດ້ານ​ຕ່າງໆ ເພື່ອ​ຮັບ​ໃຊ້​ໃຫ້​ແກ່​ການເຄື່ອນໄຫວ​ວຽກ​ງານ​ກຳມະ ບານ ໃຫ້​ມີ​ຂະ​ບວນ​ການ​ຟົດຟື້ນ​ຕໍ່​ເນື່ອງ ໂດຍ​ສະເພາະ ໄດ້​ສ້າງ​ກອງ​ທຶນ​ຊ່ວຍເຫຼືອ​ເຊິ່ງ​ກັນ ແລະ ກັນພ້ອມ​ທັງ​ໄດ້​ປຸກລະດົມ​ຊຸກຍູ້​ພະນັກງານ, ສະມາຊິກ​ກຳມະບານ, ກຳມະກອນ ແລະ ຜູ້​ອອກແຮງ​ງານ ເຂົ້າ​ເປັນ​ສະມາຊິກ​ກອງ​ທຶນ ມາ​ຮອດ​ປັດຈຸບັນ, ມີ​ສະມາຊິກ​ກອງ​ທຶນ​ທັງ​ໝົດ 3.456 ສະຫາຍ, ມີ​ເງິນ​ກອງ​ທຶນ 1.751 ລ້ານ​ກວ່າ​ກີບ, ຊຸກຍູ້​ຕິດຕາມ​ກວດກາ​ການ​ປົກ​ປ້ອງ​ສິດ ແລະ ຜົນ​ປະ ໂຫຍດ​ອັນ​ຊອບ​ທຳ ຕາມ​ພາລະ​ບົດບາດ, ສິດ ແລະ ໜ້າທີ່​ຂອງ​ສະຫະພັນ​ກຳມະບານ​ລາວ ເປັນຕົ້ນ​ແມ່ນ ການ​ເບີກ​ຈ່າຍ​ເງິນເດືອນ, ຄ່າ​ແຮງ​ງານ, ສະຫວັດດີ​ການ-ສັງຄົມ, ເບິ່ງແຍງ​ຊີວິດ​ການ​ເປັນ​ຢູ່ ແລະ ການ​ປະຕິບັດ​ນະໂຍບາຍ​ຕໍ່​ພະນັກງານ, ສະມາຊິກ​ກຳມະບານ, ກຳມະກອນໃນ​ເວລາ​ເຈັບເປັນຢ່າງ​ທົ່ວ​ເຖິງ. ນອກ​ນັ້ນ, ຫ້ອງການ​ກຳມະບານ​ກອງທັບ ຍັງ​ໄດ້​ເອົາໃຈໃສ່​ປຸກລະດົມ​ຂະ ​ບວນ​ການ​ດ້ານ​ຕ່າງໆ​ໃຫ້​ຟົດຟື້ນ ຕາມ​ເນື້ອ​ໃນ​ຂໍ້​ແຂ່ງຂັນ 5 ເປັນ​ເຈົ້າ ສອດ​ຫ້ອຍ​ເຂົ້າ​ໃນ​ທຸກ​ຂົງເຂດ​ວຽກ​ງານ ຕິດ​ພັນ​ກັບ 4 ໜ້າທີ່​ໃຫຍ່ 26 ແຜນ​ງານ ທີ່​ຄະ ນະ​ພັກ​ກະຊວງ​ປ້ອງ​ກັນ​ປະເທດ​ວາງ​ອອກ, ຊຸກຍູ້​ຂະ​ບວນ​ການຈັດຕັ້ງ​ຜັນ​ຂະຫຍາຍ​ແນວທາງ​ນະໂຍບາຍ​ຂອງ​ພັກ, ແຜນ​ພັດທະນາ​ເສດຖະກິດ-ສັງຄົມ​ຂອງ​ລັດ, ມະຕິ​ກອງ​ປະຊຸມ​ໃຫຍ່​ຜູ້​ແທນ​ສະຫະພັນ​ກຳມະບານ​ລາວ​ທົ່ວ​ປະເທດ ຄັ້ງ​ທີ VIII ແລະ ມະຕິ​ກອງ​ປະຊຸມ​ໃຫຍ່​ຂັ້ນ​ຂອງ​ຕົນ ຫັນ​ມາ​ເປັນ​ແຜນການ, ແຜນ​ງານ, ໂຄງການ, ກິດຈະກຳອັນ​ລະອຽດ ແລະ ນຳພາ​ຈັດ​ຕັ້ງ​ປະຕິບັດ​ໃຫ້​ສຳເລັດ​ຕາມ​ຄາດໝາຍ ແລະ ລື່ນ​ຄາດໝາຍ​ທີ່​ວາງ​ໄວ້. ເຊິ່ງ​ໃນ​ປີຜ່ານມາ ຫ້ອງການ​ກຳມະບານ​ກອງທັບ ໄດ້​ຮັບ​ການ​ຢັ້ງຢືນ​ຈາກ​ສູນ​ກາງ​ສະຫະພັນ​ກຳມະບານ​ລາວ ເປັນ​ສະຫະພັນ​ກຳມະບານ 5 ເປັນ​ເຈົ້າ ປະຈຳ​ປີ 2023 ຢ່າງ​ສົມ​ກຽດ. ໂດຍ: ບ່າວ​ກອງທັບ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ