ກອງທັບປະຊາຊົນລາວ
 
ວັນພຸດ, ວັນທີ 24 ເມສາ 2024

  

ແຂວງຫຼວງພະບາງ ສະຫຼຸບວຽກງານປ້ອງກັນຊາດ-ປ້ອງກັນຄວາມສະຫງົບ ປະຈຳປີ 2023
ເວລາອອກຂ່າວ: 2024-03-04 15:04:03 | ຜູ້ຂຽນ : admin2 | ຈຳນວນຄົນເຂົ້າຊົມ: 245 | ຄວາມນິຍົມ:



ກອງປະຊຸມສະຫຼຸບວຽກງານປ້ອງກັນຊາດ-ປ້ອງກັນຄວາມສະຫງົບ ປະຈຳປີ 2023 -ວາງຄາດໝາຍສູ້ຊົນປະຈຳປີ 2024 ຂອງແຂວງຫຼວງພະບາງ ໄດ້ຈັດຂຶ້ນວັນທີ1 ມີນາ 2024 ນີ້, ທີ່ສະໂມສອນຂອງກອງບັນຊາການທະຫານແຂວງ, ໂດຍການເປັນປະທານຂອງ ທ່ານ ຄຳຂັນ ຈັນທະວີສຸກ ກໍາມະການສູນກາງພັກ ເຈົ້າແຂວງຫຼວງພະບາງ, ປະທານປ້ອງກັນຊາດ-ປ້ອງກັນຄວາມສະຫງົບແຂວງ, ມີກອງບັນຊາການທະຫານແຂວງ, ກອງບັນຊາການປ້ອງກັນຄວາມສະຫງົບແຂວງ, ມີຮອງປະທານ, ຄະນະກຳມະການ ປກຊ-ປກສ ຂັ້ນແຂວງ, ຂັ້ນເມືອງ, ອົງການ, ກົມກອງ, ພະແນກການ ແລະ ພາກສ່ວນກ່ຽວຂ້ອງເຂົ້າຮ່ວມ. ໂອກາດນີ້, ສະຫາຍ ພົນຈັດຕະວາ ວິລ່ຽມ ວົງທິສານ ຫົວໜ້າການທະຫານກອງບັນຊາການທະຫານແຂວງ ຮອງປະທານຄະນະກຳມະການ ປກຊ-ປກສ ແຂວງ ໄດ້ໃຫ້ກຽດຂຶ້ນຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບໃນໜຶ່ງປີວ່າ: ໄລຍະຜ່ານມາໄດ້ຈັດຕັ້ງກຳລັງລົງກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ, ສຶກສາອົບຮົມການເມືອງນໍາພາແນວຄິດເຮັດໃຫ້ປະຊາຊົນມີຄວາມຕື່ນຕົວຈັດຕັ້ງປະຕິບັດແນວທາງນະໂຍບາຍຂອງພັກ, ກົດໝາຍລັດ, ຕັ້ງໜ້າປົກປັກຮັກສາ ແລະ ສ້າງສາພັດທະນາປະເທດຊາດ, ອັນພົ້ນເດັ່ນໄລຍະຜ່ານມາທັງສອງກໍາລັງໄດ້ປະສານສົມທົບແລກປ່ຽນຂໍ້ມູນຂ່າວສານວິຊາສະເພາະ, ສົມທົບກັບອໍານາດການປົກຄອງທ້ອງຖິ່ນ ພ້ອມກັນແກ້ໄຂບັນຫາປະກົດການຫຍໍ້ທໍ້ຕ່າງໆເຊັ່ນ: ການຄ້າຂາຍເຖື່ອນ, ບັນຫາຢາເສບຕິດ, ສາດສະໜາ, ການລັກລອບຕັດໄມ້ທໍາລາຍປ່າຊະຊາຍ, ອາວຸດເສິກ, ອາວຸດລ່າເນື້ອ, ການເຂົ້າ-ອອກເມືອງ, ການເຄື່ອນຍ້າຍພົນລະເມືອງຜ່ານຊາຍແດນຜິດຕໍ່ລະບຽບກົດໝາຍ, ການຕັ້ງຖິ່ນລໍາເນົາຕາມລໍາພັງໃຈ ແລະ ບັນຫາອື່ນໆ, ອັນພົ້ນເດັ່ນຜ່ານມາສາມາດສ້າງບ້ານປ້ອງກັນຊາດເຂັ້ມແຂງໄດ້ 73 ບ້ານ, ມີ 6.016 ຄອບຄົວ, ບ້ານປ້ອງກັນຄວາມສະຫງົບດີ 675 ບ້ານ, ມີ 69.897 ຄອບຄົວ, ນອກນີ້ ຍັງສໍາເລັດການຝຶກອົບຮົມວຽກງານ ປກສ ບ້ານໄດ້ 8 ບ້ານ, ອົບຮົມວຽກງານ ປກຊ ໃຫ້ກອງຫຼອນໄດ້ 8 ກຸ່ມບ້ານ, ກວມເອົາ 7 ເມືອງທົ່ວແຂວງ, ອົບຮົມວຽກງານ ປກຊ-ປກສ ໃຫ້ນັກຮຽນມັດທະຍົມຕອນປາຍ 41 ແຫ່ງ, ມີຜູ້ເຂົ້າຮ່ວມ 7.753 ຄົນ, ອົບຮົມໃຫ້ນັກສຶກສາສະຖາບັນໄດ້ 4 ແຫ່ງມີ 1.158 ຄົນ, ນອກນີ້ຍັງໄດ້ຈັດຕັ້ງກໍາລັງກຽມພ້ອມສູ້ຮົບ, ປ້ອງກັນເປົ້າໝາຍຍຸດທະສາດ, ການກອບກູ້ໄພພິບັດທໍາມະຊາດ, ປ້ອງກັນຊາຍແດນ, ປ້ອງກັນແຂກການນຳຂັ້ນສູງ, ກອງປະຊຸມຂັ້ນຕ່າງໆ, ບຸນປະເພນີ ແລະ ປ້ອງກັນໂຄງການເສັ້ນທາງລົດໄຟລາວ-ຈີນ, ໂດຍລວມຜ່ານມາຂອບເຂດຮັບຜິດຊອບມີຄວາມເປັນລະບຽບຮຽບຮ້ອຍ, ສະຫງົບປອດໄພ, ມີສະຖຽນລະພາບທາງດ້ານການເມືອງຢ່າງໜັກແໜ້ນ, ລະບົບການເມືອງຢູ່ຂັ້ນຮາກຖານໄດ້ຮັບການປັບປຸງ, ເສດຖະກິດມີການຂະຫຍາຍຕົວ, ຊີວິດການເປັນຢູ່ຂອງປະຊາຊົນໄດ້ການພັດທະນາດີຂຶ້ນ, ກຳລັງ ປກຊ-ປກສ ນັບມື້ເຕີບໃຫຍ່ເຂັ້ມແຂງໜັກແໜ້ນ, ຮັບປະກັນໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດຊາດກ້າວຂຶ້ນຢ່າງບໍ່ຢຸດຢັ້ງ, ປະຊາຊົນລາວບັນດາເຜົ່າມີຄວາມສາມັກຄີປອງດອງ ແລະ ພ້ອມກັນປະກອບສ່ວນຢ່າງແຂງແຮງ ເຂົ້າໃນການເຮັດໜ້າທີ່ ປກຊ-ປກສ ຢູ່ຂັ້ນທ້ອງຖິ່ນຂອງຕົນຢ່າງເປັນຂະບວນຟົດຟື້ນກ້ວາງຂວາງ, ໂອກາດນີ້ຜູ້ແທນກອງປະຊຸມຍັງໄດ້ປະກອບຄຳຄິດເຫັນແລກປ່ຽນບົດຮຽນໝາກຜົນຂອງການຈັດຕັ້ງປະຕິບັດວຽກງານຂອບເຂດຮັບຜິດຊອບຂອງຕົນ, ເພື່ອຄົ້ນຄ້ວາເອກະພາບນໍາໄປຈັດຕັ້ງປະຕິບັດວຽກງານຈຸດສຸມໃນປີ 2024 ໃຫ້ໄດ້ຮັບໝາກຜົນສູງຂຶ້ນລື່ນເກົ່າ. ເພື່ອເຮັດໃຫ້ກອງປະຊຸມມີເນື້ອໃນເລິກເຊິ່ງ ແລະ ເປັນທິດຊີ້ນໍາຈັດຕັ້ງປະຕິບັດໃນຕໍ່ໜ້າໃຫ້ໄດ້ຮັບຜົນດີ ທ່ານ ຄໍາຂັນ ຈັນທະວີສຸກ ໄດ້ມີຄໍາເຫັນໂອ້ລົມ ເນັ້ນໜັກໃຫ້ຄະນະກໍາມະການ ປກຊ-ປກສ ແຕ່ລະຂັ້ນເອົາໃຈໃສ່ຕໍ່ວຽກງານສືບຂ່າວ, ກໍາແໜ້ນສະພາບ, ກົນອຸບາຍຍຸດທະສາດ ແລະ ແຜນການເຄື່ອນໄຫວຂອງກໍາລັງອິດທິປໍລະປັກ ແລະ ກຸ່ມຄົນບໍ່ຫວັງດີ, ທັງຕີລາຄາໃຫ້ຊັດເຈນ, ແກ້ໄຂຢ່າງແທດເໝາະ, ດ້ວຍການສຸມກໍາລັງຫັນລົງກໍ່ສ້າງຮາກຖານການເມືອງໃຫ້ມີຄຸນນະພາບ ແລະ ມີປະສິດທິຜົນ, ໃນນັ້ນຕ້ອງເອົາໃຈໃສ່ພິເສດຢູ່ເຂດຫຼໍ່ແຫຼມ, ກໍາແໜ້ນຮາກຖານປະຊາຊົນ, ສະກັດກັ້ນບໍ່ໃຫ້ກຸ່ມຄົນບໍ່ຫວັງດີໂຄສະນາຍຸແຍ່ແກ່ດຶງປະຊາຊົນ, ໄປພ້ອມກັບການໂຄສະນາສຶກສາອົບຮົມປະຊາຊົນບັນດາເຜົ່າໃຫ້ຮັບຮູ້ເຊື່ອມຊຶມຕໍ່ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ, ສົມທົບແໜ້ນກັບບັນດາວຽກງານຕ່າງໆ, ເພື່ອຮັບປະກັນເຮັດໃຫ້ແຂວງ ມີສະຖຽນນະພາບທາງກ້ານການເມືອງ, ສະຫງົບປອດໄພ ແລະ ສັງຄົມມີຄວາມເປັນລະບຽບຮຽບຮ້ອຍ, ດ້ວຍການສຸມໃສ່ແກ້ໄຂບັນຫາປະກົດການຫຍໍ້ທໍ້ໃຫ້ຫຼຸດໜ້ອຍຖອຍລົງ, ແກ້ໄຂຕ້ອງມີຄວາມເປັນເອກະພາບ, ຖືກຕ້ອງຕາມຂະບວນການຍຸຕິທໍາ ແລະ ແນບນຽນ, ເດັດຂາດ. ຂ່າວ - ພາບ: ສົມພອນ ສຸວັນທອນ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ