ວັນຈັນ, ວັນທີ 14 ຕຸລາ 2024
ກອງບັນຊາການທະຫານແຂວງຜົ້ງສາລີ ຈັດພິທີບາສີສູ່ຂວັນ ສົ່ງທ້າຍປີເກົ່າ ພສ 2566 ຕ້ອນຮັບປີໃໝ່ ພສ 2567
ເວລາອອກຂ່າວ: 2024-04-12 14:52:07 | ຜູ້ຂຽນ : admin2 | ຈຳນວນຄົນເຂົ້າຊົມ: 1611 | ຄວາມນິຍົມ: 
ໃນຕອນເຊົ້າ ວັນທີ 12 ເມສາ 2024 ນີ້, ຢູ່ກອງບັນຊາການທະຫານແຂວງຜົ້ງສາລີ ໄດ້ຈັດພິທີຕັກບາດ ພຣະ 9 ອົງ ແລະ ບາສີສູ່ຂວັນສົ່ງທ້າຍປີເກົ່າ ພສ 2566 ຕ້ອນຮັບປີໃໝ່ ພສ 2567, ໂດຍການເຂົ້າຮ່ວມ ຂອງສະຫາຍ ພົນຈັດຕະວາ ຊຽງເພັງ ບົວລະວົງ ເລຂາຄະນະພັກ ຫົວໜ້າການເມືອງ ກອງບັນຊາການທະຫານແຂວງຜົ້ງສາລີ, ສະຫາຍ ພັນເອກ ຄໍາພອນ ແສນສີວົງສາ ຮອງເລຂາຄະນະພັກ ຫົວໜ້າການທະຫານ, ມີຄະນະປະຈໍາພັກ, ຄະນະພັກກອງບັນຊາການທະຫານແຂວງ, ຄະນະຫ້ອງ, ຄະນະພະແນກ, ຄອບຄົວຄະນະພັກ-ຄະນະບັນຊາກອງບັນຊາການທະຫານແຂວງ, ພະນັກງານ-ນັກຮົບອົງການ 5 ຫ້ອງ ແລະ ແຂກຖືກເຊີນເຂົ້າຮ່ວມ.
ໃນພິທີໄດ້ພ້ອມກັນຕັກບາດ, ຍາດນໍ້າອຸທິດສ່ວນບຸນກຸສົນ ແລະ ຮັບຟັງການເທດສະໜາຈາກພຣະພິກຸສົງ ເພື່ອເຮັດໃຫ້ມີແຕ່ຄວາມສຸກ, ຄວາມຈະເລີນກ້າວໜ້າ, ພ້ອມນັ້ນໄດ້ບາສີສູ່ຂວັນເພື່ອສົ່ງທ້າຍປີເກົ່າ ພສ 2566 ຕ້ອນຮັບປີໃໝ່ ພສ 2567 ທີ່ຈະມາເຖິງໃຫ້ມີບັນຍາກາດຄຶກຄື້ນມ່ວນຊື່ນ ແລະ ໄດ້ຫົດສົງນໍ້າໃຫ້ພອນເຊິ່ງກັນ ແລະ ກັນ ດ້ວຍບັນຍາກາດຟົດຟື້ນມ່ວນຊື່ນຕາມຮີດຄອງປະເພນີລາວ ທີ່ເຄີຍປະຕິບັດກັນມາແຕ່ບູຮານນະການ.
ໃນໂອກາດດັ່ງກ່າວ, ສະຫາຍ ພົນຈັດຕະວາ ຊຽງເພັງ ບົວລະວົງ ໄດ້ຕາງໜ້າໃຫ້ຄະນະພັກ-ຄະນະບັນຊາ ກອງບັນຊາການທະຫານແຂວງ, ພະນັກງານ-ນັກຮົບ ກ່າວຄຳອວຍພອນໄຊອັນປະເສີດແດ່ ຄະນະນໍາກອງບັນຊາການທະຫານແຂວງ ຈົ່ງມີສຸຂະພາບແຂງແຮງ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ ສືບຕໍ່ນໍາພາ-ຊີ້ນໍາພາກອງບັນຊາການທະຫານແຂວງຜົ້ງສາລີ ໃຫ້ມີຄວາມກ້າວໜ້າຂຶ້ນເລື້ອຍໆ, ອວຍພອນໄຊມາຍັງບັນດາພະນັກງານ-ນັກຮົບທົ່ວທະຫານແຂວງ ແລະ ແຂກທີ່ໄດ້ມາຮ່ວມໃນພິທີ ຈົ່ງມີສຸຂະພາບເຂັ້ມແຂງ, ເຮັດສໍາເລັດໜ້າທີ່ອັນມີກຽດ, ພ້ອມກັນຕ້ອນຮັບປີໃໝ່ດ້ວຍຈິດໃຈເບີກບານມ່ວນຊື່ນ ແລະ ເດີນທາງໄປມາຫາສູ່ກັນດ້ວຍຄວາມປອດໄພ.
ຂ່າວ, ພາບ: ທອງສຸກ ຈັນຖະໜອມ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
