ກອງທັບປະຊາຊົນລາວ
 
ວັນພຸດ, ວັນທີ 29 ພຶດສະພາ 2024

  

ທະຫານ​ແຂວງ​ອຸດົມ​ໄຊ ສະຫຼຸບ​ວຽກ​ງານ​ຈັດ​ຕັ້ງ​ພັກ-ພະນັກງານ ແລະ ມອບ​ໃບຢັ້ງຢືນ​ໜ່ວຍ​ພັກ ປອດ​ໃສ ເຂັ້ມແຂງ ໜັກ​ແໜ້ນ
ເວລາອອກຂ່າວ: 2024-04-24 09:07:57 | ຜູ້ຂຽນ : admin1 | ຈຳນວນຄົນເຂົ້າຊົມ: 390 | ຄວາມນິຍົມ:



ໃນກາງເດືອນເມສາ 2024 ນີ້, ກອງ​ບັນຊາ​ການ​ທະຫານ​ແຂວງ​ອຸດົມ​ໄຊ ໄດ້ສະຫຼຸບ​ວຽກ​ງານ​ຈັດ​ຕັ້ງ​ພັກ-ພະນັກງານ ແລະ ມອບ​ໃບຢັ້ງຢືນ​ໜ່ວຍ​ພັກ​ປອດ​ໃສ ເຂັ້ມແຂງ ແລະ ໜັກ​ແໜ້ນ ປະຈຳ​ປີ 2023 ໂດຍ​ການ​ເປັນ​ປະທານ​ຂອງສະຫາຍ ພັນ​ເອກ ຕຸ້ຍ ພົມ​ມີ​ໄຊ ເລຂາ​ຄະນະ​ພັກ, ຫົວໜ້າ​ການເມືອງ ກອງ​ບັນຊາ​ການ​ທະຫານ​ແຂວງ​ອຸດົມ​ໄຊ, ມີ​ຄະນະ​ພັກ-ຄະນະ​ບັນຊາ, ອົງການ 5 ຫ້ອງ, ກອງພັນ, ໂຮງຮຽນ, ໂຮງໝໍ, ກົມ​ກອງ​ອ້ອມ​ຂ້າງ​ກອງ​ບັນຊາ​ການ​ຕະຫຼອດ​ຮອດ​ພະນັກງານ​ຫຼັກ​ແຫຼ່ງ​ເຂົ້າ​ຮ່ວມ. ສະຫາຍ ພັນ​ເອກ ໄຊ​ພອນ ກໍ​ຊົມ​ພູ ຫົວໜ້າ​ຫ້ອງ​ການເມືອງ ກອງ​ບັນຊາ​ການ​ທະຫານ​ແຂວງ​ອຸດົມ​ໄຊ ໄດ້​​ຜ່ານ​ບົດ​ສະຫຼຸບ ການຈັດຕັ້ງ​ປະຕິບັດ​ວຽກ​ງານ​ກໍ່ສ້າງ​ພັກ-ພະນັກງານ ປະຈຳ​ປີ 2023 ຄະນະ​ພັກ​ແຕ່​ລະ​ຂັ້ນ ໄດ້​ເອົາໃຈໃສ່, ໃຫ້​ຄວາມ​ສຳຄັນ ແລະ ຖື​ວຽກ​ງານ​ດັ່ງກ່າວ​ເປັນ​ວຽກ​ງານ​ຍຸດ​ທະ​ສາດ​ແຖວ​ໜ້າ ເພື່ອ​ໃຫ້​ຖັນ​ແຖວ​ສະມາຊິກ​ພັກ​ທົ່ວ​ກອງ​ບັນຊາ​ການໄດ້​ຮັບ​ຮູ້, ເຊື່ອມ​ຊຶມ ກຳ​ແໜ້ນ​ແນວທາງ-ແຜນ​ນະໂຍບາຍ ຂອງ​ພັກ, ມີ​ທັດສະນະ​ຫຼັກ​ໝັ້ນ​ຊົນ​ຊັ້ນ, ກຳ​ໄດ້​ທິດ​ສະ​ດີ​ມາກ-ເລ​ນິນ, ແນວ​ຄິດ​ປະທານ ໄກສອນ ພົມວິຫານ, ທາດ​ແທ້​ມູນເຊື້ອ ຂອງ​ຊາດ, ຂອງ​ພັກ, ຂອງ​ກອງທັບ. ຈາກ​ການ​ນຳພາ-ຊີ້ນໍາ​ຂອງ​ຄະນະ​ພັກ​ແຕ່​ລະ​ຂັ້ນ ສາມາດ​ຢັ້ງຢືນ​ໄດ້​ວ່າ ຄຸນ​ທາດ​ການເມືອງ ​ຂອງ​ຖັນ​ແຖວ​ສະມາຊິກ​ພັກ​ໃນ​ທົ່ວ​ກອງ​ບັນຊາ​ການ​ທະຫານ​ແຂວງ​ອຸດົມ​ໄຊ ມີ​ຄວາມ​ໜັກ​ແໜ້ນ​ຕໍ່​ອຸດົມ​ການ​ສັງຄົມ​ນິຍົມ, ມີ​ຄວາມ​ຕັ້ງ​ຕໍ່​ບໍລິສຸດ​ຕໍ່​ພັກ ​ຕໍ່​ປະເທດ​ຊາດ, ເປັນ​ແບບຢ່າງ​ນຳ​ໜ້າ​ອົດທົນ​ຜ່ານ​ຜ່າ​ຄວາມ​ຫຍຸ້ງຍາກ, ມີ​ນໍ້າໃຈ​ເສຍສະຫຼະ​ເພື່ອ​ຜົນ​ປະໂຫຍດ​ລວມ ຂອງ​ຊາດ, ເປັນ​ກຳລັງ​ຫຼັກ​ແຫຼ່ງ​ປະຕິບັດ​ແນວທາງ​ຂອງ​ພັກ​ຢ່າງ​ແທ້​ຈິງ ຕິດ​ພັນ​ກັບ​ຂະ​ບວນ​ການ​ກໍ່ສ້າງ​ໜ່ວຍ​ພັກ ປອດ​ໃສ ເຂັ້ມແຂງ ໜັກ​ແໜ້ນ, ບົນ​ຈິດໃຈ​ເສີມ​ຂະຫຍາຍ​ມູນເຊື້ອ ຂອງ​ພັກ ຄະນະ​ພັກ​ກອງ​ບັນຊາ​ການ ໄດ້​ຊີ້​ນຳ​ຢ່າງ​ໃກ້​ຊິດ​ເຮັດ​ໃຫ້​ວຽກ​ງານ​ດັ່ງກ່າວ​ໄດ້​ຮັບ​ການຈັດຕັ້ງ​ເປັນ​ຂະ​ບວນ​ກວ້າງຂວາງ​ກາຍເປັນ​ສະຕິ​ຄວາມ​ຮັບຜິດຊອບ, ທັງ​ເປັນ​ມາດຕະຖານ​ເພື່ອ​ປະ​ເມີນ​ຄຸນ​ນະ​ພາບ​ໃນ​ການ​ນຳພາ-ຊີ້ນໍາ ຂອງ​ຄະນະ​ພັກ​ແຕ່​ລະ​ຂັ້ນ ຕິດ​ພັນ​ກັບ​ການ​ສ້າງ​ກອງ 3 ປອດ, ກອງ​ວັດທະນະ ທຳ-ນັກຮົບ​ວັດທະນະທຳ. ຜ່ານ​ການຈັດຕັ້ງ​ປະຕິບັດ​ສາມາດ​ຕີ​ລາຄາ​ສະມາຊິກ​ພັກ​ແຂງ​ໄດ້ 939 ສະຫາຍ, ຍິງ 154 ສະຫາຍ ກວມ​ເອົາ 95,23%. ຈາກ​ຜົນງານ​ດັ່ງກ່າວ​ສະເໜີ​ຍ້ອງຍໍ​ຜົນງານ 5 ປີ ຫຼຽນ​ໄຊ​ປະເພດ​ຕ່າງໆ ຈຳນວນ 503 ສະຫາຍ, ຫຼຽນ​ກາ​ແຮງ​ງານ 541 ສະຫາຍ, ໃບ​ຍ້ອງຍໍ​ປະເພດ​ຕ່າງໆ​ຈຳນວນ 813 ໃບ. ໃນ​ພິທີ​ຍັງ​ໄດ້​ຜ່ານ​ມະຕິ​ຕົກ ລົງ​ຂອງ​ຄະນະ​ປະຈຳ​ພັກ​ແຂວງ ວ່າ​ດ້ວຍ​ການ​ມອບ​ໃບຢັ້ງຢືນ​ໜ່ວຍ​ພັກ​ປອດ​ໃສ ເຂັ້ມແຂງ ໜັກ​ແໜ້ນ ປະຈຳ​ປີ 2023 ໃຫ້​ບັນດາ​ໜ່ວຍ​ພັກ​ທີ່​ຂື້ນ​ກັບ​ອົງຄະ​ນະ​ພັກ​ກອງ​ບັນຊາ​ການ​ທະຫານ​ແຂວງ​ອຸດົມ​ໄຊ ຈຳນວນ 20 ໜ່ວຍ​ພັກ ແລະ ຜ່ານ​ຂໍ້​ຕົກລົງ ຂອງ​ລັດຖະມົນຕີ​ກະຊວງ​ປ້ອງ​ກັນ​ປະເທດ ແລະ ກົມ​ໃຫຍ່​ການເມືອງ​ກອງທັບ ວ່າ​ດ້ວຍ​ການ​ແຕ່ງຕັ້ງ​ຮອງ​ຫົວໜ້າ​ຫ້ອງ​ພະລາທິການ ແລະ ຮອງຫົວໜ້າ​ພະ​ແນກ​ປ້ອງ​ກັນ​ພາຍ​ໃນ ​ກອງ​ບັນຊາ​ການ​ທະຫານ​ແຂວງ​ອຸດົມ​ໄຊ ໃນ​ນີ້,​ ແຕ່ງຕັ້ງ ສະຫາຍ ພັນ​ໂທ ບຸນ​ປອນ ໄຊຈະເລີນ ເປັນ​ຮອງ​ຫົວໜ້າ​ຫ້ອງ​ພະລາທິການ ແລະ ແຕ່ງຕັ້ງ ສະຫາຍ ຮ້ອຍ​ເອກ ຄຳ​ຊາຍ ແສງ​ມະ​ນິ​ທຳ ເປັນ​ຮອງຫົວໜ້າ​ພະ​ແນກ​ປ້ອງ​ພາຍ​ໃນ ກອງ​ບັນຊາ​ການ​ທະຫານ​ແຂວງ​ອຸດົມ​ໄຊ. ໂດຍ: ວິໄລ​ພອນ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ