ວັນເສົາ, ວັນທີ 07 ທັນວາ 2024
ຄະນະຮັບຜິດຊອບບຸກຄະລາກອນຂັ້ນແຂວງລົງຕິດຕາມຊຸກຍູ້ການກະກຽມ ດໍາເນີນກອງປະຊຸມໃຫຍ່ 3 ຂັ້ນຢູ່ກອງບັນຊາການທະຫານແຂວງວຽງຈັນ
ເວລາອອກຂ່າວ: 2024-05-06 11:08:16 | ຜູ້ຂຽນ : admin2 | ຈຳນວນຄົນເຂົ້າຊົມ: 1216 | ຄວາມນິຍົມ: 
ເພື່ອປະຕິບັດຕາມໜັງສືແຈ້ງການຂອງຄະນະຈັດຕັ້ງແຂວງວຽງຈັນ ເລື່ອງການລົງຕິດຕາມຊຸກຍູ້ການກະກຽມໃຫ້ແກ່ກອງປະຊຸມຂອງພັກ ແລະ ວຽກງານດ້ານບຸກຄະລາກອນ ໂດຍອີງຕາມແຜນການເຄື່ອນໄຫວຂອງອະນຸກໍາມະການບຸກຄະລາກອນຂັ້ນແຂວງ ສະບັບເລກທີ 879/ຄຈຂ, ລົງວັນທີ23 ຕຸລາ 2023, ດັ່ງນັ້ນໃນຕອນເຊົ້າຂອງວັນທີ3 ພຶດສະພາ 2024 ຄະນະຮັບຜິດຊອບບຸກຄະລາກອນຂັ້ນແຂວງເຊິ່ງນໍາໂດຍ ສະຫາຍ ນາງ ຈັນທະບູນ ໂພສາລາດ ຄະນະປະຈຳພັກແຂວງຫົວໜ້າຄະນະຈັດຕັ້ງແຂວງວຽງຈັນ ພ້ອມດ້ວຍຄະນະໄດ້ລົງເຄື່ອນໄຫວຕິດຕາມຊຸກຍູ້ການກະກຽມກອງປະຊຸມໃຫ່ຍ ແລະ ເກັບກໍາຂໍ້ມູນທາງດ້ານບຸກຄະລາກອນຢູ່ກອງບັນຊາການທະຫານແຂວງວຽງຈັນ, ເຂົ້າຮ່ວມພິທີໃນຄັ້ງນີ້ມີ ສະຫາຍ ພົນຈັດຕະວາ ບຸນຜອງ ບຸດທະວົງ ກໍາມະການພັກແຂວງ ເລຂາຄະນະພັກ, ຫົວໜ້າການເມືອງກອງບັນຊາການທະຫານແຂວງວຽງຈັນ, ມີບັນດາສະຫາຍຄະນະປະຈໍາພັກ, ຄະນະພັກ-ຄະນະບັນຊາ, ຄະນະພັກຮາກຖານກົມກອງອ້ອມຂ້າງ, ອະນະນຸກໍາມະການ ແລະ ຄະນະນະຮັບຜິດຊອບເຂົ້າຮ່ວມ.
ໃນກອງປະຊຸມ ສະຫາຍ ພັນເອກ ສົມພັນ ເຮືອງພະຈັນ ຄະນະປະຈໍາພັກ ຫົວໜ້າຫ້ອງການເມືອງກອງບັນຊາການທະຫານແຂວງວຽງຈັນໄດ້ຂຶ້ນລາຍການໂດຍຫຍໍ້ ກ່ຽວກັບການຈັດຕັ້ງກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກຢູ່ກອງບັນຊາການທະຫານແຂວງວຽງຈັນຕໍ່ກັບຄະນະຮັບຜິດຊອບຂັ້ນແຂວງໄດ້ຮັບຊາບ, ພາຍຫຼັງໄດ້ຮັບຄໍາສັ່ງແນະນໍາຈາກຄະນະພັກຂັ້ນເທິງ ຄະນະພັກພວກເຮົາກໍ່ໄດ້ເປີດກອງປະຊຸມເຊື່ອມຊຶມ ບັນດາຄໍາສັ່ງແນະນໍາ ແລະ ອອກມະຕິຕົກລົງແຕ່ງຕັ້ງຄະນະຊີ້ນໍາ, ບັນດາອະນຸກຳມະການ ( ເນື້ອໃນ, ບຸກຄະລາກອນ, ຂະບວນການ, ເສດຖະກິດ, ປ້ອງກັນ) ແລະ ກໍານົດໜ້າທີ່ລະອຽດ, ກຳນົດເວລາໃຫ້ແຕ່ລະອະນຸກຳມະການ, ມອບໃຫ້ແຕ່ລະອະນຸກຳມະການເຕົ້າລວມ ໃຫ້ສ້າງແຜນການເຄື່ອນໄຫວຂອງແຕ່ລະອະນຸກຳມະການ ມາຮອດປະຈຸບັນເຫັນວ່າມີຜົນສໍາເລັດເປັນກ້າວໆ.
ໂອກາດສໍາຄັນດັ່ງກ່າວ, ສະຫາຍ ນາງ ຈັນທະບູນ ໂພສາລາດ ຄະນະປະຈໍາພັກແຂວງຫົວໜ້າຄະນະຈັດຕັ້ງແຂວງວຽງຈັນກໍ່ໄດ້ໃຫ້ກຽດໂອ້ລົມຕໍ່ກອງປະຊຸມໂດຍສະຫາຍໄດ້ເນັ້ນໜັກໃຫ້ບັນດາອະນຸກໍາມະການ ເອົາໃຈໃສ່ໃນການກະກຽມຄວາມພ້ອມຮອບດ້ານໃຫ້ແກ່ການຈັດກອງປະຊຸມໃຫຍ່ 3 ຂັ້ນ, ຄະນະຊີ້ນໍາ-ຄະນະຮັບຜິດຊອບເນື້ອໃນ, ບຸກຄະລາກອນ, ຄະນະພັກແຕ່ລະຂັ້ນຕ້ອງເພີ່ມທະວີເອົາໃຈໃສ່ ແລະ ມີຄວາມເປັນເອກະພາບສູງຕໍ່ກັບວຽກງານທີ່ຕົນເອງຮັບຜິດຊອບໃຫ້ໜັກແໜ້ນກວ່າເກົ່າ. ພະນັກງານສະມາຊິກພັກທຸກສະຫາຍຕ້ອງເອົາໃຈໃສ່ກຳແໜ້ນບັນດາມາດຖານບຸກຄະລາກອນທີ່ອອກຮັບສະໝັກເລືອກຕັ້ງເຂົ້າເປັນຄະນະພັກຊຸດໃໝ່ ຕ້ອງເປັນຜູ້ມີມາດຖານເງື່ອນໄຂຄົບຖ້ວນຕາມກົດລະບຽບຂອງພັກ ທັງນີ້ກໍ່ເພື່ອເປັນການຮັບປະກັນທາງດ້ານບຸກຄະລາກອນທີ່ສະໝັກເລືອກຕັ້ງໃຫ້ມີຄຸນນະພາບ ເພື່ອສືບຕໍ່ຊີ້ນໍາ-ນໍາພາກົມກອງໃຫ້ເຂັ້ມແຂງຂຶ້ນເລື້ອຍໆ.
ໂດຍ: ສາຍຄໍາ ພອນມະນີ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
