ວັນເສົາ, ວັນທີ 07 ທັນວາ 2024
ໂຮງໝໍບໍລິເວນ109 ກອງທັບປະກາດການແຕ່ງຕັ້ງຂັ້ນພະແນກ ແລະ ຂະແໜງການ
ເວລາອອກຂ່າວ: 2024-05-06 14:59:59 | ຜູ້ຂຽນ : admin2 | ຈຳນວນຄົນເຂົ້າຊົມ: 1250 | ຄວາມນິຍົມ: 
ວັນທີ30 ເມສາ 2024 ຜ່ານມານີ້, ໂຮງໝໍບໍລິເວນ 109 ກອງທັບໄດ້ປະກາດແຕ່ງຕັ້ງຂັ້ນຫົວໜ້າພະແນກ, ຮອງພະແນກ ແລະ ຫົວໜ້າຂະແໜງການຂອງໂຮງໝໍບໍລິເວນ109 ກອງທັບ, ໂດຍການເປັນປະທານຂອງ ສະຫາຍ ພົນຈັດຕະວາ ຕີເບດ ສີແພງຄູນ ກໍາມະການຄະນະພັກອົງການກົມໃຫຍ່ ຫົວໜ້າຫ້ອງການເມືອງກົມໃຫຍ່ພະລາທິການກອງທັບ, ມີຄະນະພັກ-ຄະນະບັນຊາ, ພະນັກງານຫຼັກແຫຼ່ງ ແລະ ຜູ້ທີ່ຖືກແຕ່ງຕັ້ງຮັບໜ້າທີ່ໃໝ່ເຂົ້າຮ່ວມ.
ສະຫາຍ ພັນໂທ ສີສຸດາ ວໍລະສິງ ຫົວໜ້າພະແນກພະນັກງານ ຫ້ອງການເມືອງກົມໃຫຍ່ພະລາທິການກອງທັບ, ໄດ້ຜ່ານຂໍ້ຕົກລົງຂອງກົມໃຫຍ່ການເມືອງກງອທັບ, ອີງຕາມ ກົດໝາຍນາຍທະຫານກອງທັບປະຊາຊົນລາວ, ສະບັບເລກທີ 43/ສພຊ, ລົງວັນທີ14ມິຖຸນາ 2018 ໃນພາກທີII ໝວດທີ4 ມາດຕາ26 ວ່າດ້ວຍການແຕ່ງຕັ້ງ, ຍົກຍ້າຍນາຍທະຫານ, ອີງຕາມ ທິດທາງກ່ຽວກັບການປັບປຸງບູລະນະກົງຈັກການຈັດຕັ້ງນໍາພາ-ບັນຊາໃນກໍາລັງປະກອບອາວຸດໃຫ້ເຂັ້ມແຂງ, ໜັກແໜ້ນຮອບດ້ານເພື່ອເຮັດສໍາເລັດໜ້າທີ່ປົກປັກຮັກສາ ແລະ ພັດທະນາປະເທດຊາດ, ອີງຕາມ ການນໍາສະເໜີຂອງຫ້ອງການເມືອງກົມໃຫຍ່ພະລາທິການກອງທັບ, ສະບັບເລກທີ 1560 ລົງວັນທີ 4 ມີນາ 2024, ອີງຕາມ ການຄົ້ນຄົ້ວາ ແລະ ນໍາສະເໜີຂອງກົມພະນັກງານ, ກົມໃຫຍ່ການເມືອງກອງທັບ ຕົກລົງ, ແຕ່ງຕັ້ງ ພັນໂທ ວັນ ໄຊຍະພູມ ເປັນຫົວໜ້າພະແນກແຜນການ-ສັງລວມ, ພັນໂທ ວຽງສະຫວັນ ຈັນທະປັນຍາ ເປັນຫົວໜ້າພະແນກການເມືອງ, ພັນໂທ ຄຳພູທອງ ກໍລະກົດ ເປັນຮອງຫົວໜ້າພະແນກແຜນການ-ສັງລວມ, ພັນຕີ ໝອກ ທອງດຳ ເປັນຮອງຫົວໜ້າພະແນກການເມືອງ, ພັນຕີ ພົງສະຫວັນ ບາງພະຄີ ເປັນຫົວໜ້າຂະແໜງກວດກາພະແນກການເມືອງ, ຮ້ອຍເອກ ນິວວົງ ໄຊຍະຄຳສັກດາ ເປັນຫົວໜ້າຂະແໜງພະນັກງານພະແນກການເມືອງ ແລະ ຮ້ອຍເອກ ບຸນມີ ໄຊຍະຈັກ ເປັນຫົວໜ້າຂະແໜງປ້ອງກັນພາຍໃນພະແນກການເມືອງໂຮງໝໍບໍລິເວນ 109 ກອງທັບ.
ໂອກາດນີ້, ສະຫາຍ ພົນຈັດຕະວາ ຕີເບດ ສີແພງຄູນ ກໍາມະການຄະນະພັກອົງການກົມໃຫຍ່ ຫົວໜ້າຫ້ອງການເມືອງກົມໃຫຍ່ພະລາທິການກອງທັບ, ກໍໄດ້ໃຫ້ກຽດໂອ້ລົມຕໍ່ນາຍທະຫານຜູ້ທີ່ໄດ້ຖືກແຕ່ງຕັ້ງຮັບໜ້າທີ່ໃໝ່ໃນຄັ້ງນີ້, ເຊິ່ງການປະກາດຍົກຍ້າຍ ແລະ ແຕ່ງຕັ້ງນາຍທະຫານໃນຄັ້ງນີ້, ແມ່ນເປັນການບູລະນະປັບປຸງກົງຈັກການຈັດຕັ້ງໃນແຕ່ລະຂັ້ນໃຫ້ມີຄວາມສະຫງົບ ແລະ ມີຄວາມໜັກແໜ້ນ, ເຂັ້ມແຂງໃນການເຄື່ອນໄຫວເຮັດວຽກງານໃຫ້ມີປະສິດຕິຜົນສູງຂຶ້ນກວ່າເກົ່າ, ອີງໃສ່ ຄວາມຮຽກຮ້ອງຕ້ອງການຂອງໜ້າທີ່ການເມືອງຂອງພັກໃນໄລຍະໃໝ່, ທັງເປັນການມອບໝາຍໜ້າທີ່ໃຫ້ພະນັກງານປະຕິບັດຕາມທິດຂອງຂັ້ນເທິງວາງອອກຢ່າງເຂັ້ມງວດ, ເພື່ອສ້າງເງື່ອນໄຂໃຫ້ພະນັກງານຜູ້ສືບທອດ, ປ່ຽນແທນໄດ້ຝຶກຝົນຫຼໍ່ຫຼອມຕົນເອງ ແລະ ທົດສອບໃນວຽກງານຕົວຈິງຫຼາຍດ້ານໃຫ້ມີຜົນສໍາເລັດ, ຮຽກຮ້ອງມາຍັງຄະນະພັກ-ຄະນະບັນຊາທຸກຂັ້ນຈົ່ງສືບຕໍ່ເອົາໃຈໃສ່ຖືເອົາວຽກງານສຶກສາອົບຮົມການເມືອງ-ນໍາພາແນວຄິດໃຫ້ສະມາຊິກພັກ, ພະນັກງານ ແລະ ນັກຮົບຢູ່ພາຍໃນກົມກອງຂອງຕົນໃຫ້ເປັນປົກກະຕິ ແລະ ເປັນວຽກງານແຖວໜ້າສອດຫ້ອຍເຂົ້າກັບທຸກຂົງເຂດວຽກງານການເມືອງຂອງກົມກອງ, ມີ ຄວາມສາມັກຄີພາຍໃນພາຍນອກຢ່າງແໜ້ນແຟ້ນ, ປະຕິບັດຫຼັກການລວມສູນປະຊາທິປະໄຕ, ເຮັດວຽກເປັນໝູ່ຄະນະ, ມອບໝາຍໃຫ້ບຸກຄົນຮັບຜິດຊອບ, ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຄວາມຮັບຜິດຊອບຂອງຕົນ ແລະ ສະເພາະຕໍ່ຜູ້ທີ່ຖືກແຕ່ງຕັ້ງຮັບໜ້າທີ່ໃໝ່ໃນຄັ້ງນີ້, ຈົ່ງສືບຕໍ່ຝຶກຝົນຫຼໍ່ຫຼອມຕົນເອງໃນທຸກດ້ານ, ມີຄຸນສົມບັດ ສິນທໍາປະຕິວັດ, ເປັນເຈົ້າການປະຕິບັດແນວທາງ, ແຜນນະໂຍບາຍ, ມະຕິ, ຄໍາສັ່ງ, ຂໍ້ກໍານົດ ແລະ ກົດລະບຽບຕ່າງໆ ຂອງພັກ-ລັດ ແລະ ຂອງກອງທັບວາງອອກຢ່າງເຂັ້ມງວດ, ຕັ້ງໜ້າປະກອບສ່ວນເຂົ້າໃນວຽກການກໍ່ສ້າງ ແລະ ປັບປຸງບູລະນະກົມກອງໃຫ້ມີຄວາມໜັກແໜ້ນ, ເຂັ້ມແຂງ ແລະ ມີຄວາມຫງົບ, ພ້ອມທັງເປັນແບບຢ່າງນໍາໜ້າໃນທຸກຂົງເຂດວຽກງານວິຊາສະເພາະເສນາຮັກກອງທັບ, ມີຈັນຍາບັນ, ຈັນຍາທໍາ ແລະ ຮັກສາໄດ້ມູນເຊື້ອແພດປະຕິວັດຂອງກອງທັບໃຫ້ໄດ້ດີຕະຫຼອດໄປ.
ໂດຍ: ຄໍາປະສົງ ລາດຊະວົງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
