ວັນເສົາ, ວັນທີ 07 ທັນວາ 2024
ໂຮງຮຽນກໍ່ສ້າງນາຍສິບທະຫານຮາບເລກ2 ວຽງໄຊ ປະກາດແຕ່ງຕັ້ງຫົວໜ້າການເມືອງໂຮງຮຽນ
ເວລາອອກຂ່າວ: 2024-05-14 14:18:58 | ຜູ້ຂຽນ : admin2 | ຈຳນວນຄົນເຂົ້າຊົມ: 1327 | ຄວາມນິຍົມ: 
ຕອນເຊົ້າວັນທີ14 ພຶດສະພາ 2024 ນີ້, ໂຮງຮຽນກໍ່ສ້າງນາຍສິບທະຫານຮາບເລກ 2 ວຽງໄຊ ປະກາດແຕ່ງຕັ້ງຫົວໜ້າການເມືອງໂຮງຮຽນ ແລະ ບົ່ງຕົວແຕ່ງຕັ້ງປ່ຽນແທນ ກຳມະການຄະນະພັກ ກຳມະການຄະນະປະຈຳພັກ ທັງເປັນເລຂາຄະນະພັກໂຮງຮຽນ, ເປັນກຽດເຂົ້າຮ່ວມເປັນປະທານຂອງ ສະຫາຍ ພົນຈັດຕະວາ ໄພວັນ ຈັນທະພົມມາ ຮອງຫົວໜ້າກົມໃຫຍ່ການເມືອງກອງທັບ, ມີກົມພະນັກງານ, ບັນດາແຂກຈາກກົມກອງອ້ອມຂ້າງ, ຄະນະພັກ-ຄະນະອຳນວຍການໂຮງຮຽນ, ຄະນະພັກ-ຄະນະບັນຊາຫ້ອງການ,ພະແນກການ, ກອງພັນເຂົ້າຮ່ວມຢູ່ສະໂມສອນໂຮງຮຽນ.
ສະຫາຍ ພັນເອກ ວົງເພັດ ວົງສະຫວັນ ຮອງກົມພະນັກງານ ກົມໃຫ່ຍການເມືອງກອງທັບໄດ້ຜ່ານຂໍ້ຕົກລົງກະຊວງປ້ອງກັນປະເທດ ວ່າດ້ວຍການອະນຸມັດໃຫ້ນາຍທະຫານຢູ່ໂຮງຮຽນກໍ່ສ້າງນາຍສິບທະຫານຮາບເລກ2 ວຽງໄຊພັກການເພື່ອກຽມຮັບບໍານານ, ອີງຕາມກົດໝາຍນາຍທະຫານກອງທັບປະຊາຊົນລາວສະບັບເລກທີ43/ສພຊ, ລົງວັນທີ14 ມິຖຸນາ 2018 ໃນພາກທີ3 ໝວດ1 ມາດຕາ33 ວ່າດ້ວຍອາຍຸກະສຽນຮັບບໍານານຂອງນາຍທະຫານ, ກະຊວງປ້ອງກັນປະເທດຕົກລົງອະນຸມັດໃຫ້ ສະຫາຍ ພັນເອກ ພູເວີນ ວົງຄໍາຊາວ ຫົວໜ້າການເມືອງໂຮງຮຽນກໍ່ສ້າງນາຍສິບທະຫານຮາບເລກ2 ວຽງໄຊພັກການ-ຮັບບໍານານ ແລະ ແຕ່ງຕັ້ງ ສະຫາຍ ພັນເອກ ສໍາລີ ຈັນທະວົງ ເປັນຫົວໜ້າການເມືອງໂຮງຮຽນ ພ້ອມທັງເປັນ ກຳມະການຄະນະພັກ ກຳມະການປະຈຳພັກ ແລະ ເປັນເລຂາຄະນະພັກ( ປ່ຽນແທນ ສະຫາຍ ຫົວໜ້າການເມືອງຜູ້ເກົ່າ ທີ່ອອກຮັບອຸດໜູນບຳນານ).
ໂອກາດນີ້, ສະຫາຍ ພົນຈັດຕະວາ ໄພວັນ ຈັນທະພົມມາ ປະທານກອງປະຊຸມ ກໍ່ໄດ້ມີຄຳເຫັນໂອ້ລົມຕໍ່ສະຫາຍທີ່ໄດ້ຮັບການແຕ່ງຕັ້ງ, ຮັບໜ້າທີ່ໃໝ່ ພ້ອມທັງເນັ້ນໜັກຫຼາຍບັນຫາສຳຄັນເປັນຕົ້ນແມ່ນເອົາໃຈໃສ່ວຽກງານສຶກສາອົບຮົມການເມືອງແນວຄິດເປັນກົກສອດຫ້ອຍເຂົ້າໃນທຸກຂົງເຂດວຽກງານ, ຄະນະພັກ-ຄະນະບັນຊາຕ້ອງຮັກສາແໜ້ນຄວາມສາມັກຄີ ເປັນເອກະພາບ ປະຕິບັດຕາມຫຼັກການ ລວມສູນປະຊາທິປະໄຕ ມອບໃຫ້ບຸກຄົນຮັບຜິດຊອບ, ປົກປັກຮັກສາຜົນງານຄຸນງາມຄວາມດີ, ເສີມຂະຫຍາຍທາດແທ້ມູນເຊື້ອ ຂອງກົມກອງກໍ່ຄືຂອງໂຮງຮຽນໄວ້ໃຫ້ດີ ແລະ ຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ສູງກວ່າເກົ່າ, ເອົາໃຈໃສ່ປັບປຸງກໍ່ສ້າງກຳລັງໃຫ້ເຂັ້ມແຂງຮອບດ້ານຖືຄຸນະພາບເປັນກົກ, ກຳແໜ້ນແນວທາງຂອງພັກ, ເປັນແບບຢ່າງນຳໜ້າໃນທຸກຂົງເຂດວຽກງານ,ເອົາໃຈໃສ່ປັບປຸງແບບແຜນວິທີເຮັດວຽກເຮັດວຽກແບບລວມສູນປະຊາທິປະໄຕ, ເຮັດວຽກເປັນໝູ່ຄະນະ, ບຸກຄົນຮັບຜິດຊອບ, ເຮັດວຽກແບບມີວິທະຍາສາດ, ເຄົາລົບ ແລະ ປະຕິບັດຫຼັກການນຳພາຂອງພັກ, ສຸມໃສ່ນຳພາຈັດຕັ້ງປະຕິບັດ 4ໜ້າທີ່ໃຫຍ່ 26ແຜນງານ ຂອງຄະນະພັກກະຊວງປ້ອງກັນປະເທດວາງອອກໃຫ້ປະກົດຜົນເປັນຈິງ ໄປຄຽງຄູ່ກັບການກໍ່ສ້າງກົມກອງ ໃຫ້ມີຄວາມເຂັ້ມແຂງ, ໜັກແໜ້ນ ມີລະບຽບແບບແຜນທັນສະໄໝ ມີຄວາມກ້າວໜ້າຂຶ້ນໄປເລື້ອຍໆ.
ໂດຍ : ຄຳແປງ ຟອງສາຍໄໝ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
