ວັນສຸກ, ວັນທີ 06 ທັນວາ 2024
ມອບ-ຮັບໜ້າທີ່ຫົວໜ້າກົມແຜນທີ່ ກົມໃຫຍ່ເສນາທິການກອງທັບ
ເວລາອອກຂ່າວ: 2024-05-27 09:16:05 | ຜູ້ຂຽນ : admin2 | ຈຳນວນຄົນເຂົ້າຊົມ: 859 | ຄວາມນິຍົມ: 
ວັນທີ23 ພຶດສະພາ 2024 ນີ້, ກົມແຜນທີ່ກອງທັບ ກົມໃຫຍ່ເສນາທິການກອງທັບ ໄດ້ມອບ-ຮັບໜ້າທີ່ຫົວໜ້າກົມແຜນທີ່ກອງທັບ ລະຫວ່າງ ສະຫາຍ ພົນຈັດຕະວາ ທອງຈັນ ວັນນະສີ ຫົວໜ້າກົມແຜນທີ່ກອງທັບ ຜູ້ເກົ່າ ແລະ ສະຫາຍ ພັນໂທ ສົມພຸດ ພິລາ ຫົວໜ້າກົມແຜນທີ່ກອງທັບຜູ້ໃໝ່ ໂດຍການເຂົ້າຮ່ວມຂອງ ສະຫາຍ ພົນຕີ ພັນແສງ ບຸນພັນ ຄະນະພັກກະຊວງປ້ອງກັນປະເທດ ຮອງຫົວໜ້າກົມໃຫຍ່ເສນາທິການກອງທັບ, ມີຫ້ອງການ, ພະແນກການ, ຄະນະພັກ-ຄະນະບັນຊາ, ກົມກອງທີ່ຂຶ້ນກັບກົມແຜນທີ່, ພະນັກງານຫຼັກແຫຼ່ງເຂົ້າຮ່ວມ.
ສະຫາຍ ພົນຈັດຕະວາ ທອງຈັນ ວັນນະສີ ຫົວໜ້າກົມແຜນທີ່ ( ຜູ້ເກົ່າ ) ໄດ້ຂຶ້ນຜ່ານບົດສະຫຼຸບວຽກງານທີ່ໄດ້ນໍາພາຈັດຕັ້ງປະຕິບັດໂດຍສັງເຂບ ໃນໄລຍະທີ່ດໍາລົງຕໍາແໜ່ງຫົວໜ້າກົມ ພາຍຫຼັງທີ່ໄດ້ຮັບການແຕ່ງຕັ້ງເປັນຫົວໜ້າກົມ ກໍໄດ້ພ້ອມກັບໝູ່ຄະນະຜັນຂະຫຍາຍບັນດາມະຕິແນວທາງນະໂຍບາຍຂອງພັກ, ຂອງກະຊວງປ້ອງກັນປະເທດ ທີ່ປິ່ນອ້ອມ 4ໜ້າທີ່ໃຫຍ່ 26ແຜນງານເຂົ້າໃນການເຄື່ອນໄຫວປະຕິບັດໜ້າທີ່ວຽກງານເຊິ່ງມີຜົນສໍາເລັດຫຼາຍດ້ານນໍາພາ-ຊີ້ນໍາປັບປຸງກໍ່ສ້າງເຫຼົ່າຮົບແຜນທີ່ ມີຄວາມເຕີບໃຫຍ່ເຂັ້ມແຂງ, ໜັກແໜ້ນທາງດ້ານການເມືອງ, ເຂັ້ມແຂງທາງດ້ານການຈັດຕັ້ງ, ເປັນລະບົບຕາມການຕົກລົງຂອງຂັ້ນເທິງ ພະນັກງານ-ນັກຮົບມີແນວຄິດອຸ່ນອ່ຽນ-ທຸ່ນທ່ຽງ, ບຸກບືນຫ້າວຫັນຕໍ່ໜ້າທີ່ວຽກງານວິຊາສະເພາະ, ມີສະຕິຕໍ່ການຈັດຕັ້ງ, ປະຕິບັດລະບຽບວິໄນເຂັ້ມງວດ, ມີຄວາມຮັບຜິດຊອບສູງຕໍ່ໜ້າທີ່ການເມືອງ, ມີລະດັບຄວາມຮູ້ດ້ານວິຊາສະເພາະ-ວິຊາການ ເປັນເສນາທິການ ໃຫ້ກົມໃຫຍ່ເສນາທິການກອງທັບ ກໍຄື ກະຊວງປ້ອງກັນປະເທດ, ໃນການຄົ້ນຄວ້າສ້າງແຜນຍຸດທະສາດ ການຮັບປະກັນແຜນທີ່ ແລະ ຂໍ້ມູນຂ່າວ-ສານ ພູມສາດ, ຄົ້ນຄວ້າພັດທະນາວຽກງານແຜນທີ່ໃນຂອບເຂດທົ່ວປະເທດ ໃຫ້ສອດຄ່ອງກັບວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ແຜນພັດທະນາເສດຖະກິດ-ສັງຄົມ, ພົວພັນຮ່ວມມືກັບບັນດາປະເທດເພື່ອນມິດຍຸດທະສາດ, ພາກພື້ນ ແລະ ສາກົນກ່ຽວກັບວຽກງານສໍາຫຼວດວັດແທກແຜນທີ່, ຖ່າຍພາບທາງອາກາດ ຕາມການມອບໝາຍຈາກກົມໃຫຍ່ເສນາທິການກອງທັບ ແລະ ກະຊວງປ້ອງກັນປະເທດ ສາມາດຕອບສະໜອງຕາມຄວາມຮຽກຮ້ອງຕ້ອງການຂອງຂັ້ນເທິງໄດ້ເປັນຢ່າງດີຕະຫຼອດມາ. ຈາກນັ້ນກໍໄດ້ເຊັນບົດບັນທຶກມອບ-ຮັບ ໜ້າທີ່ ລະຫວ່າງ ສະຫາຍ ພົນຈັດຕະວາ ທອງຈັນ ວັນນະສີ ຫົວໜ້າກົມແຜນທີ່ ( ຜູ້ເກົ່າ ) ແລະ ສະຫາຍ ພັນໂທ ສົມພຸດ ພິລາ ຫົວໜ້າກົມແຜນທີ່ ( ຜູ້ໃໝ່ ).
ໂອກາດນີ້, ສະຫາຍ ພົນຕີ ພັນແສງ ບຸນພັນ ກໍໄດ້ໃຫ້ກຽດໂອ້ລົມ ຕໍ່ການມອບ-ຮັບໜ້າທີ່ ໂດຍປະຕິບັດຕາມແນວທາງນະໂຍບາຍຂອງພັກ-ລັດ ກໍຄືກະຊວງປ້ອງກັນປະເທດ ທີ່ມີຕໍ່ພະນັກງານ-ນາຍທະຫານ ເມື່ອຮອດເວລາອາຍຸກະສຽນ ກໍຕ້ອງໄດ້ພັກຜ່ອນເຂົ້າຮັບການອຸດໜູນບໍານານ ຕາມກົດໝາຍຂອງນາຍທະຫານກອງທັບປະຊາຊົນລາວ, ພ້ອມທັງໄດ້ເນັ້ນໜັກໃຫ້ຜູ້ທີ່ໄດ້ຮັບໜ້າທີ່ໃໝ່ເຊີດຊູ ແລະ ຍົກສູງພາລະບົດບາດການນໍາພາ-ຊີ້ນໍາ ຕໍ່ໜ້າທີ່ການເມືອງທີ່ໄດ້ມອບໝາຍ, ເປັນແບບຢ່າງໃຫ້ພະນັກງານຂັ້ນລຸ່ມຢ່າງຮອບດ້ານ, ຖືເອົາວຽກງານສຶກສາອົບຮົມການເມືອງ-ແນວຄິດ, ວຽກງານກໍ່ສ້າງພັກ-ພະນັກງານ ໃຫ້ມີຄວາມເຂັ້ມແຂງໜັກແໜ້ນ, ເພີ່ມທະວີຄວາມສາມັກຄີພາຍໃນໝູ່ຄະນະ, ເປັນເຈົ້າການນໍາພາ-ຊີ້ນໍາໃຫ້ແທດເຖິງຕົວຈິງ, ຍຶດໝັ້ນຕາມ 5ຫຼັກການ 3ທິດນໍາຂອງພັກ, ປະຕິບັດຫຼັກການລວມສູນປະຊາທິປະໄຕ, ມີຄວາມເປັນເອກະພາບພາຍໃນທຸກຂົງເຂດວຽກງານ ຕັ້ງໜ້າປັບປຸງກໍ່ສ້າງກົມກອງໃຫ້ມີຄວາມເຕີບໃຫຍ່ເຂັ້ມແຂງ, ເຮັດວຽກຢ່າງມີຫຼັກການວິທະຍາສາດມີແບບແຜນ ແລະ ທັນສະໄໝ, ເພື່ອພ້ອມເຮັດສໍາເລັດໜ້າທີ່ການເມືອງຂອງກົມກອງຕາມການຈັດຕັ້ງຂັ້ນເທິງມອບໝາຍໃຫ້.
ໂດຍ: ເກດຕະວັນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
