ກອງທັບປະຊາຊົນລາວ
 
ວັນເສົາ, ວັນທີ 13 ກໍລະກົດ 2024

  

ແຂວງບໍ່ແກ້ວ ເປີດບັ້ນອົບຮົມ-ຫັດແອບວຽກງານສຶກສາ ປກຊ-ປກສ ໃຫ້ພະນັກງານການນຳຂອງແຂວງ-ເມືອງ ຊຸດທີ IV
ເວລາອອກຂ່າວ: 2024-06-12 11:58:03 | ຜູ້ຂຽນ : admin2 | ຈຳນວນຄົນເຂົ້າຊົມ: 260 | ຄວາມນິຍົມ:



ພິທີເປີດຊຸດອົບຮົມ-ຫັດແອບ ວຽກງານສຶກສາ ປ້ອງກັນຊາດ-ປ້ອງກັນຄວາມສະຫງົບ ເປົ້າໝາຍ 3 ໃຫ້ພະນັກງານການນຳຂອງແຂວງ-ເມືອງ ຊຸດທີ IV, ໄດ້ຈັດຂື້ນໃນວັນທີ 11 ມິຖຸນາ 2024 ນີ້, ຢູ່ທີ່ ໂຮງຮຽນທະຫານທ້ອງຖິ່ນແຂວງບໍ່ແກ້ວ, ໂດຍພາຍໃຕ້ການເປັນປະທານຂອງ ສະຫາຍ ປະລິນຍາເອກ ທອງຈັນ ມະນີໄຊ ກຳມະການສູນກາງພັກ, ເລຂາພັກແຂວງ ເຈົ້າແຂວງໆບໍ່ແກ້ວ, ມີບັນດາການນຳຂອງແຂວງ-ເມືອງ, ຄະນະປະຈຳພັກແຂວງ, ກຳມະການພັກແຂວງ, ພະແນກການອ້ອມຂ້າງແຂວງ, ຄະນະພັກ-ຄະນະບັນຊາ 2 ກອງບັນຊາການ ປກຊ-ປກສ, ຄະນະອຳນວຍການໂຮງຮຽນ, ແຂກຖືກເຊີນ, ພະນັກງານຄູ-ອາຈານ ຕະຫຼອດຮອດ ນັກສຳມະນາກອນທຸກສະຫາຍເຂົ້າຮ່ວມ. ພິທີ ສະຫາຍ ພັນໂທ ສຸບິນ ສີຫາລາດ ຄະນະບໍລິຫານງານພັກກອງບັນຊາການ, ຮອງຫົວໜ້າຫ້ອງເສນາທິການກອງບັນຊາການທະຫານແຂວງບໍ່ແກ້ວ ໄດ້ຂື້ນຜ່ານແຜນການອົບຮົມ-ຫັດແອບ ວຽກງານສຶກສາປ້ອງກັນຊາດ-ປ້ອງກັນຄວາມສະຫງົບ ໃຫ້ພະນັກງານການນໍາ ແຂວງ, ເມືອງ ຊຸດທີ IV ແຂວງບໍ່ແກ້ວ ປະຈຳປີ 2024. ໂດຍອີງຕາມດໍາລັດຂອງນາຍົກລັດຖະມົນຕີ ສະບັບເລກທີ 292 /ນຍ, ລົງວັນທີ 21ກັນຍາ 2011 ວ່າດ້ວຍການສຶກສາອົບຮົມວຽກງານ ປກຊ-ປກສ ທົ່ວປວງຊົນ. ຈຸດປະສົງໃນການອົບຮົມ-ຫັດແອບໃນຄັ້ງນີ້ແມ່ນ ເພື່ອອົບຮົມໃຫ້ພະນັກງານການນໍາຂອງແຂວງ, ເມືອງ ກໍາແໜ້ນ ແລະ ເຂົ້າໃຈຢ່າງເລິກເຊິ່ງຕໍ່ວຽກງານ ປ້ອງກັນຊາດ-ປ້ອງກັນຄວາມສະຫງົບ ຂອງພັກໃນໄລຍະໃໝ່, ເປັນພື້ນຖານໃຫ້ພະນັກງານການນໍາ ຮູ້ຊີ້ນໍາ-ບັນຊາ ກໍາລັງ ປກຊ-ປກສ ທີຂຶ້ນກັບຄວາມຮັບຜິດຊອບ ແລະ ເຮັດສໍາເລັດໜ້າທີ່ການເມືອງຂອງຕົນທີ່ໄດ້ຮັບການມອບໝາຍ, ກາຍເປັນຄວາມຮັບຜິດຊອບຂອງທຸກອົງການຈັດຕັ້ງ ແລະ ທົ່ວປວງຊົນ, ເພື່ອຍົກລະດັບ ຄວາມຮູ້ ຄວາມສາມາດໃຫ້ພະນັກງານການນໍາເຂົ້າໃຈຢ່າງເລິກເຊິ່ງທາງດ້ານທິດສະດີ ຫຼັກການ ແລະ ພາກປະຕິບັດຕົວຈີງ, ຕ້ອງເຂົ້າໃຈວຽກງານຢ່າງເລິກເຊິ່ງຮູ້ຊີ້ນໍາ-ບັນຊາ ແລະ ສ້າງທຸກເງື່ອນໄຂ ເພື່ອເຮັດໃຫ້ວຽກງານ ປກຊ-ປກສ ໄດ້ເຂົ້າເຖິງວຽກງານໃນຄວາມຮັບຜິດຊອບຂອງຕົນທຸກວຽກງານ. ການອົບຮົບ-ຫັດແອບໃນຄັ້ງນີ້ມີນຳສຳມະນາກອນ ຈຳນວນທັງໝົດ 32 ສະຫາຍ, ຍິງ 4 ສະຫາຍ, ມາຈາກບັນດາ 05 ເມືອງ ແລະ ບັນດາພະແນກການອ້ອມຂ້າງແຂວງ, ເຊິງເນື້ອໃນທີ່ນຳມາອົບຮົມ ປະກອບມີ 02 ພາກຄື: ພາກທິດສະດີ ແລະ ພາກປະຕິບັດຕົວຈິງ. ພາກທີດສະດີປະກອບມີ 13 ບົດຄື: ເອກະສານກໍ່ສ້າງທ່າສະໜາມສົງຄາມປະຊາຊົນ 3 ຂັ້ນ, ຂັ້ນແຂວງ-ເມືອງ-ບ້ານ-ກຸ່ມບ້ານ, ບາງບັນຫາກ່ຽວກັບການສະກັດກັ້ນ-ຕ້ານຍຸດທະສາດຫັ້ນປ່ຽນໂດຍສັນຕິ-ກໍ່ກະບົດລຸກຮື້ຂື້ນຂອງບັນດາອິດທິກໍາລັງປໍລະປັກ, ບາງທັດສະນະພື້ນຖານຂອງພັກຕໍ່ວຽກງານການທະຫານທ້ອງຖິ່ນໃນໄລຍະໃໝ່, ບົດບາດທີ່ເປັນເສນາທິການຂອງບັນດາອົງການ ພະແນກການ ອົງການຈັດຕັ້ງມະຫາຊົນຂັ້ນເມືອງຕໍ່ວຽກງານປ້ອງກັນຊາດ, ພັດທະນາເສດຖະກິດ-ສັງຄົມ ຕິພັນກັບວຽກງານ ປກຊ-ປກສ ຢູ່ຂັ້ນເມືອງ, ນະຄອນ, ດໍາລັດ 93 ວ່າດ້ວຍ: ການຈັດຕັ້ງເຄື່ອນໄຫວຂອງກໍາລັງກອງຫຼອນ ປກສບ້ານ, ກຸ່ມບ້ານ, ກໍາລັງປ້ອງກັນພາຍ ໃນ ແລະ ກໍາລັງປ້ອງກັນຕົວ, ກໍ່ສ້າງບໍລິເວນປ້ອງກັນ - ຈັ້ງທ່າຂັ້ນເມືອງ, ນະຄອນ, ສົງຄາມປະຊາຊົນ ປົກປັກຮັກສາປະເທດຊາດໄລຍະໃໝ່, ເພີ່ມທະວີການນໍາພາຂອງພັກ, ຄຸ້ມຄອງລັດຕໍ່ວຽກງານປ້ອງກັນຊາດ - ປ້ອງກັນຄວາມສະຫງົບ, ກໍ່ສ້າງພື້ນຖານວຽກງານປ້ອງຊາດ - ປ້ອງກັນຄວາມສະຫງົບ, ບາງບັນຫາພື້ນຖານກ່ຽວກັບຍຸດທະສາດ ປ້ອງກັນຊາດ-ປ້ອງກັນຄວາມສະຫງົບ ໃນໄລຍະໃໝ່, ແກ້ໄຂບັນດາການກະທໍາຜິດກົດຫມາຍ, ຂໍ້ຂັດແຍງ ແລະ ການຮ້ອງຟ້ອນ, ຄຸນຄ່າ, ສະມັດຕະພາບ, ການປະກອບສ້າງຂອງປືນ ອາກາ-ເຊກາເຊ. ພາກປະຕິບັດຕົວຈິງມີ 04 ບົດຄື: ຮຽນມ້າງປະກອບປືນ ອາກາ-ເຊກາເຊ, ຮຽນເລັງຖືກເລັງຈຸ້ມປືນ ອາກາ-ເຊກາເຊ ແລະ ບົດກວດກາທ່າຍິງ, ຮຽນຫຼັກການຍິງບົດເປີດສາກປືນ ອາກາ-ເຊກາເຊ, ປະຕິບັດຍິງລູກປືນ ແລະ ບົດກວດກາທ່າຍິງ 3 ທ່າ (ນອນ, ນັ່ງ, ຍືນ). ເຊິ່ງໄດ້ກໍານົດໄລຍະເວລາໃນການ ອົບຮົມ-ຫັດແອບ ຈຳນວນທັງໝົດ 32 ວັນ ຈຶ່ງຈະສໍາເລັດລົງ. ໂອກາດດັ່ງກ່າວ, ສະຫາຍ ປະລິນຍາເອກ ທອງຈັນ ມະນີໄຊ ຍັງໄດ້ສະແດງຄວາມຍ້ອງຍໍຊົມເຊີຍໃນໄລຍະຜ່ານມາ ພ້ອມທັງໄດ້ເນັ້ນໜັກ ໃຫ້ພະນັກງານ ຄູ-ອາຈານ, ພະນັກງານ-ນັກຮົບ ຕະຫຼອດຮອດ ນັກສຳມະນາກອນທຸກສະຫາຍ ຈົ່ງພ້ອມກັນເອົາໃຈໃສ່ສືກສາອົບຮົມການເມືອງນຳພາແນວຄິດ, ຮັດແໜ້ນຄວາມສາມັກຄີຢ່າງແໜ້ນແຟ້ນ, ເຮັດວຽກເປັນໝູ່ຄະນະແບ່ງວຽກໃຫ້ບຸກຄົນຮັບຜິດຊອບ, ປະຕິບັດບັນດາຂໍ້ກໍານົດ, ກົດລະບຽບຕ່າງໆຂອງພັກ ຂອງຊາດ ຂອງກອງທັບວາງອອກ, ແລະ ຮັບປະກັນໃຫ້ແກ່ການອົບຮົມ-ຫັດແອບທະຫານໃໝ່ມີຄວາມປອດໄພ 100%. ຍາດແຍ່ງເອົາຄວາມຮູ້ ຄວາມສາມາດ ທາງດ້ານທິດ ສະດີຫຼັກການ ໃນການອົບຮົບ-ຫັດແບບໃນຄັ້ງນີ້ ເພື່ອໜູນໃຊ້ເຂົ້າໃນຊີວິດຕົວຈິງຂອງກົມກອງຂອງຕົນໃນສະເພາະໜ້າ ແລະ ຍາວນານ ໃຫ້ມີປະສິດທິພາບສູງສຸດ. ໂດຍ: ວໍລະສິດ ພິດສະຫາຍ, ພາບໂດຍ: ນາງ ນີ່ ທໍາມະວົງ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ