ກອງທັບປະຊາຊົນລາວ
 
ວັນເສົາ, ວັນທີ 13 ກໍລະກົດ 2024

  

ໂຮງໝໍ​ທະຫານ​ແຂວງ​ໄຊ​ຍະ​ບູ​ລີ ຖື​ສຳຄັນ​ວຽກ​ງານ​ປິ່ນປົວ ຕິດ​ພັນ​ກັບການ​ກໍ່ສ້າງ​ພະນັກງານ​ວິຊາ​ການ
ເວລາອອກຂ່າວ: 2024-06-20 09:16:18 | ຜູ້ຂຽນ : admin1 | ຈຳນວນຄົນເຂົ້າຊົມ: 225 | ຄວາມນິຍົມ:



ໂຮງໝໍ​ທະຫານ​ແຂວງ​ໄຊ​ ຍະ​ບູ​ລີ ມີ​ພາລະ​ບົດບາດ​ເປັນ​ເສ ນາທິ​ການ​ດ້ານ​ການປິ່ນປົວ​ສຸຂະພາບ ຂອງ​ນາຍ ແລະ ພົນທະຫານ ກໍ​ຄືປະຊາຊົນ​ລາວ​ ບັນດາເຜົ່າ ຢູ່​ແຂວງ​ໄຊ​ຍະ​ບູ​ລີ ຕະຫຼອດ ​ໄລຍະ​ຜ່ານ​ມາ, ຄະນະ​ພັກ-ຄະ ນະ​ອຳນວຍ​ການ ຍາມ​ໃດ​ກໍ​ໄດ້​ຖື​ເອົາ​ວຽກ​ງານ​ປິ່ນປົວ​ເປັນ​ໜ້າທີ່​ໃຈ​ຂອງ​ກົມ​ກອງ ພ້ອມ​ທັງ​ໄດ້​ເອົາໃຈໃສ່​ກໍ່ສ້າງພະນັກງານ​ວິຊາ​ການ​ດ້ານ​ການ​ແພດໃຫ້​ມີ​ຄວາມ​ຮູ້ ​ຄວາມ​ສາມາດ​ນັບ​ມື້​ສູງ​ຂຶ້ນ ເພື່ອ​ຮັບປະກັນ​ໃຫ້​ແກ່​ວຽກ​ງານ​ປິ່ນປົວ​ມີ​ຄຸນ​ນະ​ພາບ ແລະ ເຮັດ​ໃຫ້​ຜູ້​ມາ​ໃຊ້​ບໍລິການ​ມີ​ຄວາມ​ເພິ່ງ​ພໍໃຈ. ສະຫາຍ ພັນ​ໂທ ບຸນ​ລົ້ນ ສຸກ​ຜາ​ລີ ອຳນວຍ​ການ​ໂຮງໝໍ​ທະຫານ​ແຂວງ​ໄຊ​ຍະ​ບູ​ລີ ໄດ້​ໃຫ້​ຮູ້​ວ່າ: ໃນຜ່ານ​ມາ, ຄະນະພັກ-ຄະນະ​ອຳນວຍ​ການໄດ້​ເອົາໃຈໃສ່​ວຽກງານ​ສຶກ​ສາ​ອົບຮົມ​ການ ເມືອງ-​ນຳພາ​ແນວ​ຄິດ ເຮັດ​ດ້ວຍ​ຫຼາຍ​ຮູບ​ການ ໂດຍ​ໄດ້​ນຳ​ເອົາ​ບັນດາ​ເອກະສານ, ມະຕິ​ຕ່າງໆ ຈາກ​ຂັ້ນ​ເທິງ ມາ​ຈັດ​ຕັ້ງ​ເຜີຍແຜ່​ເຊື່ອມ​ຊຶມ ເຮັດ​ໃຫ້​ພະນັກງານ-ນັກຮົບ ມີ​ແນວ​ຄິດ​ອຸ່ນ​ອຽນ​ທຸ່ນ​ທ່ຽງ, ເຊື່ອ​ໝັ້ນ​ຕໍ່​ການ​ນຳພາ ​ຂອງ​ພັກ-ລັດ, ມີ​ຄວາມ​ສາມັກຄີ​ແໜ້ນ​ແຟ້ນ, ມີ​ຄວາມ​ຫ້າວຫັນ​ຕໍ່ໜ້າ​ທີ່​ວິຊາ​ສະເພາະ​ຂອງ​ຕົນ ແລະ ເຮັດ ​ສຳເລັດ​ໜ້າ​ທີ່ວຽກງານ​ຕາມການ ຈັດຕັ້ງ​ຂັ້ນ​ເທິງ​ມອບ​ໝາຍ​ໃຫ້, ໄດ້​ຖື​ສຳຄັນ​ການ​ປິ່ນປົວ​ຄົນ​ເຈັບ​ທີ່​ມາ​ໃຊ້​ບໍລິການ ໃຫ້​ໄດ້​ຕາມ​ຄຳ​ຂວັນ 5 ດີ 1 ພໍໃຈ ເຊັ່ນ: ຮັບ​ຕ້ອນ​ດີ, ສະອາດ​ດີ, ສະດວກ​ດີ, ການ ບົ່ງມະຕິ​ຊັດ​ເຈນ​ດີ, ການ​ປິ່ນປົວ​ດີ, ຄົນ​ເຈັບ​ເພິ່ງ​ພໍໃຈ. ສຳລັບ​ການ​ປິ່ນປົວ​ຄົນ​ເຈັບ​ຢູ່​ໂຮງໝໍ ແມ່ນ​ມີ​ແບບ​ເສຍ​ຄ່າ ແລະ ບໍ່​ເສຍ​ຄ່າ ໃນ​ນີ້, ການ​ປິ່ນປົວ​ແບບ​ເສຍ​ຄ່າ ແມ່ນ​ຄົນ​ເຈັບ​ຜູ້​ທີ່​ບໍ່​ມີ​ບັດ​ປະກັນ​ຕົນ, ການ​ປິ່ນປົວ​ແບບ​ບໍ່​ເສຍ​ຄ່າ ແມ່ນ​ຜູ້​ທີ່​ມີ​ບັດ​ປະກັນ​ຕົນ, ການ​ປິ່ນປົວ​ໃນ​ໄລຍະ​ປີ 2023 ຜ່ານ​ມາ ສາມາດ​ຮັບ​ກວດ​ຄົນ​ເຈັບ​ເຂດ​ນອກ​ໄດ້ 4.520 ເທື່ອ​ຄົນ ໃນ​ນັ້ນ, ທະຫານ 2.431 ຄົນ, ປະຊາຊົນ, ຕຳຫຼວດ, ພະສົງ, ພະນັກງານ​ປົກຄອງ 2.089 ເທື່ອຄົນ, ຮັບ​ຄົນ​ເຈັບ​ເຂົ້າ​ນອນ​ໂຮງໝໍ 1.041 ເທື່ອຄົນ, ທະຫານ 271 ເທື່ອຄົນ, ສົ່ງ​ຄົນ​ເຈັບ​ໄປ​ໂຮງໝໍ​ອື່ນ 37 ກໍລະນີ, ສາມາດ​ຜ່າຕັດ​ໃຫຍ່​ມີ 19 ກໍລະນີ, ຜ່າຕັດ​ກາງ 33 ກໍລະນີ ແລະ ຜ່າຕັດ​ນ້ອຍ 106 ກໍລະນີ ໄປ​ຄຽງ​ຄູ່​ກັບ ວຽກ​ງານ​ປິ່ນປົວ​ນັ້ນ, ຄະນະ​ພັກ-ຄະນະ​ອຳນວຍ​ການ ຍັງ​ໄດ້​ເອົາໃຈໃສ່ກໍ່ສ້າງພະ ນັກງານ​ວິຊາ​ການ​ແພດ ໃຫ້​ມີ​ຄວາມ​ຊຳນານ ເພື່ອ​ຮັບປະກັນ​ໃຫ້​ແກ່​ການ​ປິ່ນປົວ​ຄົນ​ເຈັບ ມີ​ຄຸນ​ນະ​ພາບ ດ້ວຍ​ການຈັດຕັ້ງ​ເຝິກອົບຮົມ​ຢູ່​ກັບ​ທີ່ ແລະ ສົ່ງ​ໄປ​ຮຽນ​ຕໍ່​ໄລຍະ​ສັ້ນ ແລະ ໄລຍະ​ຍາວ ໃນ​ນີ້, ໄປ​ຮຽນ​ຕໍ່​ຊ່ຽວຊານ​ຂັ້ນ 1 ສາຂາ​ບົ່ງມະຕິ​ຮູບ​ພາບ ຢູ່​ມະຫາວິທະຍາໄລ ວິທະຍາສາດ ສຸຂະພາບ 1 ສະຫາຍ, ໄປ​ຮຽນ​ຕໍ່​ປະລິນຍາ​ຕີ ຢູ່​ວິທະຍາຄານ​ການ​ແພດ​ກອງທັບ 5 ສະຫາຍ ແລະ ໄປ​ເຝິກອົບຮົມ​ວຽກ​ງານ​ຜ່າຕັດ, ຢາ​ສະຫຼົບ, ສົ່ງ​ເຄື່ອງມື ໄລຍະ 6 ເດືອນ ຢູ່​ໂຮງໝໍ​ແຂວງ 5 ສະຫາຍ. ສະຫາຍ ພັນ​ໂທ ບຸນ​ລົ້ນ ສຸກ​ຜາ​ລີ ຍັງ​ໃຫ້​ຮູ້​ຕື່ມ​ວ່າ: ສຳລັບ​ທິດ​ທາງ​ແຜນການ​ໃນຕໍ່ໜ້າ ​ຈະ​ສືບຕໍ່ກໍ່ສ້າງ​ບຸກ​ຄະລາກອນ ​ດ້ານ​ການ​ແພດໃຫ້ມີຄວາມ​ຮູ້ ຄວາມສາມາດ​ນັບ​ມື້​ສູງຂຶ້ນ ເພື່ອ​ ຕອບ​ສະໜອງ​ກັນ​ຄວາມ​ຮຽກ ຮ້ອງ​ຕ້ອງການຂອງໜ້າທີ່​ວຽກ​ງານ ໂດຍ​ຖື​ເອົາ​ການ​ຂຶ້ນ​ຫ້ອງ​ອົບຮົມ​ພາຍ​ໃນ​ໂຮງໝໍ ອາທິດ​ລະ​ຄັ້ງ ແລະ ສ້າງ​ແຜນການສົ່ງ​ພະນັກງານ​ໄປ​ເຝິກອົບຮົມຍົກ​ລະດັບ​ວິຊາ​ສະເພາະ ທັງ​ໄລຍະ​ສັ້ນ ແລະ ໄລຍະ​ຍາວ ຢູ່​ຕາມໂຮງ ຮຽນ​ແຫ່ງ​ຕ່າງໆ ເພື່ອ​ຖອດ​ຖອນ​ເອົາ​ບົດຮຽນນຳ​ຄູ​-ອາຈານ, ໝູ່​ເພື່ອນຜູ້​ທີ່​ມີ​ປະສົບ​ການ ມາ​ໝູນ​ໃຊ້​ເຂົ້າ​ໃນ​ໜ້າທີ່​ວິຊາ​ສະເພາະ​ຂອງ​ຕົນ ເພື່ອ​ຮັບປະກັນ​ໃຫ້​ແກ່​ການ​ບໍລິການ​ຄົນ​ເຈັບ ທີ່​ມາ​ໃຊ້​ບໍລິການ​ຢູ່​ໂຮງໝໍ ໃຫ້​ໄດ້​ຕາມ​ຄຳ​ຂວັນ 5 ດີ 1 ພໍໃຈ, ສືບຕໍ່​ສຶກ​ສາ​ອົບຮົມ​ການເມືອງ-ນຳພາ​ແນວ​ຄິດ​ໃຫ້​ພະນັກງານ​ພາຍໃນ​ໂຮງໝໍ ມີ​ແນວ​ຄິດ​ອຸ່ນ​ອຽນທຸ່ນ​ທ່ຽງ, ຮັດ​ແໜ້ນ​ຄວາມ​ສາມັກຄີ, ຊ່ວຍເຫຼືອ​ເຊິ່ງ​ກັນ ແລະ ກັນ ເພື່ອ​ພ້ອມ​ກັນ​ເຮັດ​ສຳເລັດ​ໜ້າທີ່​ການເມືອງ​ຂອງ​ໂຮງໝໍ ຕາມ​ການຈັດຕັ້ງ​ຂັ້ນ​ເທິງ​ມອບ​ໝາຍໃຫ້. ໂດຍ: ສົມ​ຄິດ ພູມ​ມີ​ຈິດ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ