ກອງທັບປະຊາຊົນລາວ
 
ວັນເສົາ, ວັນທີ 13 ກໍລະກົດ 2024

  

1 ປີຜ່ານມາ​ ກອງ​ບັນຊາ​ການ​ທະຫານ​ເມືອງ​ໄຊ​ຍະ​ບູ​ລີ ກຳ​ແໜ້ນ​ວຽກ​ງານ​ກໍ່ສ້າງ​ຮາກ​ຖານ​ການເມືອງ
ເວລາອອກຂ່າວ: 2024-06-21 09:11:48 | ຜູ້ຂຽນ : admin1 | ຈຳນວນຄົນເຂົ້າຊົມ: 111 | ຄວາມນິຍົມ:



ສະຫາຍ ພັນ​ໂທ ບຸນ​ທະວີ ຖານະ​ພັນ ເລຂາ​ຄະນະ​ພັກ​ຮາກ​ຖານ, ຫົວໜ້າ​ກອງ​ບັນຊາ​ການ​ທະຫານ​ເມືອງ​ໄຊ​ຍະ​ບູ​ລີ ແຂວງ ໄຊ​ຍະ​ບູ​ລີ ໄດ້​ໃຫ້​ຮູ້​ວ່າ: ເມືອງ​ໄຊ​ຍະ​ບູ​ລີ ເປັນ​ເມືອງ​ເທສະບານ​ຂອງ​ແຂວງໄຊ​ຍະ​ບູ​ລີ ທິດເໜືອ​ຕິດ​ກັບ​ເມືອງ​ຫົງ​ສາ ແລະ ເມືອງ​ຈອມ​ເພັດ ແຂວງ​ຫຼວງ​ພະ​ບາງ ທິດໃຕ້​ຕິດ​ກັບ​ເມືອງ​ພຽງ, ເມືອງ​ປາກ​ລາຍ, ທິດຕາເວັນອອກ​ຕິດ​ກັບ​ແມ່ນ້ຳ​ຂອງ ແລະ ທິດຕາເວັນຕົກ​ຕິດ​ກັບ​ເມືອງ​ໄຊ​ສະຖານ ມີ​ເນື້ອທີ່​ທັງ​ໝົດ 3.010 ກິໂລແມັດ ເນື້ອທີ່​ສ່ວນ​ຫຼາຍ​ເປັນ​ພູຜາ​ກວມ​ເອົາ 60%, ທົ່ງພຽງ​ກວມ​ເອົາ 40%; ສະພາບ​ພາຍ​ໃນ​ເມືອງ​​ມີ​ຄວາມ​ສະຫງົບ​ໂດຍ​ພື້ນຖານ ຮັກສາ​ໄດ້​ສະຖຽນ​ລະ​ພາບ​ທາງ​ດ້ານ​ການເມືອງ, ສັງຄົມ​ມີ​ ຄວາມ​ສະຫງົບ, ເສດຖະກິດ​ມີ​ການ​ຂະຫຍາຍຕົວ, ພື້ນຖານ​ໂຄງ​ລ່າງ​ໄດ້​ຮັບ​ການ​ປັບປຸງ​ຢ່າງ​ຕໍ່​ເນື່ອງ, ມີ​ນັກ​ທ່ອງ​ທ່ຽວ, ນັກທຸລະກິດ​ພາຍ​ໃນ ແລະ ຕ່າງປະເທດ​ເຂົ້າ​ມາ​ຢ່າງ​ຫຼວງຫຼາຍ, ປະຊາຊົນ​ບັນດາເຜົ່າ​ອາໄສ​ຢູ່​ຢ່າງ​ໜາ​ແໜ້ນ ຈຶ່ງ​ເປັນ​ເງື່ອນໄຂ​ຫຍຸ້ງຍາກ​ໃນ​ການ​ຄຸ້ມ​ຄອງ ແລະ ເຮັດ​ໃຫ້​ກຸ່ມ​ຄົນ​ບໍ່​ດີ​ເຄື່ອນ​ໄຫວ​ໄດ້​ງ່າຍ ຕໍ່​​ສະພາບ​ການ​ດັ່ງກ່າວ, ຄະນະ​ກຳມະການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ແຂວງ ​ກໍ​ຄື​ຄະນະ​ກຳມະການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ເມືອງ​ໄຊ​ຍະ​ບູ​ລີ ໄດ້​ເປັນ​ເຈົ້າ​ການ​ຊີ້​ນຳ​ສອງ​ກຳລັງ ແລະ ອຳນາດ​ການ​ປົກຄອງ​ທ້ອງຖິ່ນ ເຮັດ​ໜ້າທີ່​ສຶກ​ສາ​ອົບຮົມ​ການເມືອງ-ນຳພາ​ແນວ​ຄິດ, ປັບປຸງ​ກໍ່ສ້າງ​ຮາກ​ຖານ​ການເມືອງ​ໃຫ້​ມີ​ຄວາມ​ໜັກ​ແໜ້ນ ຕາມ​ທິດ​ທາງ​ແຜນການ​ຂອງ​ຄະນະ​ປະຈຳ​ພັກ​ແຂວງ ໂດຍ​ປິ່ນ​ອ້ອມ 4 ໜ້າທີ່​ໃຫ​​ຍ່ 26 ແຜນ​ງານ​ທີ່​ຄະນະ​ພັກ​ກະຊວງ​ປ້ອງ​ກັນ​ປະເທດ​ວາງ​ອອກ ​ປະສານ​ສົມທົບ​ກັບ​ກຳລັງ​ປ້ອງ​ກັນ​ຄວາມ​ສະຫງົບ, ກຳລັງ​ຫຼວງ, ຫ້ອງການ​ອ້ອມ​ຂ້າງ​ພາຍ​ໃນ​ເມືອງ ປະຕິບັດ​ຕາມ​ທິດ​ຊີ້​ນຳ ​ຂອງ​ຄະນະ​ປະຈຳ​ພັກ​ເມືອງ ຫັນ​ເອົາ​ກຳລັງ​ລົງ​ກໍ່ສ້າງ​ຮາກ​ຖານ​ການເມືອງ ​ພັດທະນາ​ຊົນນະບົດ​ຮອບດ້ານ​ ຕາມ 4 ເນື້ອ​ໃນ 4 ຄາດໝາຍ ຊ່ວຍ​ປະຊາຊົນ​ກອບ​ກູ້​ໄພພິບັດ, ທຳ​ການ​ຜະລິດ, ປຸກ​ສ້າງ​ຕ່າງໆ ຕາມ​ທິດ​ຊີ້​ນຳ​ ຂອງ​ຂັ້ນ​ເທິງ​ວາງ​ອອກ​ເຫັນ​ວ່າ​ພະນັກງານ-ນັກຮົບ ມີ​ແນວ​ຄິດ​ອຸ່ນ​ອ່ຽນ​ທຸ່ນ​ທຽງ, ມີ​ຄຸນ​ທາດ​ການເມືອງ​ໜັກ​ແໜ້ນ, ມີ​ຄຸນສົມບັດ​ສິນ​ທຳ​ປະຕິວັດ​ດີ, ມີ​ຄວາມ​ຫ້າວຫັນ​ຕໍ່ໜ້າ​ທີ່​ການເມືອງ, ຮູ້​ຈຳແນກ​ມິດ ແລະ ສັດຕູ​ ຢ່າງ​ຈະແຈ້ງ, ມີ​ຄວາມ​ຮັບຜິດຊອບ​ສູງ​ຕໍ່ໜ້າ​ທີ່​ວຽກ​ງານ ແລະ ສຳເລັດ​ໜ້າທີ່​ວຽກ​ງານ​ຕ່າງໆ​ຂອງ​ຕົນ​ເປັນ​ຢ່າງ​ດີ. ຕໍ່​ສະພາບ​ ຂອງ​ກຳລັງ​ອິດ​ທິ​ປໍ​ລະ​ປັກ​ໃນ​ໄລຍະ 1 ປີຜ່ານມາ​ພວກ​ເຂົາ​ໄດ້​ຈັດ​ຕັ້ງ​ປະຕິບັດ​ເລ່​ລ່ຽມ​ກົນອຸບາຍ​ຫັນປ່ຽນ​ໂດຍ​ສັນຕິ ​ຂອງ​ພວກ​ເຂົາ ເພື່ອ​ຫວັງ​ທຳລາຍ​ມ້າງເພ​ລະບອບ​ໃໝ ່​ຂອງ​ພວກ​ເຮົາ​ໂດຍ​ການ​ໂຄສະນາ​ຊວນ​ເຊື່ອ​ທາງ​ສື່​ສັງຄົມ​ອອນ​ລາຍ ແລະ ແພັດ​ຟອມ​ຕ່າງໆ ເຮັດ​ໃຫ້​ພະນັກງານ-ນັກຮົບ ແລະ ປະຊາຊົນ​ບັນດາເຜົ່າ​ຜູ້​ທີ່​ຮູ້​ເທົ່າ​ບໍ່​ເຖິງ​ການ​ຫຼົງໄຫຼ​ໄປ​ຕາມ​ທິດ​ຂອງ​ພວກ​ເຂົາ ເປັນຕົ້ນ​ແມ່ນ​ໂຄສະນາ​ໃສ່​ຮ້າຍ​ປ້າຍ​ສີ​ຕໍ່​ແນວທາງ​ນະໂຍບາຍ​ ຂອງ​ພັກ-ລັດ ພ້ອມ​ນີ້, ຍັງ​ຍຸຍົງ​ກໍ່ໃຫ້ເກີດ​ປະກົດ​ການ​ຫຍໍ້ທໍ້​ຕ່າງໆ ​ໃນ​ສັງຄົມ ​ເປັນຕົ້ນ​ແມ່ນ​ບັນຫາ​ການ​ຂີ່​ລັກ, ຢາ​ເສບ​ຕິດ, ຫຼິ້ນ​ກິນຟູມ​ເຟືອຍ, ການ​ຄ້າຂາຍ​ເຖື່ອນ ແລະ ອື່ນໆ ຕໍ່​​ບັນ ຫາ​ດັ່ງກ່າວ, ຄະນະ​ກຳມະການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ຂັ້ນ​ແຂວງ ກໍຄື​ຂັ້ນ​ເມືອງໄດ້​ປະສານ​ສົມທົບ​ກັບ​ກອງ​ພົນ​ທີ 2, ກອງ​ບັນຊາ​ການ​ປ້ອງ​ກັນ​ ຄວາມ​ສະຫງົບ​ແຂວງ, ເມືອງ, ​ປກສ ກຸ່ມ​ບ້ານ ແລະ ອົງການ​ປົກຄອງ​ບ້ານ ພ້ອມ​ກັນ​ວາງ​ແຜນການເຄື່ອນໄຫວ​ສະກັດ​ກັ້ນ ແລະ ແກ້​ໄຂ​ບັນດາ​ໜໍ່​ແໜງ​ທີ່​ເປັນ​ເປົ້າ​ໝາຍ​ໄດ້​ຂາດ​ຕົວ ຮັບປະກັນ​ເຮັດ​ໃຫ້​ທົ່ວ​ເມືອງ​ມີ​ຄວາມ​ສະຫງົບ​ໂດຍ​ພື້ນຖານ; ສ່ວນ​ອົງການ​ປົກຄອງ​ທ້ອງຖິ່ນ​ເມືອງ​ໄຊ​ຍະ​ບູ​ລີ ປະກອບ​ມີ 78 ບ້ານ, ມີ​ພົນ ລະເມືອງ​ທັງ​ໝົດ 82.414 ຄົນ, ຍິງ 40.638 ຄົນ, ມີ 15.926 ຄອບຄົວ, ປະກອບ​ມີ 8 ເຜົ່າ, ພື້ນຖານ​ປະຊາຊົນ​​ ມີ​ແນວ​ຄິດ​ຮັກຊາດ, ຮັກ​ບ້ານ​ເກີດ​ເມືອງ​ ນອນ​ຂອງ​ຕົນ ​ປະກອບສ່ວນ​ເຂົ້າ​ໃນ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ຢ່າງ​ແຂງແຮງ ຍູ້​ແຍ້ງ​ການ​ພັດທະນາ​ເສດຖະກິດ-ສັງຄົມ​ໃຫ້​ຂະ​ຫຍາຍ ​ຕົວຢ່າງ​ຕໍ່​ເນື່ອງ​ຕິດ​ພັນ​ກັບ​ການ​ສ້າງ​ທ່າ​ສະໜາມ 3 ຂັ້ນ, ສ້າງ​ກອງຮ້ອຍ​ກອງ​ຫຼອນ​ແບບຢ່າງ, ສ້າງ​ບ້ານ​ປ້ອງ​ກັນ​ຊາດ​ເຂັ້ມແຂງ, ສ້າງ​ບ້ານ​ແຮກ​ສ່ຽວ, ຄອບຄົວ​ປ້ອງ​ກັນ​ຊາດ​ເຂັ້ມແຂງ,ໄດ້​ຈັດ​ຕັ້ງ​ເອົາ​ພະນັກງານ​ໄປ​ປະຈຳ​ຢູ່ 11 ກອງຮ້ອຍ​ກອງ​ຫຼອນ​ໃນ​ທົ່ວ​ເມືອງ ນອກ​ນັ້ນ, ​ຍັງ​ໄດ້​ປັບປຸງ​ອົງການ​ປົກຄອງ​ບ້ານ​ໂພນ​ສີດາ, ນາ​ຂອນ​ແກ່ນ, ບ້ານແກ້ວ ແລະ ບ້ານ​ນາ​ທັງ ນຳ​ອົງການ​ປົກຄອງ​ເມືອງ 2 ຄັ້ງ​ ມີ 7 ສະຫາຍ, ເກັບ​ກຳ​ປະ​ເມີນ​ຄືນ​ບ້ານ​ປ້ອງ​ກັນ​ຊາດ​ເຂັ້ມແຂງ​ໄດ້ 76 ບ້ານ, ຍັງ​ຄ້າງ 2 ບ້ານ ແລະ ມອບ​ໃບຢັ້ງຢືນ​ໃຫ້​ຄອບຄົວ​ປ້ອງ​ກັນ​ຊາດ​ເຂັ້ມແຂງ​ໄດ້ 14.823 ຄອບຄົວ, ຍັງ​ຄ້າງ 578 ຄອບຄົວ ປັດຈຸບັນ​ທົ່ວ​ເມືອງໄຊ​ຍະ​ບູ​ລີ ມີ​ບ້ານ​ປ້ອມ​ໝັ້ນ 68 ບ້ານ, ກຸ່ມ​ບ້ານ​ສູ້​ຮົບ​ຕິດ​ລຽນ​ມີ 6 ກຸ່ມ​ບ້ານ. ສະຫາຍ ພັນ​ໂທ ບຸນ​ທະວີ ຖານະ​ພັນ ຍັງ​ໃຫ້​ຮູ້​ຕື່ມ​ວ່າ: ນອກຈາກ​ນັ້ນ​ ຍັງ​ໄດ້​ຈັດ​ຕັ້ງ​ກຳລັງ​ປະຈຳການ​ກຽມພ້ອມ​ສູ້​ຮົບ​ຕະຫຼອດ 24 ຊົ່ວໂມງ, ມີ​ຄະນະ​ປະ ຈຳການ, ສິດປະຈຳການ, ພາຫະນະ​ປະຈຳການ ເພື່ອ​ຕິດຕາມ​ສະພາບ​ຕ່າງໆ​ທີ່​ເກີດ​ຂຶ້ນ​ພາຍ​ໃນ​ເມືອງ​ໃຫ້​ເປັນ​ປົກກະຕິ, ສ້າງ​ແຜນການ​ຊີ້​ນຳ​ກຳລັງ​ກອງ​ຫຼອນ​ບ້ານ, ​ປກສ ກຸ່ມ​ບ້ານ ເຄື່ອນ​ໄຫວ​ສາລະ​ເວ​ເກັບ​ກຳ​ສະພາບ​ຢູ່​ຮາກ​ຖານ​ໄດ້ 15 ຄັ້ງ​ ມີ 4.000 ສະຫາຍ​ເຂົ້າ​ຮ່ວມ ປະສານ​ສົມທົບ ​ປກສ ເມືອງ, ກຳລັງ​ກອງ​ຫຼອນ-​ປກສ ບ້ານ ເຄື່ອນ​ໄຫວ​ປ້ອງ​ກັນ​ວັນ​ບຸນ​ສຳຄັນ​ຕ່າງໆ ​ຂອງ​ຊາດ, ຂອງ​ພັກ ແລະ ຂອງ​ກອງທັບ​ໄດ້​ທັງ​ໝົດ 20 ຄັ້ງ ມີ 110 ສະຫາຍ ຮັບປະກັນ​ສະພາບ​ພາຍ​ໃນ​ເມືອງໄຊ​ຍະ​ບູ​ລີ ມີ​ຄວາມ​ສະຫງົບ. ໂດຍ: ສົມ​ຄິດ ພູມ​ມີ​ຈິດ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ