ກອງທັບປະຊາຊົນລາວ
 
ວັນອາທິດ, ວັນທີ 21 ກໍລະກົດ 2024

  

ສົກຮຽນ 2023-2024 ​ວປກ ສຳເລັດ​ການ​ບຳລຸງ-ກໍ່ສ້າງ​ນາຍ​ທະຫານ 15 ເປົ້າ​ໝາຍ
ເວລາອອກຂ່າວ: 2024-06-25 09:43:00 | ຜູ້ຂຽນ : admin1 | ຈຳນວນຄົນເຂົ້າຊົມ: 190 | ຄວາມນິຍົມ:



ວິທະຍາຄານ​ປ້ອງ​ກັນ​ຊາດ ໄກສອນ ພົມວິຫານ (​ວປກ) ແມ່ນ​ບ່ອນ​ຊຸບ​ຫຼໍ່​ກໍ່ສ້າງ​ບຸກ​ຄະລາ​ກອນ​ປ້ອງ​ກັນ​ຊາດ ຮັບ​ໃຊ້​ໃຫ້​ແກ່​ກົມ​ກອງ ກຳລັງ​ຫຼວງ-ກຳລັງ​ທ້ອງຖິ່ນ ໃນ​ທົ່ວ​ກອງທັບ​ເຮົາ, ມີ​ທັງ​ລະບົບ​ກໍ່ສ້າງ​ໄລຍະ​ສັ້ນ, ກໍ່ສ້າງ​ໄລຍະ​ຍາວ ແລະ ລະບົບ​ບຳລຸງ, ຍ້ອນ​ພາລະ​ບົດບາດ​ສຳຄັນ​ຄື​ດັ່ງກ່າວ ຕະຫຼອດ​ໄລຍະ​ເວລາ​ຜ່ານ​ມາ ຄະນະ​ພັກ-ຄະນະ​ອຳນວຍ​ການ​ວິທະຍາຄານ ຈຶ່ງ​ໄດ້​ເອົາໃຈໃສ່​ປັບປຸງ​ໂຄງການ​ຫຼັກສູດ​ການ​ຮຽນ-ການ​ສອນ ໃຫ້​ສອດຄ່ອງ​ກັບ​ໜ້າທີ່​ການເມືອງ​ຂອງ​ກອງທັບ ໃນ​ໄລຍະ​ໃໝ່ ເພື່ອ​ເຮັດ​ໃຫ້​ຄຸນ​ນະ​ພາບ​ການ​ຮຽນ-ການ​ສອນ​ດີ​ຂຶ້ນ ຕອບ​ສະໜອງ​ໄດ້​ຕາມ​ຄວາມ​ຮຽກຮ້ອງ​ຕ້ອງການ​ຂອງ​ໜ້າທີ່​ວຽກ​ງານ ໃນ​ສະເພາະ​ໜ້າ ແລະ ຍາວ​ນານ, ເຊິ່ງ​ໃນ​ສົກຮຽນ 2023-2024 ນີ້, ​ວປກ ໄດ້​ສຳເລັດ​ການ​ກໍ່ສ້າງ-ບຳລຸງ ນາຍ​ທະຫານ​ນຳພາ-ບັນຊາ ແລະ ພາສາ​ຕ່າງປະເທດ ຈຳນວນ 15 ເປົ້າ​ໝາຍ ລວມ​ທັງ​ໝົດ​ມີ 342 ສະຫາຍ. ອີງໃສ່ບົດ​ລາຍ​ງານການຈັດ ຕັ້ງ​ປະຕິບັດ​ແຜນການ ບຳລຸງ-ກໍ່ສ້າງຢູ່ ​ວປກ ໃນ​ສົກຮຽນ 2023-2024 ໃຫ້​ຮູ້​ວ່າ: ການ​ບຳລຸງ-ກໍ່ສ້າງ​ນາຍ​ທະຫານ ໃນ​ສົກ ຮຽນ​ຜ່ານ​ມາ ເຖິງ​ແມ່ນ​ວ່າຈະ​ພົບ​ກັບ​ຂໍ້​ຫຍຸ້ງຍາກ​ຫຼາຍ​ດ້ານ ອັນ​ເນື່ອງ​ມາ​ຈາກ ​ສະພາບ​ສະພາບ​ແວດ​ລ້ອມ​ສາກົນ, ຄວາມ​ຫຍຸ້ງຍາກ​ດ້ານ​ເສດຖະກິດ​ການ​ເງິນ, ຄ່າ​ຄອງ​ຊີບ ແລະ ອື່ນໆ ແຕ່​ຍ້ອນ​ໄດ້​ຮັບ​ການ​ຊີ້​ນຳ​ຢ່າງ​ໃກ້ຊິດ ຈາກ​ຄະນະ​ນຳ​ກະຊວງ​ປ້ອງ​ກັນ​ປະເທດ, ອົງການ​ທີ່​ກ່ຽວຂ້ອງໄດ້​ເອົາໃຈໃສ່​ຊ່ວຍເຫຼືອ ແລະ ສ້າງ​ເງື່ອນໄຂ​ສະດວກ​ຫຼາຍ​ດ້ານ ບວກ​ກັບອົງ​ການຈັດຕັ້ງ​ແຕ່​ລະ​ຂັ້ນ ພາຍ​ໃນ​ວິທະຍາຄານ ມີ​ຄວາມ​ຕັດສິນ​ໃຈ​ສູງ, ພ້ອມ​ກັນ​ອົດທົນ​ຜ່ານ​ຜ່າ​ຂໍ້​ຫຍຸ້ງຍາກ ຈັດ​ຕັ້ງ​ປະຕິບັດ​ແຜນການບຳລຸງ-ກໍ່ສ້າງສຳເລັດ​ຕາມ​ຄາດໝາຍ​ທີ່​ວ່າງ​ໄວ້. ເຊິ່ງ​ໃນ​ສົກຮຽນ 2023-2024 ນີ້, ​ວປກ ໄດ້​ສຳເລັດ​ການ​ກໍ່ສ້າງ-ບຳລຸງ​ນາຍ​ທະຫານ ນຳພາ-ບັນຊາ ແລະ ພາສາ​ຕ່າງປະເທດ ຈຳນວນ 15 ເປົ້າ​ໝາຍ ຄື: ກໍ່ສ້າງ​ເລັ່ງ​ລັດຍຸດ​ທະ​ບັ້ນ​ຮົບ-ຍຸດ​ທະ​ສາດລະບົບ 1 ປີ ຊຸດ​ທີ XX ມີ 30 ສະຫາຍ, ກໍ່ສ້າງ​ປະລິນຍາ​ໂທ ການ​ທະຫານ ລະບົບ 2 ປີ ຊຸດ​ທີ XV ມີ 17 ສະຫາຍ, ກໍ່ສ້າງ​ປະລິນຍາ​ໂທ ການເມືອງ ລະບົບ 2 ປີ ຊຸດ​ທີ XV ມີ 13 ສະຫາຍ, ກໍ່ສ້າງ​ປະລິນຍາ​ຕີ ການ​ທະຫານ ລະບົບ 3 ປີ ຊຸດ​ທີ XII ມີ 25 ສະຫາຍ, ກໍ່ສ້າງ​ປະລິນຍາ​ຕີ ການ​ທະຫານ ລະບົບ 2 ປີ ຊຸດ​ທີ XIII ມີ 30 ສະຫາຍ, ກໍ່ສ້າງ​ປະລິນຍາ​ຕີ ການເມືອງ ລະບົບ 3 ປີ ຊຸດ​ທີ XII ມີ 25 ສະຫາຍ, ກໍ່ສ້າງ​ເລັ່ງ​ລັດການ​ທະຫານ​ຂັ້ນ​ກອງພັນ​ໃຫຍ່ ລະບົບ 1 ປີ ຊຸດ​ທີ IX ມີ 20 ສະຫາຍ, ກໍ່ ສ້າງ​ເລັ່ງ​ລັດ ການ​ທະຫານ ຂັ້ນ​ກອງພັນ​ນ້ອຍ ລະບົບ 1 ປີ ຊຸດ​ທີ IX ມີ 20 ສະຫາຍ, ກໍ່ສ້າງຄູ​ການ​ທະຫານ ຂັ້ນ​ກອງພັນ​ໃຫຍ່​ທະຫານ​ຮາບ-ກອງ​ພົນທະຫານ​ຮາບ ລະບົບ 1 ປີ ຊຸດ​ທີ II ມີ 30 ສະຫາຍ, ບຳລຸງການ​ທະຫານ​ທ້ອງຖິ່ນ ລະ ບົບ 3 ເດືອນ ຊຸດ​ທີ IX ມີ 30 ສະຫາຍ, ກໍ່ສ້າງພາສາ​ຫວຽດນາມ ຊັ້ນ​ສູງ ລະບົບ 3 ປີ ຊຸດ​ທີ XI ມີ 25 ສະຫາຍ, ກໍ່ສ້າງ ພາສາ​ຣັດ​ເຊຍ ຊັ້ນ​ສູງ ລະບົບ 3 ປີ ຊຸດ​ທີ V ມີ 20 ສະຫາຍ, ກໍ່ສ້າງພາສາ​ຈີນ ຊັ້ນ​ສູງ ລະບົບ 4 ປີ ຊຸດ​ທີ VI ມີ 14 ສະຫາຍ, ກໍ່ສ້າງພາສາ​ອັງກິດ ຊັ້ນ​ສູງ ລະບົບ 4 ປີ ຊຸດ​ທີ XVI ມີ 30 ສະຫາຍ, ກໍ່ສ້າງພາສາ​ອັງກິດ ລະບົບ 1 ປີ ຊຸດ​ທີ XVII ມີ 20 ສະຫາຍ, ລວມ​ມີ​ນັກ​ສຶກ​ສາ​ທັງ​ໝົດ 349 ສະຫາຍ, ມີໜ້າ​ປ້ອງ​ກັນ​ບົດ ແລະ ສອບເສັງ​ຕົວ​ຈິງ 342 ສະຫາຍ. ຜ່ານ​ການຈັດຕັ້ງ​ປະຕິບັດ ແຜນການ​ບຳລຸງ-ກໍ່ສ້າງ ໃນ​ສົກຮຽນ​ຜ່ານ​ມາ ເຫັນ​ວ່າ: ຄະນະ​ຮັບຜິດຊອບ​ແຕ່​ລະ​ພາກສ່ວນມີ​ຄວາມ​ຮັບ​ຮູ້, ເຂົ້າໃຈ ຕໍ່ໜ້າ​ທີ່​ການເມືອງ ພ້ອມ​ກັນ​ຈັດ​ຕັ້ງ​ປະຕິບັດ​ຕາມ​ພາລະ​ບົດບາດ​ຂອງ​ຕົນ ດ້ວຍ​ຄວາມ ​ຮັບຜິດຊອບ​ສູງ, ການ​ຄຸ້ມ​ຄອງ​ແຜນການ​ອົບຮົມ, ເນື້ອ​ໃນ​ເອກະສານການ​ຮຽນ-ການ​ສອນ, ກຳນົດ​ເວລາ​ຕ່າງໆ ຖືກຕ້ອງ​ຕາມ​ຂໍ້​ກຳນົດ ແລະ ລະບຽບ​ຫຼັກການ, ສາມາດ​ບັນລຸ​ໄດ້​ຕາມ​ຈຸດປະສົງ​ຂອງ​ໂຄງການ​ຫຼັກສູດ​ແຕ່​ລະ​ເປົ້າ​ໝາຍ, ການ​ຊີ້​ນຳ-ຄຸ້ມ​ຄອງ, ການ​ກວດກາການຈັດຕັ້ງ​ປະຕິບັດ​ແຜນການ ໄດ້​ຮັບ​ການ​ປະຕິບັດ​ຢ່າງ​ຕັ້ງໜ້າ ໂດຍ​ສະເພາະ​ແມ່ນ ການ​ປະຕິບັດ​ຂໍ້​ກຳນົດ, ກົດ​ລະບຽບ, ການ​ຄົ້ນຄວ້າ​ຮໍ່າຮຽນ, ເຝິກຝົນ​ຫຼໍ່​ຫຼອມ​ຄຸນສົມບັດ​ສິນ​ທຳ​ປະຕິວັດ, ທັດສະນະ​ການ​ອອກ ແຮງ​ງານ ແລະ ອື່ນໆ, ສ່ວນ​ຄູ​-ອາຈານ ໄດ້​ສຸມ​ສະຕິ​ປັນຍາເພື່ອ​ຖ່າຍ​ທອດ​ຄວາມ​ຮູ້, ບັນດາ​ບົດຮຽນ​ພຶດຕິ​ກຳ ໃຫ້​ແກ່​ນັກ​ສຶກ​ສາ, ເປັນ​ແບບຢ່າງ​ທີ່​ດີໃນ​ການ​ຄົ້ນ ຄວ້າ, ສິດສອນ, ແນະນຳ, ນຳພາ​ປະຕິບັດ ການ​ຮຽນ-ການ​ສອນ ດ້ວຍ​ຄວາມ​ຮັບຜິດຊອບ, ສຳລັບ​ນັກ​ສຶກ​ສາ ໄດ້​ມີ​ຄວາມ​ຕື່ນ​ຕົວ​ເປັນ​ເຈົ້າ​ການ​ປະຕິບັດ​ຂໍ້​ກຳນົດ, ກົດ​ລະບຽບ​ຂອງ​ກອງທັບ ກໍ​ຄື ຂອງ​ວິທະຍາຄານ​ວາງ​ອອກ, ຍົກ​ສູງ​ຄວາມ​ຮັບຜິດຊອບ​ໃນ​ການ​ຄົ້ນຄວ້າ​ຮໍ່າຮຽນ, ເຝິກຝົນ​ຫຼໍ່​ຫຼອມ​ຕົນ​ເອງ, ເປັນ​ແບບຢ່າງ​ທີ່​ດີ​ໃນ​ການ​ຄົ້ນຄວ້າ​ຮໍ່າຮຽນ ກໍ​ຄື ການເຄື່ອນໄຫວ​ດຳລົງ​ຊີວິດ ແລະ ການ​ປະຕິບັດ​ລະບຽບ​ກົດໝາຍ, ປະກອບສ່ວນ​ຢ່າງ​ຕັ້ງໜ້າ ເຂົ້າ​ໃນ​ທຸກ​ຂະ​ບວນ​ການ ທີ່​ທາງ​ວິທະຍາຄານ​ວາງ​ອອກ ດ້ວຍ​ຄາມ​ຫ້າວຫັນ. ຜ່ານ​ການ​ຄົ້ນຄວ້າ​ຮໍ່າຮຽນ​ຕົວ​ຈິງ ສາມາດ​ຕີ​ລາຄາ​ຜົນ​ໄດ້​ຮັບ​ຕະຫຼອດ​ຊຸດ​ຮຽນ ຂອງ​ນັກ​ສຶກ​ສາ​ແຕ່​ລະ​​ເປົ້າ​ໝາຍ ຄື: ນັກ​ສຶກ​ສາ ລະບົບ​ບຳລຸງນາຍ​ທະຫານ​ບັນຊາ ລວມ​ມີ 5 ເປົ້າ​ໝາຍ, ນັກ​ສຶກ​ສາ​ມີໜ້າ​ຕົວ​ຈິງ 130 ສະຫາຍ, ຄະແນນ​ສະເລ່ຍ​ຕະຫຼອດ​ຊຸດ​ຮຽນ ເກຣດ A ມີ 10 ສະຫາຍ, ເກຣດ B+ ມີ 117 ສະຫາຍ, ເກຣດ B ມີ 3 ສະຫາຍ, ນັກ​ສຶກ​ສາ​ລະບົບ​ກໍ່ສ້າງນາຍ​ທະຫານ​ບັນຊາ ມີ 5 ເປົ້າ​ໝາຍ, ນັກ​ສຶກ​ສາ​ມີໜ້າ​ຕົວ​ຈິງ 108 ສະຫາຍ, ຄະແນນ​ສະເລ່ຍ​ຕະ ຫຼອດ​ຊຸດ​ຮຽນ ເກຣດ B+ ມີ 108 ສະຫາຍ ແລະ ນັກ​ສຶກ​ສາ​ລະບົບ​ພາສາ​ຕ່າງປະເທດ​ມີ 5 ເປົ້າ​ໝາຍ, ນັກ​ສຶກ​ສາ​ມີໜ້າ​ຕົວ​ຈິງ 104 ສະຫາຍ, ຄະແນນ​ສະເລ່ຍ​ຕະຫຼອດ​ຊຸດ​ຮຽນ ເກຣດ B+ ມີ 7 ສະຫາຍ, ເກຣດ B ມີ 84 ສະຫາຍ ແລະ ເກຣດ C+ ມີ 3 ສະຫາຍ. ໂດຍ: ນາງ ຍ້ອມ​ເພັດ ວິໄລ​ພັນ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ