ກອງທັບປະຊາຊົນລາວ
 
ວັນເສົາ, ວັນທີ 13 ກໍລະກົດ 2024

  

ຫ້ອງ​ພະລາທິການ​ທະຫານ​ແຂວງ​ໄຊ​ຍະ​ບູ​ລີ ສຸມ​ໃສ່​ສ້າງ​ພະລາທິການ​ກັບ​ທີ່​ເພື່ອ​ຮັບ​ປະກັນແກ້​ໄຂ​ຊີວິດ​ການ​ເປັນ​ຢູ່​ໃນ​ກົມ​ກອງ
ເວລາອອກຂ່າວ: 2024-06-25 09:47:16 | ຜູ້ຂຽນ : admin1 | ຈຳນວນຄົນເຂົ້າຊົມ: 128 | ຄວາມນິຍົມ:



ສະຫາຍ ພັນ​ໂທ ອຳໄພ ອຸ່ມ​ສາ​ພົນ ກຳມະການ​ຄະນະ​ພັກ​ກອງ​ບັນຊາ​ການ, ຮອງ​ຫົວໜ້າ​ຫ້ອງ​ພະລາທິການ​ກອງບັນຊາການທະຫານ​ແຂວງ​ໄຊ​ຍະ​ບູ​ລີ ໄດ້​ໃຫ້​ຮູ້​ວ່າ: ຫ້ອງ​ພະລາທິການ​ ແມ່ນ​ຄະນະ​ພັກ​ຮາກ​ຖານ​ໜຶ່ງ​ພາຍ​ໃຕ້​ການ​ຊີ້​ນຳ-ນຳພາ​ໂດຍ​ກົງ, ຮອບດ້ານ​ຈາກ​ຄະນະ​ພັກ​ກອງ​ບັນຊາ​ການ​ທະຫານ​ແຂວງ​ໄຊ​ຍະ​ບູ​ລີ ແລະ ອົງຄະ​ນະ​ພັກ​ກົມ​ໃຫຍ່​ພະລາທິການ​ກອງທັບ ຂົງເຂດ​ວຽກ​ງານ​ຮັບປະກັນ​ລ້ຽງ​ດູ​ກຳລັງ, ສ້າງ​ພະລາທິການ ເຊິ່ງ​ຍາມ​ໃດ​ຄະນະ​ຫ້ອງ​ພະລາທິການ​ພວກ​ເຮົາ​ກໍ​ໄດ້​ເອົາໃຈໃສ່​ຕັ້ງໜ້າ​ປະຕິບັດ​ໜ້າທີ່​ວຽກ​ງານ​ຂອງ​ຕົນ​ຢ່າງຮອບດ້ານ​ຕາມ​ທິດ​ຊີ້​ນຳ​ຂອງ​ຄະນະ​ພັກ​ກະຊວງ​ປ້ອງ​ກັນ​ປະເທດ, ຄະນະ​ພັກ​ກົມ​ໃຫຍ່​ພະລາທິການ​ກອງທັບ ແລະ ກອງ​ບັນຊາ​ການ​ທະຫານ​ແຂວງ​ວາງ​ອອກ ເຫັນ​ໄດ້​ວ່າ​ ສະພາບ​ເສດຖະກິດ​ໃນ​ປັດຈຸບັນ ​ມີ​ການ​ເໜັງ​ຕີງ​ເລື້ອຍໆ ເຮັດ​ໃຫ້​ລາຄາ​ສິນຄ້າ​ເພີ່ມ​ຂຶ້ນ ສົ່ງ​ຜົນ​ກະທົບ​ໂດຍ​ກົງ ​ຕໍ່​ການ​ດຳລົງ​ຊີວິດ​ຂອງ​ພະນັກງານ-ນັກຮົບ​ ໃນ​ກົມ​ກອງ​ ແຕ່​ເຖິງ​ຢ່າງໃດ​ກໍຕາມ ​ຍ້ອນ​ຄວາມ​ເອົາໃຈໃສ່​ຂອງ​ຄະນະ​ພັກ-ຄະນະ​ບັນຊາ​ ກອງ​ບັນຊາ​ການ​ທະຫານ​ແຂວງ​ໄຊ​ຍະ​ບູ​ລີ ແລະ ຄວາມ​ເປັນ​ເຈົ້າ​ການ​ປະກອບສ່ວນ​ຢ່າງ​ແຂງແຮງ​ຂອງ ພະນັກງານ-ນັກຮົບ​ຢູ່​ບັນດາ​ກົມ​ກອງ ຈຶ່ງ​ເຮັດ​ໃຫ້​ທຸກ​ວຽກ ​ງານ​ຮັບປະກັນ​ແກ້​ໄຂ​ຊີວິດ​ການ​ເປັນ​ຢູ່​ຂອງ​ແຕ່​ລະ​ກົມ​ກອງ​ຮາກ​ຖານ​ສາມາດ​ປະຕິບັດ​ໄດ້​ບັນລຸ​ຕາມ​ລະດັບ​ຄາດໝາຍ​ທີ່​ໄດ້​ກຳນົດ​ໄວ້. ວຽກ​ງານ​ພະລາທິການ ​ກໍ​ແມ່ນ​ວຽກ​ງານ​ໜຶ່ງ​ທີ່​ສຳຄັນ ແລະ ຈຳເປັນ​ຂາດ​ບໍ່​ໄດ້ ເພາະ​ຕິດ​ພັນ​ກັບ​ທຸກ​ການເຄື່ອນໄຫວ​ປະຕິບັດ​ໜ້າທີ່​ວຽກ​ງານ​ຕົວ​ຈິງ ແລະ ຕິດ​ພັນ​ກັບ​ການ​ດຳລົງ​ຊີວິດ​ປະຈຳ​ວັນ​ຂອງ​ພະນັກງານ-ນັກຮົບ​ໃນ​ກົມ​ກອງ ດັ່ງນັ້ນ, ​ເພື່ອ​ເຮັດ​ໃຫ້​ວຽກ​ງານ​ດັ່ງກ່າວ ​ເດີນ​ແມ່ນ​ແລ່ນ​ສະດວກ ຄະນະ​ຫ້ອງ​ພວກ​ເຮົາ​ ຈຶ່ງ​ໄດ້​ຈັດ​ຕັ້ງ​ຜັນ​ຂະຫຍາຍ​ຕາມ​ເນື້ອ​ໃນ​ມະຕິ​ກອງ​ປະຊຸມ​ໃຫຍ່​ ຄັ້ງ​ທີ V ຂອງ​ອົງຄະ​ນະ​ພັກ​ກະຊວງ​ປ້ອງ​ກັນ​ປະເທດ ວ່າ​ດ້ວຍ 4 ໜ້າ​ໃຫຍ່ 26 ແຜນ​ງານ ໂດຍ​ສະເພາະ​ແມ່ນ​ການຈັດຕັ້ງ​ປະຕິບັດ​ໜ້າທີ່​ໃຫຍ່​ທີ III ກ່ຽວກັບ ແຜນການ​ຮັບປະກັນ​ການ​ແກ້​ໄຂ​ຊີວິດ​ການ​ເປັນ​ຢູ່ ແລະ ມະຕິ​ກອງ​ປະຊຸມ​ໃຫຍ່​ຂັ້ນ​ຂອງ​ຕົນ​ໃຫ້​ປະກົດ​ຜົນ​ເປັນ​ຈິງ. ໃນ​ໄລຍະ​ຜ່ານ​ມາ ຄະ​ນະ​ພັກ-ຄະນະ​ບັນຊາ​ ກອງ​ບັນຊາ​ການ​ທະຫານ​ແຂວງ ໄຊ​ຍະ​ບູ​ລີ ກໍ​ຄ ື​ຫ້ອງ​ພະລາທິການ ໄດ້​ມີ​ແຜນການ-ໂຄງການ​ອັນ​ລະອຽດ​ໃນ​ການ​ສ້າງ​ພະລາທິການ​ກັບ​ທີ່ ເພື່ອ​ຮັບປະກັນ​ໃຫ້​ວຽກ​ງານ​ຄຸ້ມ​ຄອງ​ທັບ​ລ້ຽງ​ດູ​ກຳລັງ ທັງ​ຮັບປະກັນ​ແກ້​ໄຂ​ຊີວິດ​ການ​ເປັນ​ຢູ່​ຂອງ​ພະນັກງານ-ນັກຮົບ​ ໃຫ້​ນັບ​ມື້​ດີ​ຂຶ້ນ​ເທື່ອ​ລະ​ກ້າວ ໂດຍ​ກຳນົດ​ເອົາ​ກອງພັນ 609 ເປັນ​ກົມ​ກອງ​ຕົວ​ແບບ ແລະ ມີ​ຫຼາຍ​ກົມ​ກອງ​ກໍ​ໄດ້​ສຸມ​ໃສ່​ວຽກ​ງານ​ເພີ່ມ​ພູນ​ຜະລິດຜົນ​ປູກຝັງ-ລ້ຽງສັດ ຢ່າງ​ເປັນ​ຂະ​ບວນ​ການ​ກວ້າງຂວາງ ຂຸດ​ຄົ້ນ​ໂດຍ​ນຳ​ໃຊ້​ພື້ນຖານ​ທ່າແຮງ​ບົ່ມ​ຊ້ອນ​ທີ່​ມີ​ຂອງ​ແຕ່​ລະ​ກົມ​ກອງ ເພື່ອ​ສ້າງ​ພະລາທິການ; ສຳລັບ​​ປີ 2024 ນີ້, ຄະນະ​ພັກ​ກອງ​ບັນຊາ​ການ​ທະຫານ​ແຂວງ​ໄຊ​ຍະ​ບູ​ລີ ໄດ້​ມອບ​ໃຫ້​ຄະນະ​ຫ້ອງ​ພະລາທິການ​ພວກ​ເຮົາ ບຸກເບີກ​ເນື້ອທີ່​ທຳ​ການ​ຜະລິດ​ປູກຝັງ-ລ້ຽງສັດ ບົນ​ຈິດໃຈ​ຍົກ​ສູງ​ນ້ຳໃຈ​ເພິ່ງ​ຕົນ​ເອງ ກຸ້ມ​ຕົນ​ເອງ ແລະ ສ້າງ​ຄວາມ​ເຂັ້ມແຂງ​ດ້ວຍ​ຕົນ​ເອງ ເປັນ​ຈຸດ​ໜັກ ອີງໃສ່​ພື້ນຖານ​ການ​ຜະລິດ​ກະສິກຳ​ປູກຝັງ-ລ້ຽງສັດ ຢູ່​ແຕ່​ລະ​ກົມ​ກອງ​ຮາກ​ຖານ​ແມ່ນ​ເອື້ອ​ອຳນວຍ​ຫຼາຍ​ດ້ານ ຍ້ອນ​ມີ​ສະຖານທີ່​ກວ້າງຂວາງ ແລະ ເໝາະ​ສົມ ເຊິ່ງ​ໃນ​ນີ້, ໄດ້​ບຸກເບີກ​ເນື້ອທີ່​ທັງ​ໝົດ 636,61 ເຮັກຕາ ກວມ​ເອົາ​ເນື້ອທີ່​ດິນ​ລ້ຽງ ສັດ​ໃຫຍ່ 263,4 ເຮັກຕາ, ມີ​ໜອງ​ປາ 13,07 ເຮັກຕາ, ມີ​ງົວ​ລ້ຽງ 628 ໂຕ, ໝູ 47 ໂຕ, ແບ້ 177 ໂຕ, ສັດ​ປີກ 11,248 ໂຕ, ປາ-ກົບ 193,535 ໂຕ, ສ່ວນ​ໃຫຍ່ແມ່ນ​ຊຸກຍູ້​ສົ່ງເສີມ​ໃຫ້​ພະນັກງານ-ນັກຮົບ​ປູກ​ພືດ​ຜັກ​ຕາມ​ລະດູ​ການ ​ເພື່ອ​ ສະໜອງ​ເຂົ້າ​ເຮືອນຄົວ​ລວມ​ກົມ​ກອງ, ​ພົ້ນ​ເດັ່ນ​ກວ່າ​ໝູ່​ແມ່ນ​ການ​ປູກ​ມັນຕົ້ນ ສາມາດ​ເກັບ​ກູ້​ຜົນ​ຜະລິດ​ໄດ້ 373, 064 ກິໂລກຣາມ ລວມ​ມູນຄ່າ 2.952.922.000 ກີບ ແລະ ກົມ​ກອງ​ທີ່​ພົ້ນ​ເດັ່ນ​ດ້ານ​ວຽກ​ງານ​ປູກຝັງ​ມີ 4 ກົມ​ກອງ​ຄື: ກອງພັນ 609, 411, 413 ແລະ ໂຮງຮຽນ​ການ​ທະຫານ​ທ້ອງຖິ່ນ ໃນ​ໄລຍະ 5 ເດືອນ​ຕົ້ນ​ປີ 2024 ນີ້ ສາມາດ​ສ້າງ​ລາຍ​ຮັບ​ຈາກ​ວຽກ​ງານ​ລ້ຽງ​ສັດ ລວມ​ມູນ​ຄ່າ 4.338.022.000 ກີບ ທຽບໃສ່​ແຜນການ​ປີ 2024 ບັນລຸ​ໄດ້ 57,31%. ສະຫາຍ ຮອງ​ຫົວໜ້າ​ຫ້ອງ​ພະລາທິການ ຍັງ​ໃຫ້​ຮູ້​ຕື່ມ​ວ່າ: ທິດ​ທາງ​ແຜນການ​ຕໍ່ໜ້າ​ ຈະ​ສຸມ​ໃສ່​ວຽກ​ງານ​ຜະລິດ​ກະສິກຳ​ປູກຝັງ-ລ້ຽງສັດ ໃຫ້​ຫຼາຍ​ຂຶ້ນ​ກວ່າ​ເກົ່າ ໃນ​ນ,ີ້​ ຈະ​ໄດ້​ສຸມ​ໃສ່​ການ​ລ້ຽງສັດ​ນ້ຳ​ປະເພດ​ປາດຸກ​ພັນ​ ຢູ່​ກອງ ຮ້ອຍ​ຜະລິດ​ ຈຳນວນ 15.000 ໂຕ, ເອົາໃຈໃສ່​ຊີ້​ນຳ​ແຕ່​ລະ​ຮາກ​ຖານ ​ຮັກສາ​ສັດລ້ຽງ​ທີ່​ມີ​ຢູ່​ໃຫ້​ແຜ່​ຂະຫຍາຍ​ເພີ່ມ​ຂຶ້ນ ແລະ ປູກ​ຕົ້ນໄມ້​ອຸດສາຫະກຳ, ຕົ້ນໄມ້​ກິນ​ໝາກ, ພືດ​ພັກ​ລົ້ມ​ລຸກ ພ້ອມ​ນັ້ນ ​ຍັງ​ຈະໄດ້​ກະກຽມ​ລົງ​ກວດກາ​ສຳ​ຫຼວດ​ເກັບ​ກຳ​ເນື້ອທີ່​ດິນ​ທຳ​ການ​ຜະລິດ​ຢູ່​ບັນດາ​ກົມ​ກອງ​ຮາກ​ຖານ​ທົ່ວ​ກອງ​ບັນຊາ​ການ​ທະຫານ​ແຂວງ ເພື່ອ​ກະກຽມ​ຂຽນ​ບົດ​ວິພາກ​ການ​ລົງທຶນ​ຜະລິດ​ກະສິກຳ​ໃຫ້​ຫຼາກ​ຫຼາຍ, ບຸກເບີກ​ເນື້ອທີ່​ເຮັດ​ນາປີ-ນາ​ແຊງ​ຕາມ​ທິດ​ຊີ້​ນຳ​ຂອງ​ທ່ານ​ເຈົ້າແຂວງ ແຂວງ​ໄຊ​ຍະ​ບູ​ລີ ເຊິ່ງ​ປັດຈຸບັນ, ​ຄະນະ​ພັກ​ກອງ​ບັນຊາ​ການ​ທະຫານ​ແຂວງ​ໄດ້​ລົງ​ສຳ​ຫຼວດ​ເກັບ​ກຳ​ຂໍ້​ມູນ​ເພື່ອ​ຂະຫຍາຍ​ເນື້ອທີ່​ດິນ​ລ້ຽງສັດ​ໃຫຍ່​ຕາມ​ທິດ​ຊີ້​ນຳ​ຂອງ​ທ່ານ​ເຈົ້າແຂວງ​ໄຊ​ຍະ ​ບູ​ລີ ໄດ້​ກຳນົດ​ຂອບ​ເຂດ​ທີ່​ດິນ​ລ້ຽງສັດ​ດັ່ງກ່າວ​ຮ້ອຍ​ກວ່າ​ເຮັກຕາ. ໂດຍ: ສົມ​ຄິດ ພູມ​ມີ​ຈິດ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ