ວັນຈັນ, ວັນທີ 12 ພຶດສະພາ 2025
ປະກາດການຮັບຮອງເອົາ 4 ບ້ານ ຂອງເມືອງພູກູດ ເປັນບ້ານປ້ອງກັນຊາດເຂັ້ມແຂງ
ເວລາອອກຂ່າວ: 2024-07-19 08:36:35 | ຜູ້ຂຽນ : admin1 | ຈຳນວນຄົນເຂົ້າຊົມ: 571 | ຄວາມນິຍົມ: 
ພິທີປະກາດການຮັບຮອງເອົາ 4 ບ້ານຄື: ບ້ານເຄິງ, ບ້ານນາຊາຍທອງ, ບ້ານພຽງຫຼວງ ແລະ ບ້ານ ຈອມສີ ທີ່ຂຶ້ນກັບເມືອງ ພູກູດ ແຂວງຊຽງຂວາງ ເປັນບ້ານປ້ອງກັນຊາດເຂັ້ມແຂງ ປະຈຳປີ 2024 ເປັນຄັ້ງທີ 4 ຂອງເມືອງ
ແລະ ຄັ້ງທີ 16 ຂອງແຂວງຊຽງຂວາງ ໄດ້ຈັດຂຶ້ນໃນວັນທີ 17 ກໍລະກົດ 2024 ນີ້, ໂດຍການເປັນປະທານ ຂອງສະຫາຍ ພັນເອກ ວັນທອງ ພົງສະຫວັນ
ເລຂາຄະນະພັກ ຫົວໜ້າການເມືອງ ກອງບັນຊາການທະຫານ ແຂວງຊຽງຂວາງ, ມີສະຫາຍ ຄຳພາ ພິລາວົງ ເລຂາພັກເມືອງ, ເຈົ້າເມືອງ ເມືອງພູກູດ, ມີຫົວໜ້າຫ້ອງການ ປກຊ-ປກສ ແຂວງ, ມີຄະນະພັກ-ຄະນະບັນຊາ ອົງການ 5 ຫ້ອງກອງບັນຊາການທະຫານແຂວງ, ກອງບັນຊາການທະຫານເມືອງ, ພະແນກ
ກໍ່ສ້າງຮາກຖານ, ພະແນກການ, ຂະແໜງການທີ່ກ່ຽວຂ້ອງຂອງເມືອງ, ແຂກຖືກເຊີນ ຕະຫຼອດຮອດຄະນະພັກອົງການປົກຄອງບ້ານ ແລະ ປະຊາຊົນ 4 ບ້ານ ເຂົ້າຮ່ວມ.
ສະຫາຍ ພັນໂທ ຄອນມີໄຊ ລວງຄຳວິໄລ ຫົວໜ້າການເມືອງ ກອງບັນຊາການ ທະຫານເມືອງພູກູດ ໄດ້ສະຫຼຸບການສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງ ປະຈຳປີ 2024 ວ່າ: ໃນໄລຍະຜ່ານມາ ພະແນກການທີ່ກ່ຽວຂ້ອງຂັ້ນແຂວງ, ຂັ້ນເມືອງ ໄດ້ສຸມໃສ່ປະສານສົມທົບ ກັບ ຄະນະພັກອົງການປົກຄອງບ້ານ ເພື່ອນຳເອົາມະຕິຄຳສັ່ງຕ່າງໆ ຂອງພັກ-ລັດ ໂດຍສະເພາະແມ່ນເອ
ກະສານ ຂອງກະຊວງປ້ອງກັນປະເທດ ວ່າດ້ວຍການສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງ ເຄື່ອນໄຫວຈັດຕັ້ງເຜີຍແຜ່ໃຫ້ປະຊາຊົນເຊື່ອມຊຶມ, ເຂົ້າໃຈແຈ້ງຕໍ່ແນວທາງ ປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ ຂອງພັກ, ກົດໝາຍຂອງລັດ ແລະ ເອກະສານອື່ນໆ ທີ່ກ່ຽວຂ້ອງກັບວຽກງານສ້າງບ້ານປ້ອງກັນຊາດເຂັ້ມແຂງ ເພື່ອໃຫ້ເຂົາເຈົ້າຮັບຮູ້-ເຊື່ອມຊຶມຢ່າງທົ່ວເຖິງສາມາດເຮັດໃຫ້ປະຊາຊົນ ທັງ 4 ບ້ານ ມີຄວາມຕື່ນຕົວເປັນເຈົ້າການປະກອບສ່ວນສຳຄັນເຂົ້າໃນວຽກງານດັ່ງກ່າວຢ່າງຕັ້ງໜ້າ, ຍົກສູງສະຕິຄວາມເປັນເຈົ້າການດ້ານຕ່າງໆ ເຂົ້າໃນວຽກງານ ປ້ອງກັນຊາດ-ປ້ອງກັນຄວາມສະຫງົບ ຢ່າງເປັນເອກະພາບ, ພ້ອມກັນເຮັດໜ້າທີ່ຕິດຕາມສະພາບການເຄື່ອນໄຫວຂອງກຸ່ມຄົນບໍ່ດີ ແລະ ຂອບເຂດຄວາມຮັບຜິດຊອບ ຂອງບ້ານຕົນເອງຢ່າງເຂັ້ມງວດ, ຕອບຕ້ານໄດ້ບັນດາປະກົດການຫຍໍ້ທໍ້ທັນເວລາ, ພ້ອມນັ້ນ ປະຊາຊົນແຕ່ລະບ້ານ ໄດ້ເອົາໃຈໃສ່ສ້າງເສດຖະກິດແກ້ໄຂຊີວິດການເປັນຢູ່ຂອງຄອບຄົວຕາມທ່າແຮງບົ່ມຊ້ອນຂອງຕົນດ້ວຍການຄ້າຂາຍ, ປູກຝັງ-ລ້ຽງສັດ ສາມາດເຮັດໃຫ້ແຕ່ລະຄອບຄົວຫຼຸດພົ້ນອອກຈາກຄວາມທຸກຍາກເທື່ອລະກ້າວ. ເຊິ່ງສາມາດປະເມີນຜົນການສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງໄດ້ 100% ສາມາດຢັ້ງຢືນ ແລະ ຮັບຮອງເອົາ ຈຳນວນ 4 ບ້ານ ຂອງເມືອງ ພູກູດ ແຂວງຊຽງຂວາງ ເປັນບ້ານປ້ອງກັນຊາດເຂັ້ມແຂງປະຈຳປີ 2024 ຄັ້ງທີ 4 ຂອງເມືອງພູກູດ ແລະ ຄັ້ງທີ 16 ຂອງແຂວງຊຽງຂວາງ ໄດ້ຕາມ 6 ມາດຖານທີ່ກະຊວງປ້ອງກັນປະເທດວາງອອກ. ພ້ອມນີ້, ທັງ 4 ບ້ານ ຍັງໄດ້ຮັບນາມມະຍົດເປັນ ບ້ານສຸຂະອະນາໄມ, ບ້ານວັດທະນະທຳ, ບ້ານພັດທະນາ, ບ້ານປ້ອງກັນຄວາມສະຫງົບດີ, ບ້ານປອດຄະດີ, ບ້ານສາມັກຄີປອງດອງ, ບ້ານແມ່ຍິງ 3 ດີ, ຊາວໜຸ່ມ 4 ບຸກ, ບ້ານຢຸດຕິການຖາງປ່າຊະຊາຍ ແລະ ບ້ານພົ້ນທຸກ ຕື່ມອີກ.
ໂອກາດນີ້, ສະຫາຍ ພັນເອກ ວັນທອງ ພົງສະຫວັນ ໄດ້ມອບໃບຢັ້ງຢືນບ້ານປ້ອງກັນຊາດເຂັ້ມແຂງ ໃຫ້ທັງ 4 ບ້ານ ພ້ອມທັງເປີດປ້າຍບ້ານປ້ອງກັນຊາດເຂັ້ມແຂງ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນ.
ໂດຍ: ສົມຮັກ ຈັນທະວົງສາ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
