POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນອັງຄານ, ວັນທີ 17 ມິຖຸນາ 2025

ແມ່ຍິງລາວ ຄຽງບ່າຄຽງໄຫຼ່ຮ່ວມກັບເພດຊາຍ ໃນພາລະກິດຕໍ່ສູ້ປົດປ່ອຍຊາດ ກໍຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດ
ເວລາອອກຂ່າວ: 2024-07-19 08:40:34 | ຜູ້ຂຽນ : admin1 | ຈຳນວນຄົນເຂົ້າຊົມ: 585 | ຄວາມນິຍົມ:

ເມື່ອຫວນຄືນອະດີດ ກໍຄື ສະໄໝຕໍ່ສູ້ກູ້ຊາດໃນເມື່ອກ່ອນ ແມ່ຍິງລາວບັນດາເຜົ່າ ໄດ້ອຸທິດ ຕົນເພື່ອພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ຄຽງບ່າຄຽງໄຫຼ່ຮ່ວມກັບເພດຊາຍ ພ້ອມທັງສ້າງວິລະກຳ, ຜົນງານອັນຜົນເດັ່ນຫຼາຍດ້ານ ບໍ່ວ່າໃນດ້ານການບໍລິຫານບ້ານເມືອງ, ດ້ານການອອກແຮງງານ, ເພີ່ມພູນຜະລິດຜົນຫາລ້ຽງຄອບຄົວ, ຮັກສາໄດ້ມູນເຊື້ອອັນດີງາມ ແລະ ເປັນແວ່ນແຍງອັນໃສແຈ້ງ ໃຫ້ແມ່ຍິງລາວຮຸ່ນຕໍ່ໆມາ. ເນື່ອງໃນໂອກາດ ວັນສ້າງຕັ້ງສະຫະພັນແມ່ຍິງລາວ ຄົບຮອບ 69 ປີ (20 ກໍລະກົດ 1955 - 20 ກໍລະກົດ 2024), ສະຫາຍ ພັນເອກ ນາງ ໄພວອນ ອິນທະບຸດ ຄະນະບໍລິຫານງານສູນກາງສະຫະພັນແມ່ຍິງລາວ, ຫົວໜ້າຫ້ອງການສະຫະພັນແມ່ຍິງກອງທັບ ໄດ້ໃຫ້ທັດສະນະ ແລະ ສະແດງຄວາມຄິດເຫັນຕໍ່ວັນດັ່ງກ່າວ ວ່າ: ສະຫະພັນແມ່ຍິງລາວ ເປັນອົງການຈັດຕັ້ງການເມືອງ ເຊິ່ງມີໜ້າທີ່ເຕົ້າໂຮມແມ່ຍິງທຸກຊັ້ນຄົນ ແລະ ຊົນເຜົ່າ ໃຫ້ມີນໍ້າໃຈຮັກຊາດ, ມີຄວາມຫ້າວຫັນເສຍສະຫຼະເພື່ອຜົນປະໂຫຍດສ່ວນລວມ ແລະ ປະກອບສ່ວນເຂົ້າໃນຂະບວນການຕໍ່ສູ້ເພື່ອປົດປ່ອຍປະເທດຊາດ, ກອບກູ້ເອົາເອກະລາດ, ອຳນາດອະທິ ປະໄຕ ແລະ ຜືນແຜ່ນດິນອັນຄົບຖ້ວນຂອງຊາດ ມາສູ່ປະຊາຊົນລາວບັນດາເຜົ່າ. ນັບແຕ່ປະເທດຊາດ ຕົກຢູ່ພາຍໃຕ້ລະບອບການປົກຄອງຂອງພວກລ່າເມືອງຂຶ້ນ ທີ່ໂຫດຮ້າຍປ່າເຖື່ອນ ປະຊາຊົນລາວໃນທົ່ວປະເທດ ທຸກຍາກຫຼ້າຫຼັງ, ຄົນລາວຂາດອິດສະຫຼະພາບ, ກຽດສັກສີຖືກຢຽບຢ່ຳທຳລາຍ, ປະຊາຊົນຖືກກົດຂີ່ຂູດຮີດ ຢ່າງແສນສາຫັດ ຍິ່ງໄປກວ່ານັ້ນ ແມ່ຍິງໄດ້ຖືກລ່ວງລະເມີດທາງເພດ, ຖືກຂົມຂື່ນທຳສຳເລົາ ແລະ ຖືກເຂັນຂ້າຢ່າງໂຫດຮ້າຍປ່າເຖື່ອນ. ມາຮອດວັນທີ 22 ມີນາ 1955 ພັກປະຊາຊົນລາວ ໄດ້ຮັບການສ້າງຕັ້ງຂຶ້ນ ພັກກໍໄດ້ເອົາໃຈໃສ່ຢ່າງຈົດຈໍ່ຕໍ່ການປຸກລະດົມຂົນຂວາຍ, ກໍ່ສ້າງແມ່ຍິງໃຫ້ມີຄວາມຕື່ນຕົວປະກອບສ່ວນໃນພາລະກິດປະຕິວັດ, ຖືແມ່ຍິງເປັນພາກສ່ວນໜຶ່ງໃນກຳລັງແຮງທີ່ສຳຄັນຂອງພັກ ແລະ ປະກາດສ້າງຕັ້ງສະຫະພັນແມ່ຍິງລາວຂຶ້ນໃນເວລາຕໍ່ມາ ໂດຍໜ້າທີ່ຂອງ ການຈັດຕັ້ງແມ່ຍິງໃນເບື້ອງຕົ້ນ ແມ່ນເບິ່ງແຍງ, ລ້ຽງດູ, ຊຸກເຊື່ອງ, ຕິດຕໍ່, ສົ່ງຂ່າວພະນັກງານ, ທະຫານປະຕິວັດ, ສົ່ງເອກະສານ ໃຫ້ພະນັກງານ, ທະຫານທີ່ປະຕິບັດໜ້າທີ່ຢູ່ແນວໜ້າ ແລະ ໃນເຂດຄວບຄຸມຂອງສັດຕູດ້ວຍຫຼາຍຮູບແບບ ແລະ ຫຼາຍວິທີການ, ລຳລຽງສະບຽງອາຫານ, ອາວຸດ, ເຄື່ອງນຸ່ງຫົ່ມ ໃຫ້ພະນັກງານ-ນັກຮົບຢູ່ແນວໜ້າ, ປຸກລະດົມຂົນຂວາຍຊາວໜຸ່ມ, ລູກຫຼານຂອງປະຊາຊົນ ອອກຮັບໃຊ້ປະເທດຊາດ, ປຸກລະດົມຂະບວນການຂອງແມ່ຍິງ ປະຕິບັດວຽກງານແນວຫຼັງ, ເພີ່ມພູນຜະລິດຜົນຫາລ້ຽງກຸ້ມຕົນເອງ, ປະຢັດເຂົ້າປາອາຫານ ເພື່ອສົ່ງໄປແນວໜ້າ ແລະ ປະຕິບັດວຽກງານຕາມການຈັດຕັ້ງມອບໝາຍໃຫ້ ດ້ວຍຄວາມຮັບຜິດຊອບສູງ. ສະຫາຍ ຫົວໜ້າຫ້ອງການສະຫະພັນແມ່ຍິງກອງທັບ ໄດ້ກ່າວຕື່ມວ່າ: ແມ່ຍິງລາວ ຍັງໄດ້ເປັນເຈົ້າການເຮັດວຽກງານເພີ່ມພູນຜະລິດຜົນ, ເຝິກແອບຮ່ຳຮຽນ ແລະ ສອນໜັງສື, ສະໝັກເປັນນັກຮົບອະນາໄມປະຈຳບ້ານ, ນຳພາປະຊາຊົນ ປະຕິບັດຫຼັກການອະນາໄມຂັ້ນພື້ນຖານ, ຍິງໜຸ່ມຫຼາຍໝື່ນຄົນ ຢູ່ຊົນນະບົດ ແລະ ຢູ່ໃນຕົວເມືອງຕ່າງໆໃນທົ່ວປະເທດ ໄດ້ເສຍສະຫຼະອອກຈາກຄອບຄົວ ໄປເຂົ້າຮ່ວມການປະຕິວັດ ເຊັ່ນ: ໄປເປັນທະຫານ, ເປັນພະນັກງານຂົນຂວາຍການເມືອງ, ເປັນພະນັກງານເຄື່ອນໄຫວປິດລັບຢູ່ແນວຫຼັງຂອງສັດຕູ, ໄປຮຽນຄູ, ເປັນແພດໝໍ ແລະ ອື່ນໆ. ໂດຍຜ່ານຂະບວນການດັ່ງກ່າວ ມີສະມາຊິກແມ່ຍິງລາວຫຼາຍສະຫາຍ ໄດ້ສ້າງວີລະກຳ ແລະ ຜົນງານພົ້ນເດັ່ນຢ່າງຫຼວງຫຼາຍ ເຊິ່ງພັກ-ລັດຖະບານ ໄດ້ໃຫ້ການຍ້ອງຍໍຊົມເຊີຍ ດ້ວຍການມອບນາມມະຍົດ ເປັນວີລະຊົນແຫ່ງຊາດ, ເປັນນັກຮົບແຂ່ງຂັນ ຢ່າງສົມກຽດ ແລະ ຖືກບັນທຶກໄວ້ໃນປື້ມຄຳປະຫວັດສາດຂອງຊາດລາວ. ໂດຍ: ຈິດ ເພັດພູທອງ

news to day and hot news