ວັນຈັນ, ວັນທີ 14 ຕຸລາ 2024
ໂຮງຮຽນທິດສະດີການເມືອງກອງທັບ ຖືເອົາວຽກງານການຮຽນ-ການສອນ ເປັນໜ້າທີ່ໃຈກາງ
ເວລາອອກຂ່າວ: 2024-09-06 09:05:56 | ຜູ້ຂຽນ : admin1 | ຈຳນວນຄົນເຂົ້າຊົມ: 282 | ຄວາມນິຍົມ: 
ໂຮງຮຽນທິດສະດີການເມືອງກອງທັບ ແມ່ນເບົ້າຫຼໍ່ດ້ານແນວຄິດການເມືອງທີ່ປອດໃສ ເຂັ້ມແຂງ ໜັກແໜ້ນ, ເປັນສະຖາບັນເຝິກຝົນດ້ານຄຸນທາດການ
ເມືອງ, ຄຸນສົມບັດສິນທຳປະຕິວັດ ແລະ ເສີມຂະຫຍາຍທາດແທ້ຂອງການປະຕິວັດ, ມີພາລະບົດບາດໜ້າທີ່ໃນການກໍ່ສ້າງ-ບຳລຸງນາຍທະຫານການເມືອງຂັ້ນກອງພັນນ້ອຍຂຶ້ນເມື່ອ, ທັງເປັນບ່ອນຄົ້ນຄ້ວາວິທະຍາສາດການເມືອງຂອງກອງທັບປະຊາຊົນລາວ.
ສະຫາຍ ພັນເອກ ປອ ບຸນທັນ ຈັນທະລີມາ ຫົວຫນ້າການທະຫານໂຮງຮຽນທິດສະດີການເມືອງກອງທັບໄດ້ໃຫ້ສຳພາດວ່າ: ຕະຫຼອດໄລຍະຜ່ານມາ ຄະນະພັກ-ຄະນະອຳນວຍການ ໄດ້ເອົາໃຈໃສ່ນຳພາ-ຊີ້ນຳ ຂົງເຂດວຽກງານການເມືອງ-ແນວຄິດ ຖືເອົາວຽກງານການຮຽນ-ການສອນ ເປັນໜ້າທີ່ໃຈກາງ, ເຮັດໃຫ້ວຽກງານດັ່ງກ່າວນີ້ເຄື່ອນໄຫວຖືກຕ້ອງຕາມຫຼັກການ ແລະ ມີຄຸນນະພາບສູງ ໂດຍສະເພາະແມ່ນການຄົ້ນຄວ້າສ້າງຕັ້ງສະພາວິທະຍາສາດ ເພື່ອເປັນບ່ອນອີງໃນການຄົ້ນຄວ້າ, ອະນຸມັດນຳໃຊ້ນິຕິກຳຕ່າງໆຂອງໂຮງຮຽນ, ນຳພາກໍ່ສ້າງ ແລະ ປັບປຸງໂຄງການຫຼັກສູດການຮຽນ-ການສອນໃຫ້ແຖດເໝາະກັບເງື່ອນໄຂໃໝ່ຂອງກອງທັບເຮົາ, ສ້າງຂໍ້ກຳນົດຕ່າງໆເພື່ອຄຸ້ມຄອງການຮຽນ-ການສອນ, ບຳລຸງຍົກລະດັບພະນັກງານ ຄູອາ-ຈານ, ສ້າງແຜນການອົບຮົມ-ຫັດແອບເປັນລະບົບຄົບຊຸດ, ປັບປຸງເນື້ອໃນເອກະສານການສິດສອນ, ເອກະສານຂໍ້ມູນຄົ້ນຄວ້າ, ປັບປຸງຫ້ອງຮຽນ, ວັດຖຸອຸປະກອນ, ງົບປະມານຮັບໃຊ້ການຮຽນ-ການສອນ ແລະ ອື່ນໆ ໃຫ້ຄົບຖ້ວນ, ເຊິ່ງຕະຫຼອດໄລຍະຜ່ານມາ ມີຫຼັກສູດທັງໝົດ 13 ຫຼັກສູດ, ສ້າງຫຼັກສູດໃໝ່ 3 ຫຼັກສູດ, ປັບປຸງໂຄງການຫຼັກສູດເກົ່າ 7 ຫຼັກສູດ ເພື່ອໃຫ້ສອດຂ້ອງກັບ ສະພາບການໃໝ່, ຍ້າຍຫຼັກສູດປະລິນຍາໂທ ມາໃໝ່ຈາກວິທະຍາ
ຄານ ປ້ອງກັນຊາດ ໄກສອນ ພົມວິຫານ 3 ຫຼັກສູດ, ສ້າງຂໍ້ກຳນົດຕ່າງໆເພື່ອຄຸ້ມຄອງໃນການຮຽນ-ການສອນ 8 ສະບັບ, ສົ່ງ ຄູ-ອາຈານໄປບຳລຸງຍົກລະດັບ
ຢູ່ພາຍໃນ ແລະ ຕ່າງປະເທດ 90 ກວ່າສະຫາຍ, ປັບປຸງປຶ້ມຕຳລາ ແລະ ເອກະສານຂໍ້ມູນຄົ້ນຄວ້າ 600 ກວ່າຊະນິດ ມີ 4866 ກວ່າຫົວ, ສ້າງແຜນການອົບຮົມປະຈຳສົກຮຽນ 4 ສະບັບ, ແຜນການອົບຮົມປະຈຳພາກ 20 ສະບັບ, ແຜນການປະຈຳເດືອນ 100 ສະບັບ, ໃນນີ້ ຜ່ານມາໄດ້ກໍ່ສ້າງ-ບຳລຸງນາຍທະຫານການເມືອງ ໄດ້ທັງໝົດ 1.081 ສະຫາຍ, ສັງລວມແລ້ວໃນ 4 ສົກຮຽນຜ່ານມາ ມີນັກສຶກສາທີ່ຮຽນຈົບໄປປະຕິບັດໜ້າທີ່ຢູ່ໃນກຳລັງຫຼວງ ແລະ ທ້ອງ
ຖິ່ນ ທັງໝົດ 1.031 ສະຫາຍ, ເຊິ່ງໃນສົກຮຽນ 2024-2025 ມີ 12 ເປົ້າໝາຍ ມີນັກສຶກສາທັງໝົດ 386 ສະຫາຍ, ໃນນີ້ ຫຼັກສູດກໍ່ສ້າງປະລິນຍາໂທນາຍທະ
ຫານການເມືອງ ເຊິ່ງໄດ້ມອບໂອນມາຈາກ ວິທະຍາຄານປ້ອງກັນຊາດໄກສອນ ພົມວິຫານ ມາດຳເນີນການຮຽນ-ການສອນ ເປັນຊຸດທຳອິດ ເເລະ ເພື່ອຮັບປະ
ກັນເຮັດສຳເລັດໜ້າທີ່ຂອງແຕ່ລະພາກສ່ວນ, ພາຍຫຼັງສຳເລັດວຽກງານກະກຽມ ທຸກພາກສ່ວນກໍ່ໄດ້ຈັດຕັ້ງປະຕິບັດຕາມພາລະບົດບາດຂອງໃຜລາວ, ເລີ່ມແຕ່ຕ້ອນຮັບນັກສຶກສາ, ລົງທະບຽນຮຽນ, ນຳສົ່ງນັກສຶກສາເຂົ້າຫໍພັກ, ຈັດຕັ້ງປະຕິບັດແຜນການຮຽນ-ການສອນ ແລະ ຄຸ້ມຄອງການຮຽນ-ການສອນຕາມລະບຽບການທີ່ໄດ້ກຳນົດໄວ້.
ສະຫາຍ ພັນເອກ ປອ ບຸນທັນ ຈັນທະລີມາ ໃຫ້ຮູ້ຕື່ມວ່າ: ເນື່ອງໃນໂອກາດວັນໄຂສົກຮຽນໃໝ່ 2024-2025 ນີ້ ຕາງໜ້າຄະນະພັກ-ຄະນະອຳນວຍການ ໂຮງຮຽນທິດສະດີການເມືອງກອງທັບ ຮຽກຮ້ອງໃຫ້ພະນັກງານນຳພາ-ບັນຊາ ແລະ ຄູ-ອາຈານ ທີ່ເຮັດວຽກງານຄຸ້ມຄອງ, ວຽກງານການສິດສອນ, ວຽກງານຮັບປະກັນດ້ານຕ່າງໆ ໃຫ້ແກ່ການຮຽນ-ການສອນ ຈົ່ງຮັບຮູ້ ແລະ ເຊື່ອມຊຶມໃຫ້ເລິກເຊິ່ງ, ເພີ່ມທະວີຄວາມຮັບຜິດຊອບໃຫ້ສູງຂຶ້ນຕໍ່ໜ້າທີ່ວຽກງານທີ່ຕົນເອງຮັບຜິດຊອບ, ປະສານສົມທົບແຕ່ລະພາກສ່ວນໃຫ້ແໜ້ນແຟ້ນ, ຊອກທຸກວິທີຜ່ານຜ່າຄວາມຫຍຸ້ງຍາກທີ່ຈະເກີດຂຶ້ນ, ເພື່ອພ້ອມກັນເຮັດສຳເລັດໜ້າທີ່ຂັ້ນເທິງມອບໝາຍໃຫ້, ສຳລັບນັກສຶກສາແຕ່ລະເປົ້າໝາຍຕ້ອງເຊ່ືອມຊຶມກຳແໜ້ນໜ້າທີ່ການເມືອງຂອງຕົນ, ເອົາໃຈໃສ່ຄົ້ນຄວ້າຮ່ຳຮຽນ, ປະຕິບັດຂໍ້ກຳນົດການຮຽນການສອນ ໃຫ້ຖືກຕ້ອງ ແລະ ປະຕິບັດຂໍ້ກຳນົດ ກົດລະບຽບຂອງກອງທັບ ກໍຄືຂອງໂຮງຮຽນທິດສະດີການເມືອງກອງທັບວາງອອກໃຫ້ເຂັ້ມງວດ.
ໂດຍ: ສຸກສາຄອນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
