ວັນຈັນ, ວັນທີ 14 ຕຸລາ 2024
ເຜີຍແຜ່ຜົນສໍາເລັດກອງປະຊຸມ ສະໄໝສາມັນເທື່ອທີ 7 ຂອງ ສະພາແຫ່ງຊາດຊຸດທີ IX ຢູ່ກອງພັນໃຫຍ່ 661
ເວລາອອກຂ່າວ: 2024-09-11 16:08:46 | ຜູ້ຂຽນ : admin2 | ຈຳນວນຄົນເຂົ້າຊົມ: 414 | ຄວາມນິຍົມ: 
ກອງປະຊຸມເຜີຍແຜ່ຜົນສໍາເລັດ ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນນະຄອນຫຼວງວຽງຈັນ ຊຸດທີ II ຢູ່ກອງພັນໃຫຍ່ 661 ໄດ້ຈັດຂຶ້ນໃນວັນທີ 11 ກັນຍາ 2024 ນີ້, ໂດຍການເປັນປະທານ ຂອງສະຫາຍ ພົນຕີ ປອ ວົງສັກ ພັນທະວົງ ຄະນະປະຈໍາສະພາແຫ່ງຊາດ, ປະທານກຳມາທິການ ປກຊ-ປກສ ສະພາແຫ່ງຊາດ, ມີຄະນະສະພາປະຊາຊົນນະຄອນຫຼວງວຽງຈັນ, ຄະນະພັກ-ຄະນະບັນຊາ ກອງພັນໃຫຍ່ 661 ຕະຫຼອດຮອດ ພະນັກງານຫຼັກແຫຼ່ງ ເຂົ້າຮ່ວມ.
ໂອກາດນີ້, ສະຫາຍ ພັນເອກ ຄໍາປານ ແພງພັນ ຫົວໜ້າການເມືອງກອງພັນໃຫຍ່ 661 ໄດ້ລາຍງານສະພາບຂອງກົມກອງໂດຍຫຍໍ້ເຊິ່ງກອງພັນໃຫຍ່ ລົດຕັ້ງ-ຍານເກາະ 661 ແມ່ນຫົວໜ່ວຍກົມກອງໜຶ່ງ ນອນຢູ່ໂຄງປະກອບການຈັດຕັ້ງກອງທັບປະຊາຊົນລາວ ເປັນກອງພັນໃຫຍ່ເອກະລາດຂຶ້ນກັບກະຊວງປ້ອງກັນປະເທດໂດຍກົງ ເປັນກົມກອງສູ້ຮົບ ແລະ ຮັບປະກັນສູ້ຮົບ, ມີພາລະບົດບາດເປັນກໍາລັງສູ້ຮົບ ບຸກທະລຸປະຈັນບານ ແລະ ເຄື່ອນທີ່ໄວຂອງກອງທັບ, ສູ້ຮົບໃນຮູບແຖວປະສານເຫຼົ່າ ຫຼື ສູ້ຮົບເອກະລາດຊ່ວຍໜູນກໍາລັງໄຟໂດຍກົງ ໃຫ້ກົມກອງທະຫານຮາບ ແລະ ກຳລັງອື່ນໆ ເຮັດສໍາເລັດໜ້າທີ່ຄວາມມຸ້ງປະສົງສູ້ຮົບ. ກົມກອງໄດ້ສູ້ຊົນປັບປຸງວຽກງານຢ່າງຮອບດ້ານສ້າງເປັນກໍາລັງທີ່ຈົ່ງຮັກພັກດີຕໍ່ປະເທດຊາດ, ຕໍ່ລະບອບໃໝ່, ຍຶດໝັ້ນຕໍ່ອຸດົມການຂອງພັກ, ແລະ ເປັນກໍາລັງທີ່ໄວ້ວາງໃຈຈາກປະຊາຊົນລາວບັນດາເຜົ່າ.
ສະຫາຍ ພົນຕີ ປອ ວົງສັກ ພັນທະວົງ ໄດ້ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ເຊິ່ງກອງປະຊຸມໄດ້ຄົ້ນຄວ້າພິຈາລະນາວຽກງານສໍາຄັນຕ່າງໆ ຂອງຊາດ ເປັນຕົ້ນແມ່ນໄດ້ຮັບຟັງບົດລາຍງານໂດຍສັງລວມຂອງ ທ່ານ ນາຍົກລັດຖະມົນຕີ, ລັດຖະມົນຕີຈາກກະຊວງແຜນການ ແລະ ການລົງທຶນ, ກະຊວງການເງິນ ແລະ ທະນາຄານແຫ່ງ ສປປ ລາວ ກ່ຽວກັບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ແຜນເງິນຕາຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ໄລຍະ 6 ເດືອນຕົ້ນປີ 2024 ແລະ ແຜນການ 6 ເດືອນທ້າຍ ປີ 2024. ນອກນັ້ນ, ຍັງໄດ້ຮັບຟັງການຊີ້ແຈງອະທິບາຍຈາກກະຊວງ, ອົງການ 10 ພາກສ່ວນຕື່ມອີກ.
ໂອກາດນີ້ ທ່ານ ນາງ ສົມພຽນ ວົງໄຊ ຄະນະປະຈໍາສະພາປະຊາຊົນນະຄອນຫຼວງວຽງຈັນ, ປະທານຄະນະກຳມາທິການຍຸຕິທໍາ ແລະ ປກຊ-ປກສ ສະພາປະຊາຊົນນະຄອນຫຼວງວຽງຈັນ ກໍໄດ້ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນນະຄອນຫຼວງວຽງຈັນ ຊຸດທີ 2 ເຊິ່ງກອງປະຊຸມ ໄດ້ພິຈາລະນາ ແລະ ຮັບຮອງເອົາບັນຫາສໍາຄັນຂອງນະຄອນຫຼວງວຽງຈັນຫຼາຍບັນຫາຄື: ຮັບຮອງເອົາບົດລາຍງານຂອງອົງການປົກຄອງ ນະຄອນຫຼວງວຽງຈັນ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2024 ຂອງນະຄອນຫຼວງ, ຕິດພັນກັບການກະກຽມຄວາມພ້ອມ ໃນການເປັນເຈົ້າພາບການດໍາເນີນກອງປະຊຸມອາຊຽນຂອງນະຄອນຫຼວງ; ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດ ບັນດາຄາດໝາຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ຢູ່ນະຄອນຫຼວງວຽງຈັນ; ຮັບຮອງເອົາຂໍ້ຕົກລົງວ່າດ້ວຍການຮັບຮອງເອົາລາຄາຫົວໜ່ວຍທົດແທນຕໍ່ຊັບສິນທີ່ໄດ້ຮັບຜົນກະທົບຈາກໂຄງການປັບປຸງ ແລະ ສ້ອມແປງເສັ້ນທາງຫຼວງແຫ່ງຊາດ ເລກທີ 13 ໃຕ້, ຮັບຮອງເອົາບົດລາຍງານຜົນການຈັດຕັ້ງປະຕິບັດແຜນການເຄື່ອນໄຫວວຽກງານ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2024 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II, ຮັບຮອງເອົາບົດລາຍງານການຈັດຕັ້ງປະຕິບັດ ມະຕິກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II ວ່າດ້ວຍການຮັບຮອງເອົາບົດລາຍງານການເຄື່ອນໄຫວວຽກງານ ປີ 2023 ແລະ ແຜນການຈຸດສຸມ ປີ 2024 ຂອງສານປະຊາຊົນພາກກາງ, ອົງການໄອຍະການປະຊາຊົນພາກກາງ, ສານປະຊາຊົນ ນະຄອນຫຼວງວຽງຈັນ ແລະ ອົງການໄອຍະການປະຊາຊົນ ນະຄອນຫຼວງວຽງຈັນ ໃນໄລຍະ 06 ເດືອນຕົ້ນປີ 2024.
ການເຜີຍແຜ່ໃນຄັ້ງນີ້, ແນໃສ່ເພື່ອເຮັດໃຫ້ ຄະນະພັກ-ຄະນະບັນຊາ ແຕ່ລະຂັ້ນ ແລະ ພະນັກງານຫຼັກແຫຼ່ງຜູ້ມີສິດເລືອກຕັ້ງມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ບັນດາເນື້ອໃນຈິດໃຈທີ່ໄດ້ກຳນົດໄວ້ໃນມະຕິ ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ແລະ ສະພາປະຊາຊົນນະຄອນຫຼວງວຽງຈັນ, ພ້ອມກັນເປັນເຈົ້າການຜັນຂະຫຍາຍ, ຈັດຕັ້ງປະຕິບັດໃຫ້ເກີດໝາກຜົນຕົວຈິງ ແລະ ເພື່ອເປັນພື້ນຖານໃຫ້ ຄະນະພັກ-ຄະນະບັນຊາ ແຕ່ລະຂັ້ນສືບຕໍ່ສຶກສາອົບຮົມ ແລະ ນໍາເອົາເນື້ອໃນດັ່ງກ່າວໄປຈັດຕັ້ງຜັນຂະຫຍາຍໃຫ້ເປັນຮູບປະທຳເພື່ອເປັນການປັບປຸງ, ຍົກສູງທັດສະນະຫຼັກໝັ້ນ, ຄຸນທາດການເມືອງ ຂອງພະນັກງານຫຼັກແຫຼ່ງແຕ່ລະຂັ້ນໃຫ້ໜັກແໜ້ນ, ມີຄວາມເດັດດ່ຽວໜຽວແໜ້ນ ສືບຕໍ່ບຸກທະລຸດ້ານແນວຄິດ-ຈິນຕະນາການ ສ້າງໃຫ້ມີການຫັນປ່ຽນທາງດ້ານທັດສະນະແນວຄິດ ແລະ ການກະທຳທີ່ສົ່ງເສີມດ້ານດີ, ແກ້ໄຂຈຸດອ່ອນ ເປັນເຈົ້າການຕອບຕ້ານທຸກກົນອຸບາຍມ້າງເພທຳລາຍຂອງພວກອິດທິກຳລັງປໍລະປັກ ແລະ ກຸ່ມຄົນບໍ່ດີ, ມີແບບແຜນດຳລົງຊີວິດທີ່ປອດໃສ, ມີຄວາມສາມັກຄີພາຍໃນເປັນເອກະພາບ, ເປັນກ້ອນກຳລັງແຮງໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນກ້າວໜ້າ.
ໂດຍ: ສຸເວດ ສີດາຄຳ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
