ວັນຈັນ, ວັນທີ 14 ຕຸລາ 2024
ໂຮງງານມິດຕະພາບລາວ-ຫວຽດນາມ ເປີດອົບຮົມການເມືອງ ປະຈໍາປີ 2024
ເວລາອອກຂ່າວ: 2024-09-13 13:49:41 | ຜູ້ຂຽນ : admin2 | ຈຳນວນຄົນເຂົ້າຊົມ: 402 | ຄວາມນິຍົມ: 
ວັນທີ 12 ກັນຍາ 2024 ນີ້ ໂຮງງານມິດຕະພາບລາວ-ຫວຽດນາມ ກົມໃຫຍ່ເຕັກນິກກອງທັບ ໄດ້ຈັດພິທີເປີດ ອົບຮົມການເມືອງ ປະຈໍາປີ 2024 ໂດຍການເປັນປະທານຂອງ ສະຫາຍ ພົນຈັດຕະວາ ສາຍສະໝອນ ໄຊພູບານ ຄະນະປະຈຳພັກກົມໃຫຍ່ ຮອງຫົວໜ້າກົມໃຫຍ່ເຕັກນິກກອງທັບ, ມີຄະນະພັກ-ຄະນະບັນຊາ, ຕະຫຼອດຮອດພະນັກງານ-ນັກຮົບ ເຂົ້າຮ່ວມ.
ສະຫາຍ ພັນຕີ ສຸວັນທອນ ສົມຟອງບຸດຕະຂັນ ຮອງຫົວໜ້າພະແນກໂຄສະນາອົບຮົມ ຫ້ອງການເມືອງ ກົມໃຫຍ່ເຕັກນິກກອງທັບ ໄດ້ຂຶ້ນຜ່ານຄໍາສັ່ງແນະນໍາ ກົມໃຫຍ່ການເມືອງກອງທັບ ວ່າດ້ວຍການອົບຮົມການເມືອງ ປະຈໍາປີ 2024. ຈາກນັ້ນສະຫາຍ ພົນຈັດຕະວາ ສາຍສະໝອນ ໄຊພູບານ ກໍ່ໄດ້ຂຶ້ນກ່າວເປີດກອງປະຊຸມຂຶ້ນຢ່າງເປັນທາງການພ້ອມທັງເຜີຍແຜ່ເອກະສານອົບຮົມການເມືອງ-ແນວຄິດ ໄດ້ຍົກໃຫ້ເຫັນຄວາມສໍາຄັນດ້ານວຽກງານການເມືອງ-ແນວຄິດ ໃນການເຄື່ອນໄຫວນຳພາຂອງພັກ, ແນໃສ່ກະທົບເຂົ້າໃນຖັນແຖວພະນັກງານ-ນັກຮົບ ມີຄວາມເຊື່ອໝັ້ນຕໍ່ອຸດົມການສັງຄົມນິຍົມ. ໃນການຈັດຕັ້ງອົບຮົມການເມືອງ-ແນວຄິດ ຄັ້ງນີ້ ແມ່ນແນໃສ່ເຮັດໃຫ້ພະນັກງານ-ນັກຮົບເຊື່ອມຊຶມກໍາແໜ້ນແນວທາງແຜນນະໂຍບາຍ, ມະຕິ, ຄຳສັ່ງຕ່າງໆຂອງພັກ, ຂໍ້ກຳນົດກົດລະບຽບຂອງກອງທັບ, ເປັນເຈົ້າການຕອບຕ້ານທຸກກົນອຸບາຍ ຫັນປ່ຽນໂດຍສັນຕິຂອງອິດທິກຳລັງປໍລະປັກ ແລະ ການໂຄສະນາບິດເບືອນ ຂອງກຸ່ມຄົນບໍ່ຫວັງດີໃຫ້ທັນການ, ແນໃສ່ເຮັດສຳເລັດໜ້າທີ່ການເມືອງທີ່ຂັ້ນເທິງມອບໝາຍໃຫ້ ແລະ ຜັນຂະຫຍາຍບັນດາມະຕິຕ່າງໆຂອງຂັ້ນເທິງເຂົ້າໃນທຸກຂົງເຂດວຽກງານຢ່າງກ້ວາງຂວາງ, ເປັນການສຶກສາອົບຮົມການເມືອງແນວຄິດ ໃຫ້ພະນັກງານ-ນັກຮົບຢູ່ບັນດາກົມກອງ ໃນທົ່ວກົມໃຫຍ່ເຕັກນິກກອງທັບ, ໃຫ້ມີແນວຄິດການເມືອງໜັກແໜ້ນ, ເຂັ້ມແຂງຮອບດ້ານ ມີຄຸນສົມບັດ-ສິນທໍາປະຕິວັດ ພ້ອມກັນເຮັດສຳເລັດໜ້າທີ່ຕາມການຈັດຕັ້ງຂັ້ນເທິງມອບໝາຍໃຫ້.
ໂອກາດນີ້ ຍັງໄດ້ຜ່ານຂໍ້ຕົກລົງ ກົມໃຫຍ່ເຕັກນິກກອງທັບ ວ່າດ້ວຍການແຕ່ງຕັ້ງ ບັນດາຫົວໜ້າຂະ ແໜງການ ຢູ່ໂຮງງານມິດຕະພາບລາວ-ຫວຽດນາມ. ກົມໃຫຍ່ເຕັກນິກກອງທັບ ຕົກລົງ ແຕ່ງຕັ້ງ ພັນຕີ ນາງ ນຸທອງ ດວງຄຳ ເປັນຫົວໜ້າຂະແໜງຫຍິບ, ພັນຕີ ພູວຽງ ສອນມະນີພົມ ເປັນຫົວໜ້າຂະແໜງເຕັກໂນໂລຊີ, ພັນຕີ ຈັນທະລາ ດວງບຸບຜາພັນ ເປັນຫົວໜ້າຂະແໜງສ້ອມແປງຊ່ວງລ່າງ, ພັນຕີ ຄຳຮູ້ ພົມມະລີ ເປັນຫົວໜ້າຂະແໜງສ້ອມແປງມ້າງ-ປະກອບ, ພັນຕີ ຈັນແກ້ວ ພິມມະສານ ເປັນຫົວໜ້າຂະແໜງກວດກາເຕັກນິກລົດ ໂຮງງານມິດຕະພາບລາວ-ຫວຽດນາມ.
ສະຫາຍ ພົນຈັດຕະວາ ສາຍສະໝອນ ໄຊພູບານ ໄດ້ໂອ້ລົມຕໍ່ພິທີດັ່ງກ່າວ ພ້ອມທັງເນັ້ນໜັກໃຫ້ນາຍ ແລະ ພົນທະຫານທີ່ໄດ້ຮັບໜ້າທີ່ໃໝ່ ເອົາໃຈໃສ່ຕັ້ງຫນ້າເຝິກຝົນຫຼໍ່ຫຼອມຕົນເອງທາງດ້ານຄຸນສົມບັດສິນທຳປະຕິວັດ ແລະ ປັບປຸງແບບແຜນວິທີເຮັດວຽກຂອງຕົນດີຂຶ້ນກວ່າເກົ່າ, ມີຄວາມຈົງຮັກພັກດີ, ຕໍ່ປະເທດຊາດ, ຕໍ່ການປະຕິວັດ, ມີນ້ຳໃຈຮັກຊາດ, ດຳລົງຊີວິດປອດໃສ, ຂາວສະອາດ ເຊື່ອໝັ້ນຕໍ່ການນຳພາຂອງພັກ, ຕໍ່ອຸດົມການສັງຄົມນິຍົມ ແລະ ພ້ອມກັນເຮັດສຳເລັດໜ້າທີ່ການເມືອງທີ່ຂັ້ນເທິງມອບໝາຍ.
ໂດຍ: ອານຸສອນ ວິລະວົງສາ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
