ວັນຈັນ, ວັນທີ 14 ຕຸລາ 2024
ສະຫະພັນນັກຮົບເກົ່າແຫ່ງຊາດລາວ ເຂົ້າຢ້ຽມຊົມຫໍພິພິທະພັນປະຫວັດສາດ ກອງທັບປະຊາຊົນລາວ
ເວລາອອກຂ່າວ: 2024-09-13 14:53:54 | ຜູ້ຂຽນ : admin2 | ຈຳນວນຄົນເຂົ້າຊົມ: 440 | ຄວາມນິຍົມ: 
ເນື່ອງໃນໂອກາດສະເຫຼີມສະຫຼອງວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 22 ປີ, ໃນວັນທີ 13 ກັນຍາ 2024 ນີ້, ສະຫະພັນນັກຮົບເກົ່າແຫ່ງຊາດລາວ ໄດ້ເຂົ້າຢ້ຽມຊົມຫໍພິພິທະພັນປະຫວັດສາດ ກອງທັບປະຊາຊົນລາວ ແລະ ອະນຸສອນສະຖານຄຸກກັກຂັງທ່ານຜູ້ນໍາພັກ-ແນວລາວຮັກຊາດ ຈໍານວນ 16 ທ່ານ ທີ່ຄ້າຍໂພນເຄັງ ໂດຍການນໍາພາຂອງ ສະຫາຍ ພົນຈັດຕະວາ ຄຳຫອມ ແສງບົວລົມ ຮອງປະທານສະຫະພັນນັກຮົບເກົ່າແຫ່ງຊາດລາວ ພ້ອມດ້ວຍພະນັກງານຫຼັກແຫຼ່ງ ຈໍານວນ 70 ສະຫາຍ.
ຈຸດປະສົງໃນການເຂົ້າຢ້ຽມຊົມຫໍພິພິທະພັນປະຫວັດສາດກອງທັບ ແລະ ອະນຸສອນສະຖານຄຸກກັກຂັງທ່ານຜູ້ນໍາພັກ-ແນວລາວຮັກຊາດ ກໍ ເພື່ອເປັນການສ້າງຂະບວນການຂໍ່ານັບຮັບຕ້ອນວັນປະຫວັດສາດສຳຄັນຕ່າງໆຂອງຊາດ, ຂອງພັກ, ຂອງກອງທັບ ເວົ້າລວມ, ເວົ້າສະເພາະ ກໍຄືວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 22 ປີ (09/09/2002-09/09/2024) ໃຫ້ເຕັມໄປດ້ວຍຄວາມໝາຍ, ຄວາມສຳຄັນ ແລະ ເປັນຂະບວນການຟົດຟື້ນຢ່າງກ້ວາງ ທັງເປັນການປູກຝັງຈິດສໍານຶກໃຫ້ພະນັກງານຮຸ່ນສືບທອດ ໄດ້ຫວນຄືນເຖິງເຫດການປະຫວັດສາດລາວໃນແຕ່ລະໄລຍະທີ່ລະອິດລະອ້ຽວ ໂດຍສະເພາະແມ່ນການຕໍ່ສູ້ຕ້ານຈັກກະພັດຜູ້ຮຸກຮານ ແລະ ການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ໂດຍຜ່ານການຊົມຟີມຮູບເງົາ, ຮູບພາບ, ວັດຖຸພັນ, ເອກະສານຕ່າງໆ ທີ່ໄດ້ຈັດວາງປະກອບກັບການບັນຍາຍຂອງຜູ້ນຳທ່ຽວ ເຮັດໃຫ້ພະນັກງານ ໄດ້ຮັບຮູ້ເຖິງຄວາມອົງອາດກ້າຫານຂອງກອງທັບປະຊາຊົນລາວ ໂດຍສະເພາະແມ່ນຄວາມສະຫຼາດ ມີໄຫວພິກຂອງບັນດາທ່ານຜູ້ນໍາແນວລາວຮັກຊາດຈໍານວນ 16 ທ່ານ ທີ່ສາມາດໂຕນອອກຈາກຄຸກໄດ້ຢ່າງອັດສະຈັນກາຍເປັນແວ່ນແຍງອັນໃສແຈ້ງ ໃນການສຶກສາຮໍ່າຮຽນເອົາແນວຄິດ ຄຸນສົມບັດສິນທຳປະຕິວັດ, ຄວາມມີນໍ້າໃຈຮັກຊາດ, ຮັກບ້ານເກີດເມືອງນອນ, ແລະ ນໍາບົດຮຽນທາງປະຫວັດສາດມາໝູນໃຊ້ເຂົ້າໃນໜ້າທີ່ການເມືອງຕົວຈິງຂອງຕົນ ໃຫ້ເກີດດອກອອກຜົນ ມີຜົນສໍາເລັດໃນຂະບວນການກໍ່ສ້າງກົມກອງ ໃຫ້ມີລະບຽບແບບແຜນທັນສະໄໝ ກໍຄືການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມຮຸ່ງເຮືອງສີວິໄລ.
ໂດຍ: ສົມຄິດ ພູມມີຈິດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
