ວັນສຸກ, ວັນທີ 06 ທັນວາ 2024
ແຂວງບໍ່ແກ້ວ ຈູດທຳລາຍຢາເສບຕິດ
ເວລາອອກຂ່າວ: 2024-10-24 09:00:59 | ຜູ້ຂຽນ : admin3 | ຈຳນວນຄົນເຂົ້າຊົມ: 199 | ຄວາມນິຍົມ: 
ແຫຼ່ງຂ່າວຈາກ ແຂວງບໍ່ແກ້ວ ໃຫ້ຮູ້ວ່າ: ວັນທີ 22 ຕຸລາ 2024 ຢູ່ເດ່ີນສະໝາມບິນເກົ່າ ແຂວງບໍ່ແກ້ວ ໄດ້ຈັດພິທີຈູດທຳລາຍຢາເສບຕິດ ຈຳນວນ 16 ລາຍການ ໃນໂອກາດວັນຕ້ານຢາເສບຕິດແຫ່ງຊາດ ຄົບຮອບ 23 ປີ(12 ຕຸລາ 2001-ວັນທີ 12 ຕຸລາ 2024) ໂດຍມີ ທ່ານ ທອງຈັນ ມະນີໄຊ ເຈົ້າ ແຂວງ
ແຂວງບໍ່ແກ້ວ, ມີການນຳຂອງແຂວງ-ເມືອງ, ກອງບັນຊາການປກຊ-ປກສ, ນັກທຸລະກິດ, ອຳນາດການປົກຄອງບ້ານ ແລະ ນັກຮຽນ-ນັກສຶກສາເຂົ້າຮ່ວມ.
ໃນພິທີ, ສະຫາຍ ພັນໂທ ປັນຍາ ແສງວິຈິດ ຮອງຫົວໜ້າກອງບັນຊາການ ປກສ ແຂວງບໍ່ແກ້ວ ໄດ້ຜ່ານຂໍ້ຕົກລົງຂອງທ່ານເຈົ້າແຂວງບໍ່ແກ້ວ ວ່າດ້ວຍການອະນຸຍາດໃຫ້ທຳລາຍຢາເສບຕິດທີ່ເຈົ້າໜ້າທີ່ຍຶດໄດ້ ແລະ ໂດຍຜ່ານການຕັດສິນຂອງສານປະຊາຊົນຢ່າງເດັດຂາດ ເຊິ່ງມີ 16 ລາຍການ ໃນນັ້ນ, ມີ: ຢາບ້າ 82.244.611 ເມັດ, ຢາໄອສ 928 ຫໍ່, 166 ຖົງ, 37 ຫຼອດ, 1 ກ້ອນ, ກາເຟອິນ 289 ເປົາ, 1 ຫໍ່, 2 ຖົງ, ເຄຕາມິນ 224 ຫໍ່, 97 ຖົງ, , ເຮໂລອິນ 1.895 ແທ່ງ, 2 ຖົງ, 1 ຫໍ່, 1 ກ້ອນ, 11 ຫຼອດ, ຝິ່ນ 1 ກ້ອນ, ແປ້ງຝຸ່ນ 52 ຖົງ,
119 ຫຼອດ, ຢາອີ 23 ເມັດ, ຄໍລາເຈັນ 66 ຖົງ, ຢາສູບໄຟຟ້າ 3.465 ອັນ, ຖັງບັນຈຸສານໄນຕັດອ໋ອກໄຊ 2 ຖັງ, ນ້ຳຢາດີໄອ (ສ່ວນປະສົມນ້ຳກະທ່ອມ) 558 ຂວດ, ນ້ຳຕານໝາກພ້າວ(ສ່ວນປະສົມນ້ຳກະທ່ອມ) 50 ຂວດ ແລະ ໃບກະທ່ອມ 20 ກີໂລກຣາມ.
ໂອກາດດຽວກັນ, ສະຫາຍ ພົນຕີ ສາຍໃຈ ກົມມະສິດ ຮອງເຈົ້າແຂວງ ແຂວງບໍ່ແກ້ວ ໄດ້ໃຫ້ຮູ້ວ່າ: ພັກ-ລັດຖະບານ ໄດ້ເອົາໃຈໃສ່ຊອກທຸກວິທີທາງ ເພື່ອແກ້ໄຂບັນຫາຢາເສບຕິດຢ່າງຕໍ່ເນື່ອງຕະຫຼອດມາ ແລະ ໄດ້ຖືເອົາບັນຫາຢາເສບຕິດເປັນວາລະແຫ່ງຊາດ, ຄຽງຄູ່ກັບສະກັດກັ້ນການຊື້-ຂາຍຢາເສບຕິດ, ການລົບລ້າງການປູກຝິ່່ນ, ໄດ້ເອົາໃຈ ໃສ່ບຳບັດປິ່່ນປົວ ແລະ ຟື້້ນຟູສຸຂະພາບຂອງຜູ້ຕິດຢາເສບຕິດຢູ່ບັນດາເມືອງ, ບ້ານ, ເຂດຊຸມຊົນຫ່າງໄກສອກຫຼີກ, ຕິດພັນກັບວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ. ພ້ອມນີ້, ໄດ້ເຊີນຊວນທຸກຄົນ ຈົ່ງສາມັກຄີຮ່ວມແຮງຮ່ວມໃຈ ຈັດຕັ້ງປະຕິບັດວາລະແຫ່ງຊາດ ວ່າດ້ວຍແກ້ໄຂບັນຫາຢາເສບຕິດ ເຮັດໃຫ້ຢາເສບຕິດໃຫ້ໝົດສິ້ນຈາກສັງຄົມລາວ, ພ້ອມກັນປະຕິບັດຕາມ ຄຳຂວັນ: “ ສັງຄົມຈະສະຫງົບປອດໄພ, ຮຸ່ງເຮືອງສີວິໄລ ກ້າວໜ້າ ຖ້າທຸກຄົນຮ່ວມແຮງຮ່ວມໃຈ ແກ້ໄຂບັນຫາຢາເສບຕິດ”.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
