ວັນເສົາ, ວັນທີ 07 ທັນວາ 2024
9 ເດືອນ ຂອງປີ 2024 ມີນັກທ່ອງທ່ຽວ ໄປທ່ອງທ່ຽວນະຄອນຫຼວງພະບາງ 1.583.000 ກວ່າເທື່ອຄົນ
ເວລາອອກຂ່າວ: 2024-10-29 09:02:19 | ຜູ້ຂຽນ : admin3 | ຈຳນວນຄົນເຂົ້າຊົມ: 188 | ຄວາມນິຍົມ: 
ໄລຍະ 9 ເດືອນຂອງປີ 2024 ມີນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າໄປທ່ອງທ່ຽວນະຄອນຫຼວງພະບາງ 1.583.000 ກວ່າເທື່ອຄົນ, ລື່ນຄາດໝາຍຂອງແຜນການປີທີ່ວາງໄວ້ປະມານ 6 ແສນກວ່າຄົນ (ແຜນການທີ່ວາງໄວ້ 9 ແສນຄົນ) ຄາດຄະເນວ່າອີກ 3 ເດືອນທີ່ເຫຼືອນັກທ່ອງທ່ຽວຈະເພີ່ມຂຶ້ນອີກເປັນຈຳນວນຫຼາຍ.
ທ່ານ ວຽງທອງ ຫັດສະຈັນ ເຈົ້ານະຄອນຫຼວງພະບາງ ໃຫ້ຮູ້ວ່າ: ບັນຍາກາດການທ່ອງທ່ຽວຢູ່ພາຍໃນນະຄອນຫຼວງພະບາງ ກໍຄືແຂວງຫຼວງພະບາງ ປີນີ້ ເຊິ່ງ
ເປັນປີທ່ອງທ່ຽວລາວ 2024 ແມ່ນຄຶກຄື້ນກວ່າທຸກປີຜ່ານມາ ເນື່ອງຈາກຫຼາຍປັດໄຈສຳຄັນ ເຊັ່ນ: ບັນດາສະຖານທີ່ທ່ອງທ່ຽວ ແລະ ການບໍລິການທ່ອງທ່ຽວໄດ້ຮັບການປັບປຸງດີຂຶ້ນ, ປະຊາຊົນຍັງຮັກສາໄດ້ຮີດຄອງປະເພນີ ແລະ ວັດທະນະທຳຂອງຊາວຫຼວງພະບາງທີ່ມີມາແຕ່ດົນນານ ພ້ອມນີ້, ການເດີນທາງໄປແຂວງຫຼວງພະບາງ ມີຄວາມສະດວກສະບາຍ ໂດຍສາມາດເດີນທາງໄດ້ທາງລົດໄຟ, ລົດ, ຍົນ ແລະ ອື່ນໆ.
ທ່ານກ່າວຕື່ມວ່າ: ປັດຈຸບັນ, ນັກທ່ອງທ່ຽວທັງພາຍໃນ ແລະ ຕ່າງປະເທດ ໃຫ້ຄວາມສົນໃຈໄປທ່ອງທ່ຽວຢູ່ນະຄອນຫຼວງພະບາງ ເພີ່ມຂຶ້ນຫຼາຍ ເມື່ອທຽບໃສ່ເມື່ອກ່ອນ ໂດຍສະເພາະໃນໂອກາດບຸນອອກພັນສາ ແລະ ໄຫຼເຮືອໄຟ ປະຈຳປີ 2024 ນີ້ ມີນັກທ່ອງທ່ຽວໄປຊົມການປະກວດເຮືອໄຟຢ່າງຫຼວງຫຼາຍ ເຊິ່ງນອກຈາກທ່ຽວຊົມເຮືອໄຟແລ້ວ ນັກທ່ອງທ່ຽວເຫຼົ່ານີ້ ຍັງໄດ້ທ່ຽວຊົມບັນດາສະຖານທີ່ທ່ອງທ່ຽວໃນຕົວເມືອງຫຼວງພະບາງ ເຮັດໃຫ້ມີບັນຍາກາດຄຶກຄື້ນເປັນພິເສດ ຄາດຄະເນວ່າໃນອີກ 3 ເດືອນຕໍ່ໜ້າ ຈະມີນັກທ່ອງທ່ຽວເຂົ້າໄປທ່ຽວນະຄອນຫຼວງພະບາງ ເພີ່ມຂຶ້ນອີກຈຳນວນຫຼາຍ ເນື່ອງຈາກເປັນໄລຍະລະດູແຫ່ງການທ່ອງທ່ຽວ.
ສຳລັບນະຄອນຫຼວງພະບາງ ໄດ້ຮັບລາງວັນຕ່າງໆ ມາແລ້ວຢ່າງຫຼວງຫຼາຍ ເຮັດໃຫ້ເປັນທີ່ຮູ້ຈັກຂອງນັກທ່ອງທ່ຽວຕ່າງປະເທດ ເຊິ່ງຫຼ້າສຸດໄດ້ຮັບລາງວັນ “ໜຶ່ງຮ້ອຍເລື່ອງລາວ ຈຸດໝາຍປາຍທາງການທ່ອງທ່ຽວແບບຍືນຍົງຂອງໂລກ” ປະຈຳປີ 2024 ໂດຍຈະມີພິທີມອບ-ຮັບໃບຢັ້ງຢືນ ຢ່າງເປັນທາງການໃນລະຫວ່າງວັນທີ 10-12 ທັນວາ 2024 ທີ່ ປະເທດຊິເລ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
