ວັນອັງຄານ, ວັນທີ 03 ທັນວາ 2024
ອາຊຽນ ພ້ອມກັນເພີ່ມທະວີການຮ່ວມມືດ້ານວັດທະນະທຳ ແລະ ສິລະປະ
ເວລາອອກຂ່າວ: 2024-10-30 08:50:34 | ຜູ້ຂຽນ : admin3 | ຈຳນວນຄົນເຂົ້າຊົມ: 186 | ຄວາມນິຍົມ: 
ກອງປະຊຸມລັດຖະມົນຕີວັດທະນະທຳ ແລະ ສິລະປະອາຊຽນ (AMCA) ຄັ້ງທີ 11 ແລະ ບັນດາກອງປະຊຸມປິ່ນອ້ອມທີ່ກ່ຽວຂ້ອງ ກັບບັນດາຄູ່ເຈລະຈາອາຊຽນ ໄດ້ຈັດຂຶ້ນພາຍໃຕ້ຫົວຂໍ້: ເຊື່ອມສານວັດທະນະທຳ, ສ້າງອະນາຄົດ: ຄວາມຫຼາກຫຼາຍທີ່ເປັນໜຶ່ງດຽວ (Bridging Cultures, Building Futures: Unity in Diversity) ໃນລະຫວ່າງວັນທີ 21-26 ຕຸລາ 2024 ທີ່ ເມືອງມໍລະດົກໂລກ ມາລະກາ ປະເທດມາເລເຊຍ.
ກອງປະຊຸມຄັ້ງນີ້, ພາຍໃຕ້ການເປັນປະທານຂອງ ທ່ານ ດາໂຕະ ສຣິ ຕິຢອງ ຄິງ ຊິງ ລັດຖະມົນຕີກະຊວງທ່ອງທ່ຽວ, ສິລະປະ ແລະ ວັດທະນະທຳ ມາເລເຊຍ ໂດຍມີບັນດາລັດຖະມົນຕີ, ຮອງລັດຖະມົນຕີ, ເຈົ້າໜ້າທີ່ອາ ວຸໂສດ້ານວັດທະນະທຳ ແລະ ສິລະປະ ຈາກບັນດາປະເທດອາຊຽນ, ປະເທດຕີມໍແລັດສະເຕ, ເລຂາທິການໃຫຍ່ອາຊຽນ ແລະ ຜູ້ຕາງໜ້າຈາກປະເທດບວກສາມ ຄື: ຈີນ, ຍີ່ປຸ່ນ ແລະ ສ ເກົາຫຼີ ເຂົ້າຮ່ວມຢ່າງພ້ອມພຽງ, ສ່ວນຄະນະຜູ້ແທນ ຂອງ ສປປ ລາວ ນຳໂດຍ ທ່ານ ນາງ ດາລານີ ພົມມະວົງສາ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ.
ສປປ ລາວ ໄດ້ມອບໜ້າທີ່ການເປັນປະທານຢ່າງເປັນທາງການໃຫ້ແກ່ ມາເລເຊຍ ພາຍຫຼັງສຳເລັດປະຕິບັດໜ້າທີ່ເປັນປະທານ 2022-2024 ພາຍໃຕ້ຄຳຂວັນ: “ສົ່ງເສີມບົດບາດຂອງວັດທະນະທຳ ແລະ ສິລະປະອາ ຊຽນ ຫຼັງການລະບາດຂອງພະຍາດ ໂຄວິດ-19 ເພື່ອການພັດທະນາແບບຍືນຍົງ” ເລີ່ມແຕ່ວັນທີ 27 ຕຸລາ 2022 ຈົນເຖິງ 24 ຕຸລາ 2024 ເປັນເວລາ 2 ປີ ເຊິ່ງນັບຈາກນີ້ ມາເລເຊຍຈະດຳເນີນການເປັນປະທານຈົນຮອດ ປີ 2026. ກອງປະຊຸມໄດ້ຮັບຮູ້ຮ່ວມກັນຢ່າງເປັນເອກະພາບວ່າ ອາຊຽນ ມີວັດທະນະທຳ-ສິລະປະ ທີ່ອຸດົມສົມບູນ ແລະ ຫຼາກ ຫຼາຍ, ມີຫຼາຍຢ່າງທີ່ຄ້າຍຄືກັນ ແຕ່ກໍມີເອກະລັກສະເພາະຂອງໃຜລາວ ປະກອບສ່ວນຢ່າງສຳ ຄັນເຂົ້າໃນການເຕົ້າໂຮມຄວາມສາມັກຄີ, ສ້າງຄວາມປອງດອງ ແລະ ເຂົ້າໃຈເຊິ່ງກັນ ແລະ ກັນ ຕະຫຼອດຮອດການພັດທະນາເສດຖະກິດ-ສັງຄົມ ຂອງພາກພື້ນຢ່າງແຂງແຮງ.
ກອງປະຊຸມໄດ້ພ້ອມກັນປຶກສາຫາລືບັນຫາສຳຄັນຕ່າງໆ ແລະ ທົບທວນຄືນຄວາມຄືບໜ້າການຈັດຕັ້ງປະຕິບັດແຜນຍຸດທະສາດວັດທະນະທຳ ແລະ ສິລະປະ ປີ 2016-2025 ຢ່າງຖີ່ຖ້ວນ ລວມທັງການແລກປ່ຽນຄຳຄິດຄຳເຫັນໃນການເພີ່ມທະ ວີການເຊື່ອມສານສິລະປະ-ວັດທະນະທຳ ອັນດີງາມຂອງອາຊຽນ ເພື່ອຊຸກຍູ້ສົ່ງເສີມວິໄສທັດອາຊຽນ ຫຼັງ ປີ 2025 ໃຫ້ມີຄວາມເຂັ້ມແຂງ ແລະ ເປັນຮູບປະທຳຍິ່ງຂຶ້ນ.
ທ່ານ ນາງ ດາລານີ ພົມມະວົງສາ ໄດ້ລາຍງານໝາກ ຜົນໄລຍະການເປັນປະທານ ຂອງ ສປປ ລາວ ປີ 2022-2024 ໃຫ້ກອງປະຊຸມຮັບຊາບ ໂດຍໄດ້ຍົກໃຫ້ເຫັນບາງຜົນສຳເລັດທີ່ພົ້ນເດັ່ນທີ່ອາຊຽນໄດ້ພ້ອມກັນຈັດຕັ້ງປະຕິບັດໃນຂົງເຂດວຽກງານວັດທະນະທຳ ແລະ ສິລະປະ.
ທ່ານ ຮອງລັດຖະມົນຕີ ໄດ້ໃຫ້ຮູ້ຕື່ມວ່າ: ການຮັບຮອງເອົາຖະແຫຼງການວັງວຽງ ວ່າດ້ວຍການສົ່ງເສີມຜະລິດຕະພັນວັດທະນະທຳຂະໜາດນ້ອຍ ແລະ ຂະໜາດກາງ ຄຽງຄູ່ກັບການເຕີບໂຕສີຂຽວ ແລະ ການພັດທະນາແບບຍືນຍົງ ໂດຍຜູ້ນຳອາຊຽນໃນກອງປະຊຸມສຸດຍອດອາຊຽນ ຄັ້ງທີ 44 ແລະ 45 ນັ້ນ, ຖືເປັນນະໂຍບາຍທີ່ສຳຄັນອັນໜຶ່ງ ທີ່ອາຊຽນຕ້ອງ ພ້ອມກັນນຳໄປຈັດຕັ້ງຜັນຂະຫຍາຍ ແນໃສ່ປະກອບສ່ວນຊຸກ ຍູ້ສົ່ງເສີມຜູ້ປະກອບການ ກໍຄືບັນ ດາຫົວໜ່ວຍທຸລະກິດທີ່ຕິດພັນກັບສິລະປະ ແລະ ວັດທະນະທຳໃຫ້ມີລັກສະນະກວມລວມ ແລະ ຍືນຍົງໃນຕໍ່ໜ້າ.
ຂໍ້ມູນຈາກ: ກອງເລຂາ ເສົາຄ້ຳ ວັດທະນະທຳ-ສັງຄົມ ອາຊຽນ-ສປປ ລາວ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
