ວັນອັງຄານ, ວັນທີ 10 ທັນວາ 2024
ເປີດການກໍ່ສ້າງໂຄງການມິດຕະພາບ ອາຄານໂຮງໝໍຫຼັງໃໝ່ ຂອງກອງບັນຊາການທະຫານແຂວງຈໍາປາສັກ
ເວລາອອກຂ່າວ: 2024-11-01 13:52:41 | ຜູ້ຂຽນ : admin2 | ຈຳນວນຄົນເຂົ້າຊົມ: 3444 | ຄວາມນິຍົມ: 
ພິທີເປີດການກໍ່ສ້າງໂຄງການມິດຕະພາບອາຄານໂຮງໝໍຫຼັງໃໝ່ ຂອງກອງບັນຊາການທະຫານແຂວງຈໍາປາສັກ ຈັດຂຶ້ນໃນວັນທີ 31 ຕຸລາ 2024 ນີ້, ຢູ່ໂຮງໝໍທະຫານແຂວງຈໍາປາສັກ, ໂດຍການເຂົ້າຮ່ວມຂອງ ສະຫາຍ ພົນຈັດຕະວາ ວິລະຕູ່ ວໍລະຈິດ ຫົວໜ້າການເມືອງ ກອງບັນຊາການທະຫານແຂວງຈໍາປາສັກ ກອງທັບປະຊາຊົນລາວ ແລະ ສະຫາຍ ໂງ ແມັງ ຮຸງ ຫົວໜ້າການເມືອງ ບໍລິສັດ ມິດຕະພາບ 206 ກອງທັບປະຊາຊົນຫວຽດນາມ, ມີຄະນະພັກ-ຄະນະບັນຊາ 5 ຫ້ອງ, ຄະນະອໍານວຍການໂຮງໝໍທະຫານແຂວງຈໍາປາສັກ, ຄະນະອໍານວຍການ ບໍລິສັດ ມິດຕະພາບ 206 ຫວຽດນາມ ພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍ ເຂົ້າຮ່ວມ.
ສະຫາຍ ພັນໂທ ຖາວອນ ສິນທະປະເສີດ ຮອງຫົວໜ້າຫ້ອງພະລາທິການ ກອງບັນຊາການທະຫານແຂວງຈໍາປາສັກ ໄດ້ຂຶ້ນຜ່ານເນື້ອໃນການກໍ່ສ້າງໂຄງການມິດຕະພາບ ອາຄານໂຮງໝໍຫຼັງໃໝ່. ເຊິ່ງອາຄານດັ່ງກ່າວນີ້ ມີເນື້ອທີ່ ກວ້າງ 12 ແມັດ, ຍາວ 55 ແມັດ, ສູງ 3,5 ແມັດ ແລະ ມີ 24 ຫ້ອງເຮັດວຽກ. ການຮັບເໝົາກໍ່ສ້າງ ແລະ ອອກແບບ ແມ່ນບໍລິສັດ ມິດຕະພາບ 206 ສົມທົບກັບຫ້ອງພະລາທິການທະຫານແຂວງຈໍາປາສັກ ເປັນຜູ້ປະສານງານ ແລະ ຮັບຜິດຊອບຕິດຕາມ ໂຄງການກໍ່ສ້າງ ພ້ອມລາຍງານໃຫ້ກອງບັນຊາການ ນັບແຕ່ເລີ່ມຕົ້ນຈົນສໍາເລັດໂຄງການ. ສຳລັບທຶນການກໍ່ສ້າງ ແມ່ນໄດ້ຮັບການຊ່ວຍເຫຼືອຈາກແຂວງບີງດິ້ງ ໂດຍຜ່ານກອງບັນຊາການທະຫານແຂວງບີງດິ້ງ ກອງທັບປະຊາຊົນຫວຽດນາມ ໄດ້ມາມອບຕໍ່ການຊ່ວຍເຫຼືອໃຫ້ກອງບັນຊາການທະຫານແຂວງຈໍາປາສັກ.
ໂອກາດນີ້ ທັງສອງຝ່າຍໄດ້ເຊັນສັນຍາ ການກໍ່ສ້າງໂຄງການມິດຕະພາບ ອາຄານໂຮງໝໍຫຼັງໃໝ່ ຂອງກອງບັນຊາການທະຫານແຂວງຈໍາປາສັກ ລະຫວ່າງ ສະຫາຍ ພົນຈັດຕະວາ ວິລະຕູ່ ຫົວໜ້າການເມືອງ ກອງບັນຊາການທະຫານແຂວງຈຳປາສັກ ກັບ ສະຫາຍ ເລ ວັນ ທຶກ ຫົວໜ້າການເມືອງ ບໍລິສັດ ມິດຕະພາບ 206 ຫວຽດນາມ. ພ້ອມທັງໄດ້ຜັດປ່ຽນກັນມີຄໍາເຫັນກ່າວເປີດການກໍ່ສ້າງ ໂຄງການດັ່ງກ່າວ ຂຶ້ນຢ່າງເປັນທາງການ.
ຂ່າວ: ດາວົງ ບຸດຕະວົງ
ພາບ: ນາງ ສີລິຄານ ສີດາວົງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
