ວັນອັງຄານ, ວັນທີ 10 ທັນວາ 2024
ປະກາດການແຕ່ງຕັ້ງພະນັກງານຂັ້ນນຳພາ-ບັນຊາ ຢູ່ທະຫານເເຂວງຈໍາປາສັກ
ເວລາອອກຂ່າວ: 2024-11-01 14:31:03 | ຜູ້ຂຽນ : admin2 | ຈຳນວນຄົນເຂົ້າຊົມ: 2832 | ຄວາມນິຍົມ: 
ໃນວັນທີ 30 ຕຸລາ 2024 ນີ້, ພິທີປະກາດການຈັດຕັ້ງພະນັກວານຂັ້ນນຳພາ-ບັນຊາຢູ່ກອງບັນຊາການທະຫານແຂວງຈຳປາສັກ ໄດ້ຈັດຂຶ້ນທີ່ຫ້ອງປະຊຸມຂອງຕົນ. ໂດຍພາຍໃຕ້ການເປັນປະທານຂອງ ສະຫາຍ ພົນຈັດຕະວາ ວິລະຕູ່ ວໍລະຈິດ ຫົວໜ້າການເມືອງ ກອງບັນຊາການທະຫານແຂວງຈໍາປາສັກ, ມີຄະນະພັກ-ຄະນະບັນຊາ 05 ຫ້ອງ, ພະເເນກການ, ກົມກອງອ້ອມຂ້າງທີ່ຂຶ້ນກັບກອງບັນຊາການທະຫານແຂວງຈໍາປາສັກ ເຂົ້າຮ່ວມ.
ສະຫາຍ ພັນໂທ ພູຂົງ ບຸນສີນະວົງ ຫົວໜ້າພະແນກພະນັກງານ ທະຫານແຂວງຈໍາປາສັກ, ໄດ້ຂຶ້ນຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການເເຕ່ງຕັ້ງຄະນະຫ້ອງ ຂຶ້ນກັບກອງບັນຊາການທະຫານແຂວງຈຳປາສັກ ແລະ ຂໍ້ຕົກລົງຂອງກົມໃຫຍ່ການເມືອງກອງທັບ ວ່າດ້ວຍການແຕ່ງຕັ້ງຂັ້ນພະແນກການ ຂຶ້ນກັບກອງບັນຊາການທະຫານແຂວງຈໍາປາສັກ. ໂດຍອີງຕາມກົດໝາຍນາຍທະຫານກອງທັບປະຊາຊົນລາວ (ສະບັບປັບປຸງ) ວ່າດ້ວຍການແຕ່ງຕັ້ງ, ຍົກຍ້າຍນາຍທະຫານ, ອີງຕາມທິດທາງກ່ຽວກັບການປັບປຸງບຸລະນະກົງຈັກການຈັດຕັ້ງນຳພາ-ບັນຊາ ໃນກຳລັງປະກອບອາວຸດໃຫ້ເຂັ້ມແຂງຮອບດ້ານ ເພື່ອເຮັດສໍາເລັດໜ້າທີ່ປົກປັກຮັກສາ ແລະ ພັດທະນາປະເທດຊາດ ກໍ່ຄືກົມກອງຂອງຕົນໃຫ້ມີຄວາມເຕີບໃຫຍ່ຂະຫຍາຍຕົວ. ໃນນັ້ນ, ກະຊວງປ້ອງກັນປະເທດ ຕົກລົງແຕ່ງຕັ້ງ ສະຫາຍ ພັນໂທ ໄຊມຸງຄຸນ ນາຄໍາ ເປັນຮອງຫົວໜ້າຫ້ອງການເມືອງ, ສະຫາຍ ພັນໂທ ກອງເເກ້ວ ວຽງໄຊຍະສອນ ເປັນຮອງຫົວໜ້າຫ້ອງການເມືອງ, ສະຫາຍ ພັນໂທ ຄາລົມ ຈັນທະວົງສາ ເປັນຮອງຫົວໜ້າຫ້ອງການ ແລະ ບໍລິຫານ ແລະ ກົມໃຫຍ່ການເມືອງກອງທັບ ຍັງໄດ້ຕົກລົງແຕ່ງຕັ້ງຂັ້ນພະແນກການທີ່ຂຶ້ນກັບກອງບັນຊາການທະຫານແຂວງຈໍາປາສັກ ຕື່ມອີກ
ໂອກາດດັ່ງກ່າວ ສະຫາຍ ພົນຈັດຕະວາ ວິລະຕູ່ ວໍລະຈິດ ໄດ້ມີຄໍາເຫັນໂອ້ລົມ ເຊິ່ງກ່ອນອື່ນສະຫາຍ ໄດ້ກ່າວສະແດງຄວາມຍ້ອງຍໍຊົມເຊີຍຜົນງານອັນພົ້ນເດັ່ນຂອງກົມກອງຕະຫຼອດໄລຍະຜ່ານມາ, ພ້ອມທັງໄດ້ຍົກໃຫ້ເຫັນຄວາມໝາຍ-ຄວາມສໍາຄັນ ເພື່ອເຮັດໃຫ້ມີຄຸນທາດການເມືອງໜັກແໜ້ນ ແນໃສ່ກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນສະເພາະໜ້າ ແລະ ຍາວນານຂອງກົມກອງ, ພ້ອມທັງເນັ້ນໜັກໃຫ້ຜູ້ທີ່ໄດ້ຮັບໜ້າທີ່ໃໝ່ໃນຄັ້ງນີ້ ຕ້ອງຍົກສູງພາລະບົດບາດຕໍ່ໜ້າທີ່ການເມືອງຂອງຕົນໃຫ້ໜັກແໜ້ນ, ຕ້ອງເຝິກຝົນຫຼໍ່ຫຼອມຕົນເອງໃຫ້ມີຄວາມຮູ້-ຄວາມສາມາດຢ່າງກວ້າງຂວາງ, ມີຄວາມສາມັກຄີພາຍໃນໃຫ້ແໜ້ນແຟ້ນ, ມີຄຸນສົມບັດສິນທໍາປະຕິວັດ, ມີທັດສະນະຫຼັກໝັ້ນຕໍ່ອຸດົມການຂອງພັກ, ເອົາໃຈໃສ່ປັບປຸງແບບແຜນ ການນໍາພາລວມສູນປະຊາທິປະໄຕ ເຮັດວຽກເປັນໝູ່ຄະນະແບ່ງບຸກຄົນຮັບຜິດຊອບຕໍ່ໜ້າທີ່ການເມືອງໃຫ້ຖືກຕ້ອງສອດຄ່ອງກັບໜ້າວຽກຕົວຈິງຂອງກົມກອງໃຫ້ດີຂຶ້ນເລື້ອຍໆ.
ຂ່າວ: ຮທ ນາງ ສີລິຄານ ສີດາວົງ
ພາບ: ພັຕ ນາງ ສົມພອນ ເເກ້ວມະນີໄສ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
