ວັນພະຫັດ, ວັນທີ 12 ທັນວາ 2024
ສຸມໃສ່ອົບຮົມ-ຫັດແອບ ໃຫ້ຊຳນິຊຳນານ ເພື່ອກະກຽມເຂົ້າຮ່ວມການເຝີກຊ້ອມກອບກູ້ໄພພິບັດ 3 ກອງທັບ
ເວລາອອກຂ່າວ: 2024-11-04 13:44:10 | ຜູ້ຂຽນ : admin2 | ຈຳນວນຄົນເຂົ້າຊົມ: 1747 | ຄວາມນິຍົມ: 
ວຽກງານອົບຮົມ-ຫັດແອບແມ່ນວຽກງານໜຶ່ງທີ່ສຳຄັນ ແລະ ເປັນບັນຫາຕັດສິນເຖິງຄຸນະພາບສັງລວມ ຂອງກຳລັງແຮງສູ້ຮົບ, ການເຕິບໃຫຍ່ຂະຫຍາຍຕົວ ແລະ ຄວາມເຂັ້ມແຂງ ຂອງກອງທັບ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃນນີ້, ເວົ້າສະເພາະວຽກງານຕອບຕ້ານໄພພິບັດ ກໍແມ່ນວຽກງານໜຶ່ງທີ່ສຳຄັນ ແລະ ຈຳເປັນທີ່ສຸດ ທີ່ທຸກກຳລັງເຫຼົ່າຮົບໃນທົ່ວກອງທັບພວກເຮົາຕ້ອງໄດ້ເຝີກຊ້ອມ ໃຫ້ມີຄວາມຊຳນິຊຳນານ ເພື່ອຮັບປະກັນການປະຕິບັດໜ້າທີ່ການເມືອງ ຂອງກອງທັບ ໃນການກຽມພ້ອມເຂົ້າກອບກູ້ ແລະ ຊ່ວຍເຫຼືອປະຊາຊົນ ໃນເວລາມີໄພພິບັດເກີດຂຶ້ນ.
ສະຫາຍ ພັນໂທ ຄຳຜາຍ ອ້ວນວິໄລ ຮອງຫົວໜ້າກົມອົບຮົມ ກົມໃຫຍ່ເສນາທິການກອງທັບ, ຜູ້ບັນຊາພາກສະໜາມເຝີກຊ້ອມກອບກູ້ໄພພິບັດ ຝ່າຍດຽວ ປະຈຳປີ 2024 ໃຫ້ຮູ້ວ່າ: ໄພພິບັດທາງທຳມະຊາດ ເປັນບັນຫາໃຫຍ່ ແລະ ເປັນໄພຂຸກຄາມ ທີ່ສ້າງຄວາມສູນເສຍທາງດ້ານສຸຂະພາບ, ຊີວິດ, ຊັບສິນ ແລະ ການດໍາລົງຊີວິດ ຂອງປະຊາຊົນ, ສ້າງຄວາມເສຍຫາຍຕໍ່ພື້ນຖານໂຄງລ່າງເສດຖະກິດ-ສັງຄົມ ແລະ ສິ່ງແວດລ້ອມ ເຊິ່ງເປັນການບັນທອນ ແລະ ທ່ວງດຶງ ຕໍ່ການພັດທະນາເສດຖະກິດ-ສັງຄົມ ຂອງບັນດາປະເທດໃນໂລກ, ເວົ້າລວມ, ສະເພາະປະເທດລາວຂອງພວກເຮົາ ຖືກຜົນກະທົບຈາກໄພພິບັດທາງທຳມະຊາດ ທຸກໆປີ. ດັ່ງນັ້ນ, ການກະກຽມຄວາມພ້ອມໃນທຸກດ້ານເພື່ອກອບກູ້ ແລະ ຊ່ວຍເຫຼືອຜູ້ປະສົບໄພ ແມ່ນໜ້າທີ່ຕົ້ນຕໍ ຂອງພັກ ແລະ ລັດຖະບານ ກໍ່ຄືກອງທັບເຮົາ ແລະ ຂອງທຸກພາກສ່ວນໃນທົ່ວສັງຄົມ ຈະຕ້ອງໄດ້ຮ່ວມມືຊ່ວຍເຫຼືອປັດໃຈດ້ານຕ່າງໆ ເຂົ້າໃນການກອບກູ້ແກ້ໄຂ. ເຊິ່ງການຈັດຕັ້ງຝຶກຊ້ອມກອບກູ້ໄພພິບັດ ຝ່າຍດຽວ ປະຈຳປີ 2024 ຂອງກອງທັບ ໃນຄັ້ງນີ້, ກໍເປັນການຫັດແອບໃຫ້ສາມາດກຳແໜ້ນການປະຕິບັດບັນດາຫຼັກສູດວິຊາສະເພາະ ທີ່ໄດ້ຮຽນມາ ໃຫ້ມີຄວາມຊໍານານ ເພື່ອຮັບປະກັນການປະຕິບັດໜ້າທີ່ການເມືອງຂອງກອງທັບ ເມື່ອມີເຫດການໄພພິບັດເກີດຂຶ້ນ ແລະ ທັງເປັນການຫັດແອບກະກຽມຄວາມພ້ອມເດີນທາງໄປ ເຂົ້າຮ່ວມເຝິກຊ້ອມກອບກູ້ໄພພິບັດ 3 ກອງທັບ ກຳປູເຈຍ-ລາວ-ຫວຽດນາມ ຢູ່ທີ່ຣາຊະອານາຈັກ ກຳປູເຈຍ.
ສະຫາຍ ພັນໂທ ຄຳຜາຍ ອ້ວນວິໄລ ໄດ້ກ່າວຕື່ມອີກວ່າ: ເນື້ອໃນທີ່ນຳມາເຝີກຊ້ອມຝ່າຍດຽວ ໃນຄັ້ງນີ້ ປະກອບມີ 2 ພາກ ຄື: ການກອບກູ້ຊ່ວຍເຫຼືອຜູ້ປະສົມໄພ ທາງນ້ຳ ແລະ ທາງບົກ ໃນຫົວຂໍ້: (ນ້ຳຖ້ວມ, ຕືກອາຄານຖະຫຼົ່ມ ແລະ ດີນເຊາະເຈື່ອນແຄມແມ່ນ້ຳ) ໂດຍໄດ້ແບ່ງອອກເປັນ 7 ກໍລະນີຫັດແອບ ຄື: ລາດຕາເວນ ຊອກຄົ້ນຜູ້ປະສົບໄພທາງນ້ຳ ແລະ ທາງອາກາດ ເພື່ອຊອກຜູ້ປະສົບໄພຂອບເຂດທີ່ມີນ້ຳຖ້ວມໜັກ; ຊອກຄົ້ນ-ກອບກູ້ ແລະ ຢ່ອນເຄື່ອງຊ່ວຍເຫຼືອຜູ້ປະສົບໄພຢູ່ຕາມຈຸດຕ່າງໆ; ກອບກູ້ຜູ້ປະສົມໄພ ທີ່ຖືກບາດເຈັບໝົດສະຕິໄຫຼມາຕາມກະແສນ້ຳ; ໜ່ວຍແພດສຸກເສີນປະຖົມພະຍາບາດຂັ້ນຕົ້ນ ກ່ອນນຳສົ່ງໄປໂຮງໝໍ; ຊອກຄົ້ນ-ກອບກູ້ ແລະ ຊ່ວຍເຫຼືອຜູ້ປະສົບໄພ ຢູ່ເຂດດີນເຈື່ອນຖັບຖົມ ແລະ ຕືກອາຄານຖະຫຼົ່ມຖັບຖົມ; ຊອກຄົ້ນ-ກອບກູ້ ແລະ ຊ່ວຍເຫຼືອຜູ້ປະສົບໄພ ຢູ່ເຂດທີ່ມີສານເຄມີຮົ່ວໄຫຼ; ກອບກູ້ ແລະ ຊ່ວຍເຫຼືອ ທາງດ້ານການແພດຕໍ່ຜູ້ໄດ້ຮັບບາດເຈັບ ແລະ ເສຍຊີວິດ. ຜ່ານການເຝີກຊ້ອມຕົວຈິງເຫັນວ່າ: ຄະນະຊີ້ນໍາ, ຄະນະຮັບຜິດຊອບແຕ່ລະພາກສ່ວນ ແລະ ກຳລັງເຝີກຊ້ອມແຕ່ລະເຫຼົ່າຮົບ ໄດ້ເປັນເຈົ້າການປະຕິບັດລະບຽບວິໄນ, ຄໍາສັ່ງ, ແຜນການເຝີກຊ້ອມຢ່າງເຂັ້ມງວດ ແລະ ມີຄວາມຮັບຜິດຊອບສູງ ເຖິງວ່າສະພາບອາກາດຮ້ອນ, ອຸປະກອນຮັບໃຊ້ຍັງບໍ່ພຽງພໍ ແລະ ບໍ່ຄົບຖ້ວນ ຕາມຄວາມຕ້ອງການຕົວຈິງ, ແຕ່ຄະນະຮັບຜິດຊອບຊີ້ນໍາ, ບັນດາໜ່ວຍງານ ແລະ ນັກຝຶກຊ້ອມ ກໍໄດ້ສຸມສະຕິປັນຍາ-ກໍາລັງກາຍ ຂອງຕົນຜ່ານຜາ ແລະ ນໍາໃຊ້ອຸປະກອນ-ເຕັກນິກ ທີ່ມີເຂົ້າໃນການເຝີກຊ້ອມຢ່າງສອດຄ່ອງກັບກໍລະນີລະນີຕ່າງໆທີ່ສ້າງຂຶ້ນ ແລະ ມີຄວາມປອດໄພ 100%.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
