ວັນສຸກ, ວັນທີ 06 ທັນວາ 2024
ແຫຼ່ງທ່ອງທ່ຽວບຶງໜອງເທົາ ແລະ ຖ້ຳປາເຊືອມ ຈະເປີດບໍລິການ ໃນຕົ້ນປີ 2025
ເວລາອອກຂ່າວ: 2024-11-07 08:49:24 | ຜູ້ຂຽນ : admin3 | ຈຳນວນຄົນເຂົ້າຊົມ: 151 | ຄວາມນິຍົມ: 
ທ່ານ ວົງເພັດ ຈິດປັນຍາ ຮອງເລຂາພັກແຂວງຄຳມ່ວນ ຜູ້ຊີ້ນຳວຽກງານການເມືອງ-ແນວຄິດ, ວຽກງານພັກ-ພະນັກງານ ພ້ອມຄະນະ ໄດ້ລົງຕິດຕາມ, ຊຸກຍູ້ການພັດທະນາໂຄງການແຫຼ່ງທ່ອງທ່ຽວ ບຶງໜອງເທົາ ແລະ ຖ້ຳປາເຊືອມ ໃນວັນທີ 4 ພະຈິກຜ່ານມາ ໂດຍມີ ທ່ານ ເຂັມເພັດ ແກ້ວເພຍຈັນ ປະທານບໍລິສັດເພັດມະນີເຄພີຊີ ຈຳກັດ ຜູ້ດຽວ ນຳພາຕິດຕາມຄວາມຄືບໜ້າຂອງໂຄງການ.
ແຫຼ່ງທ່ອງທ່ຽວບຶງໜອງເທົາ ແລະ ຖ້ຳປາເຊືອມເປັນແຫຼ່ງທ່ອງທ່ຽວທີ່ອຸດົມສົມບູນໄປດ້ວຍ ທຳມະຊາດທີ່ສວຍສົດງົດງາມມີທັງສັດປ່າ ແລະ ສັດນ້ຳຫຼາກຫຼາຍຊະນິດ ຊຶ່ງຕັ້ງຢູ່ບ້ານນາຂ້າງຊ້າງ ເມືອງ ທ່າແຂກ ແຂວງຄຳມ່ວນ ໂດຍແມ່ນບໍລິສັດເພັດມະນີເຄພີຊີ ຈຳກັດ ຜູ້ດຽວເປັນຜູ້ພັດທະນາໃຫ້ກາຍ ເປັນແຫຼ່ງທ່ອງທ່ຽວແບບອະນຸລັກທຳມະຊາດ ລວມມີເນື້ອທີ່ເຂດພັດທະນາ 9.89 ເຮັກຕາ ແລະ ເນື້ອທີ່ເຂດອະນຸລັກຈຳນວນ 404 ເຮັກຕາ. ໃນນັ້ນ, ປະກອບມີການປຸກສ້າງສະຖານທີ່ຮອງຮັບ ແລະ ສູນບໍລິການ, ສູນຂໍ້ມູນດ້ານການທ່ອງທ່ຽວ, ຕິດຕັ້ງອຸປະກອນ, ສິ່ງອຳນວຍຄວາມສະດວກໃນການທ່ອງທ່ຽວ, ກິດຈະກຳຂີ່ເຮືອ, ຍ່າງປ່າ, ຍ່າງຂົວທ່ຽວຊົມຖ້ຳ ແລະ ກິດຈະການອື່ນໆ ໂດຍມີມູນຄ່າການ ລົງທຶນທັງໝົດ 3 ລ້ານໂດລາສະຫະລັດ ໂດຍແມ່ນການລົງທຶນພາຍໃນ 100% ແລະ ມີໄລຍະການ ສຳປະທານ 50 ປີ. ປັດຈຸບັນແມ່ນກຳລັງເລັ່ງປັບປຸງສະຖານທີ່ຈອດລົດ, ກໍ່ສ້າງຫ້ອງນ້ຳ, ກໍ່ສ້າງເສັ້ນທາງຍົກສູງຂຶ້ນຈາກລະດັບນ້ຳ, ຮ້ານອາຫານ, ຈຸດບໍລິການ ແລະ ຂົວຍ່າງທ່ຽວຊົມພາຍໃນຖ້ຳ ແລະ ຄາດວ່າຈະເປີດບໍລິການໃຫ້ນັກທ່ອງທ່ຽວໄດ້ເຂົ້າທ່ຽວຊົມໃນຕົ້ນປີ 2025 ທີ່ຈະມາເຖິງນີ້.
ພາຍຫຼັງໂຄງການດັ່ງກ່າວ ຖ້າກໍ່ສ້າງສຳເລັດຈະກາຍເປັນທ່າແຮງດ້ານການທ່ອງທ່ຽວໃຫ້ແກ່ແຂວງ ທີ່ສາມາດສົ່ງເສີມ ແລະ ດຶງດູດເອົານັກທ່ອງທ່ຽວພາຍໃນ ແລະ ຕ່າງປະເທດເຂົ້າມາທ່ຽວຊົມ ເປັນຈຳນວນຫຼາຍ, ທັງສ້າງວຽກເຮັດງານທຳໃຫ້ປະຊາຊົນທີ່ອາໄສຢູ່ອ້ອມຂ້າງໂຄງການໄດ້ມີອາຊີບ ທີ່ແນ່ນອນສ້າງຊີວິດການເປັນຢູ່ໃຫ້ດີຂຶ້ນເທື່ອລະກ້າວ ແລະ ສ້າງລາຍຮັບປະກອບສ່ວນເຂົ້າ ໃນພັດທະນາເສດຖະກິດ-ສັງຄົມຂອງແຂວງຄຳມ່ວນ.
ໂດຍ: ກອງຄຳ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
