POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນສຸກ, ວັນທີ 06 ທັນວາ 2024

ໜຶ່ງໃນກິດຈະກຳທີ່ສຳຄັນ ຂອງງານພົບປະແລກປ່ຽນມິດຕະພາບ ວຽກງານປ້ອງກັນຊາດ ເຂດຊາຍແດນ ລາວ-ຫວຽດນາມ ຄັ້ງທີ 2
ເວລາອອກຂ່າວ: 2024-11-08 09:12:24 | ຜູ້ຂຽນ : admin1 | ຈຳນວນຄົນເຂົ້າຊົມ: 689 | ຄວາມນິຍົມ:

ກິດຈະກຳກວດສຸຂະພາບ, ປິ່ນປົວພະຍາດ ແລະ ຈ່າຍຢາ ໂດຍບໍ່ເສຍຄ່າໃຊ້ຈ່າຍໃຫ້ປະຊາ ຊົນ ເມືອງສົບເບົາ ແຂວງຫົວພັນ ສປປ ລາວ ແລະ ປະຊາຊົນຕາ ແສງລ້ອງເຊີບ ເມືອງມົກເຈົາ ແຂວງເຊິນລາ ສສ ຫວຽດນາມ ແມ່ນໜຶ່ງໃນກິດຈະກຳທີ່ສຳຄັນ ຂອງງານພົບປະແລກປ່ຽນມິດ ຕະພາບ ວຽກງານປ້ອງກັນຊາດ ເຂດຊາຍແດນ ຂັ້ນລັດຖະມົນຕີກະຊວງປ້ອງກັນປະເທດ ລາວ ແລະ ຫວຽດນາມ ຄັ້ງທີ 2 ເພື່ອ ເຮັດໃຫ້ງານດັ່ງກ່າວມີເນື້ອໃນຄວາມໝາຍເລິກເຊິ່ງ, ທັງເປັນການຊ່ວຍເຫຼືອປະຊາຊົນ ເຂດຫ່າງໄກສອກຫຼີກ ໂດຍສະ ເພາະແມ່ນເຂດທີ່ໝັ້ນພື້ນຖານ ການປະຕິວັດເມືອງສົບເບົາ ແຂວງຫົວພັນໃຫ້ມີສຸຂະພາບແຂງແຮງ, ປາສະຈາກໂລກໄພ ໄຂ້ເຈັບ ອີກດ້ານໜຶ່ງກໍເພື່ອເປັນການຖອດຖອນບົດຮຽນ ແລະ ແລກປ່ຽນປະສົບການທາງດ້ານການແພດ ຂອງກົມເສນາຮັກກອງທັບປະຊາຊົນລາວ ແລະ ກົມເສນາຮັກ ກອງທັບປະຊາຊົນຫວຽດນາມ ໃຫ້ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ. ສະຫາຍ ພັນເອກ ເຄນທອງ ວັດທະນະຄຳ ຮອງຫົວໜ້າກົມເສນາຮັກ ກົມໃຫຍ່ພະລາທິການກອງທັບ, ຫົວໜ້າຄະນະທີມງານແພດ ກອງທັບປະຊາຊົນລາວ ໄດ້ກ່າວວ່າ: ພາຍຫຼັງທີ່ໄດ້ຮັບຄຳສັ່ງຈາກກະຊວງປ້ອງກັນປະເທດ ກ່ຽວກັບການຈັດກິດຈະກຳກວດສຸຂະພາບ, ປິ່ນປົວພະຍາດ ແລະ ຈ່າຍຢາໂດຍບໍ່ເສຍຄ່າໃຊ້ຈ່າຍໃຫ້ປະຊາຊົນ ເນື່ອງໃນໂອກາດຈັດງານພົບປະແລກປ່ຽນມິດຕະພາບ ວຽກງານປ້ອງກັນຊາດ ເຂດຊາຍແດນ ຂັ້ນລັດຖະມົນຕີກະຊວງປ້ອງກັນປະເທດ ລາວ ແລະ ຫວຽດນາມ ຄັ້ງທີ 2, ກົມເສນາຮັກ ກອງທັບປະຊາຊົນລາວ ແລະ ກົມເສນາຮັກ ກອງທັບປະຊາຊົນຫວຽດນາມ ໄດ້ເຄື່ອນໄຫວສຳຫຼວດສະຖານທີ່ຕົວຈິງ ຈາກນັ້ນ, ໄດ້ສ້າງແຜນການ ເຄື່ອນໄຫວ ແລະ ຈັດຕັ້ງປະຕິບັດຕົວຈິງ, ສຳລັບທີມງານແພດກອງທັບປະຊາຊົນລາວ ລວມທັງໝົດມີ 40 ສະຫາຍ ໃນນັ້ນ, ມີວິຊາການແພດໝໍຈາກກົມເສ ນາຮັກ, ໂຮງໝໍສູນກາງ 103 ກອງທັບ, ໂຮງໝໍບໍລິເວນ 101 ກອງທັບ ແລະ ໂຮງໝໍທະຫານແຂວງຫົວພັນ ທີ່ມີປະສົບການໃນການກວດພະຍາດ ແລະ ປິ່ນປົວຄົນເຈັບ ສົມທົບກັບທີມງາານແພດ ຈາກກົມເສນາຮັກ ກອງທັບປະຊາຊົນຫວຽດນາມ ໂດຍໄດ້ ຈັດຕັ້ງເປັນ 3 ຈຸດບໍລິການກວດ ພະຍາດ ຄື: ຢູ່ໂຮງໝໍຊຸມຊົນ ເມືອງສົບເບົາ ແຂວງຫົວພັນ, ຢູ່ໂຮງຮຽນປະຖົມ ແລະ ມັດທະ ຍົມ ປ່າຮ່າງ ເມືອງສົບເບົາ ແລະ ຢູ່ສຸກສາລາກວດພະຍາດມິດຕະພາບ ຊາຍແດນ ລາວ-ຫວຽດນາມ ດ່ານຊາຍແດນລ້ອງເຊີບ ເມືອງມົກເຈົາ ແຂວງເຊິນລາ ສສ ຫວຽດນາມ. ຕະຫຼອດໄລຍະການເຄື່ອນ ໄຫວກິດຈະກຳ ທີມງານແພດທັງສອງຝ່າຍ ໄດ້ຍົກສູງຄວາມຮັບຜິດຊອບຂອງຕົນ ເຂົ້າໃນການບໍລິການກວດພະຍາດ, ປິ່ນ ປົວຄົນເຈັບ ແລະ ຈ່າຍຢາໃຫ້ປະຊາຊົນ ພ້ອມທັງໄດ້ແນະນຳໃຫ້ປະຊາຊົນເອົາໃຈໃສ່ຮັກສາສຸຂະພາບ ເພື່ອເຮັດໃຫ້ປະຊາຊົນມີສຸຂະພາບແຂງແຮງ, ມີຈິດໃຈເບີກບານມ່ວນຊື່ນ ແລະ ມີອາຍຸຍືນຍາວ, ທີມງານແພດສອງພາກສ່ວນ ທັງປະຕິບັດໜ້າທີ່ ທັງຖອດຖອນບົດຮຽນເຊິ່ງກັນ ແລະ ກັນຫຼາຍດ້ານ ເປັນຕົ້ນແມ່ນຖອດຖອນບົດຮຽນດ້ານການກວດຄົນເຈັບ, ການບົ່ງມະຕິພະຍາດ, ການຈ່າຍຢາຕາມອາການຂອງຄົນເຈັບ ແລະ ອື່ນໆ. ຜ່ານການບໍລິການກວດສຸຂະພາບ, ປິ່ນປົວພະຍາດ ແລະ ຈ່າຍຢາໂດຍບໍ່ເສຍຄ່າໃຫ້ປະຊາຊົນ 3 ຈຸດບໍລິການດັ່ງກ່າວ ເຫັນວ່າ: ປະຊາຊົນໃຫ້ ຄວາມສົນໃຈ ແລະ ເຂົ້າມາຮັບ ບໍລິການກວດພະຍາດເປັນຈຳ ນວນຫຼວງຫຼາຍ ເຖິງ 2.000 ກວ່າຄົນ, ແຕ່ລະຄົນມີໃບໜ້າຍິ້ມແຍ້ມແຈ່ມໃສ, ມີຄວາມດີໃຈ ທີ່ກະຊວງປ້ອງກັນປະເທດ ລາວ ແລະ ຫວຽດນາມ ໄດ້ຈັດກິດຈະ ກຳນີ້ຂຶ້ນມາ. ກິດຈະກຳໃນຄັ້ງນີ້, ຍັງໄດ້ສ່ອງແສງໃຫ້ເຫັນເຖິງຄວາມສາມັກຄີມິດຕະພາບ, ຄວາມສະໜິດສະໜົມເໝືອນດັ່ງອ້າຍນ້ອງຮ່ວມອຸທອນດຽວກັນ ຂອງວິຊາການແພດໝໍທັງສອງຝ່າຍ ເຖິງແມ່ນວ່າຈະພົບຄວາມຫຍຸ້ງຍາກທາງດ້ານພາສາປາກເວົ້າ ແລະ ສະພາບແວດລ້ອມຕ່າງໆ ແຕ່ທີມງານແພດໝໍທັງສອງພາກສ່ວນ ກໍໄດ້ອົດທົນຜ່ານຜ່າ ສາມາດເຮັດສຳເລັດໜ້າທີ່ຕາມທີ່ໄດ້ຮັບການມອບໝາຍ ເຮັດໃຫ້ປະຊາຊົນມີຄວາມເພິ່ງພໍໃຈກັບການບໍລິການຂອງທີມແພດກອງທັບປະຊາຊົນລາວ ແລະ ກອງທັບປະຊາຊົນຫວຽດນາມ. ສະຫາຍ ພັນເອກ ເຄນທອງ ວັດທະນະຄຳ ຍັງໄດ້ກ່າວວ່າ: ໃນໄລຍະຜ່ານມາ, ກົມເສນາຮັກກອງທັບປະຊາຊົນລາວ ແລະ ກົມເສນາຮັກ ກອງທັບປະຊາຊົນຫວຽດນາມ ໄດ້ຮ່ວມກັນຈັດກິດ ຈະກຳກວດສຸຂະພາບ, ປິ່ນປົວພະຍາດ ແລະ ຈ່າຍຢາໂດຍບໍ່ເສຍຄ່າໃຊ້ຈ່າຍໃຫ້ປະຊາຊົນມາແລ້ວຫຼາຍຄັ້ງ, ເຊິ່ງໃນປີ 2018 ໄດ້ຈັດຢູ່ເມືອງຊຽງຄໍ້ ແຂວງຫົວພັນ, ປີ 2019 ຈັດຢູ່ແຂວງ ຜົ້ງສາລີ ແລະ ປີ 2023 ໄດ້ຈັດຢູ່ບໍລິເວນຊາຍແດນ ລາວ-ຫວຽດນາມ ແຂວງອັດຕະປື. ຜົນສຳເລັດດັ່ງກ່າວນີ້, ເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ, ສອງກອງທັບ ເວົ້າລວມ, ເວົ້າສະເພາະ ເປັນການຮັດແໜ້ນຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ ລະຫວ່າງກົມເສນາຮັກ ກອງທັບປະຊາຊົນລາວ ແລະ ກົມເສນາຮັກ ກອງທັບປະຊາຊົນຫວຽດນາມ ໃຫ້ນັບມື້ເລິກເຊິ່ງ, ຈະເລີນງອກງາມ ແລະ ໝັ້ນຄົງຕະຫຼອດໄປ. ໂດຍ: ນາງ ຍ້ອມເພັດ ວິໄລພັນ

news to day and hot news