ວັນອາທິດ, ວັນທີ 27 ເມສາ 2025
ໝາກຜົນການຈັດຕັ້ງປະຕິບັດ ວຽກງານພະລາທິການ ທົ່ວກອງທັບ ໃນປີ 2024 ຜ່ານມາ
ເວລາອອກຂ່າວ: 2025-03-14 09:41:29 | ຜູ້ຂຽນ : admin3 | ຈຳນວນຄົນເຂົ້າຊົມ: 6232 | ຄວາມນິຍົມ: 
ອີງໃສ່ບົດສະຫຼຸບວຽກງານພະລາທິການປະຈຳປີ 2024 ທີ່ສະຫາຍ ພັນເອກ ພູວຽງ ດາວັນນາຮັກ ຫົວໜ້າກົມເສນາພະລາກົມໃຫຍ່ພະລາທິການກອງທັບ ລາຍງານໃນໂອກາດດຳເນີນກອງປະຊຸມສະຫຼຸບຖອດ ຖອນບົດຮຽນວຽກງານພະລາ ທິການ-ການເງິນທົ່ວກອງທັບ ປະຈຳປີ 2024 ຈັດຂຶ້ນໃນບໍ່ດົນຜ່ານມານີ້ ໄດ້ໃຫ້ຮູ້ວ່າ: ການຈັດ ຕັ້ງປະຕິບັດຂົງເຂດວຽກງານພະລາທິການທົ່ວກອງທັບໃນປີຜ່ານມາ, ເຖິງແມ່ນວ່າຈະພົບຄວາມຫຍຸ້ງຍາກຫຼາຍດ້ານ ອັນເນື່ອງມາຈາກສະພາບວິກິດ ທາງດ້ານເສດຖະກິດ, ການເງິນ ແລະ ພະລັງງານໃນໂລກ, ພາກ ພື້ນໄດ້ສົ່ງຜົນກະທົບຕໍ່ການຂະ ຫຍາຍຕົວທາງດ້ານເສດຖະກິດ ຂອງປະເທດເຮົາ ເຮັດໃຫ້ສະພາບເສດຖະກິດ-ການເງິນແຫ່ງຊາດ ຍັງສືບຕໍ່ພົບຄວາມຫຍຸ້ງຍາກ, ສະພາບໜີ້ສິນຍັງຄຸມເຄືອ ອັນເປັນສາເຫດການຕອບສະໜອງງົບປະມານໃຫ້ກອງທັບ ຍັງມີສ່ວນຈຳກັດ ໄປຄ່ຽງຄູ່ກັນນັ້ນ, ລາຄາສິນຄ້າ, ຄ່າຄອງຊີບສູງຂຶ້ນ, ບັນຫາໄພພິບັດທາງທຳມະຊາດຍັງເກີດຂຶ້ນຢ່າງຕໍ່ເນື່ອງ, ສ້າງຜົນເສຍຫາຍທາງດ້ານຊີ ວິດ, ຊັບສິນຂອງປະຊາຊົນ ແລະ ງົບປະມານຂອງລັດຢ່າງຫຼວງ ຫຼາຍ ອັນສ້າງຄວາມຫຍຸ້ງຍາກ ແລະ ເປັນສິ່ງທ້າທາຍໃຫ້ແກ່ ການຈັດຕັ້ງປະຕິບັດວຽກງານ ພະລາທິການໃນປີຜ່ານມາຢ່າງຫຼີກລ່ຽງບໍ່ໄດ້. ແຕ່ເຖິງຢ່າງໃດກໍຕາມ ໂດຍໄດ້ຮັບການຊີ້ນຳ-ນຳພາແທດເຖິງ ຂອງຄະນະນຳກະຊວງປ້ອງກັນປະເທດ ແລະ ກົມໃຫຍ່ພະລາທິການກອງທັບ ກໍຄື ຄະນະພັກ-ຄະນະບັນຊາແຕ່ລະຂັ້ນ ບວກກັບຄວາມເປັນເຈົ້າການຂອງພະນັກງານວິຊາສະເພາະ, ການປະກອບສ່ວນຢ່າງຕັ້ງໜ້າຂອງພະນັກງານ-ນັກຮົບໃນທົ່ວກອງທັບ ເຮັດໃຫ້ການຈັດຕັ້ງປະ ຕິບັດວຽກງານພະລາທິການ ໃນປີ 2024 ຜ່ານມາ ໂດຍລວມແລ້ວແມ່ນບັນລຸຕາມແຜນການທີ່ວາງໄວ້ ແລະ ມີຜົນສຳເລັດຫຼາຍດ້ານ.
ໃນນີ້, ດ້ານເຂົ້າກິນ: ພື້ນຖານແມ່ນໄດ້ຈັດຕັ້ງປະຕິບັດຢ່າງຖືກຕ້ອງ, ຄົບຖ້ວນຕາມລະບອບອັດຕາທີ່ຂັ້ນເທິງກຳນົດ ແລະ ການປະກອບສ່ວນຜະລິດກຸ້ມຕົນເອງຂອງກອງທັບ, ສະເພາະເຂົ້າກິນທົ່ວກອງທັບສາມາດຈັດຊື້ໄດ້ຕາມແຜນການ ໃນຈຳນວນ 28.882 ກວ່າໂຕນ ສາມາດກຸ້ມກິນໝົດປີ, ດ້ານຊີ້ນ ແລະ ຜັກກິນ ມີຫຼາຍກົມກອງໄດ້ປະຕິບັດຢ່າງຄົບຖ້ວນ ຕາມລະບອບອັດຕາກິນທີ່ຂັ້ນເທິງກຳນົດ, ດ້ານຊີ້ນກິນຮັບປະກັນໄດ້ແຕ່ 120-150 ກຣາມຕໍ່ຄົນຕໍ່ວັນ, ຜັກກິນ 300 ກຣາມຕໍ່ຄົນຕໍ່ວັນຂຶ້ນໄປ ຖືວ່າບັນລຸຄາດໝາຍຕາມອັດຕາສ່ວນການກິນໃນແຕ່ລະວັນ, ສະເພາະການຜະລິດກຸ້ມຕົນເອງ, ເພິ່ງຕົນເອງຂອງກົມກອງ ອັນພົ້ນເດັ່ນ ໃນປີຜ່ານມາ ແມ່ນມີຫຼາຍກົມກອງໄດ້ກໍ່ສ້າງເຮືອນຮົ່ມເພີ່ມຂຶ້ນ ເພື່ອປູກຜັກກິນໃຫ້ໄດ້ຕະຫຼອດປີ ແລະ ມີຜັກກິນ 80-90% ໝົດປີ ໂດຍບໍ່ໄດ້ອາໄສຕະຫຼາດ ແລະ ຍັງໄດ້ສົ່ງອອກຂາຍສູ່ສັງຄົມທາງນອກຕື່ມອີກ, ສະເພາະຊີ້ນກິນຍັງຂາດຫຼາຍປັດໄຈ ຈຶ່ງເຮັດໃຫ້ກົມກອງສ່ວນຫຼາຍສາມາດຮັບປະກັນໄດ້ພຽງແຕ່ 45-50%, ດ້ານການຈັດຕັ້ງກິນດື່ມລວມໝູ່ ແລະ ການປະກອບພາຊະນະຮັບ ໃຊ້ຂອງບັນດາຫົວໜ່ວຍກົມກອງ-ທ້ອງຖິ່ນໃນທົ່ວກອງທັບ ຖ້າທຽບໃສ່ຊຸມປີຜ່ານມາ ເຫັນວ່າເປັນຂະບວນດີຂຶ້ນກວ່າເກົ່າ, ມີຫຼາຍກົມກອງໄດ້ອອກແຮງກໍ່ ສ້າງເຮືອນຄົວ, ເຮືອນກິນແບບແໜ້ນໜາຖາວອນ ແລະ ສ້າງບັນດາປະຖົມປັດໃຈອື່ນໆ ເພື່ອຕອບສະໜອງໃຫ້ແກ່ການກິນດື່ມຢູ່ກົມກອງຢ່າງມີລະບຽບແບບແຜນດີຂຶ້ນ, ໄດ້ຈັດຕັ້ງກິນເຂົ້າລວມໝູ່ເປັນປົກກະຕິ, ນຳໃຊ້ເງິນກິນ ແລະ ເງິນເພີ່ມເຫຼົ່າຮົບເຂົ້າໃນການກິນດື່ມປະຈຳວັນ, ມີຫຼາຍກົມກອງໄດ້ຈັດຕັ້ງໃຫ້ມີໜ່ວຍສະບຽງຂອງຕົນຂຶ້ນ ເພື່ອວິ້ງເຕັ້ນຈັດຊື້-ຈັດຫາ, ສະໜອງຊີ້ນ, ປາ, ພືດຜັກຕ່າງໆເຂົ້າເຮືອນ ຄົວ ແລະ ຜູ້ບັນຊາລົງຮອດພະ ນັກງານ-ນັກຮົບ ໄດ້ຈັດຕັ້ງກິນເຂົ້າລວມໝູ່ 1-2 ຄາບ (ເຂົ້າເຊົ້າ ແລະ ເຂົ້າທ່ຽງ) ນຳອ້າຍນ້ອງ, ຈັດຕັ້ງກິນເຂົ້າ 3 ຄາບເປັນປົກກະຕິໄດ້ 89% ແລະ ຮັບປະກັນທາດກະລໍລີ ໄດ້ແຕ່ 3.000-3.200 ກິໂລກະລໍລີຕໍ່ຄົນຕໍ່ວັນຂຶ້ນໄປ, ໄດ້ຄົ້ນຄວ້າປະກອບເຄື່ອງອຸປະກອນຮັບໃຊ້ເຮືອນຄົວ, ເຮືອນກິນ, ປະກອບຕິດຕັ້ງເຕົາຫຸງຕົ້ມດ້ວຍອາຍນໍ້າ ໃຫ້ 53 ກົມກອງເພີ່ມຕື່ມໃນປີ 2024 ແລະ ເອົາໃຈໃສ່ເບີກຈ່າຍເງິນກິນປົກກະຕິ, ເງິນກິນເພີ່ມເຫຼົ່າຮົບໃຫ້ໄດ້ເປັນປະຈຳເດືອນ ສ້າງເງື່ອນໄຂໃຫ້ແກ່ການຈັດຕັ້ງກິນດື່ມລວມໝູ່ຂອງກົມກອງໄດ້ຢ່າງຕໍ່ເນື່ອງ.
ດ້ານເຄື່ອງນຸ່ງຫົ່ມ: ເຖິງວ່າງົບປະມານຍັງຈຳກັດ ແລະ ການສະໜອງບໍ່ທັນກັບລະດູການ ແຕ່ກໍ່ສາມາດແກ້ໄຂໄດ້ອັນຈຳເປັນສຳລັບວຽກງານເຝິກແອບ, ຊ້ອມຮົບ, ເຄື່ອນໄຫວ, ລະດົມພົນ ແລະ ຮ່ວງອື່ນໆ ຕາມລະບອບອັດຕາ ແລະ ຕາມຄຳສັ່ງຂອງຂັ້ນເທິງ ນອກນັ້ນ, ຍັງມີສ່ວນສຳຮອງແຮ່ໄວ້ຈຳນວນໜຶ່ງ ຢູ່ຂັ້ນຍຸດທະສາດ ແລະ ສາງຂອງກົມກອງ, ສ່ວນການເບີກຈ່າຍຕົວຈິງ ເຄື່ອງປະຈຳປີ 2024 ປັດຈຸບັນເບີກຈ່າຍໄດ້ແລ້ວ 20%, ສຳລັບເຄື່ອງຍາວນານ ຄາດກະຈະໃຫ້ສຳເລັດການເບີກຈ່າຍໃນຕົ້ນປີ 2025.
ວຽກງານການເງິນ: ເຖິງແມ່ນວ່າລັດຖະບານສະໜອງງົບປະມານໃຫ້ກອງທັບມີຈຳ ນວນຈຳກັດ ຖ້າທຽບໃສ່ແຜນ ການທີ່ສະເໜີແມ່ນໄດ້ພຽງແຕ່ 69,46% ແຕ່ກະຊວງປ້ອງກັນປະເທດ ກໍໄດ້ຈັດສັນດຸນດ່ຽງນຳໃຊ້ເຂົ້າແຕ່ລະວຽກງານ, ສູ້ຊົນຈັດຕັ້ງປະຕິບັດຕົວເລກດັ່ງກ່າວ ສາມາດຮັບປະກັນໃຫ້ເປົ້າໝາຍ ລາຍຈ່າຍຕ່າງໆ ໄດ້ຕາມແຜນ ການ ແລະ ທັນກັບເວລາ.
ວຽກງານນ້ຳມັນເຊື້ອໄຟ: ສາມາດຈັດຊື້ນໍ້າມັນໄດ້ 4.708.900 ລິດ ເທົ່າກັບ 30,42% ຂອງການນຳໃຊ້ໃນປີ 2024, ໄດ້ຮັບການຊ່ວຍເຫຼືອຈາກ ສປ ຈີນ ຈຳນວນ 20 ລ້ານລິດ ແລະ ໄດ້ນຳໃຊ້ເຂົ້າໃນການຮັບປະກັນໃຫ້ແກ່ວຽກງານຕ່າງໆ ແລະ ແບ່ງປັນໃຫ້ບັນດາກົມກອງໄດ້ຕາມແຜນການທີ່ວາງໄວ້. ໃນປີຜ່ານມາ ຍັງໄດ້ກໍ່ສ້າງ ແລະ ບົວລະບັດສ້ອມແປງສາງນໍ້າມັນ ບໍລິມາດບັນຈຸ 3 ລ້ານກວ່າລິດ, ໄດ້ປັບປຸງ ແລະ ຍົກລະດັບປໍ້າ ນໍ້າມັນກົມໃຫຍ່ພະລາທິການກອງທັບ ເປັນປໍ້ານໍ້າມັນທີ່ທັນສະໄໝ, ໄດ້ດັດແປງລົດຂົນສົ່ງ ມາເປັນລົດຊີແຕັກຂົນສົ່ງນໍ້າມັນ ຈຳນວນ 7 ຄັນ ແລະ ຟື້ນຟູລົດຊີແຕັກເກົ່າໄດ້ 3 ຄັນ, ໄດ້ສຳເລັດການກໍ່ສ້າງຫ້ອງວິໄຈນໍ້າມັນຂັ້ນ ຍຸດທະສາດ ແລະ ຫ້ອງວິໄຈນໍ້າ ມັນ ກອງບັນຊາການທະຫານອາກາດ ປັດຈຸບັນກຳລັງຕິດຕັ້ງເຄື່ອງຈັກ.
ວຽກງານຂົນສົ່ງ: ພື້ນຖານແມ່ນຕອບສະໜອງໄດ້ຕາມຄວາມຮຽກຮ້ອງຕ້ອງການຂອງວຽກງານຂົນສົ່ງໃນທົ່ວກອງທັບ, ໂດຍສະເພາະແມ່ນການເຂົ້າຮ່ວມ ກອບກູ້ ແລະ ຕ້ານໄພພິບັດ, ເຄື່ອນຍ້າຍວັດຖຸ, ຂົນສົ່ງກຳລັງ ຕາມການສະເໜີຂອງກົມກອງ ແລະ ແຜນວຽກຂອງຂັ້ນເທິງ, ເຊິ່ງບໍລິມາດຂົນສົ່ງໄດ້ທັງໝົດ 21.299 ໂຕນ ໃນນີ້, ກະຊວງຂົນສົ່ງ 4.619 ໂຕນ, ກົມກອງ ຂົນສົ່ງ 16.680 ໂຕນ ທຽບໃສ່ແຜນການປີປະຕິບັດໄດ້ 97,8%, ການຂົນສົ່ງແມ່ນຮັບປະກັນຄວາມປອດໄພ ພ້ອມນີ້, ຍັງໄດ້ ກໍ່ສ້າງນັກຂັບຂີ່ທີ່ໜຸ່ມນ້ອຍປ່ຽນ ແທນນັກຂັບຂີ່ທີ່ອາຍຸສູງ, ສຸຂະ ພາບອ່ອນເພຍ ເພື່ອຍົກສູງຄຸນນະພາບໃນການຂັບຂີ່ໃຫ້ດີຂຶ້ນ.
( ອ່ານຕໍ່ສະບັບໜ້າ )
ວຽກງານກໍ່ສ້າງ-ຄຸ້ມຄອງຊັບ ສິນ: ໂດຍປະຕິບັດຕາມທິດທາງ ປັບປຸງກໍ່ສ້າງຄ້າຍຄູຂອງກອງ ທັບ, ຫຼາຍກົມກອງທ້ອງຖິ່ນໄດ້ຍົກສູງຄວາມຮັບຜິດຊອບ ໃນການຂຸດຄົ້ນທ່າແຮງດ້ານຕ່າງໆ ເຂົ້າໃນການກໍ່ສ້າງຄ້າຍຄູ, ທີ່ຢູ່ອາໄສເອົາເອງ, ສາມາດແກ້ໄຂທີ່ຢູ່ອາໄສໃຫ້ກົມກອງຂອງຕົນ ໂດຍສະເພາະແມ່ນກົມກອງທີ່ ຕັ້ງໃໝ່, ມູນຄ່າການກໍ່ສ້າງເອົາ ເອງຂອງກົມກອງທ້ອງຖິ່ນ ໃນປີ 2024 ຄິດໄລ່ເປັນມູນຄ່າແມ່ນ 24 ຕື້ກວ່າກີບ, ສ່ວນການ ລົງທຶນຂອງລັດ ມີ 82 ໂຄງ ການ, ລວມມູນຄ່າ 160 ຕື້ກວ່າ ກີບ, ໂຄງການລົງທຶນເງິນດັດສົມພາຍໃນກະຊວງປ້ອງກັນປະເທດ ມີ 213 ໂຄງການ ມູນຄ່າ 838 ຕື້ກວ່າກີບ. ນອກນັ້ນ, ຍັງໄດ້ຜະ ລິດຕຽງນອນຕາມງົບປະມານ ຈຳນວນ 703 ໜ່ວຍ ແລະ ໄດ້ ເບີກຈ່າຍໃຫ້ 23 ກົມກອງ ຈຳ ນວນ 360 ໜ່ວຍ.
ວຽກງານຄຸ້ມຄອງສິ່ງປຸກສ້າງ: ທົ່ວກອງທັບມີສິ່ງປຸກສ້າງທັງໝົດ 12.941 ຫຼັງ ໃນນີ້, ມີສິ່ງປຸກສ້າງຖາວອນ 8.254 ຫຼັງ ເພີ່ມຂຶ້ນ 20,8%, ເຄິ່ງຖາວອນ 3.005 ຫຼັງ ຫຼຸດລົງ 7,2% ແລະ ເຮືອນຊົ່ວຄາວ 1.682 ຫຼັງ ຫຼຸດລົງ 12,3%, ຫຼາຍກົມກອງໄດ້ເອົາໃຈໃສ່ສ້ອມແປງ, ບົວລະບັດຮັກສາລະບົບຄ້າຍຄູໃຫ້ສະອາດງາມຕາ ແລະ ເປັນລະບຽບຈົບ ງາມ ຄ່ອຍໆລົບລ້າງເຮືອນຊົ່ວ ຄາວ ແລະ ຫັນເປັນເຮືອນຖາ ວອນໃນຕໍ່ໜ້າຕາມເງື່ອນໄຂຕົວຈິງຂອງກົມກອງ.
ວຽກງານຜະລິດແກ້ໄຂຊີວິດການເປັນຢູ່ ແລະ ຜະລິດເປັນສິນຄ້າ: ສຳລັບຢູ່ຂັ້ນກະຊວງ ໄດ້ສືບຕໍ່ສຸມໃສ່ປັບປຸງບັນດາຫົວໜ່ວຍການຜະລິດກະສິກຳຂອງກະຊວງ ໄປຕາມທິດການໄລ່ລຽງເສດຖະກິດ ແລະ ຍົກສູງຄຸນນະພາບຂອງການຜະລິດຂຶ້ນຕື່ມ ເຊັ່ນ: ກອງຜະລິດຄົບວົງຈອນເລກ 1, ກອງຜະລິດເລກ 2 ແລະ ເລກ 3 ສາມາດສ້າງລາຍຮັບຈາກການປູກຝັງ, ລ້ຽງສັດບົກ, ສັດນໍ້າ ໄດ້ທັງໝົດ 7.620.339.100 ກີບ ໃນນັ້ນ, ໄດ້ມອບພັນທະໃຫ້ຂັ້ນເທິງ 4.572.203.460 ກີບ ລື່ນແຜນການ 7,18%, ບັນດາກອງຜະລິດທີ່ລ້ຽງສັດໃຫຍ່ມີງົວທັງໝົດ 1.035 ໂຕ, ຄວາຍ 167 ໂຕ ແລະ ແກະ 761 ໂຕ, ບັນດາກົມກອງເຫຼົ່ານັ້ນ ໄດ້ເອົາໃຈໃສ່ການລ້ຽງດູສັດລ້ຽງໄດ້ດີສົມຄວນ ແຕ່ສະພາບການຂະຫຍາຍຕົວຍັງຢູ່ໃນລະດັບຕໍ່າ. ສ່ວນຢູ່ບັນດາກົມກອງ-ທ້ອງຖິ່ນ ໂດຍປະຕິບັດຕາມທິດນຳ 4 ປູກ 4 ລ້ຽງ ທີ່ກົມໃຫຍ່ພະລາທິການກອງທັບວາງອອກ ເພື່ອແກ້ໄຂຊີວິດການເປັນຢູ່ ແລະ ຜະລິດເປັນສິນຄ້າເຮັດນາປີ-ນາແຊງ ເນື້ອທີ່ 1.233 ເຮັກຕາ, ຜົນຜະລິດໄດ້ 1.195 ໂຕນ, ທຽບໃສ່ປີຜ່ານມາເພີ່ມຂຶ້ນ 5%, ເດັ່ນກວ່າໝູ່ແມ່ນກອງພົນທີ 4, ກອງພົນທີ 5, ກອງບັນຊາການທະຫານແຂວງຈຳປາສັກ ແລະ ກອງບັນຊາການທະຫານແຂວງສາລະວັນ ສາມາດຜະລິດເຂົ້າໄດ້ 140 ໂຕນຂຶ້ນເມືອ, ປູກພືດຜັກໄດ້ 3.156 ໂຕນ, ເດັ່ນກວ່າໝູ່ຜະລິດໄດ້ 200 ໂຕນຂຶ້ນເມື່ອ ມີກອງພົນທີ 1, ກອງພົນທີ 2, ກອງບັນຊາການທະຫານແຂວງໄຊຍະບູລີ ແລະ ກອງບັນຊາການທະຫານແຂວງຄຳມ່ວນ, ຈຳໜ່າຍສັດລ້ຽງປະເພດງົວ, ຄວາຍ ພາຍໃນປີທັງໝົດ 2.779 ໂຕ, ກົມກອງທີ່ເດັ່ນກວ່າໝູ່ມີງົວ, ຄວາຍ 200 ໂຕຂຶ້ນເມືອມີ ກອງພົນທີ 2, ກອງບັນຊາການທະຫານແຂວງຫຼວງພະບາງ, ບໍລິຄຳໄຊ ແລະ ກອງບັນຊາການທະຫານແຂວງເຊກອງ, ຈຳໜ່າຍອອກ ໝູ ແລະ ແບ້ 19.314 ໂຕ, ປະເພດສັດປີກ ຈຳໜ່າຍອອກ 176.682 ໂຕ, ປະເພດສັດນໍ້າ ຈຳໜ່າຍອອກ 1.308 ໂຕນ. ນອກນີ້, ຫຼາຍກົມກອງຍັງບໍລິການດ້ານຕ່າງໆ ສາມາດສ້າງລາຍຮັບໄດ້ 51.805 ຕື້ກີບ ທຽບໃສ່ປີ ຜ່ານມາເພີ່ມຂຶ້ນ 9%. ສັງລວມແລ້ວໃນປີ 2024 ຜ່ານມາ ກົມກອງໃນທົ່ວກອງທັບ ສາມາດສ້າງລາຍຮັບຈາກການຜະລິດກະສິກຳ ແລະ ການບໍລິການຕ່າງໆ ນັບທັງເງິນສົດ ແລະ ວັດ ຖຸປະມານ 146 ຕື້ກວ່າກີບ (ໃນນີ້, ມີທຶນໝູນວຽນ 25 ຕື້ກວ່າກີບ) ທຽບໃສ່ປີ 2023 ເພີ່ມຂຶ້ນ 22%, ບັນດາກົມກອງ-ທ້ອງຖິ່ນ ສາມາດສ້າງລາຍຮັບໄດ້ແຕ່ 5 ຕື້ກີບຂຶ້ນໄປ ມີກອງພົນທີ 1, ກອງພົນທີ 2, ກອງພົນທີ 3, ກອງພົນທີ 4, ກອງພົນທີ 5, ກອງບັນຊາການທະຫານແຂວງຫຼວງພະບາງ, ໄຊຍະບູລີ, ສາລະວັນ, ເຊກອງ ແລະ ກອງບັນຊາການທະຫານແຂວງອັດຕະປື.
ວຽກງານກໍ່ສ້າງຂະແໜງການວິຊາສະເພາະ: ໄດ້ເກັບກຳຈຳ ນວນພົນພະລາທິການໃນທົ່ວກອງທັບ ມີຄວາມຊັດເຈນຍິ່ງ ຂຶ້ນ, ສາມາດຂຶ້ນສະຖິຕິລາຍຊື່ບຸກຄົນ, ປະເພດວິຊາສະເພາະ, ວຸດທິການສຶກສາ, ຈຳນວນເຫຼືອ-ບໍ່ພໍ ຕາມການຈັດຕັ້ງປະກອບຢູ່ ແຕ່ລະກົມກອງ ເຮັດໃຫ້ການ ຄາດກະກໍ່ສ້າງກຳລັງແຕ່ລະຂະ ແໜງການພະລາທິການ ໄດ້ຫັນເຂົ້າສູ່ຄວາມເປັນຈິງ, ໄດ້ປັບປຸງການຈັດຕັ້ງຢ່າງເປັນລະບົບ, ນັບແຕ່ຂັ້ນກະຊວງລົງຮອດບັນດາກົມກອງໃນທົ່ວກອງທັບ ໃນນີ້, ໄດ້ແຕ່ງຕັ້ງໜ້າທີ່ໃໝ່ 674 ສະ ຫາຍ, ສັບຊ້ອນຍົກຍ້າຍບ່ອນປະ ຈຳການ 386 ສະຫາຍ ແລະ ພັກ ຜ່ອນຮັບບຳນານ 72 ສະຫາຍ, ໄດ້ຊີ້ນຳບັນດາວິທະຍາຄານ ແລະ ໂຮງຮຽນເຫຼົ່າຮົບພະລາທິການ ກ່ຽວກັບການຄົ້ນຄວ້າປັບປຸງຫຼັກສູດ, ໂຄງການສິດສອນໃຫ້ແທດເໝາະກັບລະດັບຂັ້ນຮຽນ ແລະ ສະພາບຕົວຈິງຂອງວຽກງານພະລາທິການກອງທັບເຮົາໃນແຕ່ລະໄລຍະໃຫ້ມີລັກສະນະວິທະຍາສາດ, ທຽບທັນກັບສາ ກົນຫຼາຍຂຶ້ນ ສົກປີ 2023-2024 ມີນັກຮຽນຈົບທັງພາຍໃນ ແລະ ຕ່າງປະເທດ ຈຳນວນ 2.524 ສະຫາຍ, ໄດ້ຄົ້ນຄວ້າຄັດເລືອກນັກຮຽນເຂົ້າຮຽນທັງພາຍໃນ ແລະ ຕ່າງປະເທດ ຕາມຕົວເລກທີ່ກະຊວງອະນຸມັດ ສົກຮຽນ 2024-2025 ຈຳນວນ 1.304 ສະຫາຍ.
ນອກຈາກບັນດາວຽກງານດັ່ງທີ່ກ່າວມາແລ້ວນັ້ນ ຍັງມີຫຼາຍຂົງເຂດວຽກ ເປັນຕົ້ນແມ່ນ ວຽກງານເສນາຮັກ, ວຽກງານຄຸ້ມຄອງວັດຖຸພະລາທິການ, ວຽກງານພົວພັນຮ່ວມມືກັບຕ່າງປະເທດ ແລະ ຂົງເຂດວຽກງານອື່ນໆ ທີ່ປິ່ນອ້ອມວຽກງານ ພະລາທິການ ກໍໄດ້ຮັບການຈັດ ຕັ້ງປະຕິບັດມີໝາກຜົນຕົວຈິງ ແລະ ມີການຫັນປ່ຽນໄປໃນທິດທາງທີ່ດີຂຶ້ນຢ່າງຈະແຈ້ງ.
ໂດຍ: ນາງ ຍ້ອມເພັດ ວິໄລພັນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
