ວັນອັງຄານ, ວັນທີ 24 ມິຖຸນາ 2025
ກອງບັນຊາການທະຫານແຂວງຄຳມ່ວນ ເປີດຂະບວນການແຂ່ງຂັນຍ້ອງຍໍ ປະຈຳປີ 2025
ເວລາອອກຂ່າວ: 2025-05-08 09:17:13 | ຜູ້ຂຽນ : admin1 | ຈຳນວນຄົນເຂົ້າຊົມ: 3420 | ຄວາມນິຍົມ: 
ພິທີເປີດຂະບວນການແຂ່ງ ຂັນຍ້ອງຍໍ ພາຍໃຕ້ເນື້ອໃນຂໍ້ ແຂ່ງຂັນຮັກຊາດ ແລະ ພັດທະ ນາ ປະຈຳປີ 2025 ທົ່ວທະຫານ ແຂວງຄຳມ່ວນ ໄດ້ຈັດຂຶ້ນໃນ ວັນທີ 5 ພຶດສະພາ 2025 ນີ້, ໂດຍການເປັນປະທານຮ່ວມຂອງ ສະຫາຍ ພັນເອກ ສີສົມພູ ແກ້ວບຸນລ້ອມ ຮັກສາການຫົວໜ້າການເມືອງກອງບັນຊາການທະ ຫານແຂວງຄຳມ່ວນ ແລະ ທ່ານ ນາງ ບັງອອນ ໄຊຍະສິດ ກຳມະ ການປະຈຳພັກແຂວງ, ຮອງປະ ທານສະພາປະຊາຊົນແຂວງຄຳມ່ວນ, ເປັນກຽດເຂົ້າຮ່ວມພິ ທີໃນຄັ້ງນີ້ ມີພະແນກພາຍໃນແຂວງ, ຄະນະພັກ-ຄະນະບັນ ຊາ ອົງການ 6 ຫ້ອງບັນດາພະ ແນກການທະຫານແຂວງ ຕະ ຫຼອດຮອດພະນັກງານຫຼັກແຫຼ່ງຈາກຫົວໜ່ວຍກົມກອງທີ່ຂຶ້ນກັບກອງບັນຊາການທະຫານແຂວງຄຳມ່ວນ ເຂົ້າຮ່ວມ.
ສະຫາຍ ພັນໂທ ຟ້າອຳນວຍ ພັນທະວົງສິນ ຮັກສາການຫົວໜ້າພະແນກໂຄສະນາ-ອົບຮົມ ກອງບັນຊາການທະຫານແຂວງຄຳ ມ່ວນ ໄດ້ຜ່ານຂໍ້ຕົກລົງ ຂອງ ກອງບັນຊາການທະຫານແຂວງ ວ່າດ້ວຍການແຕ່ງຕັ້ງຄະນະຮັບ ຜິດຊອບຊີ້ນຳລວມ ແລະ ບັນດາອານຸກຳມະການ ຈັດຕັ້ງເປີດຂະບວນການແຂ່ງຂັນ-ຍ້ອງຍໍທົ່ວ ທະຫານແຂວງຄຳມ່ວນ ປະຈຳປີ 2025. ຈາກນັ້ນ, ສະຫາຍ ພັນໂທ ໜູໄລ ແກ້ວດວງດີ ຄະນະພັກຮາກຖານ ຮອງຫົວໜ້າ ຫ້ອງການເມືອງ ຜ່ານແຜນການ ເຄື່ອນໄຫວວຽກງານຂະບວນການແຂ່ງຂັນຍ້ອງຍໍ ພາຍໃຕ້ເນື້ອໃນຮັກຊາດ ແລະ ພັດທະນາ ພ້ອມທັງຜ່ານເນື້ອໃນຂໍ້ແຂ່ງຂັນ ປະ ຈຳປີ 2025 ຈຸດປະສົງກໍເພື່ອແນໃສ່ປະຕິບັດຕາມແນວທາງປ້ອງກັນຊາດ-ປ້ອງກັນຄວາມສະຫງົບ ໂດຍສະເພາະການເພີ່ມທະວີວຽກງານປ້ອງກັນຊາດທົ່ວປວງຊົນຮອບດ້ານໃນສະພາບການໃໝ່, ທັງເປັນການຊຸກຍູ້ຂະບວນການແກ້ໄຂຊີວິດການເປັນຢູ່, ການປັບປຸງກໍ່ສ້າງຄ້າຍຄູຕາມ ທິດນຳ ເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງໃຫ້ດີຂຶ້ນເປັນກ້າວໆ ແລະ ເປັນການຊຸກຍູ້ຂະບວນການພົວ ພັນປະສານສົມທົບກັບອຳນາດ ການປົກຄອງທ້ອງຖິ່ນ ໃນການ ຈັດຕັ້ງເຄື່ອນໄຫວໜ້າທີ່ ແລະ ປັບປຸງກໍ່ສ້າງກົມກອງ, ເສີມຂະ ຫຍາຍມູນເຊື້ອອັນດີງາມ ລະ ຫວ່າງກອງທັບກັບປະຊາຊົນຄືປາກັບນ້ຳ, ຈັດຕັ້ງປະຕິບັດຕາມພາລະບົດບາດ-ໜ້າທີ່ວຽກງານປ້ອງກັນຊາດ ກຽມພ້ອມສູ້ຮົບ ແລະ ສູ້ຮົບມີໄຊ ປະຕິບັດຕາມທິດທາງແຜນການ 4 ໜ້າທີ່ໃຫຍ່ 25 ແຜນການຂອງອົງຄະນະພັກກອງບັນຊາການທະຫານແຂວງຄຳມ່ວນວາງອອກ ເພື່ອປະເມີນຜົນການເຄື່ອນໄຫວວຽກງານ ແຂ່ງຂັນ-ຍ້ອງຍໍຂອງແຕ່ລະກົມກອງທີ່ພະນັກງານ-ນັກຮົບໄດ້ ຈັດຕັ້ງປະຕິບັດຕົວຈິງ. ໃນກອງປະຊຸມຍັງໄດ້ຜ່ານຮ່າງເນື້ອໃນ ເປີດຂະບວນແຂ່ງຂັນ-ຍ້ອງຍໍ ພາຍໃຕ້ເນື້ອໃນຮັກຊາດ ແລະ ພັດ ທະນາ ປະຈຳປີ 2025, ຈາກນັ້ນ ຕາງໜ້າຄະນະພັກ-ຄະນະບັນຊາແຕ່ລະກົມກອງກໍໄດ້ລົງນາມເຊັນຮັບ ພ້ອມທັງຈັບມືແຂ່ງຂັນ ເພື່ອພ້ອມກັນນຳເອົາເນື້ອໃນດັ່ງກ່າວໄປຈັດຕັ້ງປະຕິບັດໃຫ້ປະກົດຜົນເປັນຈິງ.
ໂດຍ: ລາກີ ພົມມີສິດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
