ວັນອັງຄານ, ວັນທີ 24 ມິຖຸນາ 2025
ພະແນກຊາວໜຸ່ມ ກອງບັນຊາການທະຫານແຂວງສາລະວັນ ສ້າງໄດ້ຜົນງານທີ່ພົ້ນເດັ່ນ
ເວລາອອກຂ່າວ: 2025-05-08 09:19:47 | ຜູ້ຂຽນ : admin1 | ຈຳນວນຄົນເຂົ້າຊົມ: 3138 | ຄວາມນິຍົມ: 
ສະຫາຍ ພັນໂທ ແອວິໄລຈິດ ດາລາແສງ ຫົວໜ້າພະແນກຊາວໜຸ່ມ ກອງບັນຊາການທະຫານແຂວງສາລະວັນ ໃຫ້ຮູ້ວ່າ: ໃນປີຜ່ານມາ ຄະນະບໍລິຫານງານ-ຄະນະໜ່ວຍຊາວໜຸ່ມແຕ່ລະຂັ້ນ ແມ່ນໄດ້ເອົາໃຈໃສ່ສຶກສາອົບຮົມວຽກງານການເມືອງ-ນຳພາແນວຄິດໃຫ້ບັນດາສະມາຊິກຊາວໜຸ່ມຢ່າງເປັນປົກກະຕິ ເຮັດໃຫ້ສະມາຊິກຊາວໜຸ່ມ ມີແນວຄິດອຸ່ນອຽນ, ທຸ່ນທ່ຽງ, ຫ້າວຫັນ ປະຕິບັດໜ້າທີ່ການເມືອງ, ເຮັດສຳເລັດໜ້າທີ່ວິຊາສະເພາະທີ່ໄດ້ຮັບມອບໝາຍ, ເປັນເຈົ້າການຊີ້ນຳ ແລະ ນຳພາຊາວໜຸ່ມ-ໄວໜຸ່ມເຂົ້າຮ່ວມທຸກຂະບວນການຂອງກົມກອງ, ເປັນກຳລັງຫຼັກແຫຼ່ງ ໃນການກອບກູ້ຊ່ວຍເຫຼືອພໍ່ແມ່ປະຊາຊົນທີ່ຖືກຜົນກະທົບຈາກໄພທຳມະຊາດໄປພ້ອມໆກັບ ການຮັກສາຄວາມສະຫງົບຮຽບຮ້ອຍພາຍໃນກົມກອງ ເວົ້າລວມ ກໍຄື ຂອບເຂດກົມກອງຮັບຜິດຊອບ ເຮັດໃຫ້ສະພາບມີຄວາມສະຫງົບໂດຍພື້ນຖານ.
ປັດຈຸບັນ, ທົ່ວກອງບັນຊາການທະຫານແຂວງສາລະວັນ ປະກອບມີ 5 ຄະນະບໍລິຫານງານ, 22 ໜ່ວຍຂຶ້ນກັບຄະນະບໍລິຫານງານ, ມີ ໜ່ວຍຊາວໜຸ່ມ
ເອກະລາດ 15 ໜ່ວຍ, ມີສະມາຊິກຊາວໜຸ່ມທັງໝົດ 995 ສະຫາຍ, ຍິງ 86 ສະຫາຍ, ດ້ານວຽກງານປູກຝັງ-ລ້ຽງສັດໃນຊຸມປີຜ່ານມາ ທາງຄະນະບໍລິຫານງານຊາວໜຸ່ມ-ຄະນະໜ່ວຍຊາວໜຸ່ມ ກອງບັນຊາການທະຫານແຂວງສາລະວັນ ແມ່ນໄດ້ເອົາໃຈໃສ່ຊຸກຍູ້ຂະບວນການປູກຝັງ-ລ້ຽງສັດ ຢ່າງຕັ້ງໜ້າ ໃນນັ້ນ, ປູກໄມ້ປະດັບ 22.500 ຕົ້ນ, ຕົ້ນໄມ້ກິນໝາກ 36.255 ຕົ້ນ, ປູກຕົ້ນໝາກມ່ວງຫິມະພານ 400 ຕົ້ນ, ປູກກ້ວຍ 2.255 ຕົ້ນ, ປູກມັນຕົ້ນ 21 ເຮັກຕາ, ເຮັດນາປີ-ນາແຊງໃນເນື້ອທີ 16 ເຮັກຕາ ເກັບກູ້ໄດ້ 48 ໂຕນ, ລ້ຽງສັດປະເພດ ງົວ-ຄວາຍ 17 ໂຕ, ລ້ຽງໝູ 126 ໂຕ, ສັດປີກ 3.925 ໂຕ, ລ້ຽງປາທຸກຊະນິດ ຈຳນ່າຍແລ້ວ 3.500 ກິໂລ, ລວມລາຍຮັບຈາກການປູກຝັງ-ລ້ຽງສັດໄດ້ທັງໝົດ 1.480.775.000 ກີບ. ຈາກຜົນງານດັ່ງກ່າວນັ້ນ, ຄະນະບໍລິຫານງານຊາວໜຸ່ມ, ຄະນະໜ່ວຍຊາວໜຸ່ມ ໄດ້ຮັບການຢັ້ງຢືນຊາວໜຸ່ມນຳໜ້າ 4 ບຸກ ຈຳນວນ 5 ຄະນະ, ຂັ້ນໜ່ວຍຊາວໜຸ່ມມີ 5 ໜ່ວຍ, ພ້ອມຮັບທຸງໄຊນຳໜ້າ, ຮັບໃບຍ້ອງຍໍຊາວໜຸ່ມ 4 ບຸກ ປະຈຳປີ 2024 ຈຳນວນ 20 ໜ່ວຍ ຢ່າງໜ້າສັນລະເສີນ.
ສະຫາຍ ພັນໂທ ແອວິໄລຈິດ ດາລາແສງ ຍັງກ່າວຕື່ມອີກວ່າ: ໃນຕໍ່ໜ້າແມ່ນຈະໄດ້ສຸມໃສ່ການຈັດຕັ້ງປະຕິບັດໜ້າທີ່ວຽກງານ ກໍຄື ຮັກສາມູນເຊື້ອ ແລະ ຜົນງານ ທີ່ບັນດາຄະນະບໍລິຫານງານ-ຄະນະໜ່ວຍຊາວໜຸ່ມ ແລະ ບັນດາສະມາຊິກຊາວໜຸ່ມ ຍາດມາໄດ້ ໄປຄວບຄູ່ກັບການເຮັດວຽກງານສຶກສາອົບຮົມການເມືອງ-ນຳພາແນວຄິດໃຫ້ບັນດາສະມາຊິກຊາວໜຸ່ມຢ່າງເປັນປົກກະຕິ, ເປັນເຈົ້າການນຳພາສະມາຊິກຊາວໜຸ່ມ ຄົ້ນຄວ້າສຶກສາຮ່ຳຮຽນບັນດາຂໍ້ກຳນົດ-ກົດລະບຽບຂອງກອງທັບ ກໍຄື ຂໍ້ກຳນົດ ແລະ ກົດລະບຽບຂອງສູນກາງຊາວໜຸ່ມປະຊາຊົນປະຕິວັດລາວ, ເພື່ອເຮັດໃຫ້ສະມາຊິກແຕ່ລະສະຫາຍມີຄວາມຫ້າວຫັນເຂົ້າໃນການປະຕິບັດໜ້າທີ່ວຽກງານ ແລະ ຂະບວນການລວມຂອງກົມກອງ ກໍຄື ຂັ້ນເທິງວາງອອກ ຕິດພັນກັບການສ້າງກົມກອງວັດທະນະທຳ ແລະ ນັກຮົບວັດທະນະທຳ
ໂດຍ: ສຸກັນ ວົງສະຫວັດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
