ວັນພະຫັດ, ວັນທີ 21 ພຶດສະພາ 2026
6 ເດືອນຕົ້ນປີ 2025 ທະຫານນະຄອນຫຼວງວຽງຈັນ ສ້າງໄດ້ຜົນງານຫຼາຍດ້ານ
ເວລາອອກຂ່າວ: 2025-08-12 09:36:58 | ຜູ້ຂຽນ : admin1 | ຈຳນວນຄົນເຂົ້າຊົມ: 1591 | ຄວາມນິຍົມ: 
ສະຫາຍ ພັນເອກ ສົມເພັດ ສຸລີວົງ ຫົວໜ້າຫ້ອງການ ກອງ ບັນຊາການທະຫານນະຄອນ ຫຼວງວຽງຈັນ ໃຫ້ຮູ້ວ່າ: ການຈັດ ຕັ້ງປະຕິບັດວຽກງານຮອບດ້ານ ໃນໄລຍະ 6 ເດືອນຕົ້ນປີ 2025 ນີ້ ແມ່ນມີຜົນສຳເລັດຫຼາຍດ້ານເປັນຕົ້ນແມ່ນວຽກງານຮັບປະກັນເຮັດໃຫ້ສະພາບມີຄວາມສະຫງົບ ໄດ້ຫັນເອົາກຳລັງລົງກໍ່ສ້າງຮາກຖານການເມືອງພັດ ທະນາຊົນນະບົດຮອບດ້ານຕາມ 4 ເນື້ອໃນ 4 ຄາດໝາຍ, ສຸມໃສ່ ສ້າງທ່າສະໜາມ 3 ຂັ້ນໂດຍປະ ສານສົມທົບແໜ້ນກັບອົງການປົກຄອງທ້ອງຖິ່ນ ແລະ ກຳລັງທຸກພາກສ່ວນທີ່ກ່ຽວຂ້ອງ ເຮັດໜ້າທີ່ຕິດຕາມສະພາບຕ້ານປະ ກົດການຫຍໍ້ທໍ້ ທີ່ຈະເກີດຂຶ້ນ ແລະ ແກ້ໄຂໃຫ້ທັນເວລາ ຮັບປະກັນ ເຮັດໃຫ້ສະພາບຂອບເຂດນະ ຄອນຫຼວງວຽງຈັນ ມີຄວາມສະ ຫງົບໂດຍພື້ນຖານ, ເອົາໃຈໃສ່ໃນການຈັດຕັ້ງລະບົບປະຈຳການຕະຫຼອດ 24 ຊົ່ວໂມງ, ເຄື່ອນໄຫວເກັບກຳສະພາບຕາມບໍລິເວນຊາຍແດນໃຫ້ມີຄວາມສະຫງົບ, ພ້ອມນັ້ນ ຍັງໄດ້ເອົາໃຈໃສ່ໃນການນຳ ພາ-ຊີ້ນຳພະນັກງານ-ນັກຮົບ ສຸມ ໃສ່ການອົບຮົມ-ຫັດແອບ ເພື່ອ ເປັນການປັບປຸງລະບຽບແບບ ແຜນ, ເຝິກຝົນຫຼໍ່ຫຼອມກຳລັງແຮງກາຍເຮັດໃຫ້ນາຍ ແລະ ພົນ ທະຫານ ມີຄວາມໜັກແໜ້ນ ເຂັ້ມແຂງ, ມີຄວາມຊຳນິຊຳນານໃນການນຳໃຊ້ອາວຸດຍຸດໂທປະ ກອນ.
ໄປຄຽງຄູ່ກັບວຽກງານຮັບ ປະກັນເຮັດໃຫ້ສະພາບມີຄວາມສະຫງົບ, ຍັງໄດ້ສຸມໃສ່ວຽກງານການສຶກສາອົບຮົມການເມືອງ-ນຳພາແນວຄິດ ໃນອົງການກອງບັນຊາການ ແລະ ກົມກອງຮາກ ຖານ ເຮັດຫຼາຍເນື້ອໃນ ແລະ ຫຼາຍ ຮູບການເພື່ອໃຫ້ແທດເໝາະ ກັບໜ້າທີ່ການເມືອງຂອງແຕ່ ລະກົມກອງ ຜ່ານການຈັດຕັ້ງປະຕິບັດໄດ້ມີການສະຫຼຸບຈຸດດີ, ຈຸດອ່ອນຂໍ້ຄົງຄ້າງ, ບົດຮຽນທີ່ ຖອດຖອນໄດ້ ແລະ ບັນຫາທີ່ຈະແກ້ໄຂໃນຕໍ່ໜ້າໃຫ້ມີຈຸດສຸມ ເພື່ອຄວາມເປັນເອກະພາບໃນໜູ່ຄະນະ; ພ້ອມນັ້ນ, ຍັງໄດ້ປັບ ປຸງການຈັດຕັ້ງ, ຊັບຊ້ອນພະນັກ ງານ ແລະ ມອບໝາຍໜ້າທີ່ໃຫ້ສອດຄ່ອງເໝາະສົມຕາມຄວາມຮູ້ຄວາມສາມາດໃນການນຳພາ-ບັນຊາຢູ່ຂະແໜງການຕ່າງໆ.
ດ້ານວຽກງານການແກ້ໄຂຊີ ວິດການເປັນຢູ່ ແມ່ນໄດ້ຊີ້ນຳ ແລະ ຊຸກຍູ້ບັນດາກົມກອງຮາກຖານສຸມໃສ່ 4 ປູກ 4 ລ້ຽງທີ່ ກົມໃຫຍ່ພະລາທິການກອງທັບວາງອອກ ແລະ ຕາມເງື່ອນໄຂທ່າແຮງບົ່ມ ຊ້ອນຂອງຕົນ ໂດຍປະຕິບັດຕາມທິດນຳເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍ ຕົນເອງ ໂດຍຖືເອົາການປູກ-ການລ້ຽງເປັນຕົ້ນຕໍ ແລະ ບໍລິ ການຕ່າງໆ ເປັນສຳຮອງ ເພື່ອ ເຮັດໃຫ້ການແກ້ໄຂຊີວິດການເປັນຢູ່ຂອງພະນັກງານ-ນັກຮົບດີຂຶ້ນເທື່ອລະກ້າວ. ນອກຈາກນັ້ນຍັງໄດ້ເອົາໃຈໃສ່ສ້ອມແປງປົກປັກຮັກສາເຄື່ອງຂອງພາຫະນະເຕັກນິກທີ່ຂັ້ນເທິງປະກອບໃຫ້ຢູ່ໃນສະພາບກຽມພ້ອມສູ້ຮົບ ແລະ ບໍລິຫານ ໂດຍການຈັດຕັ້ງບົວລະບັດຜັດເຊັດອາວຸດຍຸດໂທປະກອນໃຫ້ຖືກຕາມຫຼັກການເຕັກນິກ ເພື່ອຮັບປະກັນໃນການປະຕິບັດໜ້າທີ່ ແລະ ນຳໃຊ້ໄດ້ຍາວນານ; ວຽກງານການພົວພັນ ຮ່ວມມືກັບຕ່າງປະເທດ ໄດ້ປະ ຕິບັດຕາມແນວທາງການຕ່າງ ປະເທດຂອງພັກ ໃນການເພີ່ມທະວີການພົວພັນຮ່ວມມືກັບບັນ ດາປະເທດເພື່ອນມິດຍຸດທະສາດ ເພື່ອຮັດແໜ້ນຄວາມສາມັກຄີ ແລະ ແລກປ່ຽນບົດຮຽນ, ປະສົບການຢ່າງເປັນປົກກະຕິ ແລະ ຕໍ່ເນື່ອງ.
ຈາກຜົນງານທີ່ກ່າວມານັ້ນ, ກົມກອງຍັງໄດ້ຮັບການຍ້ອງຍໍປະເພດຕ່າງໆ ດັ່ງນີ້: ໃນນັ້ນໄດ້ ຮັບຫຼຽນໄຊພິລະອາດຫານ ຊັ້ນ II ມີ 2 ສະຫາຍ, ຫຼຽນໄຊພິລະອາດຫານຊັ້ນ III ປະເພດກົມກອງລວມໝູ່ 17 ກົມກອງ, ບຸກຄົນ 190 ສະຫາຍ, ໃບຍ້ອງຍໍກະຊວງປ້ອງກັນປະເທດ ປະເພດກົມກອງລວມໝູ່ຈຳນວນ 13 ກົມກອງ, ບຸກຄົນ 1.110 ສະຫາຍ, ໃບຍ້ອງຍໍກົມໃຫຍ່ການເມືອງກອງທັບ ມີ 681 ສະຫາຍ ຢ່າງໜ້າຊົມເຊີຍ.
ໂດຍ: ທະນັນເສນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
