POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນພະຫັດ, ວັນທີ 13 ພະຈິກ 2025

ໜ້າທີ່ ແລະ ນະໂຍບາຍຕ່າງໆ ຕໍ່ຄູອາສາທີ່ຈະເຂົ້າເປັນລັດຖະກອນປ້ອງກັນຊາດ
ເວລາອອກຂ່າວ: 2025-10-15 10:34:20 | ຜູ້ຂຽນ : admin2 | ຈຳນວນຄົນເຂົ້າຊົມ: 784 | ຄວາມນິຍົມ:

ພາຍຫຼັງທີ່ລັດຖະບານໄດ້ອອກມະຕິ ເລກທີ 09/ລບ ວ່າດ້ວຍການແກ້ບັນຫາຂາດແຄນຄູສອນ ເຊິ່ງໄດ້ມອບໃຫ້ກະຊວງປ້ອງກັນປະເທດ ແລະ ກະຊວງສຶກສາທິການ ແລະ ກິລາ ຮ່ວມກັນເປັນເຈົ້າການໃນການແກ້ໄຂບັນຫາການຂາດແຄນຄູສອນຢູ່ເຂດຫ່າງໄກສອກຫຼີກ ແລະ ການປະລະການຮຽນຂອງນັກຮຽນ ໂດຍຫັນເອົາຄູອາສາທີ່ລໍຖ້າໂຄຕ້າ ເຂົ້າມາເປັນລັດຖະກອນປ້ອງກັນຊາດ (ທະຫານ)ຈຳນວນ 2.000 ຄົນ ແລະ ຫັນເອົາພະນັກງານ-ນັກຮົບ ໄປເຝິກອົບຮົບວິຊາຄູຊັ້ນປະຖົມສຶກສາ ແລ້ວໄປຊ່ວຍສອນຢູ່ເຂດຫ່າງໄກສອກຫຼີກ ໂດຍສະເພາະແມ່ນເຂດທຸລະກັນດານ. ຕໍ່ບັນຫານີ້, ຫຼາຍຄົນຍັງບໍ່ທັນເຂົ້າໃຈ ແລະ ສັບສົນຕໍ່ວຽກງານດັ່ງກ່າວ ບາງຄົນກໍມີທັດສະນະດ້ານລົບ, ບາງຄົນຢາກຮູ້ກ່ຽວກັບຂັ້ນຕອນ, ໜ້າທີ່ ແລະ ນະໂຍບາຍຕ່າງໆ ຕໍ່ຄູອາສາຜູ້ທີ່ຈະເຂົ້າເປັນທະຫານ ແລະ ທະຫານຜູ້ທີ່ຈະໄປເປັນຄູ. ສະຫາຍ ພັນເອກ ປອ ສອນໄຊ ຈັນຍາລາດ ຫົວໜ້າກົມພະນັກງານ ກົມໃຫຍ່ການເມືອງກອງທັບ ໃຫ້ສຳພາດຕໍ່ນັກຂ່າວໜັງສືພິມກອງທັບວ່າ: ສໍາລັບໜ້າທີ່ ຄູອາສາສະໝັກ ທີ່ໄດ້ຮັບການບັນຈຸເຂົ້າເປັນລັດຖະກອນປ້ອງກັນຊາດ ຈະໄດ້ປະຕິບັດ 2 ໜ້າທີ່ຄື: 1. ສິດສອນຊັ້ນປະຖົມຕາມການມອບໝາຍ ຂອງໂຮງຮຽນແຫ່ງນັ້ນໆ; 2. ມີໜ້າທີ່ໃນການກໍ່ສ້າງຮາກຖານໃນເຂດຕົນເອງສັງກັດ ແລະ ດໍາເນີນຊີວິດຢູ່ໃນໂຮງຮຽນທີ່ຕົນສັງກັດ, ພ້ອມທັງມີການປະເມີນຕີລາຄາການປະຕິບັດໜ້າທີ່, ການສິດສອນ ເປັນແຕ່ລະໄລຍະ, ສ່ວນການຮັບນະໂຍບາຍເງິນເດືອນ ແມ່ນສາມາດຮັບໄດ້ຢູ່ກອງບັນຊາການທະຫານເມືອງ ຫຼື ກອງກໍ່ສ້າງຮາກຖານການເມືອງ ໃນເຂດທີ່ຕົນສັງກັດ. ສ່ວນການປະຕິບັດນະໂຍບາຍ ໃຫ້ແກ່ຄູອາສາສະໝັກ ທີ່ໄດ້ຮັບການບັນຈຸເຂົ້າເປັນລັດຖະກອນປ້ອງກັນຊາດ ແມ່ນກອງບັນຊາການທະຫານເມືອງ ຫຼື ກອງກໍ່ສ້າງຮາກຖານການເມືອງ ໃນເຂດທີ່ຕົນສັງກັດ ເປັນຜູ້ຄິດໄລ່ເງິນເດືອນ ແລະ ເງິນນະໂຍບາຍ ເຊິ່ງມີລາຍລະອຽດດັ່ງນີ້: 1. ນະໂຍບາຍອາຊີບຄູ: ໄດ້ຮັບເງິນອຸດໜູນວິຊາຊີບຄູ; ໄດ້ຮັບເງິນນະໂຍບາຍການສອນຫ້ອງຄວບ; ໄດ້ຮັບເງິນນະໂຍບາຍສອນໃນເຂດຫ່າງໄກສອກຫຼີກ ແລະ ທຸລະກັນດານ; ໄດ້ຮັບການເລື່ອນຊັ້ນ ຕຳແໜ່ງບໍລິຫານ, ວິຊາການຄູ ແລະ ເງິນອຸດໜູນ ຕາມລະບຽບການ ແລະ ກົດໝາຍ ກໍານົດໄວ້;ໄດ້ຮັບການເຝິກອົບຮົມ ແລະ ຍົກລະດັບ ວິຊາຊີບຄູ. 2. ນະໂຍບາຍໃນການປະຕິບັດໜ້າທີ່ເປັນທະຫານ: ໄດ້ຮັບການປະດັບທຽບຊັ້ນຕາມວຸດທິການສຶກສາ; ໄດ້ຮັບນະໂຍບາຍເງິນເດືອນ; ໄດ້ຮັບການເລື່ອນຊັ້ນ; ໄດ້ຮັບຊຸດເຄື່ອງແບບທະຫານ; ການເຝິກອົບຮົມທາງການທະຫານ; ໄດ້ຮັບນະໂຍບາຍອື່ນໆ ເຊັ່ນ: ເຄື່ອງອຸປະໂພກ, ບໍລິໂພກ ຕາມອັດຕາ, ຕາມລະບຽບການ ແລະ ກົດໝາຍ ວ່າດ້ວຍ ນາຍທະຫານ ກອງທັບປະຊາຊົນລາວ. ສຳລັບ ນາຍ ແລະ ພົນທະຫານ ທີ່ຈະໄປຊ່ວຍສອນ ຕ້ອງໄດ້ຜ່ານການເຝິກອົບຮົມ ວິຊາຄູຊັ້ນປະຖົມສຶກສາກ່ອນ, ຜູ້ທີ່ຖືກສັບຊ້ອນໄປເຮັດໜ້າທີ່ນັ້ນ ຈະໄດ້ຮັບເງິນເພີ່ມຕື່ມ 70% ຂອງເງິນເດືອນພື້ນຖານ (ຕາມຊັ້ນ) ແລະ ຍັງຈະເປັນອີກໜຶ່ງເງື່ອນໄຂໃນການສະເໜີເລື່ອນຊັ້ນ, ເລື່ອນທຽບຊັ້ນ ສັງລວມໄດ້ວ່າ ການທີ່ເອົາທະຫານໄປຊ່ວຍສອນນີ້ ເປັນແກ້ໄຂບັນຫາແບບສະເພາະໜ້າ ໄປຊ່ວຍສອນໃນເວລາຈຳເປັນ ກໍຄືເວລາທີ່ຄູທີ່ສອນເປັນປະຈຳບໍ່ສະບາຍ ຫຼື ມີວຽກຄອບຄົວຕ່າງໆ. ສ່ວນໄລຍະຍາວ ລັດຖະບານໄດ້ປຸກລະດົມໃຫ້ທຶນຮຽນແບບມີເບ້ຍລ້ຽງໃຫ້ແກ່ນັກຮຽນຜູ້ທີ່ຈະໄປຮຽນວິຊາຄູ ຢູ່ຕາມວິທະຍາໄລຄູຕ່າງໆ ໃນຂອບເຂດທົ່ວປະເທດ ແລະ ພາຍຫຼັງຮຽນຈົບ ແມ່ນຈະຖືກສັບຊ້ອນໄປສອນຕາມໂຄຕ້າ. ໂດຍ: ຈິດ ເພັດພູທອງ

news to day and hot news