POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນຈັນ, ວັນທີ 11 ພຶດສະພາ 2026

ເນື່ອງໃນໂອກາດລະນຶກ ວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 80 ປີ (21 ມີນາ1946 -21 ມີນາ 2026)
ເວລາອອກຂ່າວ: 2026-03-19 09:29:31 | ຜູ້ຂຽນ : admin3 | ຈຳນວນຄົນເຂົ້າຊົມ: 1552 | ຄວາມນິຍົມ:

ເຫດການໃນວັນທີ 21 ມີນາ 1946 ເຖິງວ່າຈະຜ່ານພົ້ນໄປໄດ້ຫຼາຍສິບປີແລ້ວກໍຕາມ, ແຕ່ເຫດການສະເທືອນຂວັນທີ່ພວກຮຸກຮານກໍ່ຂຶ້ນນັ້ນຍັງສະຖິດແໜ້ນໃນຄວາມຊົງຈຳຂອງປະຊາຊົນລາວທັງຊາດເວົ້າລວມ, ເວົ້າສະເພາະແມ່ນຊາວເມືອງທ່າແຂກຜູ້ຕົກເປັນເຫຍື່ອຂອງຄວາມໂຫດຮ້າຍປ່າເຖື່ອນຢ່າງບໍ່ມີວັນຈະ ຫຼົງລືມໄດ້. ພາຍຫຼັງທີ່ພວກລ່າເມືອງຂຶ້ນຝະລັ່ງກັບຄືນມາປຸ້ນສະດົມເອກະລາດຂອງລາວເປັນຄັ້ງທີສອງ, ໂດຍປະຕິບັດຍຸດທະສາດກວມລວມຂອງພວກເຂົາທີ່ວ່າ: ”ຍົກກຳລັງບຸກຕີເອົາເມືອງທ່າແຂກໃຫ້ໄດ້”, ໃນວັນທີ 15 ມີນາ 1946 ພວກເຂົາໄດ້ໃຊ້ກຳລັງບຸກຕີເຂົ້າທັງ 3 ທິດພ້ອມກັນເຊິ່ງໄດ້ຮັບການຄຸ້ມກັນຢ່າງຂະໜານໃຫຍຈາກຍົນຖິ້ມລະເບີດ “ສະປິດຟາຍ’’ ຂອງອັງກິດ ແລະ ຍົນ “ໂກໂບຣາ’’ ຂອງຝັ່ຣງພ້ອມດ້ວຍກຳລັງປືນໃຫຍ່ໜ້າດິນ, ລົດຫຸ້ມເກາະສົມທົບກັບກຳລັງທະຫານຮາບທີ່ມີພັນທະມິດຫຼາຍປະເທດເຂົ້າຮ່ວມເປັນຈຳນວນຫຼວງຫຼາຍ. ພວກເຂົາໄດ້ຖະຫຼົ່ມເມືອງທ່າແຂກຢ່າງດຸເດືອດເພື່ອຫວັງດັບມອດກຳລັງປະກອບອາວຸດຂອງປະຊາຊົນລາວ ທີ່ຍັງອ່ອນນ້ອຍໃນຕົວເມືອງທ່າແຂກໃຫ້ສະຫຼາຍຕົວໄປພ້ອມກັບການຍຶດຄອງຕົວເມືອງດັ່່່ງກ່າວ. ໂດຍຍຶດໝັ້ນໃນອຸດົມການເພື່ອຄວາມເປັນເອກະລາດແຫ່ງຊາດ, ກຳລັງປະກອບອາວຸດປະຊາຊົນລາວອັນມີປະທານ ສຸພາ ນຸວົງ, ທ່ານ ສິງກະໂປ ສີໂຄດຈຸນລະມາລີ ເປັນຜູ້ບັນຊາໄດ້ອົງອາດກ້າຫານບັນຊານັກຮົບຕໍ່ສູ້ສົມທົບກັບການປຸກລະດົມກຳລັງຊາວໜຸ່ມ ແລະ ຊັ້ນຄົນຕ່າງໆໃນຕົວເມືອງທ່າແຂກຕ້ານຄືນຢ່າງອົງອາດກ້າແກ່ນ. ເຖິງວ່າກຳລັງປະກອບອາວຸດເຮົາຈະອ່ອນນ້ອຍ ແຕ່ກໍອາໄສມູນເຊື້ອຄວາມຮັກຊາດ, ຮັກເອກະລາດເປັນເດີມພັນ. ພາຍໃນຕົວເມືອງທ່າແຂກໄດ້ມີການກະກຽມຮັບມືກັບພວກຮຸກຮານດ້ວຍການຂຸດຂຸມຄອງສູ້ຮົບເຖິງ 3 ຊັ້ນ. ເຮັດໃຫ້ການສູ້ຮົບລະຫວ່າງກຳລັງປະກອບອາວຸດເຮົາກັບສັດຕູແກ່ຍາວໄປເປັນເວລາ 6 ວັນຄືນ. ໃນບັ້ນຮົບນີ້ ພະນັກງານ-ນັກຮົບ ແລະ ປະຊາຊົນຊາວເມືອງທ່າແຂກຫຼາຍຄົນໄດ້ເອົາເລືອດທາແຜ່ນດິນເພື່ອແລກເອົາຄວາມມີອິດສະຫຼະພາບ. ໂດຍອີງອາໄສປະຊາຊົນເປັນກຳລັງແຮງໃນການລຳລຽງຂົນສົ່ງ ແລະ ຊາວໜຸ່ມກໍສະໝັກອອກເປັນທະຫານເພື່ອຕໍ່ສູ້ປົກປ້ອງຜືນແຜ່ນດິນ ແມ່ໂດຍບໍ່ຢ້ານກົວຕໍ່ການເສຍສະຫຼະໃດໆ. ການສູ້ຮົບແກ່ຍາວຮອດມື້ທີ 7 ສະພາບການໃນໜ້າສະໜາມຮົບຮ້ອນແຮງຂຶ້ນ, ສັດຕູໄດ້ສຸມທຸກກຳລັງພາຫະນະ ແລະ ກຳລັງພົນບຸກຕີເຂົ້າທຸກທິດ ແລະ ຫຍັບເຂົ້າມໍ່ໆຕົວເມືອງຊັກໄຊ້, ກົງກັນຂ້າມກັບກຳລັງປະກອບອາວຸດເຮົາຜ່ານການສູ້ຮົບຕະຫຼອດ 6 ວັນຄືນນັ້ນ, ໄດ້ເຮັດໃຫ້ພະນັກງານ-ນັກຮົບອິດອ່ອນໂຮຍແຮງ, ສົມທົບກັບການປະກອບພາຫະນະສູ້ຮົບບໍ່ພຽງພໍ, ເພື່ອຮັກສາກຳລັງ ທ່ານ ສິງກະໂປ ສີໂຄດຈຸນລະມາລີ ໄດ້ສັ່ງໃຫ້ກຳລັງອອກຈາກຂຸມຄອງຊັ້ນທີ 3 ເຂົ້າໄປຢູ່ຊັ້ນທີ 2ເພື່ອສູ້ຮົົບປ້ອງກັນຕົວເມືອງ ແລະ ປົກປ້ອງກຳລັງຂອງຕົນຖອຍອອກສູ່ເຂດປອດໄພ. ເວລານີ້ຍິ່ງກ່ວາເວລາໃດໝົດ, ອາວຸດທີ່ມີໃນກຳມືໄດ້ສຸມ ກຳລັງໄຟໃສ່ສັດຕູເຊິ່ງໃນນັ້ນ ກໍມີປືນ 75 ມມ ສອງກະບອກແຕ່ຊ້ຳພັດບໍ່ມີກ້ອງສ່ອງ ແລະ ແປ້ນຢັນ, ສະນັ້ນ ຍິງແຕ່ລະເທື່ອເຈົ້າຂອງປືນຕ້ອງໄດ້ແກ່ເອົາຄືນມາດ້ວຍຄວາມລຳບາກ, ແຕ່ການສູ້ຮົບກໍຍັງສືບຕໍ່ດ້ວຍຄວາມອົງອາດກ້າຫານ. ສະໜາມຮົບປົກປ້ອງເມືອງທ່າແຂກຜ່ານໄປເປັນເວລາ 7 ວັນຄືນ, ແຕ່ສຽງປືນຍັງດັງກ້ອງຢູ່ກາງສະໜາມຮົບ, ໃນທີ່ສຸດມັນກໍເຫຼືອວິໄສເມື່ອເຫຼັກຫຼາຍກ່ວາຖ່ານ, ກຳລັງປະກອບອາວຸດຂອງພວກເຮົາຈຳຕ້ອງຖອຍອອກໄປສູ່ເຂດປອດໄພ ໂດຍສະເພາະແມ່ນຫັນທິດຈາກການຕໍ່ສູ້ປົກປ້ອງຕົວເມືອງມາເປັນການຕໍ່ສູ້ເພື່ອປ້ອງກັນຄວາມປອດໄພໃຫ້ແກ່ປະທານສຸພານຸວົງໄດ້ຖອຍຂ້າມແມ່ນ້ຳຂອງໄປສູ່ຝັ່ງຂວາຂອງແມ່ນ້ຳຂອງຫຼາຍກວ່າ,ເຮັດໃຫ້ຕົວເມືອງທ່າແຂກຕົກເຂົ້າໃນກຳມືຂອງຈັກກະພັດລ່າເມືອງຂຶ້ນຝຣັ່ງໃນວັນທີ 21 ມີນາ 1946 ດ້ວຍຄວາມລະທົມຂົມຂື່ນ, ພວກລ່າເມືອງຂຶ້ນໄດ້ກາຍເປັນມືຄາດຕະກອນທີ່ຫ້ຽມໂຫດ, ເຂັ່ນຂ້າປະຊາຊົນຢ່າງປ່າເຖື່ອນ, ຈັບເອົາຜູ້ເຖົ້າຜູ້ແກ່, ແມ່ມານໄປຍິງເປົ້າເທື່ອລະນັດແຕ່ຕີນເຖິງຫົວ, ຜູ້ສາວກໍເອົາໄປຂົ່ມຂືນທຳສຳເລົາແລ້ວກໍຂ້າຖິ້ມ, ເດັກນ້ອຍບາງຄົນກໍເອົາໃສ່ຄົກມອງຕຳ, ບາງຄົນກໍຖືກຍັດໃສ່ກະເປົາຖິ້ມລົງແມ່ນ້ຳຂອງ. ຕົວເມືອງທ່າແຂກໃນເວລານັ້ນໄດ້ກາຍເປັນແດນປະຫານທີ່ໜ້າສະຫຍອງຂວັນ, ສາຍນ້ຳຂອງຍ່ານເມືອງທ່າແຂກໄດ້ກາຍເປັນສີແດງດ້ວຍເລືອດ. ພວກຝຣັ່ງໄດ້ກາຍເປັນຄາດຕະກອນທີ່ປຸ້ນເອົາຊີວິດຂອງຊາວເມືອງທ່າແຂກເຊິ່ງລວມທັງຊາວຫວຽດນາມຕ່າງດ້າວເຖິງ 3 ໝື່ນກ່ວາຄົນ. ຢາດເລືອດທີ່ ພະນັກງານ-ນັກຮົບ ແລະ ປະຊາຊົນຊາວເມືອງທ່າແຂກຫຼັ່ງຍ້ອມປິຕຸພູມໃນວັນນັ້ນໄດ້ກາຍເປັນສັນຍາລັກແຫ່ງນ້ຳໃຈຮັກຊາດ, ຮັກຄວາມເປັນເອກະລາດ, ພ້ອມກັນນັ້ນ ກໍເປັນສັນຍາລັກແຫ່ງໂທດກຳອັນປ່າເຖື່ອນຂອງພວກຈັກກະພັດລ່າເມືອງຂຶ້ນຝຣັ່ງທີ່ກະທຳຕໍ່ຄົົນລາວຜູ້ບໍ່ມີຄວາມຜິດຫຍັງເຖິງວ່າວັນເວລາຈະລ່ວງເລີຍໄປຫຼາຍສິບປີ, ແຕ່ກໍຍັງຝັງເລິກໃນດວງໃຈຂອງປະຊາຊົນລາວ, ໂດຍສະເພາະແມ່ນປະຊາຊົນຊາວເມືອງທ່າແຂກຢ່າງບໍ່ມີວັນຈະຫຼົງລືມໄດ້. ໂດຍ: ໂຊເລ້ ບຸນເຮືອງ

news to day and hot news